Refuge [Dangpanan], ni Shaelynn Abel

Hulyo 7–13: “Dako ang Ilang Ganti ug Walay Kataposan ang Ilang Himaya”

Doktrina ug mga Pakigsaad 76

“Unsa ang mahitabo kanako human ako mamatay?” Hapit ang tanan makapangutana niini sa lainlaing mga paagi. Sulod sa mga siglo, daghang mga tradisyon sa Kristiyano, nga nagsalig sa mga pagtulun-an sa biblia, mitudlo bahin sa langit ug impyerno, bahin sa paraiso alang sa mga matarong ug pag-antos alang sa mga daotan. Apan ang tibuok tawhanong pamilya pagabahinon ba gayod sa ingon ka higpit nga paagi? Niadtong Pebrero 1832, sila si Joseph Smith ug Sidney Rigdon naghunahuna kon wala na bay lain pa nga angayang masayran mahitungod sa hilisgotan (tan-awa sa Doktrina ug mga Pakigsaad 76, ulohan sa seksiyon).

Sigurado gayod nga aduna. Samtang sila si Joseph ug Sidney namalandong niining mga butanga, ang Ginoo “mihikap sa mga mata sa [ilang] mga pagsabot ug sila nabuksan” (bersikulo 19). Sila nakadawat og pagpadayag nga ingon ka makapahingangha, ingon ka malukpanon, ingon ka makapadan-ag nga ang mga Santos yanong mitawag niini nga “ang Panan-awon.” Giablihan niini ang mga bintana sa langit ug mihatag sa mga anak sa Dios og makapalambo sa panabot nga panglantaw bahin sa kahangtoran. Ang panan-awon mipadayag nga ang langit mas halangdon ug mas halapad ug mas bukas kay sa gituohan kaniadto sa mga tawo. Ang Dios mas maluluy-on ug makiangayon kay sa atong masabtan. Ug ang mga anak sa Dios adunay mahangtorong padulngan nga mas mahimayaon kay sa atong mahunahunaan.

Tan-awa sa Mga Santos, 1:147–50; “The Vision,” sa Revelations in Context, 148–54.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 76

Ang kaluwasan moabot pinaagi ni Jesukristo, ang Anak sa Dios.

Ang Seksiyon 76 nagpadayag og importante nga mga kamatuoran mahitungod sa atong mahangtorong kapalaran, apan dili kompleto ang pag-ingon nga kini nga pagpadayag mao ang mahitungod sa tulo ka gingharian sa himaya o gani mahitungod sa plano sa kaluwasan. Sa mas eksakto nga paagi, ang seksiyon 76 mao ang mahitungod ni Jesukristo, kinsa mihimo nga posible sa plano sa Dios alang sa atong kaluwasan ug mahangtorong himaya. Samtang kamo magbasa, mahimong mangita kamo sa mga pulong o hugpong sa mga pulong nga naghulagway sa relasyon tali ni Jesukristo ug sa mga tawo nga makapanunod sa lain-laing mga gingharian sa himaya. Tingali usa ka talaan sama sa mosunod makatabang nimo sa pagsulat unsay imong makita.

Mga gingharian sa himaya	Relasyon ngadto ni Jesukristo	Mahangtorong mga panalangin
Mga gingharian sa himaya Celestial (mga bersikulo 50–70, 92–96)	Relasyon ngadto ni Jesukristo Nakadawat og pagpamatuod bahin ni Jesus Naghimo ug nagtuman sa mga pakigsaad uban Kaniya	Mahangtorong mga panalangin Nahugasan gikan sa sala Nabuntog pinaagi sa hugot nga pagtuo
Mga gingharian sa himaya Terrestrial (mga bersikulo 71–79, 97)	Relasyon ngadto ni Jesukristo	Mahangtorong mga panalangin
Mga gingharian sa himaya Telestial (mga bersikulo 81–90, 98–106, 109–12)	Relasyon ngadto ni Jesukristo	Mahangtorong mga panalangin

Unsay imong gibati nga angay nimong buhaton sa pagpalig-on sa imong relasyon sa Manluluwas?

Sa dihang gibasa ni Wilford Woodruff kini nga panan-awon miingon siya, “Gibati ko ang labaw nga paghigugma sa Ginoo sukad masukad sa akong kinabuhi” (tan-awa sa “Mga Tingog sa Pagpahiuli: Mga Pagpamatuod sa Panan-awon’”). Unsay imong nakat-onan mahitungod ni Jesukristo gikan sa mga bersikulo 1–5, 20–24, 39–43, 107–8 nga maoy hinungdan nga ikaw mas nahigugma pa og dugang Kaniya?

Tan-awa usab sa 1 Pedro 3:18–19; 4:6; Dallin H. Oaks, “Unsa ang Nabuhat sa Atong Manluluwas alang Kanato?,” Liahona, Mayo 2021, 75–77; “Ako Nagpabilin nga Natingala,” Mga Himno, nu. 114.

Tutoki ang Langitnong Amahan, si Jesukristo, ug ang Ilang doktrina. Sa tanan nga atong makat-onan diha sa mga kasulatan, ang labing importante nga mga kamatuoran motabang nato sa pagpalig-on sa hugot nga pagtuo diha sa Langitnong Amahan ug ni Jesukristo, paghinulsol, paghimo ug pagtuman sa mga pakigsaad uban Kanila, ug pagdawat sa Espiritu Santo. Bisan og tingali makapaikag ang pagtandi o pag-analisar sa mga kinaiya o batasan sa mga tawo kinsa modawat sa lain-laing mga gingharian sa himayan, mas importante ang pagtutok ngadto sa Langitnong Amahan ug sa Manluluwas. Ang tanan nga Ilang gibuhat sa pag-andam nato alang niana nga himaya motudlo kanato ngadto Kanila.

Dinhi niini nga lawak, nakita ni Joseph Smith ang panan-awon nga narekord sa Doktrina ug mga Pakigsaad 76.

Doktrina ug mga Pakigsaad 76:5–10, 114–18

Ako makasabot sa kabubut-on sa Dios “pinaagi sa gahom sa Espiritu Santo.”

Dili tanang miyembro sa Simbahan sayon nga midawat sa pagpadayag sa seksiyon 76, tungod kay nagtudlo kini nga hapit ang tanan maluwas ug makadawat og ang-ang sa himaya. Pananglitan, si Brigham Young miingon: “Ingon niana ang akong mga tradisyon nga, sa dihang ang Panan-awon unang miabot kanako, direkta kining nahisupak ug sukwahi sa akong kanhi edukasyon. Miingon ako, Hulat og kadiyot. Wala ko kini isalikway; apan wala ako makasabot niini.” Mipasabot siya nga kinahanglan niya nga “maghunahuna ug mag-ampo, magbasa ug maghunahuna, hangtod nga ako kining nasayran ug hingpit nga nasabtan alang sa akong kaugalingon”(sa “The Vision,” sa Revelations in Context, 150). Unsay imong nakat-onan gikan sa iyang kasinatian nga makatabang kanimo kon ang Dios mopadayag og mga butang nga lahi kay sa imong kasamtangang panabot? Unsay imong nakat-onan mahitungod sa Dios diha sa Doktrina ug mga Pakigsaad 76:5–10, 114–18? Unsa ang gitudlo niini nga mga bersikulo mahitungod sa unsaon nimo nga masabtan “ang maayo nga kahimuot sa kabubut-on sa [Dios]”? (bersikulo 7).

Doktrina ug mga Pakigsaad 76:39–44, 50–70

Ang kahimayaan mao ang labing taas nga matang sa kaluwasan.

Ang Doktrina ug mga Pakigsaad 76:39–44 naghulagway sa kaluwasan sa kinatibuk-an. Ang bersikulo 50–70 naghulagway og kahimayaan, usa ka piho nga matang sa kaluwasan. Unsaon nimo sa pagpasabot ang kalainan tali sa kaluwasan ug kahimayaan? Unsa man ang tahas sa Manluluwas sa duha? Unsa ang imong nakit-an dinhi niining mga bersikulo nga nakapadasig nimo nga magtinguha og kahimayaan?

Tan-awa usab sa Juan 3:16–17; Doktrina ug mga Pakigsaad 132:20–25.

Doktrina ug mga Pakigsaad 76:50–70, 92–95

Gusto sa Langitnong Amahan nga makadawat ko og kinabuhing dayon didto sa celestial nga gingharian.

Naghunahuna ba ikaw—o nabalaka—kon ikaw ba mahimong matang sa tawo kinsa modawat sa celestial nga himaya, sumala sa gihulagway sa Doktrina ug mga Pakigsaad 76:50–70, 92–95? Samtang importante nga makahibalo unsa ang gipaabot sa Dios kanato, ikonsiderar usab ang pagtan-aw niini nga mga bersikulo unsay nahimo sa Dios alang kanato—ug gihimo karon—sa pagtabang nato nga mahimong sama Kaniya. Ngano nga imong gibati nga ang imong mga paningkamot importante ngadto Kaniya?

Sa unsang paagi nga kining panan-awon bahin sa celestial nga himaya makaapekto sa paagi sa imong gusto sa pagpuyo sa imong inadlaw nga kinabuhi?

Tan-awa usab sa Moises 1:39; J. Devn Cornish, “Igo Ba Ang Akong Kamaayo? Makasulod Ba Ko Didto?,” Liahona Nob. 2016, 32–34.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Joseph Smith Jr.

• Si Sidney Rigdon

• Panimalay nila ni John ug Elsa Johnson

• Ang Panan-awon (D&P 76)

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 76:24

Kitang tanan mga anak sa Dios.

• Aron sa pagtabang sa imong mga anak nga makasabot sa ilang balaan nga potensyal, mahimong mopakita ka nila og mga litrato sa mga bata ug sa ilang mga ginikanan. Dayon mahimo nga basahon nimo ang Doktrina ug mga Pakigsaad 76:24 ug mopakigbahin sa usag usa ngano nga ikaw malipayon nga makahibalo nga kitang tanan “mga anak nga lalaki ug mga anak nga babaye sa Dios.”

• Mahimo usab nga manganta kamo og dungan sa “Ako Anak sa Dios” (Songbook sa mga Bata, 2–3) ug modapit sa imong mga anak sa pagtudlo sa ilang mga kaugalingon kon manganta sila “ako.” Dayon kantaha pag-usab ang kanta, pulihan ang “ako” og “ikaw” samtang nagtudlo ngadto sa laing tawo.

Doktrina ug mga Pakigsaad 76:5, 41–42, 69

Si Jesukristo mao ang akong Manluluwas.

• Ikonsiderar ang pagdrama uban sa imong mga bata sa usa ka talan-awon diin ang usa ka tawo nangutana, “Unsa ang nahimo ni Jesukristo kanako?” Ikaw ug ang imong mga anak makapangita sa posible nga mga tubag diha sa mga bersikulo 5, 41–42, o 69 sa seksiyon 76. Mahimo usab nga inyong kantahon ang “Mipadala sa Bugtong Anak,” Songbook sa mga Bata, 20–21. Unsaon nato pagpakita sa atong pagpasalamat sa unsay nahimo sa Manluluwas kanato?

Detalye gikan sa Tuguti ang Gagmayng mga Bata [Suffer the Children], ni J Kirk Richards

Doktrina ug mga Pakigsaad 76:62

Ang Langitnong Amahan gusto nga ako mobalik sa pagpuyo uban Kaniya sa kahangtoran.

• Ikaw ug ang imong mga anak mahimong mobasa o motan-aw og kabahin o tanan sa “Kapitulo 26: Ang Tulo ka mga Gingharian sa Langit” (diha sa Doktrina ug mga Pakigsaad, 97–103, o sa tugbang nga bidyo sa Gospel Library) ug mopakigbahin sa usag usa unsay inyong ganahan mahitungod sa panan-awon nga nasinati ni Joseph Smith. Tugoti ang imong mga anak nga mopakigbahin og mga hunahuna ug mga pagbati mahitungod sa unsay kahimtang nga mopuyo uban sa Langitnong Amahan didto sa celestial nga gingharian.

  Chapter 26: The Three Kingdoms of Heaven: 16•February 1832

• Mahimo usab nga imong basahon ang Doktrina ug mga Pakigsaad 76:62 ug dapiton ang imong mga anak sa pagdrowing og mga litrato sa ilang kaugalingon uban sa Langitnong Amahan ug ni Jesukristo sa celestial nga gingharian (tan-awa sa pahina sa kalihokan niining semanaha).

Doktrina ug mga Pakigsaad 76:12, 15–19, 114–16

Ang pagtuon sa mga kasulatan makatabang nako nga “makasabot sa mga butang sa Dios.”

• Mahimo nimong dapiton ang imong mga anak sa pagbasa sa mga bersikulo 15–19 aron mahibaloan unsa ang gihimo nila ni Joseph Smith ug Sidney Rigdon sa dihang nakita nila ang panan-awon diha sa Doktrina ug mga Pakigsaad 76. Sultihi ang imong mga anak mahitungod sa usa ka higayon sa dihang ikaw nakadawat og pagdasig samtang nagbasa sa mga kasulatan, ug pangutan-a ang imong mga anak kon sila aduna bay susama nga mga kasinatian.

Alang sa dugang nga mga ideya, tan-awa ang isyu karong bulana sa Higala nga magasin.

Glory in Degrees [Himaya diha sa mga Ang-ang], ni Annie Henrie Nader