Bwilōn̄ kōn Jisōs Kraist im gospel eo An
Jen keememej ta eo mejād ekar loe im būruōd ekar en̄jake me ekar kōļapļo̧k bwilōn̄ eo ad ilo katok in pinmuur eo an Rilo̧mo̧o̧r.
Ewōr juon m̧ōtta ejitōnbōro, eo eperan, ekar juon rūkaki in university, rijeje etijem̧ļo̧k, im, ilon̄inļo̧k aolep men otemjej, juon rikaļoor an Jisōs Kraist eo me eļap an wūjlepļo̧k. E ekar loļo̧k Āne Ekwojarjar elōn̄ alen bwe en bōk koņaan ilo kweilo̧k ko, kōm̧m̧ani ekkatak in etale ko, im tōl kajineet ko. Ekkar n̄an e, aolep iien ej loļo̧k āne eo ijo Jisōs ekar etetal ie, ej bwilōn̄ kōnke ekar ekkatak men ko rekāāl ilo ejjeļo̧k pere, lukkuun bwilōn̄, im itok limoin kōn Rilo̧mo̧o̧r, jerbal in karejar eo An ioon laļ in, im lāmoren eo An eaorōk Ippān. Bwilōn̄ in me eo m̧ōtta ej kwaļo̧k n̄e ej kōnono kōn aolep men ko ej ekkatak ilo Āne Ekwojarjar eo ekkapaļ armej, im bwilōn̄ in elakkar juon pedped in kōttōpar ko an reļļap im kōttōpar ko ikkijeen jeļāļo̧kjeņ ilo mour in.
Ke ikar ron̄jake an kwaļo̧k en̄jake ko an im kar en̄jake itok limo eo an, ikar kejokļo̧kjeņ kōn ewi jon̄an menin bwilōn̄ ko an jetōb, āinwōt kōnono kake, me jemaron̄ im jej aikuj en̄jake kōn gospel eo an Jisōs Kraist me kar katakin kake im oktak ko emaron̄ kōm̧m̧an ilo ad mour āinwōt rikaļoor im ilo iaļ in ad ļo̧k n̄an mour indeeo. Bwilōn̄ in ij kōnono kake ej kōn en̄jake ko, bwilōn̄, ak lokjenad ekkā an waļo̧k n̄an aolep ro me rej wūjlepļo̧k mour ko aer n̄an Rilo̧mo̧o̧r im katak ko An im kile ilo ettā An pād ilo mour ko aer. Āinwōt juon en̄jake in bwilōn̄, im̧we eo an kareel eo Jetōb Kwojarjar, rej kōļapļo̧k itok limo eo n̄an lan̄lōn̄ ilo ad mour kōn katak ko an Kraist.1
Jeje ko rekwojarjar repād ie jejjo waanjon̄ak ko kōn ekōjkan an en̄jake in waļo̧k. Rikanaan Aiseia, n̄an waanjon̄ak, ekar kwaļo̧k kam̧m̧olool eo an em̧wūlaļ kōn Irooj kōn lan̄lōn̄ eo an ilo E.2 Ro rekar ron̄ an Jisōs kwaļo̧k naan ilo jikin jar eo ilo Capernaum rekar bwilōn̄ kōn katak ko An im kajoor eo me E ekar katakin kake.3 Ejja en̄jake eo wōt me ekar pejlo̧k ilo aolep eke in menono eo an rikanaan Josep Smith ke ej edik ke ekar riit jān Baibōļ eo jebta eo jinoin ilo Bok in Jemes, eo me ekar tōl e n̄an kappukot mālōtlōt eo an Anij.4
Ro jeiū im jatū, n̄e jej lukkuun m̧ool ilo ad bwilōn̄ kōn Jisōs Kraist im gospel eo An, jej m̧ōņōņōļo̧k, eļapļo̧k ad itok limo kōn jerbal eo an Anij, im jej kile pā ko pein Irooj ilo aolep men. N̄an kōmeļeļeik ļo̧k, ekkatak ko ad kōn naan ko an Anij eļapļo̧k meļeļeier; jar ko ad, eļapļo̧k unier; ad kabun̄ jar, eļapļo̧k kautiej; jerbal eo ad ilo aelōn̄ in kiin̄ eo an Anij, eļapļo̧k tiljek. Aolep kōm̧m̧an kein rej jipan̄ im̧we eo an Jetōb Kwojarjar bwe en emakijkij ļo̧k an pād ilo mour ko ad.5 Kōn menin, naan in kam̧ool ko ad kōn Rilo̧mo̧o̧r im gospel eo An renaaj kajoor ļo̧k, jenaaj kōmour wōt Kraist ilo mour ko ad,6 im jenaaj mour mour ko ad “bwe em̧ōj likūt okram̧ ilo E im kalōk kom̧ ilo E, im kom̧win pen ilo tōmak, … im en ļap ami kam̧m̧oolol.”7 N̄e jej mour ilo wāween in, eļapļo̧k wōt ad kajoor ilo jetōb im pād ilo kōjparok eo ņae po ilo aujiid ko an jab itok limo ilo jetōb.
Kain jab ikdeelel in ej kwaļo̧k kadkadin an jako itok limo ko ad n̄an lukkuun bōk koņaad ilo gospel eo an Irooj. Ilo m̧ool ej ijjino n̄e jej en̄jake bwe em̧ōj ad kadede bōk aolep jeļā ko remenin aikuj im kōjeraam̧m̧an ko n̄an m̧ōņōņō ko ad ilo mour in. Jab ju bōro in, āinwōt kōnono kake, ej kōm̧m̧an bwe jen bōk menin letok ko an gospel in ilo ad kajejtokjeņ, im jān iien in im wōnm̧aanļo̧k, jej pād ilo kauwōtata ilo ad kajejtokjeņ jim̧or ad kōmaat ad ilo men ko raorōk an gospel eo an Jisōs Kraist8 im bujen ko jekar kōm̧m̧ani. Tōprak in, jidik kōn jidik jej kattoļo̧k kōj jān Irooj, kōm̧ōjņoik maron̄ ko ad n̄an “Ron̄jake E,”9 oktak im jab ļōmņak n̄an em̧m̧an eo an jerbal in An. Pere kōn m̧ool ko em̧ōj ad būki kadede maron̄ deļo̧n̄ ilo ad ļōmņak im bōro, kōm̧m̧an bwe en pidodo ad po ilo kapo ko.10
Pastor Aiden Wilson Tozer, juon rijeje ebun̄bun̄ im rikūrijtin eperan, ekar je, “Ju bōro kōn jeram̧m̧an ko ad make ej juon menin jum̧ae n̄an aolep eddōkļo̧k ko ilo jetōb.”11 Ejjab ke men eo in ekar waļo̧k n̄an armej in Nipai ro ejjab to ālkin wōt ļotak eo an Kraist? Rekar “jino aer dik im dikļo̧k aer bwilōn̄ kōn juon kōkaļļe im juon menin bwilōn̄ jān lan̄, … [jab tōmak] aolep men ko me rekar ron̄ im loe.” Kōn menin Setan ekar “kapiloik mej ko im tōl er bwe ren jab tōmak ke katak ko an Kraist rekar juon menin bwebwe im juon men ejjeļo̧k tokjen.”12
Ro jeiū im jatū rejitōnbōro, ilo iakwe eo an ewāppen im ejjeļo̧k jem̧ļo̧kin im jeļā kōn piktokid kōj armej,13 Rilo̧mo̧o̧r eo ekar ejaake juon wāween n̄an kōj n̄an bōbrae kōj jān ad wōtļo̧k ilo aujiid in jab kea kōn mour in jetōb. Kūr eo an Rilo̧mo̧o̧r eo ej letok n̄an kōj juon erreim̧aanļo̧k edepakpak, eļaptata ļōmņak kōn juon laļ etarpok eo me jej mour ie: “Ekkatak jān Eō, im ron̄jaki naan ko Aō; etetal ilo ettā im Jetōb eo Aō, im enaaj wōr am aeņōm̧m̧an ilo N̄a.”14 Ilo ad eo̧ron̄ kūr eo an Rilo̧mo̧o̧r, jej kwaļo̧k ad ettā, ad ikdelel n̄an maron̄ katakin, im ad kōjatdikdik n̄an erom̧ āinwōt E.15 Kūr in ej barāinwōt kitbuuj jerbal n̄an E im jerbal in karejar n̄an ajri ro nejin Anij “kōn aolepen [buruōd], maron̄, ļōmņak, im kajoor.”16 Men eo eļap ilo kijejeto ko ad ilo iaļ in rej, em̧ool, kien ko ruo reļļap: n̄an iakwe Irooj ad Anij im iakwe ro rūtūrid āinwōt kōj make.17
Kain m̧wil in ej m̧ōttan m̧wil ko an Jisōs rekwojarjar im kar kam̧ool ilo aolep men ko E ekar kōm̧m̧an ilo iien an kar kwaļo̧k naan ilo mour in.18 Kōn menin, n̄e jej lukkuun kōttōpar im m̧ool ilo ad wūjlepļo̧k kōj make n̄an reilo̧k n̄an E im ekkatak jān waanjon̄ak eo an ewāppen,19 enej em̧m̧an ad jeļā eļapļo̧k kōn E. Jej eddōkļo̧k ilo itok limo im ikdeleel n̄an kobaiki bwe en m̧ōttan mour ko ad jon̄ak ko routiej kōn wāween ad aikuj mour, waanjon̄ak ko jej aikuj kwaļo̧ki, im kien ko jej aikuj ļoori. Jej barāinwōt bōk eļapļo̧k meļeļe ko, mālōtlōt, im m̧wil ko rekwojarjar, im jouj n̄an Anij im ro ritūrūr.20 Imaron̄ kam̧ool n̄an eok bwe maron̄ n̄an en̄jake im̧we im iakwe eo an Rilo̧mo̧o̧r enaaj ļapļo̧k ilo mour ko ad, kōļapļo̧k tōmak eo ad, ad ikdeleel n̄an kōm̧m̧an jim̧we, im kōketak n̄an jipan̄ E im ro jet.21 N̄an kōmeļeļeik ļo̧k, ad kam̧m̧olool kōn kōjeraam̧m̧an ko im idajon̄jon̄ ko jej jelm̧aei ilo mour in renaaj pen im erom̧ m̧ōttan kabun̄ jar eo ad em̧ool.22
Ro m̧ōtta jitōnbōro, aolep men kein rej kōkajoorļo̧k bwilōn̄ eo ad ilo jetōb kōn gospel eo im ej kōm̧akūt kōj n̄an lan̄lōn̄ ilo ad dāpij bujen ko jej kōm̧m̧ani ippān Irooj—ilubwiljin mellijon̄ im idajon̄jon̄ ko jej iooni. Aaet, kōn aolep tōprak kein rej waļo̧k, jej aikuj leļo̧k ad make kōn tōmak im m̧ool in kōttōpar ilo katak ko an Rilo̧mo̧o̧r,23 kajjieon̄ bwe m̧wil ko An ren m̧ōttan mour ko ad ilo wāween ad mour.24 N̄an kōmeļeļeik ļo̧k, jej aikuj kepaakeļo̧k E ilo ad ukweļo̧k,25 kappukot jeorļo̧k bōd im kajoor in pinmuur eo An ilo mour ko ad im kōjparok kien ko An. Irooj make ekar kallim̧ur bwe E enaaj tōl iaļ ko ad eļan̄n̄e jej lōke ilo E kōn aolepen buruōd, kile E ilo aolep wāween ko im jab atartar ilo jeļāļo̧kjeņ eo ad make.26
Juon em̧m̧aan ij kab kar ioone, eo etan in Wes im eo epād ilo kweilo̧k in kiiō, ekar bōk kūr eo an Kraist n̄an ekkatak kōn E im gospel eo An im ekar jino en̄jake an bwilōn̄ kōn iakwe eo An ālkin 27 iiō ko an kattoļo̧k e make jān iaļan bujen eo. Ekar ba n̄an eō bwe juon raan ekar kōnono ilo Facebook ippān juon mijinede, Elder Jones, eo kar jitōn̄e bwe en tin jerbal ilo bukwōn eo an Wes m̧okta jān an etal n̄an lukkuun mijen eo an ilo Panama. Ke Elder Jones ekar jeļā kōn Wes, ilo an kar jab jeļā ke ekar juon membōr in Kabun̄ in, ekar en̄jake tōl eo an Jetōb Kwojarjar im kar jeļā bwe ej aikuj kajju tōpar Wes. E ekar m̧okaj an kōm̧m̧an ekkar n̄an im̧we in. Wes ekar bwilōn̄ ilo an jab kōtmene ke en kar ioon mijenede in im ekar jino kile bwe Irooj ekar jeļā kōn e jekdo̧o̧n ettoļo̧k eo an jān iaļan bujen eo.
Jān iien eo m̧aanļo̧k, Wes im mijinede ro rekar jino emakijkij aer leto letak meļeļe ko. Elder Jones im kōmpanien eo an rekar leļo̧k jerbal in jipan̄ ko im ennaan ko an jetōb me rekar jipan̄ Wes n̄an bar en̄jake an bwilōn̄ kōn Rilo̧mo̧o̧r im gospel eo An. Ej kōjjoe kijeek in naan in kam̧ool eo an kōn m̧ool eo im iakwe eo an Rilo̧mo̧o̧r n̄an e. Wes ekar en̄jake bwe ej itok jān Rikaeņōm̧m̧an eo im ekar bōk kajoor eo ekar aikuji n̄an jepļaak n̄an oror eo. Ekar ba n̄an eō bwe en̄jake eo An ekar bōktok n̄an e men ko bwinnin jetōb im en̄jake kōn mour im ekar jipan̄ e joļo̧k en̄jake ko renana me eto an mour kaki ilo aolepen iiō ko kōn en̄jake ko reppen me ekar iooni.
Ilo an kar eo rūkaki ni m̧ōttan kar ba m̧oktaļo̧k ar etale, ekar wōr juon men em̧m̧an aolep iien im ekaitoktok limo n̄an ekkatak kōn Jisōs Kraist im gospel eo An.27 Irooj ekar kōm̧m̧ani kallim̧ur ko raibojooj me rej n̄an aolep ro me, ekoba kōj, ro rej kappukot n̄an ekkatak kōn E im kobaiki naan ko An bwe ren m̧ōttan ļo̧k mour ko ad. Ekkar n̄an Inōk ekar ba, “Lo Aō Jetōb [enaaj] pād ioom, kōn menin aolep naan ko am Inaaj kajejjeti; im toļ ko renaaj ko im̧aam, im reba ko renaaj oktak jān aer to̧o̧rļo̧k; im kwo naaj jokwe ilo N̄a, im N̄a ilo kwe; kōn menin etetal Ippa.”28 Kōn eo Karejeran Kiin̄ Benjamin, E ekar kwaļo̧k, “Naaj ān̄inn̄in kom̧ kōrā ro nejin Kraist, m̧aan ro nejin, im kōrā ro nejin; bwe lo, rainin Eaar keotak kom̧ ilo jetōb; bwe kom̧ij ba bwe būruōmi raar oktak kōn tōmak ilo Etan; kōn menin, kom̧ij ļotak ilo E im kar erom m̧aan ro im kōrā ro nejin.”29
Kōn menin, ilo ad kajjieon̄ ilo m̧ool im wōnm̧aanļo̧k wōt n̄an ekkatak kōn Rilo̧mo̧o̧r im ļoor waanjon̄ak eo An, ij kallim̧uri eok, ilo et eo Etan, bwe m̧wil ko Mwilin rekwojarjar renaaj jeje ilo kōļmenļo̧kjeņ ko ad im buruōd,30 bwe jenaaj erom̧ āinwōt E, im bwe jenaaj etetal Ippān.31
Ro jeiū im jatū rejitōn bōro, ij jar bwe jenaaj aolep jutak pen ilo Jisōs Kraist ilo ad bwilōn̄ kōn Jisōs Kraist im iakwe eo An elikio, ejjeļo̧k jem̧ļo̧kin, im ewāppen. Jen keememej ta ko mejād rekar loi im buruōd rekar ļap aer en̄jake bwilōn̄ in kōn katok in pinmuur eo an Jisōs Kraist, eo emaron̄ kōmour kōj jān kinej ilo jetōb im en̄jake im jipan̄ kōj epaakeļo̧k E. Jen aolep lo̧kjenad kōn kallim̧ur ko reļļap me epād ilubūden pein Jemed im bwe E ekar kōpooj n̄an ro rej tiljek:
“Aelōn̄ in kiin̄ eo ej ami im kōjeraam̧m̧an ko ie rej ami, im m̧weiie ko an indeeo rej ami.
Im e eo ej bōk aolep men ko otemjeļo̧k kōn kam̧m̧oolol naaj kōm̧m̧an bwe en wōj.”32
Jisōs ej Ripinmuur eo an laļ, im en̄in ej kabun̄ eo An. Ij kwaļo̧k aō kam̧ool bwe m̧ool kein ilo im̧we eo ekabwilōn̄lōn̄, ekwojarjar, im et eo ettā an ad Rilo̧mo̧o̧r, Jisōs Kraist, amen.