“Juļae 28–O̧kwōj 3: ‘Kajoor in Āinwōt Anij’: Katak im Bujen Ko 84,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Katak im Bujen Ko 84,” Itok, Ļoor Eō—N̄an M̧weeo im Kabun̄ in: 2025
Kōmeļeļe The Restoration of the Melchizedek Priesthood, jān Liz Lemon Swindle
Juļae 28–O̧kwōj 3: “Kajoor in Āinwōt Anij”
Katak im Bujen Ko 84
Jān iien eo ke priesthood eo ekar jepļaaktok ilo 1829 eo, Armej ro Rekwojarjar raar jeraam̧m̧an jān kajoor in ekwojarjar an Irooj. Raar peptaij, kar kapen, im kar kūr n̄an jerbal jān mālim eo an priesthood, ekanooj ainļo̧k wōt kōj rainin. Bōtaab kōn maron̄ eo n̄an tōpar priesthood eo ejjab āinwōt n̄e epidodo meļeļe kake, im elōn̄ļo̧k men Anij Ej kōņaan bwe Armej ro Rekwojarjar An ren meļeļe—eļaptata kōn jepļaaktok eo an kain̄i ko an tampeļ. Revelesōn eo ilo 1832 eo kōn priesthood eo, kiiō Katak im Bujen Ko 84, kar kōdepakpakļo̧k visōn eo an Armej ro Rekwojarjar kōn ta lukkuun in priesthood eo. Im emaron̄ in kōm̧m̧ane ejja āinwōt n̄an kōj rainin. Im ālkin men otemjeļo̧k, eļap ijo n̄an ekkatak kōn kajoor eo ekwojarjar me ej kabwijer “ki in jeļāļo̧kjeņ an Anij,” me ej kōm̧m̧an bwe en waļo̧k “kajoor in āinwōt anij,” im bwe ej kōpooj kōj n̄an “lo turin mejān Anij, em̧ool Jemān, im mour.” (eoon 19–22).
Ļōmnak ko n̄an Ekkatak ilo M̧weeo im ilo Kabun̄ in
Imaron̄ kōjerbal kajoor in priesthood eo an Anij im kōjeraam̧m̧an ko.
N̄e kwoj ļōmņak kōn naan eo priesthood, ta eo ej itok n̄an kōlmenļo̧kjeņ eo am̧? Elmen an kajoor in priesthood an Anij im̧we mour eo am̧?
Ālkin kōļmenļo̧kjeņ kōn kajjitōk kein, ekkatak Katak im Bujen Ko 84:17–32, kappukot ta eo Anij ej kōņaan bwe kwon jeļā kōn kajoor in priesthood eo An. Ļōmņak ekōjkan am̧ maron̄ kōjerbal eoon kein n̄an kōmeļeļeik priesthood eo im jibadbad eo an n̄an ro jet.
Juon men kwonaaj loe ej bwe jān kain̄i ko an priesthood “kajoor in āinwōt anij ej waļo̧k” (lale eoon 19–21). Bōlen kwomaron̄ kalaajrake kain̄i ko em̧ōj am̧ kar kōm̧m̧ani ilo (laajrak eo ilo Bok in Bōk Meļeļe Eļap, 18.1, 18.2, emaron̄ jipan̄). Elmen an kar kain̄i kein—im bujen ko rej ekkeijel ippāer—boktok kajoor an Anij n̄an mour eo am̧? Elmen naaj kar jekjekin mour eo am̧ ilo an ejjeļo̧k men kein?
Būreejtōn Russell M. Nelson ekar katakin: “Aolep kōrā ro im aolep em̧m̧aan ro me rej kōm̧m̧ani bujen ko ippān Anij im kōjparok bujen kein, im ro rej bōk kain̄i ko an priesthood eo ilo erreo, ewōr aer maron̄ in deļo̧n̄e kajoor eo an Anij” (“Mennin Aorōk ko ilo Jetōb,” Liaona, Nob. 2019, 77). Ļōm̧nak in ekkatak enaan eo an Būreejtōn Nelson, kappukot wāween ko kwomaron̄ “kan̄oltok kajoor eo an Rilo̧mo̧o̧r ilo mour eo [Am̧].”
Bar lale Katak im Bujen Ko 25:10, 13, 15; 121:34–37, 41–46; Topics and Questions, “Priesthood,” “Joseph Smith’s Teachings about Priesthood, Temples, and Women,” Gospel Library; Bok in Bōk Meļeļe Eļap, 3.6, Gospel Library.
Priesthood eo ej letok n̄an kōj juon kallim̧ur im bujen.
Kallim̧ur im bujen eo an priesthood eo (lale Katak im Bujen Ko 84:31–44) ewōr juon jerbal ejenolo̧k n̄an ļaddik ro nejin Jemedwōj Ilan̄ ro raar kapit er n̄an opiij eo an priesthood, bōtaab elōn̄ iaan kōjeraam̧m̧an kein kar kallim̧ur kaki ilo eoon kein rej pelļo̧k n̄an aolep ro nejin Anij. Ta kallim̧ur kein, im ta eo Anij ej kajjitōk bwe jen kōm̧m̧ane n̄an bōki?
Elder Paul B. Pieper eaar katakin “Ekaitoktok limo bwe ilo kallim̧ur eo im bujen eo an priesthood eo [lale Katak im Bujen Ko 84:31–42], Irooj ej kōjerbal naan ko bōki im bōk. Ejjab kōjerbal naan eo kapiti. Ilo tampeļ eo me em̧m̧aan ro im kōrā ro—jim̧or ippān doon—bōki im bōk kōjeraam̧m̧an ko im kajoor eo an jim̧or Priesthood ko an Aron im Melkesidek” (“Revealed Realities of Mortality,” Ensign, Jan. 2016, 21).
Ilo am̧ ekkatak Katak im Bujen Ko 84:31–44, ļōmņak meļeļein menin n̄an “bōki” im “bōk”. Ekōjkan an menin oktak jān n̄e juon ej ekkapit n̄an juon opiij an priesthood? Ewōr bar ta Irooj ej kajjitōk ippam̧ n̄an bōk jān eoon kein? Ekōjkan am̧ kōm̧m̧ane menin?
Ta eo kwoj loe me ej im̧we eok bwe kwōn tiljek ļo̧k ilo bōk Rilo̧mo̧o̧r, Jemān, rikarejar ro An, im kajoor in priesthood eo An?
Bar lale Katak im Bujen Ko 121:36–46.
Mour jān naan eo an Anij ej boktok meram im m̧ool n̄an mour eo aō.
Ta m̧ool ko kwoj loi ilo Katak im Bujen Ko 84:43–61 me ej jipan̄ eok meļeļe etke kwoj aikuj ekkatak naan ko an Anij aolep iien. Kile oktak eo ikōtaan meram im marok ilo eoon kein; ekōjkan an kar “tiljek eo̧ron̄e naan ko an mour indeeo” eo am̧ kar bōktok meram, m̧ool im “Jitōbōn Jisōs Kraist” n̄an mour eo am̧? (eoon 43, 45).
Bar lale 2 Nipai 32:3.
Keidi pedped ko an gospel eo n̄an men ko kwojeļā kaki. Kwomaron̄ ke ļōmņake juon kein ekkatak me ej kwaļo̧k m̧ool ko ilo eoon 43–44? N̄an waanjon̄ak, ekōjkan n̄an ļo̧o̧re aolep bun̄ten ko ilo juon iiōkin m̧ōn̄ā āinwōt “kōn naan otemjej … jān Anij”?
“Tiljek eo̧ron̄e naan ko an mour indeeo.”
Irooj enaaj pād ippa n̄e ij pād ilo jerbal eo An.
Ilo am̧ riiti eoon kein, kwomaron̄ loe jet wāween ko Irooj eaar ba E enaaj rie rikarejer ro An. Ekōjkan an kallim̧ur kein maron̄ kōjerbali n̄an jerbal eo Eaar kajjitōk ippam̧ n̄an kōm̧m̧ane? N̄an waanjon̄ak, ekōjkan an kallim̧ur ko ilo eoon 88 kar kūrm̧ool ilo mour eo am̧?
Aolep remaron̄ bōk koņaer ilo jerbal in an Anij.
Ta eo kwoj ekkatak jān eoon kein kōn wāween an Irooj kōttōprak jerbal eo An? Ta kakpilōklōk ko im kōjeraam̧m̧an ko kwoj loi? Kwomaron̄ bar ļōmņak kōn wāween am̧ kar “kōketake ilo aolep ettā” kōnke kwaar jerbal ippān juon eo e “kajoor ilo Jetōb eo,” ekoba armij ro ilo baam̧le eo am̧.
N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Ļōmņak ko n̄an Katakin Ajri ro
Kain̄i ko an tampeļ rej jipan̄ eō keppopo n̄an bar mour ippān Jemedwōj Ilan̄.
-
N̄an jipan̄ ajri ro nejūm̧ reim̧aanļo̧k n̄an aer etal n̄an tampeļ, kwomaron̄ ejake juon bajōļ kōn pijaan tampeļ. Ilo likin kajjojo bajōļ, kwomaron̄ je juon men me jej kōm̧m̧ane ilo tampeļ eo, āinwōt peptaij kōn ro jibūd im jim̧m̧ad, liāp ippān baam̧le ko ad, im kōm̧m̧an bujen ippān Anij. Riiti Katak im Bujen Ko 84:4–5 ippān ajri ro nejūm̧, im kajjitōk ippāer bwe ren ron̄jake ta eo Irooj ekar kakien Rikwojarjar ro n̄an kalōke. Ilo amian̄ ajri ro nejūm̧ kōm̧m̧ane bajōļ in ippān doon, kwaļo̧k n̄an doon men ko jemaron̄ kōm̧m̧ani n̄an keppopo n̄an deļo̧n̄e tampeļ eo.
Imaron̄ bōk kajoor eo an Jemedwōj Ilan̄ jān kain̄i ko an priesthood.
-
N̄an jipan̄ ajri ro meļeļe ta in kain̄i, ļōm̧ņak in lale pija in jet kain̄i ko an priesthood ippāer, āinwōt Bok in Gospel Pija, nos. 103–8, ak an wiik in peij in m̧akūtkūt. Kajjitōk ippāer n̄an kōmeļeļeik ta eo ej waļo̧k ilo kajjojo pija. Innām kwomaron̄ riit ippān doon Katak im Bujen Ko 84:19–22. Etke Jemedwōj Ilan̄ ej ekōņaan bwe jen bōki kain̄i kein? Jiron̄ ajri ro nejūm̧ kōn wāween am̧ kar en̄jake kajoor an Anij kōnke kōn kain̄i ko kwaar bōki im bujen ko kwaar kōm̧m̧ani. (Bar lale “Kajoor an Priesthood, Mālim, im Kii” ilo appendix A ak appendix B.)
Ij juon m̧ōttan Jisōs ilo aō ļoore E.
-
Ālkin riiti Katak im Bujen Ko 84:77 ippān doon, kajjitōk ippān ajri ro nejūm kōn ta meļeļein n̄an erom̧ juon eo m̧ōttan. Kwomaron̄ kōnono kōn ro m̧ōttam̧ rem̧m̧an. Elmen an Jisōs kwaļo̧k n̄an kōj bwe E ekōņaan bwe jen ro M̧ōttan? Elmen ad maron̄ kwaļo̧k ke jej bar kōņaan menin? Juon al āinwōt “I’m Trying to Be like Jesus” (Children’s Songbook, 78–79) emaron̄ jipan̄ ilo ekōnono in.
Jemedwōj Ilan̄ ej jipan̄ rikarejar ro An.
-
Ajri ro nejum̧ remaron̄ itok limoier ilo ron̄jake kōn wāween an mijenede ro kar jipan̄ eok, baam̧le eo am̧, ak ro jibum̧ im jim̧m̧am̧ bōk gospel eo. Innām kwomaron̄ riit kōn juon kallim̧ur eo ejeno̧lo̧k Irooj eaar kōm̧m̧ane n̄an mijenede ro ilo Katak im Bujen Ko 84:88. Bōlen ajri ro nejūm̧ rej maron̄ lōmņak kōn m̧akūtkūt ko me rej ekkeijel ippān eoon in. Ļōmņak in kwaļo̧k kōn juon iien me kwaar jerbal n̄an Irooj im kar en̄jake An kar pād ippam̧, āinwōt kar kōmeļeļeiki ilo eoon 88. Kwomaron̄ bar jipan̄ ajri ro nejūm̧ ļōmņak kōn wāween ko me remaron̄ erom̧ mijenede kiiō. Kam̧ool bwe Jemedwōj Ilan̄ ej jipan̄ kōj jeļā ta eo jen ba n̄e jej kōnono ippān ro jet kōn Jisōs Kraist.
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.
Rome Italy Tampeļ