“O̧kwōj 18–24: ‘Juon Pedped ippān Kallim̧ur’: Katak im Bujen Ko 89–92,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Katak im Bujen Ko 89–92,” Itok, Ļoor Eō—N̄an M̧weeo im Kabun̄ in: 2025
O̧kwōj 18–24: “Juon Pedped ippān Kallim̧ur”
Katak im Bujen Ko 89–92
Ilo Jikuuļ eo an Rikanaan ro, Rikanaan Josep Smith ekar katakin elder ro an Israel kōn kalōk aelōn̄ in kiin̄ eo an Anij ioon laļin. Raar kōnono kōn m̧ool ko an jetōb, jar ippān doon, jitlo̧k, im m̧aanjabpopo n̄an kwaļo̧k gospel eo. Bōtaab ekar wōr juon men kōn mejatoto eo me emaron̄ in kar āinwōt kōjak n̄an kōj rainin, im ekar jab āinwōt jim̧we n̄an Emma Smith barāinwōt. Ilo iien kweilo̧k ko, em̧m̧aan ro raar kōbataat im meme jikka, eo me ekar jab jeļā kake ilo iien eo, bōtaab ekar kakilmeej būļoor eo im kar kōm̧m̧ane nām ko rekkajoor ilo mejatoto. Emma ekar kwaļo̧k inepata ko an ippān Josep, im Josep ekar kajjitōk ippān Irooj. Uwaak eo An ekar juon revelesōn me eaar ļapļo̧k jān kōbataat im ettoon in tōbako. Ekar leļo̧k n̄an Armej ro Rekwojarjar, ium̧win epepen ko rej itok, “juon pedped ippān kallim̧ur”—kallim̧ur ko an ājmour ilo ānbwin, “mālōtlōt,” im “eļap mennin aorōk ko an jeļāļo̧kjeņ” (Katak im Bujen Ko 89:3, 19).
Bar lale Ro Rekwojarjar, 1:166–68.
Ļōmnak ko n̄an Ekkatak ilo M̧weeo im ilo Kabun̄ in
Irooj ej letok n̄an eō Naan in Mālōtlōt n̄an jipan̄ eō ājmour ilo ānbwin im ilo jetōb.
Ke elder ro ilo Jikuuļ eo an Rikanaan ro rekar ron̄ an Josep Smith riiti Naan in Mālōtlōt, raar m̧ōkaj in “joļo̧k paip ko aer im plug in kōbataat ko aer ilo kijeek eo” (Ro Rekwojarjar, 1:168). Rekar kōņaan kwaļo̧k aer ikdeelel in pokake Irooj. Bōlen em̧ōj kadede am̧ “kar julo̧k” jān mour eo am̧ men ko Naan in Mālōtlōt ekar kakkōl kaki, bōtaab bar ta eo kwomaron̄ ekkatak jān revelesōn in? Ļōmņaki aitia kein:
-
Ļōmņak kōn revelesōn in āinwōt “juon pedped ippān kallim̧ur”” (eoon 3)—m̧ool n̄an jem̧ļo̧kin me ej tōl ad kōm̧m̧an kāālet. Ta pedped ko kwoj loi me remaron̄ jipan̄ tōl jokāālet ko am̧? Ta kōjeraam̧m̧an ko me Irooj ej kallim̧ur? (lale eoon 18–21). Ilo wāween rōt E ekar kakūrm̧ool kallim̧ur kein ilo mour eo am̧?
-
Ta waanjon̄ak ko kwaar loe an “nana ko im kōttōbalbal … ilo būruōn armej ro renana” raar ekkeijel ippān Naan in Mālōtlōt? (eoon 4). Ilo kakobaba n̄an revelesōn in, ta ko em̧ōj an Irooj lewaj n̄an jipan̄ eok bōbrae ak anjo̧ jān nana kein?
-
Ta eo revelesōn in ej katakin eok kake kōn Irooj? Ekōjkan an Naan in Mālōtlōt eiookļo̧k n̄an Katak im Bujen Ko 29:34–35?
-
Ta eo kwoj en̄jake n̄an kōm̧m̧an em̧m̧anļo̧k n̄an kōjparok ānbwinūm̧?
Emaron̄ wōr am̧ iien em̧m̧an n̄an kōm̧eļeļe ro jet etke kwoj mour kōn Naan in Mālōtlōt—im emaron̄ lōn̄ bar iien em̧m̧an ko ilo raan ko tok jet. Ļōmņak ekōjkan am̧ maron̄ kōjerbal iien kein rem̧m̧an n̄an kam̧ool kōn Rilo̧mo̧o̧r eo, kwojarjar eo an ābwinid, im m̧ool ko jet ilo jetōb. N̄an ļōmņak ko, lale “Ānbwinūm̧ ekwojarjar,” N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko, 22–29.
Bar lale 1 Korint 6:19–20; Thomas S. Monson, “Principles and Promises,” Liahona, Nov. 2016, 78–79; Topics and Questions, “Word of Wisdom,” Gospel Library; “The Word of Wisdom,” ilo Revelations in Context, 183–91; “Addiction,” “Physical Health,” Life Help, Gospel Library.
Principles and Promises
President Monson testifies of the blessings that come as we obey the Word of Wisdom.
Ekkatak im katakin jān pedped ko. Ijelo̧kin ejake juon laajrak in men ko kōm̧m̧ani im ko jab kōm̧m̧ani, jemaron̄ mour kōn pedped ko n̄an kōjernal anemkwoj in kāālet eo ad n̄an tōmak ilo Kraist. N̄an waanjon̄ak, ļōmņaki kajjitōk ko ejaki ilo pedped in āinwōt kein kōn Naan in Mālōtlōt: Pedped ta ko remaron̄ letok kōketak n̄an juon eo ej m̧ōjņo̧ ilo pokake Naan in Mālōtlōt? Pedped ta ko remaron̄ kaenōm̧m̧an eō n̄e ewōr aō būraabļōm̧ ko ilo ejmour jekdoon ij mour kōn Naan in Mālōtlōt.
Jemedwōj Ilan̄ ekōņaan bwe jen kōjparok ānbwinnid.
Būreejtōnji eo Kein Kajuon ej kabwijer “kii ko an aelōn̄ in kiin̄ eo.”
Ilo jekjōn 90, Irooj ekar leļo̧k naan in kōmeļeļe ko kōn “jerbal in im presidency in” (eoon 12) an Josep Smith Sidney Rigdon, im Frederick G. Williams—membōr ro ta eo jej kiiō ņae etan Būreejtōnji eo Kein Kajuon. Ta eo kwoj ekkatak kōn Būreejtōnji eo Kein Kajuon jān eoon 1–17? Ļōmņak in etale enaan ko rekāāl jān ro uaan Būreejtōnji eo Kein Kajuon. Ta ko rej kōm̧m̧ani n̄an “ko̧koņ aolep jerbal ko an kabun̄ im aelōn̄ in kiin̄ in.”? (eoon 16). Ekōjkan ad maron̄ kwaļo̧k bwe rejjab “juon men eļam waan” n̄an kwe? (eoon 5).
Ļōmņak in al ak riiti naan kein jān “Come, Listen to a Prophet’s Voice” (Hymns, no. 21) ak bar juon al kōn rikanaan me ej ekkeijel n̄an katak ko ilo eoon kein. Ewi wāween an jerbal eo an Būreejtōnji eo Kein Kajuon kar jipan̄ eok jeļā kajjien Jemedwōj Ilan̄ im Jisōs Kraist?
“Aolep men ko naaj jerbal ippān doon n̄an em̧m̧an eo [aō].”
Kōļmenļo̧kjeņ kōn jabdewōt en̄jake ko ekar wōr ippam̧ n̄an kam̧ool kōn kallim̧ur eo an Irooj ilo Katak im Bujen Ko 90:24. Ļōmņak in je en̄jake ko am̧ im kwaļo̧ki n̄an juon uwaan baam̧le eo am̧ ak juon eo kwoj iakwe—bōlen juon eo me ej aikuji bar kallim̧ur eo ak kōketak eo. Eļan̄n̄e ewōr kōjeraam̧m̧an ko kokab de kōttari, kōļmenļo̧kjeņ kōn ta eo kwomaron̄ kōm̧m̧ane n̄an pād wōt ilo tiljek ilo am̧ kōttar n̄an lo ekōjkan an “aolep men ko naaj jerbal ippān doon n̄an em̧m̧an eo ami.”
Wōn eo kar Vienna Jaques?
Vienna Jaques ekar ļotak ilo Juun 10, 1787, ilo Massachusetts. Juon kōrā in tōmak eo ekarn ļap an jāān, Vienna ekar jinon ioon mijenede ro ilo 1831 eo. Ālkin an bōk juon kam̧ool ilo jetōb bwe naan ko aer ekar m̧ool, lekar ilo̧k n̄an an ioon Rikanaan eo ilo Kirtland, Ohio, ijo liin ekar peptaij ie.
Vienna ekar pokake kapilōk eo an Irooj n̄an e ilo Katak im Bujen Ko 90:28–31. An wujilepļo̧k n̄an Irooj, ekoba menin leļo̧k ko liin ekar kōm̧m̧ani m̧oktaļo̧k ilo Kirtland, rekar itok ilo juon iien eo aikuji n̄an Kabun̄ in, ke ritōl ro raar kajjieon̄ in wiaik bwidej eo ijo Kirtland Tampeļ eo enaaj kar ekkal ie. Vienna ekar “tiljek, jab pād … waan” ilo aolepān mour eo an im āliktata ekar maron̄ in “jokwe ilo aenōm̧m̧an” (eoon 31) ilo Salt Lake Valley, ijo liin ekar mej ie ke ej 96 an iiō.
“Jetōb ej kwaļo̧k m̧ool eo.”
Jej aolep ioon ennaan ko me ewōr ie “men ko rellōn̄ … rem̧ool,” im “men ko rellōn̄ … rej jab m̧ool,” (Katak im Bujen Ko 91:1–2). Ta kapilōklōk eo kwoj loe ilo jekjōn 91 me emaron̄ jipan̄ eok kile m̧ool eo ilo enaan ko kwoj tōpari? Ekōjkan an Jetōb eo kar jipan̄ kile m̧ool jān bōd?
N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Ļōmņak ko n̄an Katakin Ajri ro
Naan in Mālōtlōt ej jipan̄ eō ājmour ilo ānbwin im jetōb.
-
N̄an kwaļo̧k kadkad in jekjōn 89, bōlen kwe im ajri ro nejūm̧ maron̄ lale juon pija im tampeļ ak al juon al kōn ājmour ilo ānbwin, āinwōt “The Lord Gave Me a Temple” (Children’s Songbook, 153), n̄an kwaļo̧k bwe ānbwinid rej āinwōt tampeļ n̄an jetōb ko ad. Jipan̄ ajri ro arin n̄e remaron̄ kōjparok ānbwinier.
-
N̄an ekkatak kōn kien ko an Irooj ilo Katak im Bujen Ko 89:10–17, kwe im ajri ro nejūm̧ maron̄ jin̄a ak lale juon pija in men ko rem̧m̧an jemaron̄ kan̄i ak kōm̧m̧ani n̄an dāpij an ānbwinid ejmour (lale pija eo im peij in m̧akūtkūt eo ilo jem̧ļo̧kin laajrak in). Ta eo Irooj eaar kakkōl kōj n̄an jab kōjerbale? Etke Irooj ekōņaan bwe jen kōjparok ānbwinid?
-
Elder Gary E. Stevenson eaar kapilōk armej ro peek m̧oktaļo̧k ta eo renaaj kōm̧m̧ane n̄e kar po ilo dānin kadōk ak uno ko rekajoor. E kar katakin: “Konaaj loe ke kapo edikļo̧k an kōjebwābweik eok. Em̧ōj am̧ kōm̧m̧ane kāālet eo kōn wāween am nej uwaak im ta eo kwonaaj kōm̧m̧ane. Koban aikuj in kāālet aolep iien” (“Am̧ Bok in Ikkure in Priesthood,” Liaona, Māe 2019, 48). Ālkin riit ippān doon Katak im Bujen Ko 89:4 im ennaan eo an Elder Stevenson, kweilo̧k ippān ajri ro nejūm kōn ekōjkan aer maron̄ kāālet kio—n̄an aolepen mour ko aer—n̄an mour kōn Naan in Mālōtlōt. Kwomaron̄ role play kake ilo aer uwaake armej eo, men̄e m̧ōttaer, ej leļo̧k juon men eo me ej jum̧ae Naan in Mālōtlōt. Ekōjkan an Irooj kōjeraam̧m̧an kōj ilo ad pokake Naan in Mālōtlōt? (lale eoon 18–21).
Ānbwin ko ad rej menin letok jān Anij.
Anij ej letok n̄an eō rikanaan ro n̄an tōl im kōjparok eō.
-
Kwomaron̄ kalimjōk juon pijaan rikanaan ro etto ak al juon al āinwōt “Follow the Prophet” (Children’s Songbook, 110–11). Ilo wāween rōt Anij ej kōjeraam̧m̧an ajri ro Nejin jān Rikanaan ro An? Etke jej aikuj ron̄jake rikanaan ro an Anij? (lale Katak im Bujen Ko 90:5). Innām kwe im ajri ro nejūm̧ maron̄ kalimjōk pijaan rikanaan eo remour im kwaļo̧k jet men ko Irooj eaar katak ak kakōl kōj kaki jān e. Ekōjkan ad maron̄ ļoor rikanaan eo?
Jetōb eo emaron̄ jipan̄ eō jeļā ta eo ej m̧ool.
-
Komaron̄ kōmeļeļe ilo tukadu jinoun jekjōn eo an Katak im Bujen Ko 91 n̄an jipan̄ ajri ro nejūm̧ meļeļe etke kar letok revelesōn in. Innām remaron̄ ļōm̧ņak kōn ijoko, āinwōt mitia, ijo jej loe “elōn̄ men ko … rem̧ool” im “elōn̄ men ko … rejjab m̧ool” (eoon 1–2). Ta ko eoon 4–6 rej katakin kōj kake kōn Jetōb Kwojarjar? Ekōjkan an Jetōb Kwojarjar jipan̄ kōj jeļā ta eo ejim̧we?
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.
“Aolep grain ej em̧m̧an n̄an kijen armej; āinwōt barāinwōt leen vine eo.”