Kōmeļeļe ko jān Christ and the Rich Young Ruler, jān Heinrich Hofmann

Juļae 21–27: Ijo “Eļap Kar Leļo̧k Eļap Aikuji”

Katak im Bujen Ko 81–83

Ilo M̧aaj in 1832 eo, Irooj ekar kūr Jesse Gause n̄an erom juon rikakpilōklōk n̄an Josep Smith ilo Būreejtōnji eo an Priesthood eo Eutiej (kiiō ņa etan Būreejtōnji eo Kein Kajuon). Katak im Bujen Ko 81 ej juon revelesōn n̄an Brother Gause kōn kūr eo an ekāāl. Bōtaab Jesse Gause eaar jab jerbal ilo tiljek, innām kar kūr Frederick G. Williams n̄an bōk jikin. Etan Brother William ekar bōk jikin Brother Gause ilo revelesōn in.

Menin emaron̄ juon kōmeļeļe edik, bōtaab ej kalikkar juon m̧ool eaorōk: eitōn aolep revelesōn ko ilo Katak im Bujen Ko rej iookļo̧k armej, ak aolep iien jemaron̄ kappukot wāween ko n̄an kōjerbali ilo mour ko ad make (lale 1 Nipai 19:23). N̄e jej riiti kapilōk eo an Irooj n̄an Frederick G. Williams bwe en “kōkajoor bukwe ko rem̧ōjņo̧,” jej maron̄ ļōmņak kōn armej ro jej maron̄ kōkajoorļo̧k er (Katak im Bujen Ko 81:5). N̄e jej riiti kūr eo an Irooj n̄an ro uwaan United Firm n̄an “lukwōj kom̧ kōn bujen in,” jemaron̄ kōļmenļo̧kjeņ kōn bujen ko ad make. Im jej maron̄ riiti kallim̧ur eo An, “N̄a … I lokjak n̄e kom̧ij kōm̧m̧ane ta Ij ba,” ainwōt n̄e E ej kōnono n̄an kōj (Katak im Bujen Ko 82:10, 15). Jej maron̄ kōm̧m̧ane mennin kōnke, āinwōt an Irooj kar kean̄ “ta eo Ij ba n̄an juon Ij ba n̄an aolep” (eoon 5).

Lale “Newel K. Whitney and the United Firm,” “Jesse Gause: Counselor to the Prophet,” ilo Revelations in Context, 142–47, 155–57.

Ļōmnak ko n̄an Ekkatak ilo M̧weeo im ilo Kabun̄ in

Katak im Bujen Ko 81:4–5; 82:18–19

“Kwo naaj kōm̧m̧an eļap em̧m̧an n̄an armej ro am.”

Ilo jejjo naan ko ilo Katak im Bujen Ko 81–83, Irooj ej kipel kōj n̄an jipan̄ armij ro rej aikuj ipeļaakid. Ļōmņak in kakōļļeik naan kein ilo am̧ loi. Juon iaan waanjon̄ak ko eļap kōmeļeļeik epād ilo Katak im Bujen Ko 81:4–5. Erkein rej jet kajjitōk ko n̄an jipan̄ eok lin̄uri eoon kein:

• Ta jet wāween ko juon armij emaron̄ “m̧ōjņo̧”? Ta meļeļein menin n̄an “rie” er? N̄āāt eo jerbal in jipan̄ ĀinwōtKraist an ro jet ekar jipan̄ ke iaar en̄jake m̧ōjņo̧?

• Ta eo emaron̄ kōm̧m̧an bwe pā ko pein juon ren ilo kōnono kake “rej allitoto”? Ekōjkan ad maron̄ “kotak lōn̄ļo̧k” pā ko?

• Ta meļeļein “bukwe ko rem̧ōjņo̧”? Elmen kar kōkajoorļo̧k er?

Elmen an Rilo̧mo̧o̧r kōm̧m̧ani men kein n̄an kwe?

Bōlen ekkatak kōn eoon kein kar bōktok n̄an ļōmņak eo am̧ kōn juon eo kwomaron̄ kar “rie,” “kotak lōn̄ļo̧k,” ak “kōkajoor.” Ta eo kwonaaj kōm̧m̧ane n̄an jerbal in karejar n̄an armej eo?

Ta ko jet kwoj bar ekkatak kōn jerbal in jipan̄ n̄an ro jet ilo Katak im Bujen Ko 82:18–19? Kwomaron̄ barāinwōt kōjo̧ pijaan alooj eo “Teachings of Thomas S. Monson: Rescuing Those in Need” (Gospel Library). Ekōjkan an ro uwaan ward eo an Bisop Monson waanjon̄oke ta ko eoon kein rej katakin?

Teachings of Thomas S. Monson: Rescuing Those in Need

Bar lale Jekab 2:17–19; Mosaia 18:8–9; “Works of God” (pija), ChurchofJesusChrist.org.

Works of God

Carl Heinrich Bloch (1834–1890), Christ Healing the Sick at Bethesda, 1883, oil on canvas, 100 ¾ x 125 ½ inches. Brigham Young University Museum of Art, kar wiaiki jān jāān ko letok in Jack R. im Mary Lois Wheatley, 2001.

Katak im Bujen Ko 82:3

Rilo̧mo̧o̧r ej letok n̄an eō eļap im kōtmān eļap jān eō.

Riiti eoon in emaron̄ kōm̧akūt eok n̄an etale ta eo Anij ekar lewaj n̄an eok—ilo kōjeraam̧m̧an ko an kaniek im jetōb jimo̧r. Likūt mennin ilo kōļmenļo̧kjen eo am̧ ilo am̧ riiti jekjōn 82. Ta eo kwoj en̄jake ke Anij ej kōtmane jān eok?

Bar lale “Because I Have Been Given Much,” Hymns, no. 219.

Katak im Bujen Ko 82:8–10

Kien ko rej kam̧ool kōn iakwe eo an Anij n̄an kōj.

N̄e kwe ak juon eo kwojeļa kajeen ej ļōmņak etke Irooj ej letok elōn̄ kien ko, Katak im Bujen Ko 82:8–10 emaron̄ jipan̄. Ta kōļmenļo̧kjeņ ko ilo eoon kein remaron̄ jipan̄ eok kōmeļeļeik n̄an juon etke kwoj kāālet n̄an ļoor kien ko an Irooj? Ta eo kwomaron̄ keidi n̄an kien ko me emaron̄ jipan̄? Kwomaron̄ bar lo ļōmņak ko jet ilo Katak im Bujen Ko 1:37–38; 130:20–21 im pijaan alooj eo “Blessed and Happy Are Those Who Keep the Commandments of God” (Gospel Library). Ta en̄jake ko raar katakin eok n̄an kalimjōk kien ko āinwōt kōjeraam̧m̧an?

Blessed and Happy Are Those Who Keep the Commandments of God

Ļōmņak kōn jet iaan kien ko Irooj eaar lewaj n̄an eok. Ta ko kien kein raar katakin eok kōn E im Ankilaan? (lale eoon 8). Ilo wāween rōt eaar jelet mour eo am̧ ilo am̧ kōjparok kien kein?

Ta eo kwoj ekkatak kōn Irooj jān eoon 10? Koļak lale ta meļeļein n̄e Irooj ej “lokjak”? (bar lale eoon 15).

Ekōjkan an Irooj kōjpārok kallim̧ur ko an ilo mour eo am̧? Ta eo kwomaron̄ ba n̄an juon eo ejjab en̄jake ikdeelel n̄an kōjparok kien kōnke rejjan̄in lo kōjeraam̧m̧an ko raar kōjatdikdik kaki? Kwoj ke loe jet ļōm̧ņak ko ilo enaan eo an Elder D. Todd Christofferson “Jemdo̧o̧n eo Ad ippān Anij”? (Liaona, Māe 2021, 78–80).

Bar lale Topics and Questions, “Commandments,” Gospel Library.

Katak im Bujen Ko 82:10

Irooj ej kōjeraam̧m̧an kōj ilo wāween ko An make rekabwilōn̄lōn̄.

Sister Virginia H. Pearce, kar juon membōr eo m̧okta ilo Būreejtōnji eo Eutiej an Jiron̄ ro, ekar ba kōn juon kōrā eo ekar inepata kōn an ajri ro nejin kōm̧m̧ani kāālet ko rebōd. Ilo turin ikumkum, liin eaar kajjieo̧n̄e aolep men ekar ļōm̧ņak n̄an kappukot kōjeraam̧m̧an eo an Irooj ikijeer. Kakobaba in jar, liin eaar kōm̧m̧an an kōttōpar n̄an kōļapļo̧k iien ko an ilo tampeļ im kar en̄jake ke Irooj enaaj kautiej en̄taan ilo an ukōt buruōn ajri ro nejin. Kōrā eo ekar kwaļo̧k:

“Ālkin jon̄oul iiō in ikutkut pād ilo tampeļ im ikutkut in jar, iburomōj in ba bwe kālet eo an ajri ro nejū rekar jab oktak. …

“Ak ikar oktak. N̄a ij juon kōrā oktak.… Būruō emera. Ij obrak kōn tūriam̧o̧. Imaron̄ kōm̧m̧an eļapļo̧k im iaanjo jān mijak, ikumkum, bōd, ņa ruō, im en̄taan. Em̧ōj aō leļo̧k aolep iien ko aō im ij pedped wōt ioon Irooj. Im ekutkut aō en̄jake kajoor an Irooj. E ej jilkintok an tūriam̧o̧, enaan ko redik me rej kwaļo̧k an iakwe eō im ajri ro neju. Kōtmene ko aō em̧ōj aer oktak. Ijjeļo̧kin kōtmene bwe ajri ro ren oktak, ij kōtmene an ekutkut tūriam̧o an Irooj im ij obrak kōn kam̧m̧oolol kōn er. …

“Jar ko aō raar oktak. Ij kwaļo̧k eļapļo̧k iakwe im eļapļo̧k kam̧m̧oolol. … Irooj ej jerbal ilo wāween ko rekwabilōn̄lōn̄, im ikar lukkuun obrak kōn aenōm̧m̧an eo ej eļļā jān jeļā otemjej” (ilo “Prayer: A Small and Simple Thing,” At the Pulpit [2017], 288–89).

Katak im Bujen Ko 83

“Kōrā ro emej pāleer im ajri ro ejeļo̧k jineer im jemeer naaj (kabwe aer aikuj?)kake n̄an er.”

Ilo Eprōl in 1832 eo, āinwōt kar katakin jān Irooj, Josep Smith ekar ilo̧k iturinļo̧k 800 m̧aiļ ko n̄an loļo̧k Armej ro Rekwojarjar me raar ain doon ilo Missouri (laleKatak im Bujen Ko 78:9). Ke eaar pād ijo, eaar loļo̧k jukjuk in pād eo ijo elōn̄ kōrā ro emej palear rej kajiririk ajri ro nejier make. Ibwilijier raar Phebe Peck im Anna Rogers, ro Rikanaan eo ekar jeļā kajjier. Ilo Missouri ilo 1830 ko, kien ko an state kar leļo̧k n̄an kōrā ro emej pāleer jon̄an jim̧we ko aer ioon men ko m̧weie ļeo pāleer emej. Ta eo kwoj ekkatak jān jekjōn 83 kōn ekōjkan an Irooj en̄jake kōn kōrā ro emej pāleer im ajri ro ejeļo̧k jineer im jemeer? Kwojeļā ke kōn juon eo ilo jekjek in me enaaj jeraam̧m̧an jān iakwe im kōjparok eo am̧? Ta jet wāween ko komaron̄ kwaļo̧k ta eo ewōr ippam ippān kōrā ro emej paleer, ro emej jineer im jemaer, kōrā remake iaer, im ro jet repad ilo aikuj?

Lale barāinwōt Aiseia1:17; Jemes 1:27

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Katak im Bujen Ko 81:3

Imaron̄ jar n̄an Anij “ilo ainikien im ilo [būruō].”

• Ilo am̧ riiti Katak im Bujen Ko 81:3 ippān ajri ro nejūm̧, jipan̄ er ļōmņak kōn oktak ko ilo “lo̧bwilej” im “kapijuknen” ijoko remaron̄ jar ie. Kwomaron̄ bar ron̄jake ak al ippāer juon al kōn jar, āinwōt “Secret Prayer” (Hymns, no. 144). Kwaļo̧k n̄an doon juon men jān al eo me ej katakin juon m̧ool eaorōk kōn jar. Kwomaron̄ bar kōnaan ippāer kōn kōnono n̄an Jemedwōj Ilan̄ ilo kautiej.

• N̄an kōketak ajri ro nejūm̧ bwe ren jar ilo būruer, kwomaron̄ leļo̧k n̄an er pepa en jekjek in menono im kajjitōk ippāer bwe ren jin̄a ak je juon men me rekōn̄aan jar kake n̄an Jemedwōj Ilan̄. Kam̧ool bwe Jemedwōj Ilan̄ ejeļā ta ko kwoj ļōeņake im en̄jaki im E maron̄ eoron̄ jar ko ad jekdo̧o̧n n̄e jejjab kwaļo̧ki ilo eļļaaj. Kwomaron̄ kwaļo̧k n̄an er juon en̄jake ke kwaar jar ilo būruōm̧ im Jemedwōj Ilan̄ eaar eoron̄ eok.

Katak im Bujen Ko 81:5

Jisōs Kraist ekōņaan bwe in jipan̄ ro rej pād ilo aikuj.

• Ippān ajri ro nejūm̧, jin̄a pijaan pā im bukwe ko, im kajjitōk ippān ajri ro nejūm̧ n̄an kappukot m̧ōttan ānbwin kein ilo Katak im Bujen Ko 81:5. Ta eo Irooj ej kajjitōk ippād n̄an kōm̧m̧ane ilo eoon kein? Kwomaron̄ bar kwaļo̧k n̄an doon jet wāween ko me armej raar kōkajoorļo̧k eok ke kwaar “m̧ōjņo̧.” Pijaan alooj eo “Pass It On”(ChurchofJesusChrist.org) emaron̄ leļo̧k n̄an ajri ro ļōm̧ņak kōn wāween remaron̄ jerbal n̄an ro jet. Kwomaron̄ al juon al kōn jerbal in jipan̄, āinwōt “Have I Done Any Good?” (Hymns, no. 223). Ļōmņak in jipan̄ ajri ro nejūm̧ kōm̧m̧ane juon karōk n̄an jipan̄ juon armej eo ej pād ilo aikuj wiik in.

  Pass It On

• Kwomaron̄ kōjerbal pija ak pijaan alooj kein me rej kwaļo̧k kōn bwebwenato in an Jisōs Kraist jerbal n̄an ro jet (lale pija ko ilo elmakot in; Bok in Gospel Pija, nos. 41, 42, 46, 47, 55; ak juon iaan Bible Videos ilo Gospel Library). Ekōjkan ad maron̄ ļoor waanjon̄ak eo an Rilo̧mo̧o̧r n̄an jipan̄ ro jet?

  

Jemaron̄ jibadōkļo̧k armej ro rej pād ilo aikuj āinwōt kar Rilo̧mo̧o̧r.

Jipan̄ ajri ro nejūm̧ bōk im̧we ko aer make. Katakin meļeļein kwaļo̧k m̧ool eo—meļeļein jipan̄ armej ro jet erom̧ rikatak ro ippāer make. Ijelo̧kin jiron̄ wōt ajri ro nejūm̧ ekōjkan aer maron̄ jerbal n̄an ro jet, n̄an waanjon̄ak, kōketak er n̄an kappukot tōl an Irooj n̄an jeļā wōn ro remaron̄ jipan̄.

Katak im Bujen Ko 82:10

Jemedwōj Ilan̄ ej kallim̧ur kōjeraam̧m̧an ko ilo aō kajjieon̄ pokake E.

• Kwe im ajri ro nejūm̧ maron̄ etale Katak im Bujen Ko 82:8–10 n̄an uwaake kajjitōk in “Etke Jemedwōj Ilan̄ ej letok n̄an kōj kakien?” Kwomaron̄ kōnaan jipan̄ ajri ro ļōmņak kōn waanjon̄ak in kakien ko An (lale, n̄an waanjon̄ak, Exodus 20:4–17; Matu 22:37–39; Katak im Bujen Ko 89:5–17). Emaron̄ jipan̄ n̄e kwe im ajri ro nejūm̧ komij lale ak jin̄aik pija ko n̄an bōk jikin jet iaer. Ekōjkan an kakien ko an Jemedwōj Ilan̄ kwaļo̧k iakwe eo An n̄an kōj?

• Bōlen juon ikkure emaron̄ jipan̄ ajri ro nejūm̧ kalimjōk kakien ko an Anij āinwōt kōjeraam̧m̧an, ejjab eddo. Juon armej emaron̄ leļo̧k enaan ko n̄an jipan̄ bar juon armej, eo kar kapinjak mejen, n̄an kōm̧m̧ane juon men āinwōt jāānwūj, ak jin̄aik juon pija. Ļōmņak kōn juon men eo ekam̧ōņōņō im elōn̄ kilen kōm̧m̧ane! Innām ekōnono kōn ekōjkan an kakien ko an Anij āinwōt katak kein ilo ikkure in.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.

Pija eo an Jisōs kemour juon em̧m̧aan, jān Dan Burr