“ວັນທີ 21–27 ເດືອນກໍລະກົດ: ບ່ອນທີ່ ‘ຖືກປະທານໃຫ້ຫລາຍ ກໍຈະຖືກຮຽກຮ້ອງຫລາຍ’: ຄຳສອນ ແລະ ພັນທະສັນຍາ 81–83,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 81–83,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ລາຍລະອຽດຈາກ Christ and the Rich Young Ruler [ພຣະຄຣິດ ແລະ ເຈົ້ານາຍມະຫາເສດຖີໜຸ່ມ], ໂດຍ ເຮັນຣິກ ຮ໊ອບແມນ

ວັນທີ 21–27 ເດືອນກໍລະກົດ: ບ່ອນທີ່ “ຖືກປະທານໃຫ້ຫລາຍ ກໍຈະຖືກຮຽກຮ້ອງຫລາຍ”

ຄຳສອນ ແລະ ພັນທະສັນຍາ 81–83

ໃນເດືອນມີນາ ປີ 1832, ພຣະຜູ້ເປັນເຈົ້າໄດ້ເອີ້ນ ເຈຊີ ກໍສ໌ ໃຫ້ເປັນທີ່ປຶກສາຂອງໂຈເຊັບ ສະມິດ ໃນຝ່າຍປະທານຂອງຖານະປະໂລຫິດສູງ (ຕອນນີ້ເອີ້ນວ່າ ຝ່າຍປະທານສູງສຸດ). ຄຳສອນ ແລະ ພັນທະສັນຍາ 81 ເປັນການເປີດເຜີຍຕໍ່ບຣາເດີ ກໍສ໌ ກ່ຽວກັບການເອີ້ນໃໝ່ຂອງເພິ່ນ. ແຕ່ເຈຊີ ກໍສ໌ ບໍ່ໄດ້ຮັບໃຊ້ຢ່າງຊື່ສັດ, ສະນັ້ນ ເຟຣ໌ເດຣິກ ຈີ ວິວລຽມສ໌ ຈຶ່ງຖືກເອີ້ນໃຫ້ຮັບຕຳແໜ່ງແທນເພິ່ນ. ຊື່ຂອງບຣາເດີ ວິວລຽມສ໌ ໄດ້ແທນຊື່ຂອງບຣາເດີ ກໍສ໌ ໃນການເປີດເຜີຍ.

ສິ່ງນັ້ນເບິ່ງຄືວ່າເປັນລາຍລະອຽດເລັກນ້ອຍ, ແຕ່ມັນບອກເຖິງຄວາມຈິງທີ່ສຳຄັນ: ການເປີດເຜີຍສ່ວນຫລາຍ ຢູ່ໃນຄຳສອນ ແລະ ພັນທະສັນຍາ ແມ່ນກ່າວເຖິງຜູ້ຄົນໃດໜຶ່ງໂດຍສະເພາະ, ແຕ່ເຮົາສາມາດຊອກຫາວິທີທີ່ຈະນຳໃຊ້ມັນ ໃນຕົວເຮົາເອງໄດ້ (ເບິ່ງ 1 ນີໄຟ 19:23). ເມື່ອເຮົາອ່ານຄຳແນະນຳຂອງພຣະຜູ້ເປັນເຈົ້າຕໍ່ເຟຣ໌ເດຣິກ ຈີ ວິວລຽມສ໌ ເພື່ອ “ໃຫ້ກຳລັງຫົວເຂົ່າທີ່ອ່ອນເພຍ,” ເຮົາສາມາດຄິດເຖິງຜູ້ຄົນທີ່ເຮົາສາມາດເພີ່ມຄວາມເຂັ້ມແຂງໃຫ້ໄດ້ (ຄຳສອນ ແລະ ພັນທະສັນຍາ 81:5). ເມື່ອເຮົາອ່ານຄຳເຊື້ອເຊີນຂອງພຣະຜູ້ເປັນເຈົ້າເຖິງສະມາຊິກຂອງກຸ່ມທຸລະກິດເອກະພາບ ເພື່ອ “ໃຫ້ພວກເຈົ້າຜູກມັດຕົນເອງໂດຍພັນທະສັນຍານີ້,” ເຮົາສາມາດຄິດເຖິງພັນທະສັນຍາຂອງເຮົາເອງ. ແລະ ເຮົາສາມາດອ່ານຄຳສັນຍາຂອງພຣະອົງ, “ເຮົາ … ເຮັດຕາມສັນຍາເມື່ອພວກເຈົ້າເຮັດຕາມສິ່ງທີ່ເຮົາກ່າວ,” ຄືກັບວ່າພຣະອົງກຳລັງກ່າວກັບເຮົາ (ຄຳສອນ ແລະ ພັນທະສັນຍາ 82:10, 15). ເຮົາສາມາດເຮັດສິ່ງນີ້ເພາະ, ດັ່ງທີ່ພຣະຜູ້ເປັນເຈົ້າໄດ້ປະກາດວ່າ, “ສິ່ງໃດກໍຕາມທີ່ເຮົາກ່າວກັບຄົນໜຶ່ງ ກໍຄືກັນກັບເຮົາກ່າວກັບທຸກຄົນ” (ຂໍ້ທີ 5).

ເບິ່ງ “Newel K. Whitney and the United Firm,” “Jesse Gause: Counselor to the Prophet,” ໃນ Revelations in Context,, 142–47, 155–57.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 81:4–5; 82:18–19

“ເຈົ້າຈະເຮັດຄວາມດີອັນຍິ່ງໃຫຍ່ທີ່ສຸດແກ່ເພື່ອນມະນຸດຂອງເຈົ້າ.”

ໃນຂໍ້ພຣະຄຳພີຫລາຍຂໍ້ໃນ ຄຳສອນ ແລະ ພັນທະສັນຍາ 81–83, ພຣະຜູ້ເປັນເຈົ້າເຊື້ອເຊີນເຮົາໃຫ້ຊ່ວຍເຫລືອຄົນຂັດສົນທີ່ຢູ່ອ້ອມຂ້າງເຮົາ. ໃຫ້ຄິດທີ່ຈະໝາຍຂໍ້ພຣະຄຳພີເມື່ອທ່ານພົບເຫັນມັນ. ຕົວຢ່າງທີ່ບັນຍາຍຄວາມໝາຍຫລາຍທີ່ສຸດແມ່ນຢູ່ໃນ ຄຳສອນ ແລະ ພັນທະສັນຍາ 81:4–5. ຕໍ່ໄປນີ້ແມ່ນບາງຄຳຖາມ ເພື່ອຊ່ວຍທ່ານໄຕ່ຕອງຂໍ້ເຫລົ່ານີ້:

ມີທາງໃດແດ່ທີ່ຜູ້ຄົນສາມາດ “ອ່ອນແອ”? ຄຳວ່າ “ຊ່ວຍເຫລືອ” ໝາຍຄວາມວ່າແນວໃດ? ການຮັບໃຊ້ເໝືອນດັ່ງພຣະຄຣິດຂອງຄົນອື່ນ ຊ່ວຍເຮົາເມື່ອໃດ ຕອນເຮົາຮູ້ສຶກອ່ອນແອ?
ແມ່ນຫຍັງທີ່ເຮັດໃຫ້ມືຂອງຜູ້ຄົນ “ເມື່ອຍລ້າ” ໃນທາງປຽບທຽບ? ເຮົາຈະສາມາດ “ຍົກ” ມືເຫລົ່ານັ້ນຂຶ້ນໄດ້ແນວໃດ?
ຄຳວ່າ “ຫົວເຂົ່າທີ່ອ່ອນເພຍ” ໝາຍຄວາມວ່າແນວໃດ? ມັນຖືກເຮັດໃຫ້ເຂັ້ມແຂງແນວໃດ?

ພຣະຜູ້ຊ່ວຍໃຫ້ລອດເຮັດສິ່ງເຫລົ່ານີ້ເພື່ອທ່ານແນວໃດ?

ບາງທີການສຶກສາຂໍ້ນີ້ ອາດເຮັດໃຫ້ທ່ານນຶກເຖິງບາງຄົນທີ່ທ່ານສາມາດ “ຊ່ວຍເຫລືອ,” “ຍົກ,” ຫລື “ໃຫ້ກຳລັງ.” ທ່ານຈະເຮັດສິ່ງໃດເພື່ອປະຕິບັດສາດສະໜາກິດຕໍ່ບຸກຄົນນັ້ນ?

ທ່ານຮຽນຮູ້ຫຍັງແດ່ກ່ຽວກັບການຮັບໃຊ້ຄົນອື່ນໃນ ຄຳສອນ ແລະ ພັນທະສັນຍາ 82:18–19? ທ່ານອາດຈະເບິ່ງວິດີໂອ “Teachings of Thomas S. Monson: Rescuing Those in Need” (ຫ້ອງສະໝຸດພຣະກິດຕິຄຸນ) ນຳອີກ. ສະມາຊິກຫວອດຂອງອະທິການມອນສັນເປັນຕົວຢ່າງທີ່ດີເຖິງສິ່ງທີ່ຂໍ້ເຫລົ່ານີ້ສິດສອນແນວໃດ?

Teachings of Thomas S. Monson: Rescuing Those in Need
Bishop Thomas Monson and his ward welcome a poor German family into their community, providing them with housing, warmth, and food for Christmas.

ເບິ່ງ ຢາໂຄບ 2:17–19; ໂມໄຊຢາ 18:8–9; “Works of God” (ວິດີໂອ), ChurchofJesusChrist.org ນຳອີກ.

Works of God
Two families share how they have seen the works of God made manifest in their lives as ward members reach out in love and understanding.

ຄຳສອນ ແລະ ພັນທະສັນຍາ 82:3

ພຣະຜູ້ຊ່ວຍໃຫ້ລອດໄດ້ປະທານໃຫ້ເຮົາຫລາຍ ແລະ ຮຽກຮ້ອງຈາກເຮົາຫລາຍ.

ການອ່ານຂໍ້ນີ້ອາດກະຕຸ້ນໃຫ້ທ່ານທົບທວນສິ່ງທີ່ພຣະເຈົ້າໄດ້ປະທານໃຫ້ທ່ານ—ທັງພອນທາງຮ່າງກາຍ ແລະ ທາງວິນຍານ. ໃຫ້ຈື່ຈຳສິ່ງນີ້ໄວ້ໃນໃຈ ຂະນະທີ່ທ່ານອ່ານສ່ວນທີ່ເຫລືອຢູ່ຂອງ ພາກທີ 82. ທ່ານຮູ້ສຶກວ່າພຣະເຈົ້າຮຽກຮ້ອງຫຍັງຈາກທ່ານ?

ເບິ່ງ “Because I Have Been Given Much,” Hymns, no. 219 ນຳອີກ.

ຄຳສອນ ແລະ ພັນທະສັນຍາ 82:8–10

ພຣະບັນຍັດເປັນຫລັກຖານຢືນຢັນຄວາມຮັກຂອງພຣະເຈົ້າທີ່ມີຕໍ່ເຮົາ.

ຖ້າຫາກທ່ານ ຫລື ບາງຄົນທີ່ທ່ານຮູ້ຈັກເຄີຍສົງໄສວ່າເປັນຫຍັງພຣະຜູ້ເປັນເຈົ້າຈຶ່ງມອບພຣະບັນຍັດຫລາຍຂໍ້ໃຫ້, ຄຳສອນ ແລະ ພັນທະສັນຍາ 82:8–10 ສາມາດຊ່ວຍໄດ້. ຄວາມຮູ້ແຈ້ງໃດແດ່ໃນຂໍ້ເຫລົ່ານີ້ ທີ່ສາມາດຊ່ວຍທ່ານໃຫ້ອະທິບາຍຕໍ່ບາງຄົນ ເຖິງເຫດຜົນທີ່ທ່ານເລືອກເຮັດຕາມພຣະບັນຍັດຂອງພຣະຜູ້ເປັນເຈົ້າ? ທ່ານສາມາດປຽບທຽບພຣະບັນຍັດໃສ່ກັບຫຍັງທີ່ອາດຈະຊ່ວຍໄດ້? ທ່ານຈະພົບຄວາມຮູ້ແຈ້ງເພີ່ມເຕີມໃນ ຄຳສອນ ແລະ ພັນທະສັນຍາ 1:37–38; 130:20–21 ແລະ ວິດີໂອ “Blessed and Happy Are Those Who Keep the Commandments of God” (ຫ້ອງສະໝຸດພຣະກິດຕິຄຸນ). ປະສົບການໃດແດ່ທີ່ໄດ້ສິດສອນທ່ານໃຫ້ເຫັນວ່າພຣະບັນຍັດເປັນພອນ?

Blessed and Happy Are Those Who Keep the Commandments of God
Read Elder Keetch's full conference talk here: https://www.lds.org/general-conference/2015/10/blessed-and-happy-are-those-who-keep-the-commandments-of-god?lang=eng&_r=1

ຄິດກ່ຽວກັບພຣະບັນຍັດບາງຂໍ້ທີ່ພຣະເຈົ້າໄດ້ປະທານໃຫ້ທ່ານ. ພຣະບັນຍັດເຫລົ່ານີ້ສິດສອນຫຍັງແດ່ກ່ຽວກັບພຣະອົງ ແລະ ພຣະປະສົງຂອງພຣະອົງ? (ເບິ່ງ ຂໍ້ທີ 8). ຊີວິດຂອງທ່ານໄດ້ຮັບຜົນກະທົບແນວໃດຈາກການຮັກສາພຣະບັນຍັດເຫລົ່ານີ້?

ທ່ານຮຽນຮູ້ຫຍັງແດ່ກ່ຽວກັບພຣະຜູ້ເປັນເຈົ້າ ຈາກ ຂໍ້ທີ 10? ທ່ານຄິດວ່າພຣະຜູ້ເປັນເຈົ້າຖືກ “ຜູກມັດ” ໝາຍຄວາມວ່າແນວໃດ? (ເບິ່ງ ຂໍ້ທີ 15 ນຳອີກ).

ພຣະຜູ້ເປັນເຈົ້າໄດ້ຮັກສາຄຳສັນຍາຂອງພຣະອົງໃນຊີວິດຂອງທ່ານແນວໃດ? ທ່ານຈະເວົ້າແນວໃດກັບບາງຄົນທີ່ບໍ່ຮູ້ສຶກໄດ້ຮັບແຮງຈູງໃຈ ທີ່ຈະຮັກສາພຣະບັນຍັດ ເພາະພວກເຂົາບໍ່ໄດ້ຮັບພອນທີ່ພວກເຂົາຫວັງໄວ້? ທ່ານໄດ້ພົບຄວາມຮູ້ແຈ້ງທີ່ເປັນປະໂຫຍດຫລືບໍ່ ໃນຂ່າວສານຂອງແອວເດີ ດີ ທອດ ຄຣິສໂຕເຟີສັນ “Our Relationship with God”? (Liahona, May 2022, 78–80).

ເບິ່ງ Topics and Questions, “Commandments,” ຫ້ອງສະໝຸດພຣະກິດຕິຄຸນ ນຳອີກ.

ຄຳສອນ ແລະ ພັນທະສັນຍາ 82:10

ພຣະຜູ້ເປັນເຈົ້າອວຍພອນເຮົາໃນວິທີທີ່ອັດສະຈັນຂອງພຣະອົງເອງ.

ຊິດສະເຕີ ເວີຈີເນຍ ເອັຈ ເພຍສ໌, ອະດີດສະມາຊິກຂອງຝ່າຍປະທານຍິງໜຸ່ມສາມັນ, ໄດ້ກ່າວເຖິງສະຕີຄົນໜຶ່ງທີ່ເປັນຫ່ວງຫລາຍກ່ຽວກັບລູກໆຂອງນາງ ຜູ້ກຳລັງເລືອກເຮັດສິ່ງທີ່ບໍ່ຊອບທຳ. ດ້ວຍຄວາມຕື່ນຕົກໃຈ, ນາງໄດ້ພະຍາຍາມໃນທຸກວິທີທາງທີ່ນາງສາມາດຄິດໄດ້ ເພື່ອຂໍພອນຈາກພຣະເຈົ້າແທນພວກເຂົາ. ນອກເໜືອຈາກການອະທິຖານຢ່າງແຮງກ້າ, ນາງໄດ້ຕັ້ງເປົ້າໝາຍທີ່ທະເຍີທະຍານວ່າຈະໄປພຣະວິຫານເລື້ອຍກວ່າເກົ່າ ແລະ ຮູ້ສຶກແນ່ໃຈວ່າພຣະຜູ້ເປັນເຈົ້າຈະຮັບຮູ້ການເສຍສະລະອັນສຳຄັນນີ້ ໂດຍການປ່ຽນໃຈລູກໆຂອງນາງ. ຜູ້ຍິງຄົນນັ້ນໄດ້ລາຍງານວ່າ:

“ຫລັງຈາກສິບປີຂອງການໄປພຣະວິຫານຫລາຍຂຶ້ນ ແລະ ການອະທິຖານຕະຫລອດເວລາ, ຂ້ານ້ອຍເສຍໃຈທີ່ຕ້ອງບອກວ່າ ການເລືອກຂອງລູກໆຂອງຂ້ານ້ອຍບໍ່ປ່ຽນແປງເລີຍ. …

“ແຕ່ຂ້ານ້ອຍປ່ຽນໄປ. ຂ້ານ້ອຍແຕກຕ່າງ. … ຂ້ານ້ອຍມີຫົວໃຈທີ່ອ່ອນໂຍນ. ຂ້ານ້ອຍເຕັມໄປດ້ວຍຄວາມເຫັນອົກເຫັນໃຈ. ຕາມຈິງແລ້ວ ຂ້ານ້ອຍສາມາດເຮັດໄດ້ຫລາຍຢ່າງ ແລະ ເປັນອິດສະລະຈາກຄວາມຢ້ານກົວ, ຄວາມກັງວົນ, ຄວາມຮູ້ສຶກຜິດ, ການຕຳໜິ, ແລະ ຄວາມຫວາດຫວັ່ນ. ຂ້ານ້ອຍໄດ້ປະຖິ້ມຂີດຈຳກັດເວລາຂອງຂ້ານ້ອຍ ແລະ ສາມາດລໍຖ້າພຣະຜູ້ເປັນເຈົ້າໄດ້. ແລະ ຂ້ານ້ອຍໄດ້ປະສົບກັບການສະແດງໃຫ້ປະຈັກເຖິງອຳນາດຂອງພຣະຜູ້ເປັນເຈົ້າ. ພຣະອົງສົ່ງຄວາມເມດຕາອັນລະອຽດອ່ອນ, ຂ່າວສານນ້ອຍໆທີ່ສະແດງເຖິງຄວາມຮັກຂອງພຣະອົງທີ່ມີຕໍ່ຂ້ານ້ອຍ ແລະ ລູກໆຂອງຂ້ານ້ອຍ. ຄວາມຄາດຫວັງຂອງຂ້ານ້ອຍໄດ້ປ່ຽນໄປ. ແທນທີ່ຈະຄາດຫວັງໃຫ້ລູກໆຂອງຂ້ານ້ອຍປ່ຽນແປງ, ຂ້ານ້ອຍຄາດຫວັງຄວາມເມດຕາອັນລະອຽດອ່ອນເຫລົ່ານີ້ເລື້ອຍໆ ແລະ ເຕັມໄປດ້ວຍຄວາມກະຕັນຍູຕໍ່ມັນ. …

“ຄຳອະທິຖານຂອງຂ້ານ້ອຍໄດ້ປ່ຽນໄປ. ຂ້ານ້ອຍສະແດງຄວາມຮັກຫລາຍຂຶ້ນ ແລະ ຮູ້ສຶກຂອບພຣະຄຸນຫລາຍຂຶ້ນ. … ພຣະຜູ້ເປັນເຈົ້າທຳງານໃນວິທີອັດສະຈັນ, ແລະ ຂ້ານ້ອຍເຕັມປ່ຽມໄປດ້ວຍສັນຕິສຸກທີ່ເກີນກວ່າຈະເຂົ້າໃຈໄດ້ແທ້ໆ” (ໃນ “Prayer: A Small and Simple Thing,” At the Pulpit [2017], 288–89).

ຄຳສອນ ແລະ ພັນທະສັນຍາ 83

“ຈະຕ້ອງຈັດຫາໃຫ້ແມ່ໝ້າຍ ແລະ ເດັກກຳພ້າ.”

ໃນເດືອນເມສາ ປີ 1832, ຕາມທີ່ໄດ້ຮັບຄຳແນະນຳຈາກພຣະຜູ້ເປັນເຈົ້າ, ໂຈເຊັບ ສະມິດ ໄດ້ເດີນທາງເກືອບເຖິງ 800 ໄມ (1288 ກິໂລແມັດ) ໄປຢ້ຽມຢາມໄພ່ພົນ ຜູ້ທີ່ໄດ້ເຕົ້າໂຮມກັນຢູ່ ລັດມີເຊີຣີ (ເບິ່ງ ຄຳສອນ ແລະ ພັນທະສັນຍາ 78:9). ຂະນະທີ່ເພິ່ນຢູ່ທີ່ນັ້ນ, ເພິ່ນໄດ້ໄປຢ້ຽມຢາມຊຸມຊົນແຫ່ງໜຶ່ງ ຊຶ່ງມີແມ່ໝ້າຍຫລາຍຄົນ ທີ່ລ້ຽງລູກຕາມລຳພັງ. ໃນບັນດາເຂົາເຈົ້າ ແມ່ນນາງຟີບີ ແພ໊ກ ແລະ ແອນນາ ຣໍເຈີ, ຜູ້ຊຶ່ງສາດສະດາຮູ້ຈັກເປັນສ່ວນຕົວ. ຢູ່ໃນລັດມີເຊີຣີ ໃນຊ່ວງຊຸມປີ 1830, ກົດໝາຍລັດໄດ້ໃຫ້ສິດແບບຈຳກັດແກ່ແມ່ໝ້າຍ ເລື່ອງການໄດ້ຮັບຊັບສິນຂອງສາມີທີ່ເສຍຊີວິດ. ທ່ານຮຽນຮູ້ຫຍັງແດ່ຈາກ ພາກທີ 83 ກ່ຽວກັບຄວາມຮູ້ສຶກຂອງພຣະຜູ້ເປັນເຈົ້າ ກ່ຽວກັບແມ່ໝ້າຍ ແລະ ເດັກກໍພ້າ? ທ່ານຮູ້ຈັກໃຜບໍ ທີ່ຢູ່ໃນສະຖານະການນີ້ ຜູ້ສາມາດໄດ້ຮັບຜົນປະໂຫຍດຈາກຄວາມຮັກ ແລະ ການດູແລຂອງທ່ານ? ມີວິທີໃດແດ່ທີ່ທ່ານສາມາດແບ່ງປັນສິ່ງທີ່ທ່ານມີກັບແມ່ໝ້າຍ, ເດັກກຳພ້າ, ແມ່ລ້ຽງລູກດ່ຽວ, ແລະ ຄົນອື່ນໆ?

ເບິ່ງ ເອຊາຢາ 1:17; ຢາໂກໂບ 1:27 ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 81:3

ເຮົາສາມາດອະທິຖານຫາພຣະເຈົ້າ “ໂດຍອອກສຽງ ແລະ ໃນໃຈ [ຂອງເຮົາ].”

ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 81:3 ກັບລູກໆຂອງທ່ານ, ໃຫ້ຊ່ວຍພວກເຂົາຄິດເຖິງສະຖານທີ່ “ສາທາລະນະ” ແລະ “ສ່ວນຕົວ” ທີ່ພວກເຂົາສາມາດອະທິຖານໄດ້. ທ່ານອາດຈະຟັງ ຫລື ຮ້ອງເພງກັບພວກເຂົາ ກ່ຽວກັບການອະທິຖານ, ເຊັ່ນ “ອະທິຖານຄອບຄົວ” (ເພງສວດ ແລະ ເພງຂອງເດັກນ້ອຍ, 73). ແບ່ງປັນນຳກັນບາງຢ່າງຈາກເພງສວດທີ່ສິດສອນຄວາມຈິງສຳຄັນກ່ຽວກັບການອະທິຖານ. ທ່ານກໍສາມາດເວົ້າລົມກ່ຽວກັບຄວາມຄາລະວະຕໍ່ພຣະບິດາເທິງສະຫວັນນຳອີກ.
ເພື່ອຊຸກຍູ້ລູກໆຂອງທ່ານໃຫ້ອະທິຖານໃນໃຈຂອງພວກເຂົາ, ທ່ານສາມາດເອົາຫົວໃຈເຈ້ຍໃຫ້ພວກເຂົາ ແລະ ເຊື້ອເຊີນໃຫ້ພວກເຂົາແຕ້ມ ຫລື ຂຽນບາງສິ່ງທີ່ພວກເຂົາຕ້ອງການອະທິຖານກ່ຽວກັບຕໍ່ພຣະບິດາເທິງສະຫວັນ. ເປັນພະຍານວ່າພຣະບິດາເທິງສະຫວັນຮູ້ວ່າເຮົາກຳລັງຄິດ ແລະ ຮູ້ສຶກແນວໃດ ແລະ ພຣະອົງສາມາດໄດ້ຍິນຄຳອະທິຖານຂອງເຮົາ ເຖິງແມ່ນວ່າເຮົາຈະບໍ່ເວົ້າອອກສຽງກໍຕາມ. ທ່ານອາດແບ່ງປັນກັບພວກເຂົາເຖິງປະສົບການຕອນທີ່ທ່ານໄດ້ອະທິຖານໃນໃຈຂອງທ່ານ ແລະ ພຣະບິດາເທິງສະຫວັນໄດ້ຍິນທ່ານ.

ຄຳສອນ ແລະ ພັນທະສັນຍາ 81:5

ພຣະຜູ້ເປັນເຈົ້າຕ້ອງການໃຫ້ເຮົາຊ່ວຍຄົນຂັດສົນ.

ກັບລູກໆຂອງທ່ານ, ໃຫ້ແຕ້ມຮູບມື ແລະ ຫົວເຂົ່າ, ແລະ ຂໍໃຫ້ລູກໆຂອງທ່ານຊອກຫາອະໄວຍະວະເຫລົ່ານີ້ໃນ ຄຳສອນ ແລະ ພັນທະສັນຍາ 81:5. ພຣະຜູ້ເປັນເຈົ້າໄດ້ຂໍໃຫ້ເຮົາເຮັດຫຍັງໃນຂໍ້ນີ້? ພວກທ່ານອາດແບ່ງປັນນຳກັນກ່ຽວກັບວິທີທີ່ຜູ້ຄົນເຮັດໃຫ້ທ່ານເຂັ້ມແຂງຂຶ້ນ ເມື່ອທ່ານຮູ້ສຶກ “ອ່ອນແອ” ຫລື “ເມື່ອຍລ້າ.” ວິດີໂອ “Pass It On” (ChurchofJesusChrist.org) ສາມາດໃຫ້ແນວຄິດແກ່ລູກໆຂອງທ່ານກ່ຽວກັບວ່າ ພວກເຂົາຈະຮັບໃຊ້ຄົນອື່ນແນວໃດ. ພວກທ່ານກໍສາມາດຮ້ອງເພງກ່ຽວກັບການຮັບໃຊ້, ເຊັ່ນ “ຄວາມເມດຕາເລີ່ມຈາກເຮົາ” ( ເພງສວດ ແລະ ເພງຂອງເດັກນ້ອຍ, 69). ໃຫ້ຄິດທີ່ຈະຊ່ວຍລູກໆຂອງທ່ານວາງແຜນຊ່ວຍເຫລືອຄົນຂັດສົນຢ່າງໜ້ອຍຄົນໜຶ່ງໃນອາທິດນີ້.

2:3
Pass It On
Children around the world have taken President Thomas S. Monson's counsel to find a way to serve others.
ທ່ານກໍສາມາດໃຊ້ຮູບພາບ ຫລື ວິດີໂອ ນຳອີກ ເພື່ອເລົ່າເລື່ອງງ່າຍໆກ່ຽວກັບພຣະເຢຊູຄຣິດຮັບໃຊ້ຄົນອື່ນ (ເບິ່ງຮູບພາບໃນໂຄງຮ່າງນີ້; ປຶ້ມຮູບພຣະກິດຕິຄຸນ, ເລກທີ 41, 42, 46, 47, 55; ຫລື Bible Videos ເລື່ອງໜຶ່ງໃນຫ້ອງສະໝຸດພຣະກິດຕິຄຸນ). ເຮົາຈະສາມາດເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດ ເພື່ອຊ່ວຍເຫລືອຄົນອື່ນໄດ້ແນວໃດ?

ພຣະເຢຊູຄຣິດກັບຜູ້ຍິງທີ່ພຣະອົງໄດ້ປິ່ນປົວ — ເຮົາສາມາດເອື້ອມອອກໄປຫາຄົນຂັດສົນ ດັ່ງທີ່ພຣະຜູ້ຊ່ວຍໃຫ້ລອດໄດ້ກະທຳ.

ຊ່ວຍລູກໆຂອງທ່ານໃຫ້ໄດ້ຮັບແຮງດົນໃຈຂອງຕົນເອງ. ການສິດສອນມີຄວາມໝາຍຫລາຍກວ່າການພຽງແຕ່ແບ່ງປັນຄວາມຈິງ—ມັນໝາຍເຖິງການຊ່ວຍຄົນອື່ນໃຫ້ກາຍເປັນຜູ້ຮຽນຮູ້ຢ່າງມີອິດສະລະ. ແທນທີ່ຈະບອກລູກໆຂອງທ່ານວ່າຈະຮັບໃຊ້ຄົນອື່ນໄດ້ແນວໃດ, ໃຫ້ຊຸກຍູ້ພວກເຂົາໃຫ້ສະແຫວງຫາການຊົງນຳຈາກພຣະຜູ້ເປັນເຈົ້າ ເພື່ອຈະໄດ້ຮູ້ວ່າພວກເຂົາສາມາດຊ່ວຍເຫລືອຜູ້ໃດ.

ຄຳສອນ ແລະ ພັນທະສັນຍາ 82:10

ພຣະບິດາເທິງສະຫວັນສັນຍາພອນ ເມື່ອເຮົາພະຍາຍາມເຊື່ອຟັງພຣະອົງ.

ທ່ານ ແລະ ລູກໆຂອງທ່ານສາມາດເບິ່ງໃນ ຄຳສອນ ແລະ ພັນທະສັນຍາ 82:8–10 ເພື່ອຫາຄຳຕອບໃຫ້ກັບຄຳຖາມທີ່ວ່າ “ເປັນຫຍັງພຣະບິດາເທິງສະຫວັນຈຶ່ງມອບພຣະບັນຍັດໃຫ້ເຮົາ?” ທ່ານອາດຢາກຊ່ວຍລູກໆຂອງທ່ານໃຫ້ຄິດເຖິງຕົວຢ່າງຂອງພຣະບັນຍັດຂອງພຣະອົງ (ເບິ່ງ, ຍົກຕົວຢ່າງ, ອົບພະຍົບ 20:4–17; ມັດທາຍ 22:37–39; ຄຳສອນ ແລະ ພັນທະສັນຍາ 89:5–17). ມັນອາດຊ່ວຍໄດ້ຖ້າຫາກທ່ານ ແລະ ລູກໆຂອງທ່ານຊອກຫາ ຫລື ແຕ້ມຮູບທີ່ເປັນຕົວແທນໃຫ້ບາງຢ່າງ. ພຣະບັນຍັດຂອງພຣະບິດາເທິງສະຫວັນສະແດງຄວາມຮັກຂອງພຣະອົງທີ່ມີຕໍ່ເຮົາແນວໃດ?
ບາງທີເກມງ່າຍໆອາດຊ່ວຍໃຫ້ລູກໆຂອງທ່ານເຫັນວ່າພຣະບັນຍັດຂອງພຣະເຈົ້າເປັນພອນ, ບໍ່ແມ່ນພາລະ. ຄົນໜຶ່ງອາດໃຫ້ຄຳແນະນຳເພື່ອຊ່ວຍອີກຄົນໜຶ່ງທີ່ຖືກປິດຕາໃຫ້ເຮັດບາງສິ່ງ ເຊັ່ນ ເຮັດແຊນວິຈ ຫລື ແຕ້ມຮູບ. ຄິດຫາບາງສິ່ງທີ່ມ່ວນຊື່ນ ແລະ ສ້າງສັນ! ແລ້ວເວົ້າລົມກ່ຽວກັບພຣະບັນຍັດຂອງພຣະເຈົ້າ ວ່າຄ້າຍຄືກັນກັບຄຳແນະນຳໃນເກມນີ້ແນວໃດ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ພຣະເຢຊູຄຣິດກັບຜູ້ຊາຍທີ່ພຣະອົງໄດ້ປິ່ນປົວ — ຮູບພາບພຣະເຢຊູຄຣິດກຳລັງປິ່ນປົວຜູ້ຊາຍຄົນໜຶ່ງ, ໂດຍ ແດນ ເບີ