Karōk eo Ej Jerbal ke?
Ij kam̧ool bwe karōk in m̧ōņōnō eo ej jerbal. Kar ejake jān Jemāmi Ilan̄, eo ej iakwe kom̧.
Karōk eo ej jerbal ke?
Ejjab to ikar bwebwento ippān juon rūm̧m̧an ded me ekar jerbale juon mijen jejjo iiō ko remootļo̧k im ekar kiiō boub ilo jerbal eo an. Ilo jet jekjek ko, mour eo an ekar em̧m̧an. Bōtaab tōmak eo an ekar m̧ōjņo̧ļo̧k. Ekar rūmlaļļo̧k ilo juon m̧alo in pere kōn Rilo̧mo̧o̧r eo im Kabun̄ eo An. Ekar kōmeļeļeik bwe ekar jab bōk kōjeraam̧m̧an ko ekar kōtmene jān gospel eo kar kōjepļaaktok. Ekar jab en̄jake bwe karōk in m̧ōņōņō eo ekar jerbal ilo mour eo an.
Ennaan eo aō rainin ej n̄an aolep ro me remaron̄ kar wōr ejja en̄jake rōt in. Ij kōnono n̄an ro me ilo juon iien “ar en̄jake n̄an al, al in iakwe em̧ool in pinmuur” ak jab “en̄jake kiiō.”1
Jemedwōj Ilan̄ ekar kōpooj juon karōk aiboojoj n̄an m̧ōņōņō indeeo eo ad. Bōtaab ke mour ekar jab waļo̧ktok ilo wāween eo jekar kōjatdikdik kake, emaron̄ in āinwōt bwe karōk eo ejjab jerbal.
Bōlen jej en̄jake wāween eo rikaļoor ro an Jisōs raar en̄jake ke raar pād ilowaan wa eo, “ej ilukwōn lom̧aļo, im jeplōklōk kōn ņo ko: bwe kōto ej itok im̧aan.”2
Innām, ilo lukkuun jibbon̄ tata:
“Jisōs ej itok n̄an ippāer, im etal ioon lo̧jet.
“Im ke rū kaļoran rej lo An etal ioon lo̧jet, rej abwinmake, … im rej lam̧ōj bwe rej mijak.
“Ak e m̧ōkaj an Jisōs kōnono n̄an er im ba, Kom̧win peran; N̄a E; kom̧win jab abwinmake.
“Im Piter e uwaak E im ba, Irooj, eļan̄n̄e Kwe ņe, Kwōn jiron̄ eō bwe in iwōj n̄an Ippam̧ ioon lo̧jet.
“Im Ej ba, Kwon itok. Im ke Piter ej to jān wa eo, ej etal ioon lo̧jet, bwe en ilo̧k n̄an Jisōs.
“A ke ej lo kōto, e mijak, im ej jino an tuļo̧k, im e lam̧ōj im ba, …“Irooj, Kwōn lo̧mo̧o̧ren eō.
“Im e m̧ōkaj an Jisōs erloke pein, im dāpij e im ba n̄an e, O kwe e dik am̧ tōmak, etke kwaar pere?”3
Imaron̄ ke kwaļo̧k ippāmi jilu pedped in katak ko ij ekkatak jān Piter? Ij jar bwe pedped in katak kein remaron̄ jipan̄ jabdewōt ro me rej en̄jake bwe karōk in m̧ōņōņō eo ejjab jerbal ilo mour ko aer.
Juon, jerbal ilo tōmak ilo Jisōs Kraist.
Ij bwilōn̄ kōn tōmak eo an Piter. Ilo kajjitōk eo eļam waan an Jisōs n̄an, “itok,” ekar to jān wa eo waan ellāle. Eaar āinwōt jeļā bwe eļan̄n̄e Jisōs Kraist ekar kajjitōk ippān n̄an kōm̧m̧ane juon men, emaron̄ kar kōm̧m̧ane.4 Piter ekar lōke Rilo̧mo̧o̧r eo eļapļo̧k jān an kar lōke wa eo waan. Im bwe tōmak jab eo ekar leļo̧k n̄an e kajoor n̄an jerbal kōn peran ilo juon iien ekainepata, jekjek ekamijak.
Tōmak eo an Piter ej kakeememej eō kōn juon en̄jake me ikar ron̄ jān Elder José L. Alonso. Ejjab to ālkin jako eo an ļaddik eo nejin Elder Alonso, ilo̧k jān juon baam̧le eo edik ajri ro ie, Elder Alonso ekar ron̄ an ajri ro kōnono.
“Ta eo jenaaj kōm̧m̧ane?” raar kajjitōk.
Juon leddik nejin ruatimjuon iiō dettan ekar uwaak, “Em̧m̧an an baba pād. E ej kwaļo̧k gospel eo an Jisōs Kraist.”
Āinwōt Piter, leddik in edik ekar lo eļapļo̧k jān apan̄ ko an im kar lōke ilo Jisōs Kraist im Pinmuur eo An. Tōmak ilo Rilo̧mo̧o̧r eo ej bōktok aenōm̧m̧an im kajoor n̄an wōnm̧aanļo̧k wōt.
Eļan̄n̄e kwoj reilikļo̧k ilo mour eo am̧, ij tōmak kwonaaj lo bwe kwaar kōjerbal tōmak elōn̄ kattōn. Kobatok ilo Kabun̄ in ej juon jerbal in tōmak. Kōnono ippān Jemedwōj Ilan̄ ilo jar ej juon jerbal in tōmak. Riiti jeje ko rekwojarjar ej juon jerbal in tōmak. Ron̄jake ennaan ko aō ilo kweilo̧k in eļap ej juon jerbal in tōmak. Āinwōt an Būreejtōn Russell M. Nelson kar ba, “Jab kadikļo̧k tōmak eo em̧ōj kadede am̧ bōke.”5
Bar juon katak ij ekkatak jān Piter ej en̄in:
Ilo iien ko renana, oktakļo̧k n̄an Jisōs Kraist ilo iien eo em̧ōkaj tata.
Ilo an kar etetal ļo̧k n̄an ippān Rilo̧mo̧o̧r eo, Piter ekar leļn̄o̧n̄ kōn kōto eo im ekar jino tūm̧laļļo̧k. Bōtaab ke Piter ekar kile ta eo ekar waļo̧k, ekar jab kajjieon̄ in kam̧ūnm̧ūn dān eo kōn e make ak aaō ļo̧k n̄an wa eo. Ijello̧kin kōtļo̧k tōmak eo an ilo Kraist, ekar kakijin̄en̄eļo̧k an dāpiji, jan̄ļo̧k “Irooj, Kwōn lo̧mo̧o̧ren eō.”
“Im e m̧ōkaj an Jisōs erļo̧ke pein, im dāpij e.”6
Aolepādwōj jej jelm̧ae kōto ko reļļap me remaron̄ kōm̧akūt tōmak eo ad im kōm̧m̧an bwe jen tūm̧laļļo̧k. N̄e menin ej waļo̧k, jouj keememej bwe karōk in m̧ōņōņō eo an Jemedwōj Ilan̄ ebar wōr juon etan—karōk in pinmuur eo. Karōk eo ekar jab bwe mour eo ad en pidodo im em̧m̧an, jāmin tūbbo̧k, jamin tūm̧laļļo̧k, kōn juon māidikdik ilo turin mejād aolep iien. Jemedwōj Ilan̄ ekar jeļā bwe naaj kar aikuj in lo̧mo̧o̧ren kōj. En̄in ej etke Ekar kōpooj juon karōk in pinmuur.7 En̄in ej etke Ekar jilkintok juon Ripinmuur. N̄e jej apan̄—kōn jabdewōt un—ejjab meļeļe in karōk eo ejjab jerbal. En̄in ej iien eo eļaptata jej aikuji karōk eo!
Ilo iien ko, ļoor waanjon̄ak eo an Piter. Oktakļo̧k n̄an Rilo̧mo̧o̧r eo ilo iien eo em̧ōkaj tata.
“Kiiō ej iien eo im raan in lo̧mo̧o̧r eo ami; Jab aepedped kōn raan in ukeļo̧k eo ami.”8
Jekdo̧o̧n ia eo jej pād ie im ia eo jakar pād ie, ukweļo̧k ej iaļ eo m̧aanļo̧k. Būreejtōn Nelson ekar katakin:
“Ejjeļo̧k juon men ej kanemkwoj eļapļo̧k, kōkwojarjar eļapļo̧k, ak aorōkļo̧k jān juon ukweļo̧k eo emakijkij im aolep iien ukweļo̧k. …
“Mekarta kwoj tiljek em̧m̧akūt m̧aanļo̧k ilo iaļen bujen eo, kar eļļak ak etal jān iaļen bujen eo, ak jab maron̄ loe iaļ eo jān ijo kwoj pād ie kiiō, ij akweļap ippem̧ n̄an ukweļo̧k. En̄jake kajoor in kajoorļo̧k eo an ukweļo̧k aolep raan—jān kōm̧m̧an im maron̄ kōm̧m̧an em̧m̧anļo̧k jidik kajjojo raan.”9
Itok n̄an Kraist ej meļeļe in eļapļo̧k jān baj ļōmņak kōn E ak kōnono kōn E ak em̧ool iakwe E. Ej meļeļe in ļoor E. Ej meļeļe in mour ilo wāween eo E ej katakin kōj n̄an mour. Im n̄an aolepādwōj, bwe ej meļeļe in ukweļo̧k, ilo jab karum̧wijļo̧k.
Juon iaan leddik ro nejū ekōn jerbal ilo jikin kaminene eo an mijenede. Ekar jiron̄ eō kōn juon elder eo ekar katakin me ekar ba ilo ittiņo n̄an e bwe ekar jab jeļā Bok in Mormon ekar m̧ool. Ekar jar im jar kōn juon kam̧ool ilo jetōb, ak ekar jab bōk uwaak.
Leddik eo nejū ekar jar n̄an jeļā ta eo ej aikuj kōm̧m̧ane n̄an jipan̄ mijenede in. Im̧we eo liin ekar bōke ekar bwe jeje ko rekwojarjar raar jab litok wōt bwe jen maron̄ riiti im bōk juon naan in kam̧ool; raar barāinwōt litok n̄an katakin kōj kōjparok kien ko an Anij. Leddik eo nejū ekar kwaļo̧k ļōmņak in ippān mijenede eo.
Tokālik, ekar bar lo mijenede in, eļapļo̧k an em̧ōņōņō. Ekar jiron̄ e bwe ekar bōk juon naan in kam̧ool āliktata bwe Bok in Mormon ej m̧ool. Ekar jeļā bwe kam̧ool in ekar itok kōnke ekar kōm̧m̧ane juon kijejeto eļapļo̧k n̄an kōm̧m̧ane ta eo Bok in Mormon ej katakin.
Jen ļoor waanjon̄ak eo an Piter kōn oktakļo̧k n̄an Rilo̧mo̧o̧r eo ilo iien ko renana. Ļoor Jisōs Kraist ijello̧kin pedped ioon mālōtlōt im kajoor eo am̧ make. Jekdo̧o̧n ewi aitokan am̧ kar kajjieon̄ n̄an em̧ōjānjān ioon dān ilo An jako, ejjāmin rum̧ij n̄an pukōtļo̧k E. Karōk eo ej jerbal!
Pedped in katak kein kajilu ij ekkatak jān Piter im en̄jake eo an ej en̄in:
Kōttāik eok make im̧aan Irooj, im Enaaj kotak eok n̄an men ko reļļapļo̧k.
Piter ekar kwaļo̧k tōmak, jim̧or ilo etetal ioon dān eo im ilo pukōt Rilo̧mo̧o̧r eo ke ekar aikuj jipan̄. Em̧ool mekarta, Rilo̧mo̧o̧r eo ekar lo ilo Piter maron̄ eo eļapļo̧k ippān. “O kwe e dik am̧ tōmak,” Ekar ba, “etke kwaar pere?”10
Piter emaron̄ in kar dike luki. Bōtaab ekar bōk ilo ettā. Ekar wōnm̧aanļo̧k n̄an kappukōt eļapļo̧k tōmak ilo Jisōs Kraist. Jān elōn̄ļo̧k bar en̄jake in kalōk tōmak ko—jet iaer relukkuun pen, lukkun in pen—āliktata Piter ekar erom ritōl eo eļap kōjatdikdik ioon Irooj ekar aikuji bwe en erom. Ekar kōtōprak men ko reļļap ilo jerbal eo an Irooj.
Ta men ko reļļap Irooj ekar kōņaan bwe kwon kōtōpraki? Ilo Kabun̄ eo An im aelōn̄ in kiin̄ eo, elōn̄ iien ko rem̧m̧an n̄an jerbal im jerbal in karejar n̄an ro jet āinwōt an Rilo̧mo̧o̧r eo kar kōm̧m̧an. Ej kōņaan bwe kwon erom m̧ōttan jerbal eo eļap An. Karōk in m̧ōņōņō eo ejjāmin erom juon men elukkuun m̧ool ijello̧kin n̄e kwoj jipan̄ ro jet mour kake.
Ilo kalōk tōmak eo aō make, naan kein an Alma raar ukōt mour: “Em̧ōņōņō ro rej kōttāik er make ijjab kar kipel er n̄an kōttāik er.”11 Jen ettā ilo likūt kōj make ilo juon jekjek eo ijo Jisōs emaron̄ kotak kōj, tōl kōj, im koortokjān maron̄ ko ad.12
Ij kam̧ool bwe karōk in m̧ōņōnō eo ej jerbal. Kar ejake jān Jemāmi Ilan̄, eo ej iakwe kom̧. Ej jerbal kōnke Jisōs Kraist ekar anjo̧ ioon jerawiwi im mej kōn Pinmuur eo An. Itok n̄an E, ļoor E, im “ejidimkij an naaj karōk in lo̧mo̧o̧r eļap itok n̄an kom̧.”13 Ilo etan Jisōs Kraist, amen.