Kōj Jej Kabun̄ eo an Jisōs Kraist im Armej ro Rekwojarjar ilo Raan Ko Āliktata
Kabun̄ in eļapļo̧k meļeļein jān baj im̧ōko reļļap im wāween tōl an kabun̄; Kabun̄ in ej kōj, membōr ro, kōn Kraist ilo jeban im rikanaan eo āinwōt rikōnono eo An.
Ālkin bōk juon kūr n̄an “itok im lale,”1 Ikar etal im jar ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata ej kab kein kajuon ke ekar 26 aō iiō. Ej kab m̧ōj aō jepel jān ļeo ippa kein kajuon. Ekar wōr juon nejū ļaddik jilu an iiō. Im ikar jab en̄jake kajoor kōn mijak. Ke ikar deļo̧n̄e m̧ōnjar eo, ikar obrak kōn okmāneen ke ikar kile tōmak eo im lan̄lōn̄ eo an armej ro raar jepooļ eō. Ilo m̧ool ekar “juon jikin ko jān ļan̄.”2 Jilu wiik tokālik, ikar kōm̧m̧ane bujen peptaij eo ippān Jemedwōj Ilan̄ im ikar jino iaļ eo aō āinwōt juon rikaļoor an Kraist, men̄e mour eo aō ekar jab wāppen ilo iaļ eo.
N̄an n̄a n̄an bōk kōjeraam̧m̧an kein an mour indeeo, ļamļam ko rellōn̄ an kanniōk im jetōb raar aikuj in koņ ilo jikier. Gospel eo an Jisōs Kraist em̧ōj an jepļaaktok im ekar kwaļo̧k; bwe m̧ōnjar ko em̧ōj aer ekkal im em̧ōj kōjparoki; ekar wōr juon wāween tōl an kabun̄, jān rikanaan eo n̄an ritōl ro ilo joko jikier; im juon branch ekar obrak kōn membōr in bujen ro raar pojak n̄an karuwaineneik eō im ļaddik eo nejū ke kar bōktok kōm n̄an Rilo̧mo̧o̧r, “naajdik er jān em̧m̧an eo an naan in Anij,”3 im kar leļo̧k iien ko rem̧m̧an n̄an jerbal.4
Jān jinoin, Anij ekar kappukot n̄an aiintok im kōlaajrake ajri ro nejin5 “n̄an bōktok [ad] mour in jab wabanban im mour indeeo.”6 Kōn jibadbad in ilo kōļmenļo̧kjeņ, E ekar katakin kōj n̄an kalōk jikin ko n̄an kabun̄jar7 ijo jej bōk jeļāļo̧kjeņ im kain̄i ko an lo̧mo̧o̧r im mour indeeo ippān Anij ilo aiboojoj eo eutiej tata; kōm̧m̧an im kōjparok bujen ko rej liāpe kōj n̄an Jisōs Kraist;8 rej letok kōn “kajoor in āinwōt anij”;9 im emakijkij koba ippān doon n̄an keememej im kōkajoorļo̧k doon ilo E.10 Ejaake eo an Kabun̄ in im m̧ōnjar ko an rej pād n̄an em̧m̧an ko an jetōb eo ad. “Kabun̄ in … ej rumej eo me jej kalōk baam̧le ko indeeo.”11
Ke ij kōnono ippān juon m̧ōtta eo me ekar jelm̧ae juon iien epen, ikar kajjitōk wāween an kar maron̄ mour ilo an apan̄ kōn jāān. Ej kōmjaļaaļ, ekar uwaak bwe bisop eo an ekar jipan̄ e kōjerbal jāān ko an joortak in jitlo̧k ko. Ekar bar ba, “Ijaje ia eo baam̧le eo aō im n̄a naaj kar pād ie eļan̄n̄e en kar jab Kabun̄ in.” Ikar uwaak, “Kabun̄ in ej membōr ro. Rej ro me rej m̧ōņōņō im lan̄lōn̄ ilo aer leļo̧k joortak in jitlo̧k ko n̄an jipan̄ ro me rej pād ilo aikuj. Kwoj bōk leen tōmak ko aer im kāālet n̄an ļoor Jisōs Kraist.”
Rikaļoor ro m̧ōtta an Kraist, jen jab pere jerbal in ekabwilōn̄lōn̄ me Irooj ej kōm̧m̧ane ilo an kōjerbal kōj, Kabun̄ eo An, jekdo̧o̧n likjab ko ad. Jet iien jej rileļo̧k ro im jet iien jej ritōllo̧k, ak jej aolep juon baam̧le ilo Kraist. Kabun̄ eo An ej juon jon̄ak Ekar letok n̄an tōl im kōjeraam̧m̧an kōj ilo ad kabun̄jar n̄an E im jerbal n̄an doon.
Jet sister rekar joļo̧k aer bōd n̄an eō, ļōmņak bwe rejjab membōr ro reniknik an Doulul eo an Kōrā ro kōnke rej jerbal ilo Būraimere ak Doulul eo an Jiron̄ ro. Sister rein rej ilubwiljin membōr ro reniknik ilo Doulul eo an Kōrā ro kōnke rej jipan̄ ajri ro rejitōnbōro im jodikdik ro kōkajoorļo̧k tōmak ko aer ilo Jisōs Kraist.
Doulul eo an Kōrā ro ejjab wōr jon̄an n̄an juon ruum̧ ilo juon m̧ōnjar, juon katak an Jabōt, juon m̧akūtkūt, ak juon būreejtōnji ilo ijo rej jokwe ie ak aolep jikin. Doulul eo an Kōrā ej kōrā in bujen ro an Kabun̄ in; ej kōj—kōj kajjojo im kōj aolep. Ej ad “jukjuk in pād in tūriam̧o im jerbal in jipan̄ ipeļaakin laļ in.”12 Jabdewōt jikin im aolep jikin jej etal n̄an e, jej aolep iien m̧ōttan Doulul eo an Kōrā ro ilo ad kajjieon̄ kakūrm̧ool jibadbad eo an ekwojarjar, eo ej n̄an kōrā ro n̄an kōttōbrak jerbal eo an Anij ilo wāween ko an kajjojo barāinwōt aolep13 `jān leļo̧k jipan̄, “deor jān jeram̧ōl, deor jān nan̄inmej; deor jān pere, deor jān kōjool—deor jān aolep men ko me rej bōbrae… lan̄lōn̄ im eddōkļo̧k.”14
Ejjeļo̧k oktak jān ta ko rej waļo̧k ilo doulul eo an elder ro im doulul ko an Kabun̄ in n̄an aolep iiō ko, ekoba ajri ro im jodikdik ro nejid. Kabun̄ in eļapļo̧k jān im̧ōko reļļap im jon̄ak ko an kabun̄; Kabun̄ in ej kōj, membōr ro. Kōj jej Kabun̄ eo an Jisōs Kraist im Armej ro Rekwojarjar ilo Raan Ko Āliktata, kōn Kraist ilo jeban im rikanaan eo āinwōt An rikōnono. Irooj eaar ba:
“Lo, en̄in ej katak eo Aō—jabdewōt eo ej ukeļo̧k im itok n̄an Ippa, ejja wōt ej kabun̄ eo Aō. …
“Im … jabdewōt eo ej jān kabun̄ eo Aō, im niknik ilo kabun̄ eo Aō n̄an jem̧ļo̧kin, e Inaaj kajutak e ioon Aō ejm̧aan.”15
Ro jeiū im jatū, jen kile ewi jon̄an ad jeraam̧m̧an bwe jej uwaan Kabun̄ eo an Jisōs Kraist, ijo jemaron̄ kobaik tōmak ko ad, bōro ko, kajoor ko, ļōmņak ko, im pā ko n̄an E n̄an kōm̧m̧ani menin bwilōn̄ ko rekajoor An. “Bwe ānbwin [Kabun̄ an Kraist] e jab juon ra, a elōn̄.”16
Juon ļaddik jodikdik ekar ba n̄an jinen, “Ke ikar dik, aolep iien ij leļo̧k juon dala ilo juon m̧ōttan jon̄oul, ikar ļōmņak bwe kōn juon daļa in naaj kalōk juon likio in m̧ōnjar. “Ejjab ke kōjak menin?”
Ekar jibwe, im ekar ba, “Elukkuun em̧m̧an! Kwar ke pijaik ļo̧k ilo kōļmenļo̧kjeņ eo am̧?”
“Aaet!” ekar ba. “Raiboojoj, im kar milien iaer!17
Ro m̧ōtta rejitōnbōro, en wōr ippād tōmak eo an āinwōt juon ajri im lan̄lōn̄ ilo jeļā bwe men̄e kijejeto ko ad reddik tata rej kōm̧m̧an juon oktak eaorōk ilo aelōn̄ in kiin̄ eo an Anij.
Jibadbad eo ad ilo aelōn̄ in kiin̄ eo An ej aikuj n̄an aiin tok doon n̄an Kraist. Ilo ad riiti ilo jeje ko rekwojarjar, Rilo̧mo̧o̧r ekar erļo̧ke kūr in n̄an Rinipai ro:
“Ewōr ke ami jabdewōt rinan̄inmej ilubwiljimi? Kom̧in bōktok er ije. Ewōr ke ami jabdewōt … rinan̄inmej ilubwiljimi? Kom̧in bōktok er ije im Inaaj kōmour er, bwe ewōr Aō tūriam̧okake kom̧; en̄jake ko Aō reobrak kōn tūriam̧o.
“… Bwe Ij lo bwe ami tōmak ebwe bwe in kemour kom̧.”18
Ejjab wōr ippān aolep kaen̄taanan ko me remaron̄ bōktok kōj n̄an neen Rilo̧mo̧o̧r ke? Ilo an jet iaad wōr kapan̄pan̄ ko ilo ānbwin, elōn̄ļo̧k rej tariņaeik en̄jake ko rankeke, ro jet ļon̄tak n̄an lali ekkeijel in kitōltōl ko aer, im jej aolep pukōt kakkije jidik n̄e jetōb ko ad rej idajon̄jon̄. Jej aolep en̄taan ilo elōn̄ kain wāween.
Jej riit bwe “aolep jarlepju eo, kōn juon wōt ainikien, raar wōnm̧aanļo̧k kōn rinan̄inmej ro aer im rim̧ōjņo ro aer, im … kōn aolep er ro raar m̧ōjņo ilo jabdewōt wāween otemjeļo̧k; im Eaar kōmour er otemjej ke raar bōk m̧aanļo̧k er n̄an E.
“Im raar kōm̧m̧an aolep, jim̧or er ro kar kōmour er im ro raar mour, bukwelōlō ineen, im raar kabun̄-jar n̄an E.”19
Jān juon ļaddik jidikdik eo me ej kōļļā juon m̧ōttan jon̄oul kōn tōmak n̄an juon m̧am̧a eo ejjeļo̧k pāleen, ej aikuj kajoor in jouj eo an Irooj n̄an juon baba eo ej apan̄ n̄an kakke aikuj ko an baam̧le eo an n̄an ro jibūd im jim̧aad ro me rej aikuj kain̄i in lo̧mo̧o̧r im mour indeeo ippān Anij ilo aiboojoj eo eutiej tata n̄an kōj kajjojo ro me rej kōkāāl bujen ko ippān Anij kajjojo wiik, jej aikuji doon, im jemaron̄ bōktok doon n̄an bōk kōmour in pinmuur eo an Rilo̧mo̧o̧r.
Ro jeiū im jatū, jen ļoor kūr in an Jisōs Kraist n̄an bōktok kōj make im en̄taan ko ad n̄an E. N̄e jej itok n̄an E im boktok ro jej iakwe er n̄an E, E ej lo tōmak eo ad. E enaaj kōmour er, im E enaaj kōmour kōj.
Āinwōt “rikaļoor ro an Kraist reineem̧m̧an,”20 kōj jej kajjieon̄ erom̧ “juon wōt ilo bōro im juon wōt ilo ļōmņak”21 im n̄an ettā bōro; jeļāņae; jouj; kipiliie; obrak kōn kem̧m̧aanwa im meanwōd; jatōr ilo aolep men; niknik ilo kōjparok kien ko an Anij ilo iien otemjeļo̧k; obrak kōn tōmak, kōjatdikdik, im iakwe em̧ool, im obrak kōn jerbal ko rem̧m̧an.22 Jej kajjieon̄ in erom̧ āinwōt Jisōs Kraist.
Ij kam̧ool bwe āinwōt Kabun̄ eo an Kraist, rej un ko kōn, āinwōt an kar Būreejtōn Nelson katakin “Rilo̧mo̧o̧r eo ad im Ripinmuur, Jisōs Kraist, enaaj kōm̧m̧ane jet iaan jerbal ko An rekajoor ikōtaan kiiō im iien eo Ej bar itok.”23
Irooj eaar ba:
“Lo, Inaaj kōm̧ōkaj jerbal eo Aō ilo iien eo an.
“Im Ij lewōj n̄an kom̧ … juon kien bwe kom̧in kuktok kom̧ make ippān doon, im karōk kom̧ make, im kōpooj kom̧ make, im kokwōjarjar kom̧ make; aaet, karreoik būruōmi, im kwaļ pā ko peimi im neemi Im̧aō, bwe In maron̄ karreoik kom̧.”24
Jemaron̄ uwaake kūr in ekwojarjar im lan̄lōn̄ n̄an aiin doon, ejaake, kōpooj, im karreoik kōj make ej jar eo aō ettā in ilo etan Jisōs Kraist, amen.