Jemdo̧o̧n eo Ad ippān Anij
Jekdo̧o̧n ta ko jej jelm̧aeiki ilo mour in, jemaron̄ lōke Anij im kappukot lan̄lōn̄ ilo E.
Āinwōt Job ilo Kallim̧ur M̧okta, ilo juon iien en̄taan jet remaron̄ kar en̄jake bwe Anij ekar katajinemjen er. Kōnke jejeļā bwe Anij ewōr an kajoor n̄an bōbrae ak joļo̧k jabdewōt kaen̄tanaan, jemaron̄ po ilo ellotaan eļan̄n̄e E ejjab kōm̧m̧ane menin, im bōlen jej kajjitōk, “Eļan̄n̄e Anij ejjab letok jipan̄ eo me jej jar kake, ewi wāween an lōn̄ aō tōmak ilo E?” Ilo juon iien ilo iien mellijon̄ ko an reļļap, Job ekar mour jim̧we im ekar ba:
“Innām kom̧win jeļā bwe Anij ear jolaļļo̧k eō, im ear kōpooļ eō kōn ok eo An.
“Ij lam̧ōj im ba, ‘Kowadon̄!’ Ak ejjeļo̧k ej eo̧ron̄ eō; ij lam̧ōj bwe juon en jipan̄, ak ejjeļo̧k ekajet.”1
Ilo uwaak eo an n̄an Job, Anij ekar kajjitōk ilo maron̄, “Kwōnaaj liaakļo̧k Eō ke bwe ren kōwānōk eok?”2 Ak ilo bar jet naan, “Kwōnaaj kajatokjān Aō ekajet ke? Kwōnaaj liaakļo̧k Eō ke bwe ren kōwānōk eok?”3 Irooj ekar kipel ilo an kakeememej Job kōn An kajoorpōtata im jeļā men otemjej, im Job kōn ettā eo an ekar kwaļo̧k bwe ekar jab jolete jabdewōt men jekdo̧o̧n jon̄an jeļāļo̧kjeņ, kajoor, im jim̧we eo an Anij im ejjab maron̄ jutak ilo ekajet eo an Eo Ekajoor tata:
“I jeļā bwe Kwō maron̄ in kōm̧m̧an men otemjej,” ekar ba, “im ejjeļo̧k e maron̄ dem̧ake jabdewōt iaan pepe ko Am̧.
“… Iar kōnono men eo iar jab meļeļe; men in bwilōn̄ ko i bani, im i jaje kake. …
“Kōn men in ij make jōjōik eō, im ukeļo̧k ilo būn̄al im bwidej in wūpaaj.”4
Ilo jem̧ļo̧kin, Job ekar jeraam̧m̧an ke ej lo Irooj im “Irooj ear kajeraam̧m̧an jem̧lokōn Job eļap jān jinoin.”5
Lukkuun lo m̧ool ej menin bwebwe n̄an kōj kōnke ekadu erreim̧aanļo̧k eo ad n̄an kajirere im ekajet Anij, im ļōmņak, n̄an waanjon̄ak, “Ijjab m̧ōņōņō, kōn menin Anij ej kōm̧m̧an juon men ejjab jim̧we.” N̄an kōj, ajri ro Nejin ilo mour in ilo juon laļ eo epidodo ad po ie, eo ejeļā jidik kōn raan ko ļo̧k, kiiō, im ilju im jekļaj, E ej kwaļo̧k, “Ejja Eo wōt ejeļā aolep men otemjeļo̧k, aolep men otemjeļo̧k raar itok kōn N̄a.”6 Jekab ej kakkōl ilo jim̧we: “Pukot jaab n̄an kapilōk Irooj, ak n̄an bōk kapilōk jān Pein. Bwe lo, kom̧ make jeļā bwe E ej kapilōk ilo mālōtlōt, im ilo jim̧we, im ilo eļap tūriam̧okake, ioon aolep jerbal ko An.”7
Jet rejjab meļeļe kallim̧ur ko an Anij kōn meļeļe in bwe pokake E ej tōl n̄an tōprak ko ralikkar ilo juon tōre em̧ōj karōke. Remaron̄ ļōmņak, “Eļan̄n̄e ij tiljek ilo kōm̧m̧an mijen eo aō, Anij enaaj kōjeraam̧m̧an eō kōn juon m̧are elem̧ōņōno im ajri ron” ak “Eļan̄n̄e inaaj bōjrak jān kein katak ko an ilo jikuuļ ilo raan in Jabōt, Anij enaaj kōjeraam̧m̧an eō kōn kūrāāt ko rem̧m̧an” ak “Eļan̄n̄e ij kōļļā juon m̧ōttan jon̄oul, Anij enaaj kōjeraam̧m̧an eō kōn jerbal eo eto ao kōņaan.” Eļan̄n̄e mour ejjab itok ilo jejjet ilo wāween in ak ekkar n̄an iien ko jej kōtmeni, remaron̄ en̄jake liaakļo̧k jān Anij. Ak aolep men rejjab jerbal ilo economy eo ekwojarjar. Jejjab aikuj ļōmņak bwe karōk eo an Anij āinwōt juon vending machine ijo jej (1) kālet juon kōjeraam̧m̧an eo jej kōņaan, (2) kadeļon̄ aolep jerbal ko rem̧m̧an me remenin aikuj, im (3) wōrtōr eo em̧ōkaj an kajju tōpar.8
Ilo m̧ool Anij emnaaj dāpij bujen im kallim̧ur ko An n̄an kōj kajjojo. Jejjab aikuj inepata kake.9 Katok in pinmuur eo an Jisōs Kraist—eo ekar wōnlaļļo̧k n̄an ium̧win aolep men im weaak n̄an ijo eutiej tata10 im eo ej jolete aolep kajoor in lan̄ im laļ11—ej lukkuun lale bwe Anij emaron̄ im enaaj kakūrm̧ool kallim̧ur ko An. Eaorōk bwe jej kautiej im pokake kien ko An, ak ejjab aolep kōjeraam̧m̧an ko rej pedped ioon pokake kien12 ej ļōmi, kōm̧m̧ani, im karōki iien ko ekkar n̄an men ko jej kōtmeni. Jej kate kōj jon̄an wōt ad maron̄ ak jej aikuj aje aolep men n̄an E eo ej kōjeikiik kōjeraam̧m̧an ko, jim̧or ilo mour in kanniōk im jetōb.
Būreejtōn Brigham Young ekar kōmeļeļeiki bwe tōmak eo an ekar jab ekkaļ ioon jet tōprak ak kōjeram̧m̧an ko ak ioon kam̧ool eo an kōn im jem̧jerā eo an ippān Jisōs Kraist. E ekar ba: “Tōmak eo aō ejjab pedped ioon jerbal ko an Irooj ilo āne jiddik ko ilometo, ioon an bōktok armej ro n̄an ijin … ejjab ioon jipan̄ ko me ej leļo̧k n̄an ro armej rein ak ioon armej raņ, ak ejjab pedped ioon n̄e jej jeram̧m̧an ak jab jeram̧m̧an, ak tōmak eo aō ej pedped ioon Irooj Jisōs Kraist, im jeļāļo̧kjeņ eo aō iar bōke jān E.”13
Ad ukweļo̧k im pokake, ad jerbal in jipan̄ im kaarmejet ko me eļap tokjeer. Jekōņaan pād ilubwiljin ro me Ether ekar kōmeļeļe kake er āinwōt “iien otemjej baptoa ilo jerbal ko rem̧m̧an.”14 Ak ejjab lukkuun ļap kōnke jet rekoot ko me em̧ōj jei im kōjparoki ilo bok in jeje an selestial. Men ko eļap tokjeer kōnke rej kōm̧m̧an bwe jen bōk koņaad ilo jerbal eo an Anij im rej un ko unin ad kobaļo̧k im jerbal Ippān ilo oktak ko ad make jān piktokin armej n̄an armej ro rekwojarjar.15 Ta eo Jemedwōj Ilan̄ ej letok ej E make im Eo Nejin, juon jem̧jerā eo epaak im ejjeļo̧k jem̧ļo̧kin Ippāer kōn jouj im jipan̄ eo an Jisōs Kraist, ad Ripinmuur.
Jej ajri ro nejin Anij, kōjeņoļo̧k kōj n̄an mour in jab wabanban im mour indeeo. Ad mejān kajjik ej n̄an erom̧ ri jolōt, “ri jolōt ippān Kraist.”16 Jemed ej kōņaan tōl kōj kajjojo ilo iaļan bujen eo An n̄an bun̄tōn ko kar kōm̧m̧ani n̄an aikuj ko ad kajjojo im kajejjet n̄an karōk eo An n̄an m̧ōņōnō eo eļaptata Ippān. Jemaron̄ kōtmene lōke eo ej eddōkļo̧k im tōmak eļap ilo Jemān im eo Nejin, juon ļōmņak en̄jake iakwe eo Aer, im kaeņōm̧m̧an im tōl eo ejjab likjab jāb Jetōb Kwojarjar.
Em̧ool barāinwōt, iaļ in ejjab pidodo n̄an jabdewōt iaad. Ekanooj in ļap ijo emenin aikuj n̄an kōkm̧anm̧anļo̧k im karreoiki bwe en pidodod. Jisōs eaar ba:
“N̄a Ij vain e m̧ool, im Jema e Ri kallib.
“Jabdewōt ra ilo N̄a e jab jebar leen [Jemān] ej bōkļo̧k, im ra jabdewōt ej jebar leen, Ej karreoik e, bwe en orļo̧k an jebar leen.”17
Jerbal in kōkm̧anman im karreo an Anij, kōn menin ko remenin aikuj, jet iien rej kajju oktak im kōmetak. Keememej ke meļeļe eo an Paul, jej “ri joļōt ippān Kraist; eļan̄n̄e jej en̄taan Ippān, bwe jen barāinwōt aiboojoj Ippān.”18
Kōn menin, ilubwiljin kijeek in kōkm̧anm̧anļo̧k im karreo in, ijjeļo̧kin ad illu ippān Anij, jen epaakeļo̧k Anij. Kūr Jemān ilo etan Nejin. Etetal Ippāer ilo Jetōb, raan n̄an raan. Kōtļo̧k bwe Ren kwaļo̧k Aer m̧ool n̄an eok. Itok ilo m̧ool n̄an jeļā Er im ilo m̧ool jeļā wōn kwe make.19 Anij En Anjo̧.20 Rilo̧mo̧o̧r eaar akweļap kōn kōj:
“Ron̄jake E eo ej rijojomar ippān Jemān, eo ej akweļap kōn kom̧ im̧aan Mejān—
“Ba: Jema, lo en̄taan ko im mej eo an Eo eaar jab kōm̧m̧an jerawiwi, ilo E Kwar kanooj būn̄-būruōm̧; lo bōtōktōkin Nejūm̧ eo eaar to̧o̧rļo̧k, bōtōktōkin E eo Kwar leļo̧k bwe Kwōn maron̄ aiboojoj;
“Kōn menin, Jema, dāpij rein jeiū im jatū rej lōke ioon Eta, bwe ren maron̄ itok n̄an Ippa im bōk mour ejjeļo̧k jem̧ļo̧kin.”21
Ļōmņak kōn jet waanjon̄ak ko kōn em̧m̧aan im kōrā ro retiljek ro rekar lōke Anij, lōke bwe kōjeraam̧m̧an ko an me Ekar kallim̧ur kaki naaj leļo̧k n̄an er ilo mour in ak ilo mej. Tōmak eo aer ekar pedped ejjab ioon ta eo Anij ekar ak ekar jab kōm̧m̧an ilo juon jekjek ealikkar ak tōr ak kōn jeļā bwe E āinwōt Jemed eo ejouj im Jisōs Kraist āinwōt juon aer Ripinmuur em̧ool.
Ke Ebream kar tin katok kake jān ippān pris in Ijipt eo an Elkana, ekar lam̧ōj n̄an Anij n̄an lo̧mo̧o̧rene, im Anij ekar kōm̧m̧an.22 Ebream ekar mour n̄an erom̧ juon jemān ritōmak im ineen aolep baam̧le ko ioon laļ in renaaj jeram̧m̧an.23 Moktaļo̧k, ilo ejja lokatok eo, ejja pris an Elkenah ekar aje ļo̧k jilu bōrjin ro “kōn erreo eo aer … rebar kar bun̄badik n̄an kabun̄-jar n̄an Anij aļaļ ko ak Anij dekā.”24 Rekar mej ijeņ āinwōt ro kar kamej er kōn tōmak eo aer.
Josep eo etto, kar wia kake n̄an kōm̧akoko āinwōt juon jodikdik jān bratōr ro an make, ilo en̄taan eo an ekar oktak n̄an Anij. Āliktata, ekar bun̄bun̄ ilo m̧weo im̧ōn m̧aajta eo an ilo Ijipt ak aolep em̧m̧an ko an rekar jej tokjeer kōn wōt aer kar ņa ruōn kōn kōrā eo an ippān Potipar. Josep emaron̄ kar ļōmņak, “Kōn menin kalbuuj ej unin aō pād ie kōn aō kōjparok kien erreo.” Ijjeļo̧kin ekar bar oktak n̄an Anij im ekar jeram̧m̧an jekdo̧o̧n ilowaan jikin kalbuuj. Josep ekar lukkuun inepata kōn ke rikalbuuj eo kar m̧ōttan, kōjekdo̧o̧n kallim̧ur ko an n̄an Josep, meļo̧kļo̧k aolep men kōn e ālkin an kar bōk jerbal eo an ilo jikin eo an Pero. Āliktata, ilo am̧ jeļā, Irooj ekar karōke bwe en Josep eo ej pād ilo jerbal eļap lōke im kajoor ie iturin Pero, kōmaron̄ e Josep n̄an lo̧mo̧o̧ren im̧ōn Israel im elōn̄ ro jet. Em̧ool, Josep eo emaron̄ kam̧ool em̧ool “bwe men otemjej rej jim̧or jerbale em̧m̧an n̄an ro rej yokwe Anij.”25
Abinadai ekar lukkuun m̧ool ilo an kakūrm̧ool e wōņāān eo ekwojarjar. “A ij kadedeļo̧k ennaan in aō,” ekar ba, “innām ejjeļo̧k tokjān [ta ko rej waļo̧k n̄an eō], eļan̄n̄e āindein bwe in mour.”26 Ekar jab mej ilo mej ko an ro rej m̧an er, ak ealikkar ke kar lo̧mo̧o̧ren e ilo aelōn̄ in kiin̄ eo an Anij, im juon eo ejitōnbōro ippān ekar oktak, Alma, ekar ukōt rekoot in bwebwenato an Rinipai ro me ekar tōl ļo̧k n̄an itok eo an Kraist.
Alma im Amulek kar lo̧mo̧o̧en er jān kalbuuj ilo Ammonihah n̄an uwaake akweļap eo aer, im rikakkure ro aer kar m̧an er.27 M̧oktaļo̧k, mekarta, ejja rikakkure rein wōt kar joļo̧k kōrā im ajri ro nejier me rej tōmak ņai ilo juon kijeek elukkun kajoor an uruur. Alma, ej kam̧ool juon iien enana ilo kaen̄tanaan eo kar kipel jān Jetōb n̄an jab kōjerbal kajoor eo an Anij n̄an “lo̧mo̧o̧ren er jān urur ko”25 bwe ren maron̄ bōk lōn̄ļo̧k er n̄an Anij ilo aiboojoj.26
Rikanaan Josep Smith ekar lukkun m̧ōjņo ilo jikin kalbuuj Liberty, Missouri, ilo an ejjeļo̧k an kajoor n̄an jipan̄ Armej ro Rekwojarjar ilo aer kar kakkure im koote er im kakoiki er jān m̧ōko m̧ōer ilo juon iien m̧ōļo ak wiintōr. “O Anij, kwo pād ia?” Josep ekar lam̧ōj im jan̄. “Ewi toun naaj an Peim tōt wōt?”30 Uwaak eo, Irooj ekar kallim̧ur: “Mennin jum̧ae kein am im en̄taan kein am renaaj n̄an jidik wōt iien; innām eļan̄n̄e kwo naaj kijejetoiki em̧m̧an, Anij enaaj kotak eok ijo eutiej. … Kwe kwo jan̄in āinwōt Job.”31
Ilo jem̧ļo̧kin, Josep emaron̄ kar kwaļo̧k ippān Job, “Men̄e [Anij] maron̄ m̧an eō, inaaj kōjatdikdik wōt kōn E.”32
Elder Brook P. Hales ekar keidi bwebwenato in an Sister Patricia Parkinson, eo ekar ļotak im ekar jab pilo ak ke ej 11 an iiō ekar pilo.
Elder Hales ekar keememej: Ikar jeļā kajjien Pat ium̧win elōn̄ iiō ko im ejjab to eaar jiron̄ e bwe iaar nōbar jekjek eo me liin ej iien otemjej em̧m̧an im m̧ōņōņō. Liin eaar uwaak, “Ekwe, kwojjan̄in pād ippa ilo m̧weo, kwonan̄in ke? Ewōr iien rōt kein ij iooni. Ekar wōr aō apan̄ ko kōn būrom̧ōj, im eaar ļap aō jan̄.’ Mekarta, liin eaar kakobaba, “Jān iien n̄an iien iaar jino aō jab loļo̧kjeņ, eaar juon apan̄, bōtaab iaar jeļā bwe Jemedwōj Ilan̄ im Rilo̧mo̧o̧r raar pād ippān baam̧le eo aō im n̄a. … N̄an ro me rej kajjitōk ippa eļan̄n̄e ij illu kōnke ipilo, ij uwaak, ‘Wōn eo inaaj illu ippān? Jemedwōj Ilan̄ ej pād ippa ilo menin; ijjab make iaaō. E ej pād ippa aolep iien.’”33
Ilo jem̧ļo̧kin, ej kōjeraam̧m̧an eo kōn juon jemdo̧o̧n eo epaak im edāpdep ippān Jemān im Nejin eo me jej kappukot. Ej kōm̧m̧an aolep oktak im eļap tokjeņ wōņeen im ejjeļo̧k jem̧ļo̧kin. Jenaaj kam̧ool ippān Paul “bwe ij watōk en̄taan ko ilo [mour in] jekdo̧o̧n n̄e keidi ippān aiboojoj eo enaaj waļo̧k n̄an kōj.”34 Ij kwaļo̧k aō kam̧ool bwe jekdo̧o̧n ta ko jej jelm̧aeiki ilo mour in, jemaron̄ lōke Anij im kappukot lan̄lōn̄ ilo E.
“Kwōn lōke Irooj kōn aolepān būruom̧, im kwōn jab atartar ioon jeļāļo̧kjeņ eo am̧.
”Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.”35
Ilo etan Jisōs Kraist, amen.