Pija in Alooj eo: “Kom̧ij Kōrā Ro Eaar Kanaan Kake Er!
Ilo 1979 Būreejtōn Spencer W. Kimball ekar pād ilo aujipital im ekar kajjitōk ippān kōrā eo pāleen, Camilla, n̄an riiti kōnono eo an n̄an juon kweilo̧k eļap an kōrā ro.
Sister Camilla Kimball: “Elōn̄ iaan wōnm̧aanļo̧k ko reļļap rej waļo̧k ilo kabun̄ in ilo raan ko āliktata kōnke elōn̄ kōrā ro rem̧m̧an ilo laļin (ilo er ewōr ippāer kain en̄jake in ilo jetōb) renaaj kobatok ilo Kabun̄ in kōn oran bōnbōn eo eļap. Menin enaaj bōk jikin n̄an jon̄an eo me kōrā ro ilo Kabun̄ in renaaj romak kōn wāppen im bōk koņaer ilo mour ko aer n̄an jon̄an eo me kōrā ro jet ilo Kabun̄ in rej loe er āinwōt rejenolo̧k im oktak—ilo wāween ko rekam̧ōņōņō—jān kōrā ro jet ilo laļ in.”1
Būreejtōn Russell M. Nelson: “Kōrā ro jeiū im jatū rejitōn bōro, kom̧ij rijipan̄ ro reaorōk ilo raan kein āliktata, raan eo me Būreejton Kimball eaar kanaan kake er ej rainin. Kom̧ij kōrā ro eaar kanaan kake er! Ami wānōk, meram, iakwe, jel̗ālokjeņ, peran, m̧wil, tōmak, im weppān ilo mour enaaj boktok elōn̄ļo̧k kōrā ro rem̧m̧an ilo laļ in, ippāntok baam̧le ko aer, n̄an Kabun̄ in kōn oran enaaj ļapļo̧k jān kar m̧okta!
“Jej … aikuj ami kajoor, ami oktaktok, ami kajoor in tōmak, ami maron̄ n̄an tōl, ami mālōtlōt, im ainikiōm̗i. Aelōn̄ in kiin̄ eo an Anij eban im ejjab maron̄ dedeļo̧k n̄e ejjeļo̧k kōrā ro rej kōm̧m̧ani bujen ko rekwojarjar innām kōjparoki, kōrā ro remaron̄ kōnono kōn kajoor im maron̄ eo an Anij!…
“… Jekdo̧o̧n kūr rot eo am̧i, jekdo̗o̗n ta jōkjōk ko kom̗ij pād ie, kōmij aikuji l̗ōmn̗ak ko ami, en̄jake ko ami, im ami im̗we. Jeaikuji kom̗ n̄an kōnono im kwal̗o̗k ainikiemi ilo iien kweilo̗k ko an ward im stake ko. Jeaikuji kajjojo sister ro em̧ōj aer m̧are ‘n̄an kōnono āinwōt ‘juon rijipan̄ im m̧ool n̄an eo m̧ōttan’ ilo ami ippān doon ippān ļōm̧aro pālemi n̄an tōl baam̧le ko ami. M̗are ak emake iaan, kom̗ sister ran̗ kom̗ij make wōt kōn maron̄ ko ami im jel̗ā eo em̗ōj ami bōke āinwōt menin letok ko jān Anij. Kōm em̗m̗aan ro jeimi im jatimi rejjab maron̄ bōk im̧we kein ami rejenolo̗k.
“Jejel̗ā kōn kōm̗anm̗an eo em̗m̗an tata im el̗ap tata eaar kōm̗anm̗an eo an kōrā! Jej aikuji kajoor eo am̧!…
“…Ij kam̗m̗oolol kom̗, kōrā ro jeiu im jatū, im kōjeraam̗m̗an kom̗ ilo ami kōl̗apl̗o̗k im kwal̗o̗k jon̄ak ko ami, n̄an kakūrm̗ool jon̄an kōm̗anm̗an eo ami, ilo ami jibwe pein doon im etetal ilo jerbal in ekwojarjar. Ippān doon jenaaj jipan̄ kōpooj lal̗ in n̄an Itok eo Kein Karuo an Irooj.”2