“O̧kwōj 11–17: ‘Kajutak … juon Im̧ōn Anij’: Katak im Bujen Ko 88,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Katak im Bujen Ko 88,” Itok, Ļoor Eō—N̄an M̧weeo im Kabun̄ in: 2025
Jikuuļ eo an Rikanaan ro ekar bōk jikin ilo ruum̧ in.
O̧kwōj 11–17: “Kajutak … juon Im̧ōn Anij”
Katak im Bujen Ko 88
Ekkā an, Irooj letok n̄an kōj jidik in An “utiej im kajoor” ejeļo̧k jem̧ļo̧kin (Katak im Bujen Ko 88:47) ilo revelesōn ko. Katak im Bujen Ko 88 ej kain revelesōn in—juon eo kōn meram im aiboojoj im aelōn̄ in kiin̄ ko me remaron̄ kōm̧m̧an bwe kea ko ad ilo mour in ren āinwōt reddik ilo keidi. Jekdo̧o̧n n̄e jejjab maron̄ meļeļe aolepen, jemaron̄ en̄jake n̄e ewōr men eļapļo̧k kōn mour indeeo me jejjab jeļā. Aaet, Irooj ejjab jeere m̧ool kein reļļap n̄an kakor kōj ak kōm̧m̧an ad en̄jake edik. Ilo m̧ool, E eaar kallim̧ur, “Raan eo enaaj itok n̄e kom̧ naaj meļeļe em̧ool Anij” (eoon 49; naan ko kar kobaiktok). Bōlen ekar n̄an jem̧ļo̧k eo eaiboojoj me Irooj eaar kakien Rikwojarjar ro An ilo Kirtland n̄an ejaake Jikuuļ eo an Rikanaan ro. “Karōke kom̧ make,” Eaar ba. “Kōpooj kajjojo mennin aikuj, im kajutak … juon im̧ōn Anij” (eoon 119). Eļapļo̧k jān ijoko jabdewōt, ej pād iloan m̧weeo im̧ōn Anij—im ilo m̧oko m̧ōd—me E emaron̄ lelōn̄ļo̧k visōn ko ad jān men ko an mour in, “joļo̧k jān pinjān mejān n̄an [kōj],,” im keppooj kōj n̄an “pokake kien eo an aelōn̄ selestial” (eoon 68, 22).
Lale Saints, 1:164–66.
Ļōmnak ko n̄an Ekkatak ilo M̧weeo im ilo Kabun̄ in
Jisōs Kraist ej letok n̄an eō aenōm̧m̧an.
Jejjo raan ālkin kakkōl eo kōn tariņae eo enaaj kar “lutōkleplepļo̧k ioon aolep laļ ko” (Katak im Bujen Ko 87:2), Irooj eaar leļo̧k juon revelesōn me Josep Smith ekar ņaetan juon “‘bilkōn wōjke olive’,” eo ej juon kakōļļe in aenōm̧m̧an (Katak im Bujen Ko 88, kōmeļeļe an jekjōn eo; bar lale Genesis 8:11). Ilo ekkatak eo am̧ kōn jekjōn 88 wiik in, kappukot enaan ko an Irooj n̄an eok kōn aenōm̧m̧an.
Meram im kien rej itok jān Jisōs Kraist.
Naan ko meram im kien rej āliji elōn̄ kōttan ilo jekjōn 88. Kakōļļeik ak keememej eoon ko ijo kwoj loi naan kein ilo eoon 6–67, im je ta eo kwoj ekkatak kōn meram im kien—im kōn Jisōs Kraist. Ta eo kwoj en̄jaake an im̧we n̄an kōm̧m̧ane n̄an bōk meram im mour kōn “kien eo an Kraist,”? (eoon 21).
Bar lale Aiseia 60:19; Jon 1:1–9; 3 Nipai 15:9; Timothy J. Dyches, “Meram ej Eddāp n̄an Meram,” Liaona, Māe 2021, 112–15; Sharon Eubank, “Kraist: Meram eo Me ej Romaak ilo Marok,” Liaona, Māe 2019, 73–76.
Jeje ko rekwojarjar epād ie kien eo an Kraist.
“Kom̧in kepaaktok eō.”
En̄jaake ta ko raar kwaļo̧k n̄an eok bwe kallim̧ur ko ilo eoon kein rej m̧ool? Ta bun̄ten eo am̧ nej tokālik n̄an “kepaaktok” Kraist? Ļōm̧ņak in kōm̧m̧an bwe al eo “Nearer, My God, to Thee” (Hymns, no. 100) āinwōt juon m̧ōttan katak eo am̧ im kabun̄jar.
Ij maron̄ erreo kōn Pinmuur eo an Jisōs Kraist.
Irooj ekar kakien bwe “kom̧in kokwōjarjar kom̧” ej waļo̧k ruo kōttan ilo jekjen 88 (eoon ko 68, 74). Ilo am̧ ļōm̧ņak, ta meļeļein naan in? Kwoj maron̄ etale jet iaan ennaan ko iumin “Kokwōjarjar” ilo Unin Tōl eo n̄an Jeje ko Rekwojarjar (Gospel Library). Elmen ad erom̧ kwōjarjar? Kōtļo̧k bwe kajjitōk in en tōl ekkatak eo am̧ kōn Katak im Bujen Ko 88:67–76, im ļo̧o̧ke jabdewōt jeļā kwoj bōke ilo jetōb.
Katak im Bujen Ko 88:77–80, 118–26
“Kappukot jeļā em̧ool jān ekkatak im barāinwōt jān tōmak.”
Irooj ekar jiron̄ Rikwojarjar ro n̄an kalōk juon “jikuuļ an rikanaan ro” ilo Kirkland (Katak im Bujen Ko 88:137). Katak in ilo jekjōn 88 ekar katakin er kilen kōm̧m̧ane. Katak in emaron̄ bar jipan̄ eok “Kajutak … juon im̧ōn ekkatak” (eoon 119) ilo mour eo am̧ make. Em̧ool, kwoj maron̄ lale eoon 77–80 im 118–26 āinwōt juon elmakot n̄an “kōkāāl m̧weo im̧ōmi [ak mour ko ami] n̄an juon jikin ekkatak gospel eo,” im “juon jikin kone an tōmak.” (Russell M. Nelson, “Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” Liaona, Nob. 2018, 113). Ej maron̄ kaikdeleel n̄an jin̄aik ta “kōkāāl” eo am̧ emaron̄ āinwōt, ekoba naan ko jān eoon kein me kwoj en̄jaake ke kwoj aikuj būki n̄an mour kaki.
Ej maron̄ bar jipan̄ n̄an etale kajjitōk kein: Etke ekkatak im jeļāļo̧kjen eaorōk ippān Irooj?. Ta eo E kōņaaņ bwe in ekkatak? Ilo wāween rōt E kōņaaņ bwe in ekkatak? Kappukot uaak ko n̄an kajjitōk kein ilo eoon 77–80 im ilo “M̧ool enaaj kanemkwoj eok” (N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko, 30–33).
Ta meļeļein “jān katak im barāinwōt jān tōmak.” ilo am̧ ļōm̧ņak? (verse 118). Ta ļo̧m̧ņak ko kwoj boki jān enaan eo an Elder Mathias Held “Kappukot Jeļāļo̧kjeņ jān Jetōb eo”? (Liaona, Māe 2019, 31–33).
Bar lale Topics and Questions, “Seeking Truth and Avoiding Deception,” Gospel Library; “A School and an Endowment,” ilo Revelations in Context, 174–82.
N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Ļōmņak ko n̄an Katakin Ajri ro
Jemedwōj Ilan̄ ej letok mennin letok ko rem̧m̧an.
-
Kwoj maron̄ jino juon kōnono kōn Katak im Bujen Ko 88:33 ilo am̧ kajjitōk ippān ajri ro n̄an kōnono kōn mennin letok ko kar leļo̧k n̄an er—jim̧or ko raar bōke ilo m̧ōņōņō im ko jet rekar jab. Bōlen rej maron̄ kōm̧m̧ane āinwōt rej bōk juon mennin letok ilo m̧ōņōņō. Innem kwoj maron̄ kōnono kōn mennin letok ko Jemedwōj Ilan̄ ej letok n̄an kōj (āinwōt mennin letok eo an Jetōb Kwojarjar). Elmen ad bōk mennin letok kein ilo m̧ōņōņō?
N̄e ij kappukotļo̧k Rilo̧mo̧o̧r eo, inaaj lo E.
-
Katak im Bujen Ko 88:63 epād ie naan in m̧akūtkūt ko me remaron̄ im̧we jet ikkure ko relimo n̄an kōketak ajri ro n̄an kappukot Irooj ilo mour ko aer. N̄an waanjon̄ak, kwe im ajri ro maron̄ ļōm̧ņak kōn juon ikkure n̄an juon ekōnono kōn naan ko “niknik kappukot eō im kom̧ naaj lo eō” (naan ko kar kobaiktok) ak “kaļļaļļaļ, im enaaj peļļo̧k”?
Ajri rej aikuj elōn̄ kain men ko. Eitōn aolep ajri em̧m̧antata aer ekkatak n̄e elōn̄ļo̧k en̄jaake ko rej bōk jikier. Kappukot wāween ko n̄an jipan̄ ajri ro kōjerbal en̄jaake ko aer ilo loļo̧kjen, ron̄, im un̄n̄ur ilo aer ekkatak. Ilo jet jekjek, kwoj maron̄ bar lo wāween ko n̄an kobaik en̄jaake ko aer ilo kāātet im kōnāmām!” (Katakin ilo Wāween eo an Rilo̧mo̧o̧r, 32).
-
N̄an kameej karuwainene eo an Rilo̧mo̧o̧r n̄an “kepaaktok eō,” kwoj maron̄ kajjitōk ippān juon iaan ajri ro n̄an jibwe juon pija in Jisōs (āinwōt pija eo ilo jem̧ļo̧k in elmakot in) ilo juon jait ilo ruum̧ eo ilo an bar juon ajri jutak ilo jait eo juon. Ilo an ajri ro nejūm̧ ļōmņak kōn men ko rej maron̄ kōm̧m̧ani n̄an epaaketok Rilo̧mo̧o̧r, remaron̄ bōk juon bun̄ten nee m̧aanļo̧k n̄an pija eo, im ajri eo ej jibwe pija eo emaron̄ bōk juon bun̄ten nee m̧aanļo̧k n̄an ajri eo juon. Kōnono ippān ajri ro nejūm̧ ekōjkan am̧ epaakeļo̧k Rilo̧mo̧o̧r im ekōjkan An epaake waj eok. Kwomaron̄ bar al ippāer juon al kōn katak in, āinwōt “I Feel My Savior’s Love” (Children’s Songbook, 74–75).
Katak im Bujen Ko 88:77–80, 118
Jemedwōj Ilan̄ ekōņaan bwe in ekkatak.
-
Kajjitōk ippān ajri ro nejūm̧ n̄an jiron̄ eok kōn ta eo raar ekkatak ilo jikuuļ ak Būraemere. Kwomaron̄ bar kwaļo̧k jet men me kwoj ekkatak. Innām kwomaron̄ kwaļo̧k n̄an ajri ro nejūm̧ naan kein ta, etke, im elmen. Jipan̄ er etale Katak im Bujen Ko 88:77–79 n̄an lale ta eo Irooj ekōņaan bwe jen ekkatak kake. Innām lale ippān doon ilo eoon 80 n̄an lale etke E ej kōņaan bwe jen ekkatak im ilo eoon 118 n̄an lale elmen ad aikuj ekkatak.
“Kappukot jeļā … jān katak im barāinwōt jān tōmak.”
M̧ōko m̧ōd remaron̄ ekwojarjar āinwōt tampeļ eo.
-
Ilo am̧ riiti Katak im Bujen Ko 88:119 n̄an ajri ro nejūm̧, remaron̄ kōm̧m̧ane juon tulōn̄ in tampeļ kōn pā ko pāier n̄e rej ron̄ naan in “m̧weeo.” Kōmeļeļeik bwe Jemedwōj Ilan̄ eaar kōņaan bwe Josep Smith im Armej ro Rekwojarjar ren kalōk juon tampeļ, ak “m̧weo im̧ōn Anij.”
-
Kwomaron̄ kajjitōk ippān ajri ro n̄an kāālet jiljilimjuon naan ko me ej kōmeļeļeik m̧weeo m̧weer. Innām jipan̄ er kappukot ilo Katak im Bujen Ko 88:119, naan ko jiljilimjuon me Irooj ej kōjerbali n̄an kōmeļeļeik m̧weeo Im̧ōn. Ekōjkan ad maron̄ kōm̧m̧an bwe m̧weeo m̧ōd en juon “im̧ōn Anij”?
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.
Be Not Afraid, jān Michael Malm