“ວັນທີ 28 ເດືອນກໍລະກົດ–ວັນທີ 3 ເດືອນສິງຫາ: ‘ອຳນາດຂອງຄວາມເປັນເໝືອນພຣະເຈົ້າ’: ຄຳສອນ ແລະ ພັນທະສັນຍາ 84,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 84,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025
ລາຍລະອຽດຈາກ The Restoration of the Melchizedek Priesthood [ການຟື້ນຟູຖານະປະໂລຫິດແຫ່ງເມນຄີເຊເດັກ], ໂດຍ ລິສ ລີມອນ ສະວິນໂດ
ວັນທີ 28 ເດືອນກໍລະກົດ–ວັນທີ 3 ເດືອນສິງຫາ: “ອຳນາດຂອງຄວາມເປັນເໝືອນພຣະເຈົ້າ”
ຄຳສອນ ແລະ ພັນທະສັນຍາ 84
ນັບຕັ້ງແຕ່ຖານະປະໂລຫິດໄດ້ຖືກຟື້ນຟູ ໃນປີ 1829, ໄພ່ພົນລຸ້ນທຳອິດກໍໄດ້ຮັບພອນໂດຍອຳນາດອັນສັກສິດຂອງພຣະຜູ້ເປັນເຈົ້າ. ພວກເຂົາໄດ້ຮັບບັບຕິສະມາ, ໄດ້ຮັບການຢືນຢັນ, ແລະ ໄດ້ຖືກເອີ້ນໃຫ້ຮັບໃຊ້ໂດຍສິດອຳນາດຂອງຖານະປະໂລຫິດ, ຄືກັນກັບທີ່ພວກເຮົາໄດ້ຮັບໃນສະໄໝນີ້. ແຕ່ການເຂົ້າຫາອຳນາດຂອງຖານະປະໂລຫິດ ບໍ່ຄືກັບການເຂົ້າໃຈມັນຢ່າງຖີ່ຖ້ວນ, ແລະ ພຣະເຈົ້າມີຫລາຍກວ່ານັ້ນ ທີ່ພຣະອົງປະສົງໃຫ້ຜູ້ຮັບໃຊ້ຂອງພຣະອົງເຂົ້າໃຈ—ໂດຍສະເພາະແມ່ນກັບການຟື້ນຟູພິທີການຂອງພຣະວິຫານ ທີ່ກຳລັງຈະເກີດຂຶ້ນ. ການເປີດເຜີຍໃນປີ 1832 ກ່ຽວກັບຖານະປະໂລຫິດນັ້ນ, ດຽວນີ້ເປັນ ຄຳສອນ ແລະ ພັນທະສັນຍາ 84, ໄດ້ຂະຫຍາຍມະໂນພາບຂອງໄພ່ພົນ ເຖິງສິ່ງທີ່ຖານະປະໂລຫິດ ແມ່ນກ່ຽວກັບຫຍັງແທ້ໆ. ແລະ ມັນສາມາດເຮັດຄືກັນສຳລັບເຮົາໃນສະໄໝນີ້. ເຖິງຢ່າງໃດ, ມັນມີຫລາຍຢ່າງທີ່ຕ້ອງຮຽນຮູ້ກ່ຽວກັບອຳນາດແຫ່ງສະຫວັນທີ່ຖື “ຂໍກະແຈແຫ່ງຄວາມຮູ້ຂອງພຣະເຈົ້າ,” ທີ່ສະແດງ “ອຳນາດຂອງຄວາມເປັນເໝືອນພຣະເຈົ້າ” ໃຫ້ປະຈັກ, ແລະ ສິ່ງນັ້ນກະກຽມເຮົາໃຫ້ “ເຫັນພຣະພັກຂອງພຣະເຈົ້າ, ແມ່ນແຕ່ພຣະບິດາ, ແລະ ມີຊີວິດຢູ່” (ຂໍ້ ທີ 19–22).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ຄຳສອນ ແລະ ພັນທະສັນຍາ 84:17–32
ເຮົາສາມາດເຂົ້າເຖິງອຳນາດຂອງຖານະປະໂລຫິດຂອງພຣະເຈົ້າ ແລະ ພອນທັງຫລາຍ.
ເມື່ອທ່ານຄິດເຖິງຄຳວ່າ ຖານະປະໂລຫິດ, ສິ່ງໃດເຂົ້າມາສູ່ຈິດໃຈ? ອຳນາດຂອງຖານະປະໂລຫິດຂອງພຣະເຈົ້າມີອິດທິພົນຕໍ່ຊີວິດຂອງທ່ານແນວໃດ?
ຫລັງຈາກໄດ້ໄຕ່ຕອງຄຳຖາມເຫລົ່ານີ້ແລ້ວ, ທ່ານອາດສຶກສາ ຄຳສອນ ແລະ ພັນທະສັນຍາ 84:17–32, ເພື່ອຊອກຫາສິ່ງທີ່ພຣະເຈົ້າຢາກໃຫ້ທ່ານຮູ້ກ່ຽວກັບອຳນາດຖານະປະໂລຫິດຂອງພຣະອົງ. ໃຫ້ພິຈາລະນາວິທີທີ່ສາມາດໃຊ້ຂໍ້ເຫລົ່ານີ້ ເພື່ອບັນຍາຍເຖິງຖານະປະໂລຫິດ ແລະ ຈຸດປະສົງຂອງມັນໃຫ້ໃຜຄົນໜຶ່ງຟັງ.
ສິ່ງໜຶ່ງທີ່ທ່ານຈະພົບແມ່ນ ຜ່ານທາງພິທີການຖານະປະໂລຫິດ “ອຳນາດຂອງຄວາມເປັນເໝືອນພຣະເຈົ້າຈະສະແດງໃຫ້ປະຈັກ” (ເບິ່ງ ຂໍ້ທີ 19–21). ບາງທີທ່ານກໍສາມາດຂຽນລາຍການພິທີການຖານະປະໂລຫິດທີ່ທ່ານເຄີຍມີສ່ວນຮ່ວມ (ລາຍການໃນ ຄູ່ມືທົ່ວໄປ, 18.1, 18.2, ສາມາດຊ່ວຍໄດ້). ພິທີການເຫລົ່ານີ້—ແລະ ພັນທະສັນຍາທີ່ກ່ຽວຂ້ອງ—ໄດ້ນຳອຳນາດຂອງພຣະເຈົ້າມາສູ່ຊີວິດຂອງທ່ານແນວໃດ? ຊີວິດຂອງທ່ານຈະເປັນແນວໃດຖ້າບໍ່ມີມັນ?
ປະທານຣະໂຊ ເອັມ ແນວສັນ ໄດ້ສິດສອນວ່າ: “ຍິງ ແລະ ຊາຍທຸກຄົນ ຜູ້ເຮັດພັນທະສັນຍາກັບພຣະເຈົ້າ ແລະ ຮັກສາພັນທະສັນຍາເຫລົ່ານັ້ນ, ແລະ ຜູ້ທີ່ມີສ່ວນຮ່ວມໃນພິທີການຂອງຖານະປະໂລຫິດຢ່າງມີຄ່າຄວນ, ເຂົາເຈົ້າຈະໄດ້ຮັບອຳນາດຈາກພຣະເຈົ້າໂດຍກົງ” (“Spiritual Treasures,” Liahona, Nov. 2019, 77). ໃຫ້ພິຈາລະນາທີ່ຈະສຶກສາຂ່າວສານຂອງປະທານແນວສັນ, ໂດຍຊອກຫາວິທີທີ່ທ່ານສາມາດ “ດຶງດູດເອົາພະລັງຂອງພຣະຜູ້ຊ່ວຍໃຫ້ລອດເຂົ້າມາສູ່ຊີວິດ [ຂອງທ່ານ].”
ເບິ່ງ ຄຳສອນ ແລະ ພັນທະສັນຍາ 25:10, 13, 15; 121:34–37, 41–46; Topics and Questions, “Priesthood,” “Joseph Smith’s Teachings about Priesthood, Temples, and Women,” ຫ້ອງສະໝຸດພຣະກິດຕິຄຸນ; ຄູ່ມືທົ່ວໄປ, 3.6, ຫ້ອງສະໝຸດພຣະກິດຕິຄຸນ ນຳອີກ.
ຄຳສອນ ແລະ ພັນທະສັນຍາ 84:31–44
ຖານະປະໂລຫິດແມ່ນໄດ້ມາພ້ອມກັບຄຳສາບານ ແລະ ພັນທະສັນຍາ.
ຄຳສາບານ ແລະ ພັນທະສັນຍາຂອງຖານະປະໂລຫິດ (ເບິ່ງ ຄຳສອນ ແລະ ພັນທະສັນຍາ 84:31–44) ມີການນຳໃຊ້ທີ່ພິເສດສຳລັບບຸດທັງຫລາຍຂອງພຣະບິດາເທິງສະຫວັນ ຜູ້ທີ່ໄດ້ຮັບການແຕ່ງຕັ້ງສູ່ຕຳແໜ່ງຖານະປະໂລຫິດໜຶ່ງ, ແຕ່ພອນຫລາຍຢ່າງທີ່ໄດ້ສັນຍາໄວ້ໃນຂໍ້ເຫລົ່ານີ້ແມ່ນມີໃຫ້ລູກໆຂອງພຣະເຈົ້າທຸກຄົນ. ຄຳສັນຍາເຫລົ່ານີ້ແມ່ນຫຍັງ, ແລະ ສິ່ງໃດທີ່ພຣະເຈົ້າຂໍໃຫ້ເຮົາເຮັດເພື່ອຮັບເອົາມັນ?
ແອວເດີ ພອລ໌ ບີ ພີເປີ ໄດ້ສິດສອນວ່າ: “ມັນເປັນທີ່ໜ້າສົນໃຈ ທີ່ໃນຄຳສາບານ ແລະ ພັນທະສັນຍາຂອງຖານະປະໂລຫິດ [ເບິ່ງ ຄຳສອນ ແລະ ພັນທະສັນຍາ 84:31–44], ພຣະຜູ້ເປັນເຈົ້າໃຊ້ຄຳກິລິຍາ ໄດ້ຮັບ ແລະ ຮັບເອົາ. ພຣະອົງບໍ່ໄດ້ໃຊ້ຄຳກິລິຍາ ແຕ່ງຕັ້ງ. ມັນແມ່ນຢູ່ໃນພຣະວິຫານທີ່ຊາຍ ແລະ ຍິງ—ນຳກັນ—ໄດ້ຮັບ ແລະ ຮັບເອົາພອນ ແລະ ອຳນາດຂອງຖານະປະໂລຫິດແຫ່ງອາໂຣນ ແລະ ເມນຄີເສເດັກ ທັງສອງ” (“Revealed Realities of Mortality,” Ensign, Jan. 2016, 21).
ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 84:31–44, ໃຫ້ໄຕ່ຕອງວ່າ ການ “ໄດ້ຮັບ” ແລະ “ຮັບເອົາ” ຖານະປະໂລຫິດ ໝາຍຄວາມວ່າແນວໃດ. ສິ່ງນີ້ແຕກຕ່າງຈາກການຮັບການແຕ່ງຕັ້ງສູ່ຕຳແໜ່ງຖານະປະໂລຫິດແນວໃດ? ພຣະຜູ້ເປັນເຈົ້າເຊື້ອເຊີນທ່ານໃຫ້ຮັບຫຍັງອີກແດ່ໃນຂໍ້ເຫລົ່ານີ້? ທ່ານຈະເຮັດສິ່ງນັ້ນໄດ້ແນວໃດ?
ທ່ານພົບເຫັນຫຍັງແດ່ທີ່ດົນໃຈທ່ານໃຫ້ຊື່ສັດຫລາຍກວ່າເກົ່າ ໃນການຮັບເອົາພຣະຜູ້ຊ່ວຍໃຫ້ລອດ, ພຣະບິດາຂອງພຣະອົງ, ຜູ້ຮັບໃຊ້ຂອງພຣະອົງ, ແລະ ອຳນາດຂອງຖານະປະໂລຫິດຂອງພຣະອົງ?
ຄຳສອນ ແລະ ພັນທະສັນຍາ 84:43–61
ການດຳລົງຊີວິດຕາມພຣະຄຳຂອງພຣະເຈົ້າ ນຳຄວາມສະຫວ່າງ ແລະ ຄວາມຈິງເຂົ້າມາສູ່ຊີວິດເຮົາ.
ທ່ານພົບເຫັນຄວາມຈິງໃດແດ່ ຢູ່ໃນ ຄຳສອນ ແລະ ພັນທະສັນຍາ 84:43–61 ທີ່ຊ່ວຍທ່ານໃຫ້ເຂົ້າໃຈເຫດຜົນທີ່ທ່ານຈຳເປັນຕ້ອງສຶກສາພຣະຄຳຂອງພຣະເຈົ້າຢ່າງສະໝ່ຳສະເໝີ? ໃຫ້ສັງເກດເບິ່ງຄວາມແຕກຕ່າງລະຫວ່າງຄວາມສະຫວ່າງ ແລະ ຄວາມມືດ ຢູ່ໃນຂໍ້ເຫລົ່ານີ້; ວ່າວິທີທີ່ທ່ານ “ເອົາໃຈໃສ່ຢ່າງພາກພຽນຕໍ່ພຣະຄຳແຫ່ງຊີວິດນິລັນດອນ” ໄດ້ນຳຄວາມສະຫວ່າງ, ຄວາມຈິງ, ແລະ “ພຣະວິນຍານຂອງພຣະເຢຊູຄຣິດ” ເຂົ້າມາໃນຊີວິດຂອງທ່ານແນວໃດ? (ຂໍ້ທີ 43, 45).
ເບິ່ງ 2 ນີໄຟ 32:3 ນຳອີກ.
ປຽບທຽບຫລັກທຳພຣະກິດຕິຄຸນກັບສິ່ງທີ່ຄຸ້ນເຄີຍ. ທ່ານສາມາດນຶກເຖິງການປຽບທຽບທີ່ຈະສະແດງໃຫ້ເຫັນເຖິງຄວາມຈິງໃນ ຂໍ້ທີ 43–44 ໄດ້ບໍ່? ຍົກຕົວຢ່າງ, ການຕິດຕາມຂັ້ນຕອນທັງໝົດໃນສູດອາຫານ ປຽບສະເໝືອນການດຳລົງຊີວິດ “ຕາມທຸກຄຳ … ຂອງພຣະເຈົ້າ” ແນວໃດ?
“ເອົາໃຈໃສ່ຢ່າງພາກພຽນຕໍ່ພຣະຄຳແຫ່ງຊີວິດນິລັນດອນ.”
ຄຳສອນ ແລະ ພັນທະສັນຍາ 84:62–91
ພຣະຜູ້ເປັນເຈົ້າຈະສະຖິດຢູ່ກັບເຮົາ ເມື່ອເຮົາຢູ່ໃນການຮັບໃຊ້ຂອງພຣະອົງ.
ຂະນະທີ່ທ່ານອ່ານຂໍ້ເຫລົ່ານີ້, ທ່ານຈະສາມາດລະບຸວິທີທີ່ພຣະຜູ້ເປັນເຈົ້າກ່າວວ່າ ພຣະອົງຈະສະໜັບສະໜູນຜູ້ຮັບໃຊ້ຂອງພຣະອົງ. ຄຳສັນຍາເຫລົ່ານີ້ກ່ຽວຂ້ອງກັບວຽກງານທີ່ພຣະອົງໄດ້ຂໍໃຫ້ທ່ານເຮັດແນວໃດ? ຍົກຕົວຢ່າງ, ຄຳສັນຍາຢູ່ໃນ ຂໍ້ທີ 88 ໄດ້ສຳເລັດຄົບຖ້ວນໃນຊີວິດຂອງທ່ານແນວໃດ?
ຄຳສອນ ແລະ ພັນທະສັນຍາ 84:106–110
ທຸກຄົນສາມາດປະກອບສ່ວນໃນວຽກງານຂອງພຣະເຈົ້າ.
ທ່ານຮຽນຮູ້ຫຍັງແດ່ຈາກຂໍ້ເຫລົ່ານີ້ກ່ຽວກັບວິທີທີ່ພຣະຜູ້ເປັນເຈົ້າສຳເລັດວຽກງານຂອງພຣະອົງ? ທ່ານພົບເຫັນຄຳແນະນຳ ແລະ ພອນຢ່າງໃດແດ່? ທ່ານອາດຄິດກ່ຽວກັບວິທີທີ່ທ່ານໄດ້ຮັບ “ການເສີມສ້າງໃນ ຄວາມອ່ອນໂຍນທຸກຢ່າງ” ຍ້ອນວ່າທ່ານໄດ້ຮັບໃຊ້ກັບຄົນທີ່ “ເຂັ້ມແຂງໃນພຣະວິນຍານ,” ລວມທັງຄົນຢູ່ໃນຄອບຄົວຂອງທ່ານ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ຄຳສອນ ແລະ ພັນທະສັນຍາ 84:4–5
ພິທີການພຣະວິຫານຊ່ວຍເຮົາກະກຽມເພື່ອທີ່ຈະຢູ່ກັບພຣະບິດາເທິງສະຫວັນອີກຄັ້ງ.
-
ເພື່ອຊ່ວຍລູກໆຂອງທ່ານໃຫ້ຕັ້ງຕາຄອງຄອຍຖ້າທີ່ຈະໄປພຣະວິຫານ, ທ່ານສາມາດສ້າງພາບປິດສະໜາຈາກຮູບຂອງພຣະວິຫານ. ຢູ່ທາງຫລັງແຕ່ລະຊິ້ນສ່ວນ, ທ່ານສາມາດຂຽນບາງສິ່ງທີ່ເຮົາເຮັດໃນພຣະວິຫານ, ເຊັ່ນ ການຮັບບັບຕິສະມາເພື່ອບັນພະບຸລຸດ, ການຖືກຜະນຶກເຂົ້າກັບຄອບຄົວຂອງເຮົາ, ແລະ ການເຮັດພັນທະສັນຍາກັບພຣະເຈົ້າ. ອ່ານ ຄຳສອນ ແລະ ພັນທະສັນຍາ 84:4–5 ກັບລູກໆຂອງທ່ານ, ແລະ ຂໍໃຫ້ພວກເຂົາຟັງສິ່ງທີ່ພຣະຜູ້ເປັນເຈົ້າໄດ້ບັນຊາໃຫ້ໄພ່ພົນສ້າງ. ຂະນະທີ່ທ່ານ ແລະ ລູກໆຂອງທ່ານຕໍ່ຮູບປິດສະໜາເຂົ້າກັນ, ໃຫ້ແບ່ງປັນນຳກັນເຖິງສິ່ງທີ່ເຮົາສາມາດເຮັດໄດ້ ເພື່ອກຽມຕົວທີ່ຈະເຂົ້າພຣະວິຫານ.
ຄຳສອນ ແລະ ພັນທະສັນຍາ 84:19–22
ເຮົາສາມາດຮັບອຳນາດຂອງພຣະບິດາເທິງສະຫວັນໄດ້ຜ່ານທາງພິທີການຖານະປະໂລຫິດ.
-
ເພື່ອຊ່ວຍໃຫ້ລູກໆຂອງທ່ານເຂົ້າໃຈວ່າ ພິທີການແມ່ນຫຍັງ, ໃຫ້ພິຈາລະນາທີ່ຈະເບິ່ງຮູບພາບຂອງພິທີການຖານະປະໂລຫິດຫລາຍຢ່າງກັບພວກເຂົາ, ເຊັ່ນ ປຶ້ມຮູບພຣະກິດຕິຄຸນ, ເລກທີ 103–8, ຫລື ໜ້າກິດຈະກຳ ຂອງອາທິດນີ້. ຂໍໃຫ້ພວກເຂົາບັນຍາຍສິ່ງທີ່ກຳລັງເກີດຂຶ້ນໃນແຕ່ລະຮູບ. ແລ້ວພວກທ່ານກໍສາມາດອ່ານ ຄຳສອນ ແລະ ພັນທະສັນຍາ 84:19–22 ນຳກັນ. ເປັນຫຍັງພຣະບິດາເທິງສະຫວັນຈຶ່ງປະສົງໃຫ້ເຮົາຮັບພິທີການເຫລົ່ານີ້? ບອກລູກໆຂອງທ່ານວ່າ ທ່ານໄດ້ຮູ້ສຶກເຖິງອຳນາດຂອງພຣະເຈົ້າຍ້ອນພິທີການທີ່ທ່ານໄດ້ຮັບ ແລະ ພັນທະສັນຍາທີ່ທ່ານໄດ້ເຮັດແນວໃດ. (ເບິ່ງ “ອຳນາດຖານະປະໂລຫິດ, ສິດອຳນາດ, ແລະ ຂໍກະແຈ” ໃນ ພາກຫ້ອຍທ້າຍ ກ ຫລື ພາກຫ້ອຍທ້າຍ ຂ ນຳອີກ.)
ຄຳສອນ ແລະ ພັນທະສັນຍາ 84:77
ເຮົາເປັນເພື່ອນຂອງພຣະເຢຊູເມື່ອເຮົາຕິດຕາມພຣະອົງ.
-
ຫລັງຈາກທີ່ອ່ານ ຄຳສອນ ແລະ ພັນທະສັນຍາ 84:77 ນຳກັນ, ໃຫ້ຖາມລູກໆຂອງທ່ານກ່ຽວກັບວ່າ ການເປັນເພື່ອນໝາຍຄວາມວ່າແນວໃດ. ທ່ານອາດເວົ້າກ່ຽວກັບເພື່ອນທີ່ດີທີ່ທ່ານເຄີຍມີ. ພຣະເຢຊູສະແດງໃຫ້ເຮົາເຫັນວ່າ ພຣະອົງຢາກໃຫ້ເຮົາເປັນເພື່ອນຂອງພຣະອົງແນວໃດ? ເຮົາຈະສາມາດສະແດງໃຫ້ເຫັນໄດ້ແນວໃດວ່າ ເຮົາກໍຕ້ອງການສິ່ງນັ້ນຄືກັນ? ເພງເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27) ສາມາດຊ່ວຍການສົນທະນານີ້ໄດ້.
ຄຳສອນ ແລະ ພັນທະສັນຍາ 84:88
ພຣະບິດາເທິງສະຫວັນຊ່ວຍເຫລືອຜູ້ຮັບໃຊ້ຂອງພຣະອົງ.
-
ລູກໆຂອງທ່ານອາດມ່ວນຊື່ນກັບການໄດ້ຍິນກ່ຽວກັບວິທີທີ່ຜູ້ສອນສາດສະໜາໄດ້ຊ່ວຍເຫລືອທ່ານ, ຄອບຄົວຂອງທ່ານ, ຫລື ບັນພະບຸລຸດຂອງທ່ານຮັບພຣະກິດຕິຄຸນ. ແລ້ວທ່ານກໍສາມາດອ່ານກ່ຽວກັບຄຳສັນຍາພິເສດທີ່ພຣະຜູ້ເປັນເຈົ້າໄດ້ເຮັດກັບຜູ້ສອນສາດສະໜາໃນ ຄຳສອນ ແລະ ພັນທະສັນຍາ 84:88. ບາງທີລູກໆຂອງທ່ານສາມາດນຶກເຖິງການກະທຳທີ່ເຂົ້າກັບຂໍ້ນີ້. ໃຫ້ພິຈາລະນາທີ່ຈະແບ່ງປັນກ່ຽວກັບຕອນທີ່ທ່ານກຳລັງຮັບໃຊ້ພຣະຜູ້ເປັນເຈົ້າ ແລະ ຮູ້ສຶກວ່າພຣະອົງຢູ່ກັບທ່ານ, ດັ່ງທີ່ບັນຍາຍຢູ່ໃນ ຂໍ້ທີ 88. ທ່ານກໍອາດຊ່ວຍໃຫ້ລູກໆຂອງທ່ານນຶກເຖິງວິທີທີ່ພວກເຂົາສາມາດເປັນຜູ້ສອນສາດສະໜາໄດ້ດຽວນີ້. ໃຫ້ເປັນພະຍານວ່າ ພຣະບິດາເທິງສະຫວັນຊ່ວຍໃຫ້ເຮົາຮູ້ສິ່ງທີ່ຄວນເວົ້າ ເມື່ອເຮົາເວົ້າກັບຄົນອື່ນກ່ຽວກັບພຣະເຢຊູຄຣິດແນວໃດ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
ພຣະວິຫານໂຣມ ອີຕາລີ