“ວັນທີ 7–13 ເດືອນກໍລະກົດ: ‘ຍິ່ງໃຫຍ່ຈະເປັນລາງວັນຂອງພວກເຂົາ ແລະ ນິລັນດອນຈະເປັນລັດສະໝີພາບຂອງພວກເຂົາ’: ຄຳສອນ ແລະ ພັນທະສັນຍາ 76,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 76,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

Refuge [ທີ່ຫລົບໄພ], ໂດຍ ເຊລີນ ເອໂບ

ວັນທີ 7–13 ເດືອນກໍລະກົດ: “ຍິ່ງໃຫຍ່ຈະເປັນລາງວັນຂອງພວກເຂົາ ແລະ ນິລັນດອນຈະເປັນລັດສະໝີພາບຂອງພວກເຂົາ”

ຄຳສອນ ແລະ ພັນທະສັນຍາ 76

“ຈະມີຫຍັງເກີດຂຶ້ນກັບເຮົາ ຫລັງຈາກເຮົາຕາຍ?” ເກືອບທຸກຄົນຈະຖາມຄຳຖາມນີ້ໃນຮູບແບບໃດ ຮູບແບບໜຶ່ງ. ເປັນເວລາຫລາຍສັດຕະວັດ, ປະເພນີຂອງຊາວຄຣິດຫລາຍຢ່າງ, ອີງຕາມຄຳສອນໃນພຣະຄຣິສຕະທຳຄຳພີ, ໄດ້ສິດສອນເຖິງສະຫວັນ ແລະ ນະລົກ, ເຖິງທີ່ສຸຂະເສີມສຳລັບຄົນຊອບທຳ ແລະ ບ່ອນທຸກທໍລະມານສຳລັບຄົນຊົ່ວ. ແຕ່ຄອບຄົວມະນຸດທັງປວງສາມາດຖືກແບ່ງແຍກອອກຢ່າງເຄັ່ງຄັດໄດ້ແທ້ບໍ? ໃນເດືອນກຸມພາ ປີ 1832, ໂຈເຊັບ ສະມິດ ແລະ ຊິດນີ ຣິກດອນ ໄດ້ສົງໄສຖ້າຫາກມັນບໍ່ມີຫລາຍກວ່ານີ້ບໍ ກ່ຽວກັບເລື່ອງນີ້ (ເບິ່ງ ຄຳສອນ ແລະ ພັນທະສັນຍາ 76, ຫົວຂໍ້ພາກ).

ແນ່ນອນວ່າມັນມີ. ຂະນະທີ່ໂຈເຊັບ ແລະ ຊິດນີ ໄດ້ໄຕ່ຕອງກ່ຽວກັບສິ່ງເຫລົ່ານີ້, ພຣະຜູ້ເປັນເຈົ້າໄດ້ “ສຳຜັດຕາແຫ່ງຄວາມເຂົ້າໃຈ [ຂອງພວກເພິ່ນ] ແລະ ມັນໄດ້ເປີດ” (ຂໍ້ທີ 19). ພວກເພິ່ນໄດ້ຮັບການເປີດເຜີຍທີ່ສວຍງາມຫລາຍ, ທີ່ກວ້າງຂວາງຫລາຍ, ທີ່ຮຸ່ງເຫລື້ອມຫລາຍ ຈົນວ່າໄພ່ພົນເອີ້ນມັນວ່າ “ພາບນິມິດ.” ມັນໄດ້ເປີດປະຕູສະຫວັນ ແລະ ໃຫ້ລູກໆຂອງພຣະເຈົ້າໄດ້ເຫັນພາບນິລັນດອນທີ່ເກີນຄວາມຄາດຄິດ. ພາບນິມິດໄດ້ເປີດເຜີຍວ່າ ສະຫວັນຍິ່ງໃຫຍ່ ແລະ ກວ້າງຂວາງ ແລະ ມີສິ່ງລວມຢູ່ໃນນັ້ນຫລາຍກວ່າທີ່ຜູ້ຄົນສ່ວນຫລາຍໄດ້ເຊື່ອກັນມາກ່ອນ. ພຣະເຈົ້າມີຄວາມເມດຕາ ແລະ ທ່ຽງທຳຫລາຍກວ່າທີ່ເຮົາສາມາດເຂົ້າໃຈໄດ້. ແລະ ລູກໆຂອງພຣະເຈົ້າມີຈຸດໝາຍປາຍທາງນິລັນດອນ ທີ່ສະຫງ່າລາສີກວ່າທີ່ເຮົາຄາດຄິດ.

ເບິ່ງ Saints, 1:147–50; “The Vision,” ໃນ Revelations in Context, 148–54.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 76

ຄວາມລອດມີມາຜ່ານທາງພຣະເຢຊູຄຣິດ, ພຣະບຸດຂອງພຣະເຈົ້າ.

ພາກທີ 76 ເປີດເຜີຍຄວາມຈິງທີ່ສຳຄັນກ່ຽວກັບຈຸດໝາຍປາຍທາງນິລັນດອນຂອງເຮົາ, ແຕ່ມັນຈະບໍ່ສົມບູນຄົບຖ້ວນທີ່ຈະກ່າວວ່າ ການເປີດເຜີຍນີ້ແມ່ນກ່ຽວກັບອານາຈັກແຫ່ງລັດສະໝີພາບສາມແຫ່ງ ຫລື ແມ່ນແຕ່ກ່ຽວກັບແຜນແຫ່ງຄວາມລອດ. ຖືກຕ້ອງຫລາຍກວ່າ, ພາກທີ 76 ແມ່ນກ່ຽວກັບພຣະເຢຊູຄຣິດ, ຜູ້ຊຶ່ງເຮັດໃຫ້ແຜນຂອງພຣະເຈົ້າ ສຳລັບຄວາມລອດ ແລະ ລັດສະໝີພາບນິລັນດອນຂອງເຮົາເປັນໄປໄດ້. ຂະນະທີ່ທ່ານອ່ານ, ທ່ານອາດຊອກຫາຖ້ອຍຄຳ ຫລື ວະລີທີ່ບັນຍາຍເຖິງຄວາມສຳພັນລະຫວ່າງພຣະເຢຊູຄຣິດ ແລະ ຜູ້ຄົນທີ່ໄດ້ຮັບອານາຈັກແຫ່ງລັດສະໝີພາບທີ່ແຕກຕ່າງເປັນມູນມໍລະດົກ. ບາງທີຕາຕະລາງທີ່ຄ້າຍຄືກັນກັບອັນຕໍ່ໄປນີ້ສາມາດຊ່ວຍທ່ານບັນທຶກສິ່ງທີ່ທ່ານພົບເຫັນ.

ອານາຈັກແຫ່ງລັດສະໝີພາບ	ຄວາມສຳພັນກັບພຣະເຢຊູຄຣິດ	ພອນນິລັນດອນ
ອານາຈັກແຫ່ງລັດສະໝີພາບ ອານາຈັກຊັ້ນສູງ (ຂໍ້ທີ 50–70, 92–96)	ຄວາມສຳພັນກັບພຣະເຢຊູຄຣິດ ໄດ້ຮັບປະຈັກພະຍານເຖິງພຣະເຢຊູ ໄດ້ເຮັດ ແລະ ຮັກສາພັນທະສັນຍາກັບພຣະອົງ	ພອນນິລັນດອນ ຖືກຊຳລະໃຫ້ສະອາດຈາກບາບ ເອົາຊະນະໂດຍສັດທາ
ອານາຈັກແຫ່ງລັດສະໝີພາບ ອານາຈັກຊັ້ນກາງ (ຂໍ້ທີ 71–79, 97)	ຄວາມສຳພັນກັບພຣະເຢຊູຄຣິດ	ພອນນິລັນດອນ
ອານາຈັກແຫ່ງລັດສະໝີພາບ ອານາຈັກຊັ້ນຕ່ຳ (ຂໍ້ທີ 81–90, 98–106, 109–12)	ຄວາມສຳພັນກັບພຣະເຢຊູຄຣິດ	ພອນນິລັນດອນ

ທ່ານຮູ້ສຶກຖືກດົນໃຈໃຫ້ເຮັດສິ່ງໃດ ເພື່ອເພີ່ມຄວາມເຂັ້ມແຂງໃຫ້ແກ່ຄວາມສຳພັນຂອງທ່ານກັບພຣະຜູ້ຊ່ວຍໃຫ້ລອດ?

ເມື່ອວິວເຝີດ ວູດຣັບ ໄດ້ອ່ານພາບນິມິດນີ້, ເພິ່ນໄດ້ກ່າວວ່າ, “ຂ້າພະເຈົ້າຮູ້ສຶກຮັກພຣະຜູ້ເປັນເຈົ້າຫລາຍກວ່າທີ່ຜ່ານມາ ໃນຊີວິດຂອງຂ້າພະເຈົ້າ” (ເບິ່ງ “ສຽງຂອງການຟື້ນຟູ: ປະຈັກພະຍານເຖິງ ‘ພາບນິມິດ’”). ທ່ານຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຈາກ ຂໍ້ທີ 1–5, 20–24, 39–43, 107–8 ທີ່ເຮັດໃຫ້ທ່ານຮັກພຣະອົງຫລາຍຂຶ້ນ?

ເບິ່ງ 1 ເປໂຕ 3:18–19; 4:6; Dallin H. Oaks, “What Has Our Savior Done for Us?,” Liahona, May 2021, 75–77; “I Stand All Amazed,” Hymns, ເລກທີ 193 ນຳອີກ.

ສຸມໃຈໃສ່ພຣະບິດາເທິງສະຫວັນ, ພຣະເຢຊູຄຣິດ, ແລະ ຄຳສອນຂອງພວກພຣະອົງ. ຈາກທຸກສິ່ງທີ່ເຮົາສາມາດຮຽນຮູ້ຢູ່ໃນພຣະຄຳພີ, ຄວາມຈິງທີ່ສຳຄັນທີ່ສຸດຊ່ວຍເຮົາສ້າງສັດທາໃນພຣະບິດາເທິງສະຫວັນ ແລະ ພຣະເຢຊູຄຣິດ, ກັບໃຈ, ເຮັດ ແລະ ຮັກສາພັນທະສັນຍາກັບພວກພຣະອົງ, ແລະ ຮັບເອົາພຣະວິນຍານບໍລິສຸດ. ເຖິງແມ່ນວ່າມັນອາດເປັນທີ່ໜ້າສົນໃຈທີ່ຈະປຽບທຽບ ຫລື ວິເຄາະທັດສະນະຄະຕິ ຫລື ພຶດຕິກຳຂອງຜູ້ຄົນທີ່ຈະໄດ້ຮັບອານາຈັກແຫ່ງລັດສະໝີພາບທີ່ແຕກຕ່າງ, ມັນຍິ່ງສຳຄັນກວ່າທີ່ຈະສຸມໃຈໃສ່ພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດ. ທຸກສິ່ງທຸກຢ່າງທີ່ພວກພຣະອົງກະທຳເພື່ອກະກຽມເຮົາສຳລັບລັດສະໝີພາບນັ້ນ ຈະຫັນເຮົາໄປຫາພວກພຣະອົງ.

ຫ້ອງໃນບ້ານຂອງ ຈອນ ຈອນສັນ, ເມືອງໄຮຣຳ, ລັດໂອໄຮໂອ. — ຢູ່ໃນຫ້ອງນີ້, ໂຈເຊັບ ສະມິດ ໄດ້ເຫັນພາບນິມິດທີ່ຖືກບັນທຶກໄວ້ຢູ່ໃນ ຄຳສອນ ແລະ ພັນທະສັນຍາ 76.

ຄຳສອນ ແລະ ພັນທະສັນຍາ 76:5–10, 114–18

ເຮົາສາມາດເຂົ້າໃຈພຣະປະສົງຂອງພຣະເຈົ້າໄດ້ “ໂດຍອຳນາດຂອງພຣະວິນຍານບໍລິສຸດ.”

ບໍ່ແມ່ນສະມາຊິກຂອງສາດສະໜາຈັກລຸ້ນທຳອິດທຸກຄົນໄດ້ຍອມຮັບການເປີດເຜີຍຢ່າງງ່າຍດາຍຢູ່ໃນ ພາກທີ 76, ເພາະມັນໄດ້ສິດສອນວ່າ ເກືອບທຸກຄົນຈະໄດ້ຮັບຄວາມລອດ ແລະ ໄດ້ຮັບລັດສະໝີພາບໃນບາງລະດັບ. ຍົກຕົວຢ່າງ, ບຣິກຳ ຢັງ ໄດ້ກ່າວວ່າ: “ປະເພນີຂອງຂ້າພະເຈົ້າແມ່ນດັ່ງນີ້, ວ່າເມື່ອພາບນິມິດໄດ້ມາເຖິງຂ້າພະເຈົ້າເປັນເທື່ອທຳອິດ, ມັນກົງກັນຂ້າມ ແລະ ຕ້ານກັບການສຶກສາໃນອະດີດຂອງຂ້າພະເຈົ້າໂດຍກົງ. ຂ້າພະເຈົ້າໄດ້ກ່າວວ່າ, ລໍຖ້າອີກຈັກໜ້ອຍ. ຂ້າພະເຈົ້າບໍ່ໄດ້ປະຕິເສດມັນ; ແຕ່ຂ້າພະເຈົ້າບໍ່ເຂົ້າໃຈມັນ.” ເພິ່ນໄດ້ອະທິບາຍວ່າເພິ່ນຕ້ອງໄດ້ “ຄິດ ແລະ ອະທິຖານ, ອ່ານ ແລະ ຄິດ, ຈົນກວ່າຂ້າພະເຈົ້າໄດ້ຮູ້ ແລະ ໄດ້ເຂົ້າໃຈມັນຢ່າງສົມບູນຄົບຖ້ວນສຳລັບຂ້າພະເຈົ້າເອງ” (ໃນ “ພາບນິມິດ,” ຢູ່ໃນ Revelations in Context, 150). ທ່ານຮຽນຮູ້ຫຍັງແດ່ຈາກປະສົບການຂອງເພິ່ນ ທີ່ສາມາດຊ່ວຍທ່ານໄດ້ ເມື່ອພຣະເຈົ້າເປີດເຜີຍສິ່ງທີ່ແຕກຕ່າງຈາກຄວາມເຂົ້າໃຈຂອງທ່ານໃນປະຈຸບັນ? ທ່ານຮຽນຮູ້ຫຍັງແດ່ກ່ຽວກັບພຣະເຈົ້າ ຢູ່ໃນ ຄຳສອນ ແລະ ພັນທະສັນຍາ 76:5–10, 114–18? ຂໍ້ເຫລົ່ານີ້ສິດສອນຫຍັງແດ່ກ່ຽວກັບວິທີທີ່ທ່ານຈະສາມາດເຂົ້າໃຈ “ຄວາມເພິ່ງພໍໃຈແຫ່ງຄວາມປະສົງ [ຂອງພຣະເຈົ້າ]”? (ຂໍ້ທີ 7).

ຄຳສອນ ແລະ ພັນທະສັນຍາ 76:39–44, 50–70

ຄວາມສູງສົ່ງຄືຄວາມລອດທີ່ສູງສຸດ.

ຄຳສອນ ແລະ ພັນທະສັນຍາ 76:39–44 ບັນຍາຍເຖິງຄວາມລອດໂດຍທົ່ວໄປ. ຂໍ້ທີ 50–70 ບັນຍາຍເຖິງຄວາມສູງສົ່ງ, ຄວາມລອດແບບໜຶ່ງໂດຍສະເພາະ. ທ່ານຈະອະທິບາຍຄວາມແຕກຕ່າງລະຫວ່າງຄວາມລອດ ແລະ ຄວາມສູງສົ່ງແນວໃດ? ແມ່ນຫຍັງຄືບົດບາດຂອງພຣະຜູ້ຊ່ວຍໃຫ້ລອດຢູ່ໃນທັງສອງຂໍ້ນີ້? ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ທີ່ດົນໃຈທ່ານໃຫ້ສະແຫວງຫາຄວາມສູງສົ່ງ?

ເບິ່ງ ໂຢຮັນ 3:16–17; ຄຳສອນ ແລະ ພັນທະສັນຍາ 132:20–25 ນຳອີກ.

ຄຳສອນ ແລະ ພັນທະສັນຍາ 76:50–70, 92–95

ພຣະບິດາເທິງສະຫວັນຂອງເຮົາ ປະສົງໃຫ້ເຮົາໄດ້ຮັບຊີວິດນິລັນດອນ ຢູ່ໃນອານາຈັກຊັ້ນສູງ.

ທ່ານເຄີຍສົງໄສ—ຫລື ກັງວົນບໍ—ກ່ຽວກັບວ່າ ທ່ານຈະສາມາດກາຍເປັນຜູ້ຄົນທີ່ຈະໄດ້ຮັບລັດສະໝີພາບຊັ້ນສູງຫລືບໍ່, ດັ່ງທີ່ຖືກບັນຍາຍຢູ່ໃນ ຄຳສອນ ແລະ ພັນທະສັນຍາ 76:50–70, 92–95? ໃນຂະນະທີ່ມັນກໍສຳຄັນທີ່ຈະຮູ້ວ່າພຣະເຈົ້າຄາດຫວັງຫຍັງຈາກເຮົາ, ໃຫ້ພິຈາລະນາທີ່ຈະຊອກຫາຢູ່ໃນຂໍ້ເຫລົ່ານີ້ ສິ່ງທີ່ພຣະເຈົ້າໄດ້ກະທຳເພື່ຶອເຮົານຳອີກ—ແລະ ກຳລັງກະທຳຢູ່—ເພື່ອຊ່ວຍເຮົາໃຫ້ກາຍເປັນເໝືອນດັ່ງພຣະອົງ. ເປັນຫຍັງທ່ານຈຶ່ງຮູ້ສຶກວ່າຄວາມພະຍາຍາມຂອງທ່ານສຳຄັນຕໍ່ພຣະອົງ?

ພາບນິມິດເຖິງລັດສະໝີພາບຊັ້ນສູງນີ້ ມີຜົນກະທົບຕໍ່ວິທີທາງທີ່ທ່ານຢາກຈະດຳລົງຊີວິດໃນແຕ່ລະວັນຂອງທ່ານແນວໃດ?

ເບິ່ງ ໂມເຊ 1:39; J. Devn Cornish, “Am I Good Enough? Will I Make It?,” Liahona, Nov. 2016, 32–34 ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 76:24

ເຮົາທຸກຄົນເປັນລູກຂອງພຣະເຈົ້າ.

ເພື່ອຊ່ວຍລູກໆຂອງທ່ານໃຫ້ເຂົ້າໃຈສັກກະຍະພາບແຫ່ງສະຫວັນຂອງພວກເຂົາ, ທ່ານສາມາດສະແດງໃຫ້ພວກເຂົາເບິ່ງຮູບພາບຂອງເດັກນ້ອຍ ແລະ ພໍ່ແມ່ຂອງພວກເຂົາ. ແລ້ວທ່ານກໍສາມາດອ່ານ ຄຳສອນ ແລະ ພັນທະສັນຍາ 76:24 ແລະ ແບ່ງປັນນຳກັນວ່າ ເປັນຫຍັງພວກທ່ານຈຶ່ງດີໃຈທີ່ຮູ້ວ່າ ເຮົາທຸກຄົນເປັນ “ບຸດ ແລະ ທິດາຂອງພຣະເຈົ້າ.”
ທ່ານຍັງສາມາດຮ້ອງເພງ “ເຮົາເປັນລູກຂອງພຣະເຈົ້າ” (ເພງສວດ ແລະ ເພງຂອງເດັກນ້ອຍ, 64) ນຳກັນນຳອີກ ແລະ ເຊື້ອເຊີນລູກໆຂອງທ່ານໃຫ້ຊີ້ໄປຫາຕົວພວກເຂົາເອງເມື່ອພວກເຂົາຮ້ອງວ່າ “ເຮົາ.” ແລ້ວຮ້ອງເພງນັ້ນອີກ, ໂດຍໃຊ້ຄຳວ່າ “ເຈົ້າເປັນ” ແທນຄຳວ່າ “ເຮົາເປັນ” ຂະນະທີ່ຊີ້ໄປຫາຄົນໃດຄົນໜຶ່ງ.

ຄຳສອນ ແລະ ພັນທະສັນຍາ 76:5, 41–42, 69

ພຣະເຢຊູຄຣິດເປັນພຣະຜູ້ຊ່ວຍໃຫ້ລອດຂອງເຮົາ.

ໃຫ້ພິຈາລະນາທີ່ຈະຫລິ້ນລະຄອນກ້ອມກັບລູກໆຂອງທ່ານ ໃນເຫດການໜຶ່ງ ທີ່ມີຄົນໃດຄົນໜຶ່ງຖາມວ່າ, “ພຣະເຢຊູຄຣິດໄດ້ເຮັດຫຍັງແດ່ເພື່ອເຮົາ?” ທ່ານ ແລະ ລູກໆຂອງທ່ານສາມາດຊອກຫາຄຳຕອບທີ່ເປັນໄປໄດ້ຢູ່ໃນ ຂໍ້ທີ 5, 41–42, ຫລື 69 ຢູ່ໃນ ພາກທີ 76. ທ່ານສາມາດຮ້ອງເພງ “ມີພູເຂົາຂຽວແສນໄກຫ່າງໄປ,” ເພງສວດ ແລະ ເພງຂອງເດັກນ້ອຍ, 26 ນຳອີກ. ເຮົາຈະສາມາດສະແດງຄວາມກະຕັນຍູຂອງເຮົາສຳລັບສິ່ງທີ່ພຣະຜູ້ຊ່ວຍໃຫ້ລອດໄດ້ກະທຳເພື່ອເຮົາໄດ້ແນວໃດ?

ພຣະເຢຊູ ແລະ ເດັກນ້ອຍ — ລາຍລະອຽດຈາກ Suffer the Children [ຈົ່ງປ່ອຍໃຫ້ເດັກນ້ອຍມາ], ໂດຍ ເຈ ເຄີກ ຣິເຈີດສ໌

ຄຳສອນ ແລະ ພັນທະສັນຍາ 76:62

ພຣະບິດາເທິງສະຫວັນຕ້ອງການໃຫ້ເຮົາກັບຄືນໄປຢູ່ກັບພຣະອົງຕະຫລອດໄປ.

ທ່ານ ແລະ ລູກໆຂອງທ່ານສາມາດອ່ານ ຫລື ເບິ່ງສ່ວນໜຶ່ງ ຫລື ທັງໝົດຈາກ “ບົດທີ 26: ອານາຈັກສະຫວັນສາມແຫ່ງ” (ໃນ ເລື່ອງຄຳສອນ ແລະ ພັນທະສັນຍາ, 97–103, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ) ແລະ ແບ່ງປັນນຳກັນສິ່ງທີ່ທ່ານມັກກ່ຽວກັບພາບນິມິດທີ່ໂຈເຊັບ ສະມິດ ໄດ້ເຫັນ. ໃຫ້ລູກໆຂອງທ່ານແບ່ງປັນຄວາມຄິດ ແລະ ຄວາມຮູ້ສຶກຂອງພວກເຂົາກ່ຽວກັບວ່າມັນຈະເປັນແນວໃດ ທີ່ຈະອາໄສຢູ່ກັບພຣະບິດາເທິງສະຫວັນ ໃນອານາຈັກຊັ້ນສູງ.

4:7
Chapter 26: The Three Kingdoms of Heaven: 16•February 1832
ທ່ານຍັງສາມາດອ່ານ ຄຳສອນ ແລະ ພັນທະສັນຍາ 76:62 ນຳອີກ ແລະ ເຊື້ອເຊີນລູກໆຂອງທ່ານໃຫ້ແຕ້ມຮູບຂອງຕົວພວກເຂົາເອງກັບພຣະບິດາເທິງສະຫວັນ ແລະ ພຣະເຢຊູຄຣິດ ຢູ່ໃນອານາຈັກຊັ້ນສູງ (ເບິ່ງ ໜ້າກິດຈະກຳ ຂອງອາທິດນີ້).

ຄຳສອນ ແລະ ພັນທະສັນຍາ 76:12, 15–19, 114–16

ການສຶກສາພຣະຄຳພີສາມາດຊ່ວຍເຮົາໃຫ້ “ເຂົ້າໃຈເລື່ອງຂອງພຣະເຈົ້າ.”

ທ່ານສາມາດເຊື້ອເຊີນລູກໆຂອງທ່ານໃຫ້ອ່ານ ຂໍ້ທີ 15–19 ເພື່ອຈະພົບເຫັນສິ່ງທີ່ໂຈເຊັບ ສະມິດ ແລະ ຊິດນີ ຣິກດອນ ກຳລັງເຮັດຢູ່ເມື່ອພວກເພິ່ນໄດ້ເຫັນພາບນິມິດຢູ່ໃນ ຄຳສອນ ແລະ ພັນທະສັນຍາ 76. ບອກລູກໆຂອງທ່ານກ່ຽວກັບເວລາເມື່ອທີ່ທ່ານໄດ້ຮັບການດົນໃຈໃນຂະນະທີ່ທ່ານອ່ານພຣະຄຳພີ, ແລະ ຖາມລູກໆຂອງທ່ານຖ້າຫາກວ່າພວກເຂົາເຄີຍໄດ້ມີປະສົບການທີ່ຄ້າຍຄືກັນ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບພາບຂອງລັດສະໝີພາບສາມລະດັບ — Glory by Degrees [ລັດສະໝີພາບຕາມລະດັບ], ໂດຍ ແອນນີ ເຮັນຣີ ເນເດີ