Li muheb’aal, xb’aan li xShaelynn Abel

7–13 julio: “Nimaq ru lix q’ajkamunkileb’ ut chi junelik taawanq lix loq’aleb’”

Tzolʼlebʼ ut Sumwank 76

“K’a’ru tink’ul chirix naq tinkamq?” Ka’ch’in chik ma chixjunileb’ neke’xpatz’ li na’leb’ a’in. Chiru k’iila cient chihab’, naab’aleb’ li paab’aal aj Kristiano, rik’in li k’a’ru k’utb’il sa’ li Santil Hu, neke’aatinak chirix li choxa ut li xb’alb’a, chirix li hilob’aal na’ajej choq’ reheb’ li tiikeb’ xch’ool ut li rahilal choq’ reheb’ laj maak. A’b’an ma naru tab’i’ naq jachjooqeb’ ru chixjunileb’ li kristiaan chi jo’kan? Sa’ febrero re 1832, laj Jose Smith ut laj Sidney Rigdon ke’ok chixk’oxlankil ma wan chik k’a’ru naru chi nawmank chirix li na’leb’ a’an (chi’ilmanq Tzol’leb’ ut Sumwank 76, xtiklajik li tasal).

Ut yaal naq kiwan. Naq laj Jose ut laj Sidney yookeb’ chixk’oxlankileb’ li na’leb’ a’in, li Qaawa’ “kixch’e’ rilob’aal lix nawomeb’, ut kiteeli” (raqal 19). Ke’xk’ul jun k’utb’esinb’il na’leb’ q’axal sachol ch’oolej, q’axal nim ru, q’axal nakutanob’resink, jo’kan naq “li k’utb’esinb’il matk’” kik’ab’a’iik xb’aaneb’ laj santil paab’anel. Kixkanab’ chi teeto li rilob’aal choxa ut kixk’e reheb’ li ralal xk’ajol li Dios jun rilob’aal li junelik q’e kutan. Li k’utb’esinb’il matk’ kixk’utb’esi naq li choxa q’axal wi’chik xnimal ru, xchamal, ut xchaab’ilal wi’chik chiru li k’oxlanb’il chi junxilaj. Li ruxtaan ut lix tiikilal li Dios nim wi’chik chiru li nokoru chixtawb’al ru. Ut li k’a’ru te’xk’ul li ralal xk’ajol li Dios, q’axal wi’chik chaq’al ru chiru li nokoru chixk’oxlankil.

Chi’ilmanq Santos, 1:150–153; “La visión,” sa’ Revelaciones en contexto, 158–164.

Li na’leb’ re tzolok sa’ li ochoch ut sa’ li iglees

Tzolʼlebʼ ut Sumwank 76

Li kolb’a-ib’ nachal sa’ xk’ab’a’ li Jesukristo, li Ralal li Dios.

Li tasal 76 naxk’utb’esi aajelil ruhil yaal chirix b’ar toowulaq, a’b’an moko tz’aqalaq ta raj li na’leb’ wi ta yal naqaye naq wan rilom rik’in li oxib’ chi loq’alil malaj li k’uub’anb’il na’leb’ re li kolb’a-ib’. Us wi’chik xyeeb’al naq, li tasal 76 na’aatinak chirix li Jesukristo, li nak’ehok chi uxmank lix k’uub’anb’il na’leb’ li Dios choq’ re li qakolb’al ut li junelikil loq’alil. Naq yooqat chirilb’al, naru nakasik’eb’ aatin malaj ch’ol aatin li te’xch’olob’ chan ru lix wanjik li Jesukristo rik’ineb’ li kristiaan neke’xk’ul li jalan jalanq chi loq’alil. Maare jun kaaxukuut jo’ a’in naru nakatxtenq’a chixtz’iib’ankil li k’a’ru taataw.

Eb’ li awa’b’ejihom re loq’alil	Li komonil rik’in li Jesukristo	Junelikil osob’tesihom
Eb’ li awa’b’ejihom re loq’alil Choxahilal (eb’ li raqal 50–70, 92–96)	Li komonil rik’in li Jesukristo Ke’xk’ul li yaal ch’olob’anb’il chirix li Jesus Ke’ok sa’ sumwank rik’in a’an ut ke’xpaab’eb’ a’an	Junelikil osob’tesihom Ke’ch’ajob’resiik chirixeb’ li maak Ke’q’axok-u rik’in paab’aal
Eb’ li awa’b’ejihom re loq’alil Terrestil (eb’ li raqal 71–79, 97)	Li komonil rik’in li Jesukristo	Junelikil osob’tesihom
Eb’ li awa’b’ejihom re loq’alil Telestil(eb’ li raqal 81–90, 98–106, 109–112)	Li komonil rik’in li Jesukristo	Junelikil osob’tesihom

K’a’ru nakaweek’a naq us xb’aanunkil re naq taakawob’resi laa sumwanjik rik’in li Kolonel?

Naq laj Wilford Woodruff kiril li k’utb’esinb’il matk’ a’an, kixye, “Kiweek’a inrahom choq’ re li Qaawa’ jo’ maajun wa week’ahom chi rub’elaj” (chi’ilmanq “Eb’ li xyaab’ kuxej re li k’ojob’ank wi’chik: Eb’ li ch’olob’ahom chirix “li k’utb’esinb’il matk’””). K’a’ru nakatzol chirix li Jesukristo sa’eb’ li raqal 1–5, 20–24, 39–43, 107–108 li nakatxk’e chixraab’al chi nim wi’chik?

Chi’ilmanq ajwi’ 1 Pedro 3:18–19; 4:6; Dallin H. Oaks, “K’a’ru xb’aanuhom li qaKolonel choq’ qe?,” Jolomil ch’utub’aj-ib’ re abril 2021; “Sachso ninkana,” Eb’ li B’ich, 118.

Chajayali aawib’ rik’in li qaChoxahil Yuwa’, li Jesukristo, ut eb’ lix tzol’leb’. Sa’ chixjunil li k’a’ru naru naqatzol sa’eb’ li loq’laj hu, eb’ li yaal aajeleb’ ru nokohe’xtenq’a chixk’ojob’ankil li qapaab’aal chirix li qaChoxahil Yuwa’ ut chirix li Jesukristo, chixjalb’al qak’a’uxl, chi ok sa’ sumwank rik’ineb’ a’an ut roxloq’inkileb’, ut chixk’ulb’al li Santil Musiq’ej. Maare usaq raj rilb’al xjuntaq’eetankil malaj xtz’ilb’al rix xna’leb’eb’ malaj xwanjikeb’ li kristiaan li te’xk’ul li jalan jalanq chi loq’alil, jwal aajel wi’chik ru xjayalinkil qib’ rik’in li qaChoxahil Yuwa’ ut rik’in li Kolonel. Chixjunil li neke’xb’aanu a’an re qakawresinkil choq’ reheb’ li loq’alil a’an nokohe’xsutq’isi rik’ineb’ a’an.

Sa’ li na’ajej a’in, laj Jose Smith kiril li k’utb’esinb’il na’leb’ tz’iib’anb’il sa’ Tzol’leb’ ut Sumwank 76.

Tzolʼlebʼ ut Sumwank 76:5–10, 114–118

Naru nintaw ru li rajom li Dios “rik’in xwankil li Santil Musiq’ej.”

Moko chixjunileb’ ta li komon re li Iglees ke’xk’ulub’a li k’utb’esinb’il matk’ wan sa’ li tasal 76, xb’aan naq naxk’ut naq haye’ chixjunileb’ te’kole’q ut te’xk’ul jun awa’b’ejihom re loq’alil. Qayehaq, laj Brigham Young kixye: “Li k’a’ru k’aynaqin wi’ tz’aqal jalan chiru li k’utb’esinb’il matk’ naq xwab’i xb’een sut, naxka’pak’ali tz’aqal rib’ ut naxjali ru li k’a’ru intzolom chaq. Kinye, Oyb’eni. Ink’a’ kintz’eqtaana, a’b’an moko kintaw ta ru.” Kixch’olob’ naq tento “kink’oxla ut kintijok, kiwil ru ut kink’oxla, toj reetal naq kintaw ru chi tz’aqal injunes wib’” (sa’ “La visión” sa’ Revelaciones en contexto, 160–161). K’a’ru nakatzol rik’in li k’a’ru kixnumsi a’an li naru nakatxtenq’a naq li Dios naxk’utb’esiheb’ k’a’aq re ru jalan chiru li k’a’ru nakataw ru anajwan? K’a’ru nakatzol chirix li Dios sa’ Tzol’leb’ ut Sumwank 76:5–10, 114–118? K’a’ru neke’xk’ut li raqal a’an chirix chan ru taataw ru “li chaab’il ajom li na’alan sa’ xch’ool [li Dios]”? (raqal 7).

Tzolʼlebʼ ut Sumwank 76:39–44, 50–70

Li taqenaqil loq’al a’an li wan wi’ xnimal ru li kolb’a-ib’.

Sa’ Tzol’leb’ ut Sumwank 76:39–44 nach’olob’aman chixjunil chirix li kolb’a-ib’. Sa’eb’ li raqal 50–70 nach’olob’aman li taqenaqil loq’al un jun reheb’ xpaayil li kolb’a-ib’. Chan raj ru taach’olob’ naq jalan li kolb’a-ib’ chiru li taqenaqil loq’al? K’a’ru lix k’anjel li Kolonel sa’ xkab’ichaleb’? K’a’ru nakataw sa’eb’ li raqal a’an li naxwaklesi aach’ool chixsik’b’al li taqenaqil loq’al?

Chi’ilmanq ajwi’ Jwan 3:16–17; Tzol’leb’ ut Sumwank 132:20–25.

Tzolʼlebʼ ut Sumwank 76:50–70, 92–95

Lin Choxahil Yuwa’ naraj naq tink’ul li junelik yu’am sa’ li choxahil awa’b’ejihom.

Ma aapatz’om jun sutaq—malaj okenaq aak’a’uxl chirix—ma naru nakatwulak chixk’ulb’al li choxahil loq’al, jo’ ch’olob’anb’il sa’ Tzol’leb’ ut Sumwank 76:50–70, 92–95? Us ta aajel ru xnawb’al k’a’ru naroyb’eni li Dios qik’in, k’oxla ajwi’ xsik’b’aleb’ sa’eb’ li raqal a’an k’a’ru xb’aanu li Dios choq’ qe—ut li toj naxb’aanu—re qatenq’ankil chi wulak jo’ a’an. K’a’ut naq lix yalb’al aaq’e aajel ru choq’ re a’an?

Chan ru naq li k’utb’esinb’il matk’ a’in chirix li choxahil loq’alil naxjal laa wanjik rajlal kutan?

Chi’ilmanq ajwi’ Moises 1:39; J. Devn Cornish, “Ma tz’aqal chaab’ilin? Ma tinruuq chixb’aanunkil?,” Jolomil ch’utub’aj-ib’ re octubre 2016.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol’leb’ ut Sumwank 76:24

Chiqajunilo ralal xk’ajolo li Dios.

• Re xtenq’ankileb’ laa kok’al chixtawb’al ru lix choxahil loq’alileb’, naru nakak’ut xjalam-uucheb’ kok’al ut eb’ lix yuwa’ chiruheb’. Chirix a’an naru nakawil Tzol’leb’ ut Sumwank 76:24 ut teewotz cherib’il eerib’ k’a’ut naq nasaho’ eech’ool chixnawb’al naq chiqajunilo laa’o “alalb’ej ut rab’inb’ej chiru li Dios.”

• Naru ajwi’ nekeb’icha “Laaʼin jun ralal li Dios” (B’ichleb’aal choq’ reheb’ li Kok’al, 2–3) sa’ komonil, ut taapatz’ reheb’ laa kok’al naq te’xk’ut rib’ chiruq’eb’ naq te’xye “laa’in.” Chirix a’an teeb’icha’ wi’chik li b’ich, ut teejal li aatin “laa’in” rik’in “laa’at” ut te’xk’ut chiruq’ junaq chik kristiaan.

Tzol’leb’ ut Sumwank 76:5, 41–42, 69

Li Jesukristo a’an lin Kolonel.

• Naru nakab’aanu junaq k’utb’esink rik’ineb’ laa kok’al b’ar wi’ junaq kristiaan tixpatz’, “K’a’ru xb’aanu li Jesukristo choq’ we?” Laa’at ut eb’ laa kok’al naru nekesik’ xsumenkil a’an sa’eb’ li raqal 5, 41–42, malaj 69 sa’ li tasal 76. Naru ajwi’ nekeb’icha “Kixtaqla li Ralal,” B’ichleb’aal choq’ reheb’ li Kok’al, 20–21. Chan ru naru naqak’ut qab’antioxihom chirix li k’a’ru kixb’aanu li Kolonel choq’ qe?

Jalam-uuch re Kanab’eb’ li kok’al, xb’aan laj J. Kirk Richards

Tzol’leb’ ut Sumwank 76:62

Lin Choxahil Yuwa’ naraj naq tinwulaq wi’chik chi wank rik’in a’an chi junelik.

• Laa’at ut eb’ laa kok’al naru nekeril chixjunil malaj yal xcha’al li “Ch’ol 26: Li oxib’ chi aw’ab’ejihom re li choxa” (sa’ Eb’ li Esilal sa’ li Tzol’leb’ ut Sumwank, 97–103, malaj li video sa’ li Biblioteca del Evangelio) ut te’xwotz chirib’ileb’ rib’ k’a’ru nawulak chiruheb’ sa’ lix k’utb’esinb’il matk’ laj Jose Smith. Kanab’eb’ laa kok’al chixwotzb’aleb’ lix k’a’uxl ut reek’ahom chirix chan ta raj wi’ ru li wank rik’in li qaChoxahil Yuwa’ sa’ li choxahil awa’b’ejihom.

  Chapter 26: The Three Kingdoms of Heaven: 16•February 1832

• Naru ajwi’ nakayaab’asi Tzol’leb’ ut Sumwank 76:62 ut taapatz’ reheb’ naq te’xyiib’ xjalam-uucheb’ a’an rik’in li qaChoxahil Yuwa’ ut li Jesukristo sa’ li choxahil awa’b’ejihom (chi’ilmanq li perel re kok’ k’anjel re li xamaan a’in).

Tzolʼlebʼ ut Sumwank 76:12, 15–19, 114–116

Lix tzolb’aleb’ li loq’laj hu naru nikinixtenq’a “chixtawb’al ru li k’a’aq re ru re li Dios.”

• Naru nakapatz’ reheb’ laa kok’al naq te’rileb’ li raqal 15–19 re xtawb’al k’a’ru yoo laj Jose Smith ut laj Sidney Rigdon naq ke’ril li k’utb’esinb’il matk’ natawman sa’ Tzol’leb’ ut Sumwank 76. Wotz rik’ineb’ laa kok’al resil junaq hoonal b’ar wi’ xak’ul aamusiq’ankil naq yookat chirilb’al li loq’laj hu, ut patz’ reheb’ laa kok’al ma xk’ulumeb’ ajwi’ a’an.

Re xtawb’al xkomon chik li na’leb’, chi’ilmanq li hu Amigos re li po a’in.

Xtusulaleb’ li loq’alil, xb’aan li xAnnie Henrie Nader