Em̧ōj an Jerkak kōn Kōmour ilo Pein Bao ko Pein:

Jemaron̄ Erom̧ Eļapļo̧k Jān Rianjo̧

Jān Elder Patrick Kearon

Jān Būreejtōnji eo an Jiljilimjuonn̄oul

Jisōs ekar anjo̧ jān aolep kakkure ko an laļ in n̄an lewaj n̄an eok ejjab kajoor wōt n̄an mour, kōn E, n̄an eļļā ioon im barāinwōt anjo̧.

Marin, N̄a Elder Holland, im men ko rejino nana ļo̧k.

Jemaron̄ Erom̧ Eļapļo̧k Jān Rianjo̧

Kōj aolep jej itok limoōd kōn bwebwenato in armej ro rekar mour jān jorrāān. Jej ron̄ bwebwenato ko kōn explorer ro me rejjab mijak im armej armej ro rekabwilōn̄lōn̄ ro me remaron̄ dāpij im kōjparok mour ko aer make ņae aolep menin jorrāān im kauwōtata ko, im jejab maron̄ pijaikļo̧k ak jej kajjitōkin kōj make “Jemaron̄ ke kar kōm̧m̧an āindein?”

Ij kajju ļōmņak kōn explorer riBritish eo etan Ernest Shackleton im tiim̧ in rijerakrōk ro an ilo tima eo an etan HMS Endurance, kar itaak im rub ilo ice ko ilo Antarctic im jitak ilo juon āne ejjeļo̧k armej ie ium̧win enan̄in ruo iiō. Wāween tōl eo an Shackleton me ekabwilōn̄lōn̄ im an ņa mejļan jorrāān ko me ejjab maron̄ kar bōbraiki rekar maron̄ dāpij mour an em̧m̧aan ro an, jekdo̧o̧n jekjek ko renana.

Innem ikar ļōmņak kōn tiim eo an Apollo 13 rekar kaim n̄an space bwe ren jok ilo allōn̄! Ak jorrāān eo ekar waļo̧k ke juon taan̄ in oxygen ekar bokoļo̧k, im mijen eo ekar aikuj kar bōjrak. Jabwe in oxygen, tiim in ekāke eo im mijen kantōrool kar mālōtlōt ilo aer kar kōm̧m̧ane im kōjepļaatok aolep astronaut ro jilu bwe ren jepļaak n̄an laļ in ak earth.

Ij lokjenaō kōn kabwilōn̄lōn̄ in an mour wōt kajjojo armej im baam̧le ko me rekar jorrāān ilo tariņae, kalbuuj ilo kāām ko, ak ro rekar erom̧ rijipo̧kwe, ro rekar kajoor im peran ilo an wōr wōt kōjatdikdik ippāer kōn ro m̧ōttāer me rekar en̄taan, ro rekar kōm̧m̧an em̧m̧an jekdo̧o̧n nana, im ro me rekar maron̄ jipan̄ ro jet anjo̧ im tōpar bar juon raan.

Komaron̄ ke ak naaj mour ilo jabdewōt iaan jekjek kein reļļap?

Bōlen jet iami, ijoke, ļōmņak kōn bwebwenato in armej rein rekar mour wōt, im jetōb eo am̧ ej en̄jake bwe kwe mour āinwōt ro rekar mour wōt kiiō āinwōt ro kar kakkure er, kōjool, kamenin̄ier, kōmetake er, ak jabdewōt kain en̄taan ko. Kwoj pād ilubwiljin kōņaan in kajjieon̄ eo am̧ make n̄an mour ilo juon jekjek me lukkuun āinwōt juon tima eo erub im jorrāān ak juon mijen em̧ōj kallim̧ur kake ej aikuj mōkaj n̄an an bōjrak. Kwonaaj ke kar lo̧mo̧o̧ren; kwon kar ke make mour jān en̄taan ko am̧ make?

Uwaak eo ej aaet. Komaron̄ mour. Ilo m̧ool em̧ōj am̧ kadede lo̧mo̧o̧ren; em̧ōj am̧ kadede lo̧mo̧o̧ren—jān Juon eo ekar en̄taan kōn en̄taan ko an anbwin im kōlmenļo̧kjeņ im en̄taan kōn metak ko reļļap kwoj en̄taan kaki.¹ Jisōs ekar anjo̧ jān aolep kakkure ko an laļ in² n̄an lewaj n̄an eok ejjab kajoor wōt n̄an mour ak juon raan, kōn E, n̄an jelm̧ae im barāinwōt n̄an anjo̧—n̄an lukkuun anjo̧ ilōn̄inļo̧k metak, būromōj, en̄taan, im lale aer bōk jikier kōn aenōm̧m̧an.

Rijilōk Paul ej kajjitōk:

“Wōn enaaj kōjepel kōj jān yokwe an Kraist? Enaaj jorrāān ke, ak en̄taan, ak matōrtōr, ak n̄ūta, ak keelwaan, ak uwōta, ak jāje? …

“Jaab, ilo men kein otemjej eḷap ad anjọ kōn Eo ear yokwe kōj.”³

Kallim̧ur ko n̄an Ribujen in Israel

Kwonaaj keememej iien eo Būreejtōn Russell M. Nelson ekar letok kūr in me ej elaajrak ilo kweilo̧k eo eļap. Ekar ba: “Ilo am̧ ekkatak jeje ko am̧ rekwojarjar … , ij rōjan̄ kom̧ n̄an kōm̧m̧ane juon laajrak in aolep men me Irooj ekar kallim̧ur Enaaj kōm̧m̧an n̄an ro bwijin Israel. Ij tōmak kwonaaj lukkuun bwilōn̄!”⁴

Erkein rej jejjo iaan kallim̧ur ko rekajoor im rej bōktok aenōm̧m̧an me baam̧le eo am rekar en̄jake. Pijaikļo̧k Irooj an kōnono naan kein n̄an eok—n̄an eok eo ekar mour—kōnke rej n̄an kwe:

Jab mijak.⁵

Ijeļā būrom̧ōj ko am̧, im ikar itok n̄an kanemkwoj eok.⁶

Ij jāmin etal jān eok.⁷

Eta epād ioom̧, im enjeļ ro aō rej jepooļ im lale eok.⁸

Inaaj kōm̧m̧an menin bwilōn̄ ko ilubwiljimi.⁹

Koṃwin itok n̄an Ippa; ekkatak Ippa; Inaaj kakkijeik koṃ.¹⁰

N̄a ij pād ippemi.¹¹

Kom̧ij Aō.¹²

N̄an Ro Rej Mour Wōt

Kōn kam̧ool kein me relukkuun lōn̄ ilo kōļmenļo̧kjeņ, ikōņaan kajju kōnono n̄an ro me rej en̄jake āinwōt ejjeļo̧k bar juon wāween bwe ren anemkwoj im anjo̧ jān nana ko me ejelet er kōn nana in kōm̧m̧an ko an ro jet. Eļan̄n̄e en̄in ej bwebwenato eo am̧, jej jan̄ ippam̧. Jej jan̄nuwaad kōn eok n̄an anjo̧ ioon tarpok, jook, im mijak, im jej oon̄ kōn eok, kōn Jisōs Kraist, n̄an anjo̧

Jān Rijorrāān n̄an Rimour n̄an Rianjo̧

Eļan̄n̄e kwaar ioon jabdewōt kain kakkure ko, jorrāān, nana, kwomaron̄ ļōmņak ke men kein rej waļo̧k rej bōlen am̧ bōd im bwe ekkar am̧ jelm̧aeiki jook im ajļo̧k ko kwoj en̄jaki. Emaron̄ kar wōr am̧ ļōmņak rot kein:

• Imaron̄ kar bōbrae menin.

• Anij ejako an iakwe eō.

• Ejjeļo̧k juon enaaj iakwe eō.

• Em̧ōj aō lukkuun jorrāān ban maron̄ karool eō n̄an jinoin.

• Pinmuur eo an Rilo̧mo̧o̧r ej jerbal n̄an ro jet ak ejjab n̄a.

Bōd in ļōmņak kein im en̄jake kein remaron̄ kar juon lōkatiptip n̄an kappukot jipan̄ jān baam̧le, ro m̧ōttad, ritōl ro, ak rūkaki ro retijem̧ļo̧k, im kōn menin kwoj make kaen̄taan eok. Eļan̄n̄e kwaar kappukot jipan̄ jān ro kwoj lōke er, kwomaron̄ kar tariņaeiki wōt ļōmņak in jook im bar matōrtōr eok make. Men eo ej waļo̧k jān kakkure kein remaron̄ pād wōt ium̧win elōn̄ iiō ko. Kwoj kōjatdikdik bwe juon raan enaaj em̧m̧an, ak jaje eita raan eo ejjan̄in itok.

Ekar jab kōn kakkure eo, im ejjab, im ej jāmin am̧ bōd, jekdo̧o̧n ta ro rikakkure ak jabdewōt armej remaron̄ kar ba n̄an jum̧ae. N̄e kwaar juon eo kwar jorrāān jān nana, m̧ōm̧ in kanniōk, ak jabdewōt bōd in meļeļe ko jet, ejjab kwe kwoj aikuj ukweļo̧k; ejjab am̧ eddo.

Ejjab dik an wōr tokjem̧ ak dik am̧ aorōk ak dik aer iakwe eok āinwōt juon armej, ak āinwōt leddik ak ļaddik eo nejin Anij, kōn wōt ta eo jet armej rekar kōm̧m̧ane n̄an kwe.

Anij ejjab kiiō kalimjōk, ak Ej jāmin kar kalimjōk, kwe āinwōt juon armej ekajookok. Jabdewōt men eo ekar waļo̧k n̄an eok, E ejjab jook kōn eok ak illu kōn eok. E ej iakwe eok ilo wāween eo me kwonej en̄jake. Im kwonaaj loe n̄e kwoj lōke ilo kallim̧ur ko An im ilo am̧ ekkatak n̄an tōmak ilo E n̄e E ej ba bwe kwe kwo “aorōk iṃaan [Mejān].”¹³

Ejjab kwe eo jejeļā kake kōn men kein renana me rekar waļo̧k n̄an eok. Kwe, ilo m̧ool aibojooj, jeļā kake kwe kōn kadkad im indeeo āinwōt juon ļaddik ak leddik nejin Anij, im kōn Rikōm̧anm̧an eo Am̧ ewānōk, iakwe eo ejjeļo̧k jem̧ļo̧kin im kūr eo n̄an bōk likio in kōmour.

Men̄e emaron̄ pen ilo kalimjōke, en̄jake an pen, kōmour emaron̄ bōk jikin kōn menin bwilōn̄ eo kōn kajoor in pinmuur in Pinmuur eo an Jisōs Kraist, eo em̧ōj an jerkakpeje “im enaaj wōr kōmour ilo pein.”¹⁴

Ad Rilo̧mo̧o̧r etūriam̧o, anjo̧ jān marok im nana, ewōr kajoor n̄an kajim̧we aolep bōd, juon mour eobrak kōn m̧ool n̄an ro rej bōd ņae ro jet.¹⁵

Jouj im jeļā bwe Rilo̧mo̧o̧r ekar wanlaļtak n̄an ium̧win aolep men otemjej, jekdo̧o̧n ta eo ekar waļo̧k n̄an eok. Kōn menin, E elukkuun jeļā ta in lukkuun kaamijak im jook rej āinwōt im wāween en̄jake ad atajinemjen im jerata.¹⁶ Jān ijo em̧wūlaļ tata ilo en̄taan in pinmuur eo An, Rilo̧mo̧o̧r ej lewaj n̄an eok kōjatdikdik men̄e ekar jako indeeo, kajoor eo me kwaar tōmak koban kar bōke, im kōmour eo kwojjab maron̄ pijaikļo̧k ke emaron̄ bōk jikin.

Mwilin kakkure ko Rej Kaje jān Irooj im Rikanaan ro An

Ejjeļo̧k juon jikin n̄an jabdewōt kain kakkure ko—ānbwin, m̧ōm̧ in kanniōk, en̄jake, ak kōnono—ilo jabdewōt em̧, jabdewōt laļ, ak jabdewōt m̧anit. Ejjeļo̧k jabdewōt men juon kōrā ripālele, ajri, ak ļeo pālele emaron̄ kōm̧m̧ane ak ba me ej kōm̧m̧an bwe en “ekkar” n̄an m̧an er. Ejjeļo̧k juon, ilo jabdewōt laļ ak m̧anit enan̄in “kajjitōk kōn” kakkure ak jorrāān jān bar juon kōn mālim ak jān juon eo ekilep im dipen.

Ro rej kakkure im kappukōt n̄an ņoje jerawiwi ko aer remaron̄ meļo̧kļo̧ke ilo jidik wōt iien. Ak Irooj, eo ej loe aolep men, ejeļā jerbal im ļōmņak ko im kōttōpar ko ilo bōro ko.¹⁷ E ej juon Anij in kajim̧we, im ej kajimwe kōn kajjim̧we eo An ekwojarjar.¹⁸

Menin bwilōn̄ eo, Irooj ej barāinwōt juon Anij in tūriam̧o n̄an eo ej m̧ool in ukweļo̧k. Rikakkure ro—ekoba ro rekar kakkure er make—ro rej kwaļo̧k ruōer make im meļo̧kļo̧k jerawiwi ko aer, im kōm̧m̧an aolep men ilo kajoor eo aer make n̄an kōļļā wōņāān im kōkm̧anm̧anļo̧k, remaron̄ jeorļo̧k bōd kōn kabwilōn̄lōn̄ in Pinmuur eo an Kraist.

Kōn bōd in joņae ko, kajoor in joņae kein rej bōktok kaje. Ak relukkuun barāinwōt jeraam̧m̧an kōn en̄taan eo an Rilo̧mo̧o̧r kōn er im jeļā eo me ke m̧ool eo eļap enaaj anjo̧.

Ak rikakkure ro me rejjan̄in ukweļo̧k renaaj jutak im̧aan mejān Irooj n̄an bōk eddo kōn jerbal nana ko aer.

Irooj make ej juon crystal ejatōltōl ilo kaje eo An kōn kakkure ilo jabdewōt kain: “A jabdewōt eo enaaj ḷōkatipe juon iaan rein redik … , eṃṃan n̄an e n̄e rej lukwōj dekā irir eḷap ṇa i kōnwaan im kōtḷọke ijo e ṃwilaḷ i lọjet.”¹⁹

Jem̧ļo̧k in

Ro m̧ōtta rejitōnbōro ro rekar lukkuun ļap aer kinejnej—im kōn wāween in, jabdewōt eo ekar jelm̧ae kalijōkļo̧k im jab jim̧we an mour—emaron̄ bar bōk juon ijjino ekkāāl im bar jino. Ilo Getsemane im ilo Calvary, Jisōs ekar “bōk ioon make … aolep metak im en̄taan me em̧ōj en̄jake jān kwe im n̄a,”²⁰ im em̧ōj an anjo̧ ioon aolepāer! Kōn pā ko pein rej erļo̧k, Rilo̧mo̧o̧r eo ej leļo̧k menin letok in kōmour n̄an eok. Kōn peran, kijenmej, im mije etiljek ilo E, m̧okta elukkun to komaron̄ bōk menin letok in. Kwomaron̄ kōtļo̧k metak ko im likūti ilo ne ko Neen.

Rilo̧mo̧o̧r eo am̧ ejouj ekar kwaļo̧k, “Ri kọọt ej itok bwe en kọọt im ṃan im kọkkure: Ña Ij itok bwe [kwon] bōk mour, im bwe [kwon] bōk elōñ.”²¹ Kwoj juon eo ekar mour, komaron̄ kōmour, komaron̄ lōke bwe kōn kajoor im jouj eo an Jisōs Kraist, kwonaaj eļļā im anjo̧.

Jisōs ekar tijem̧ļo̧k ilo men ko reppen. E ekar itok n̄an ijin n̄an kakūrm̧ooli men ko reppen, pinmuur kōn men ko reppen n̄an pinmuur kaki, n̄an kōmour ro rejjab bōk kōmour, n̄an kajim̧we ro rejjab jim̧we, n̄an kallim̧ur ro rejjab kallim̧ur.²² Im wejepdik ilo an kōm̧mane menin. Ilo m̧ool, Elukkuun tijem̧ļo̧k kake. Ilo etan Jisōs Kraist, ad Rikōmour, amen.

N̄an ļōmņak ko reļļapļo̧k im kein jipan̄ ko, lale “Abuse” in the Life Help section at ChurchofJesusChrist.org and in the Gospel Library app.

Kakeememej Ko

1. Lale Alma 7:11–12. Būreejtōn Russell M. Nelson ekar katakin kōj: “[Jisōs Kraist] ekar kōm̧m̧an kōjak kake, kajirere kake, kapiloiki, im kalōklōke. Ilo Jikin Kallib Gethsemane, Rilo̧mo̧o̧r eo ad ekar bōk Ioon Make aolep metak, aolep jerawiwi, im aolep en̄jake ko rekōmettak im en̄taan eo kwe im n̄a jan̄in iooni im aolep ro me rekar mour ak renaaj mour ilo mour in. Ium̧win eddo eo an eddo in elukkuun kōmettak, bōtōktōk rekar to̧o̧rļo̧k jān aolep ron̄ in menokadu in Ānbwinnin [lale Katak im Bujen Ko 19:18] Aolepen en̄taan ko rekar ļapļo̧k ke Ekar dōbwāāl ioon dōbwāāl eo ioon Calvary” (“Jim̧we in Etan Kabun̄ in,” Liaona, Nob. 2018, 88).

2. Lale Jon 16:33; Pilipai 4:13.

3. Rom 8:35, 37; eoon eo eaorōk kar kobaikitok.

4. Russell M. Nelson, “Anij En Anjo̧,” Liaona, Nob. 2020, 95.

5. Lale Aiseia 41:10; 2 Nipai 8:7.

6. Lale Exodus 3:7–8.

7. Lale Duteronomi 31:6.

8. Lale Katak im Bujen Ko 109:22.

9. Lale Joshua 3:5.

10. Lale Matu 11:28; Katak im Bujen Ko 19:23; Moses 6:34.

11. Lale Katak im Bujen Ko 38:7.

12. Lale Aiseia 43:1.

13. Aiseia 43:4; eoon eo eaorōk kar kobaiktok.

14. Malakai 4:2.

15. Elder Dale G. Renlund ekar kam̧oole bwe “aolep men ko me rejjab jetjet kōn mour in maron̄ kajim̧we kōn Pinmuur eo an Jisōs Kraist” (“Illu kōn Kalijōkļo̧k,” Liaona, Māe 2021, 43); bar lale Preach My Gospel: A Guide to Missionary Service [2019], 52; Aiseia 61:1–3; Revelesōn 21:4).

16. Lale Katak im Bujen Ko 88:6; 122:5–8.

17. Lale Alma 18:32; 39:8.

18. Lale 2 Nipai 9:17; Katak im Bujen Ko 1:1–3.

19. Matu 18:6. “Men eo enana, kōm̧m̧an jerbal in ko̧kkure ko an m̧ōm̧ in kanniōk ej … ilōn̄inļo̧k jeļā ko ad. …. Ej juon ko̧kkure n̄an men eo ekwojarjar im kwojarjar. … Ej juon men eo enana im ej juon jerawiwi eļap. Kajjookok n̄an jabdewōt em̧m̧aan ak kōrā ro me rej ko̧kkure ajri ro kōn m̧ōm̧ an kanniōk. Ilo kōm̧m̧ane menin, riko̧kkure ro rejjab kōm̧m̧ane wōt joreen in eļap. E ej barāinwōt kaje im̧aan mejān Irooj” (Gordon B. Hinckley, “Save the Children,” Ensign, Nov. 1994, 54).

20. Russell M. Nelson, “Jim̧we in Etan Kabun̄ in,” 88.

21. Jon 10:10.

22. Lale Luk 4:16–19.