“ວັນທີ 4–10 ເດືອນສິງຫາ: ‘ຈົ່ງຢືນຢູ່ໃນສະຖານທີ່ສັກສິດ’: ຄຳສອນ ແລະ ພັນທະສັນຍາ 85–87,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 85–87,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 4–10 ເດືອນສິງຫາ: “ຈົ່ງຢືນຢູ່ໃນສະຖານທີ່ສັກສິດ”

ຄຳສອນ ແລະ ພັນທະສັນຍາ 85–87

ວັນຄຣິດສະມາດ ຕາມປົກກະຕິແລ້ວ ເປັນເວລາໃນການໄຕ່ຕອງຂ່າວສານເຊັ່ນ “ແຜ່ນດິນໂລກຈົ່ງມີສັນຕິສຸກ” (ເບິ່ງ ລູກາ 2:14). ແຕ່ໃນວັນທີ 25 ເດືອນທັນວາ, 1832, ຈິດໃຈຂອງໂຈເຊັບ ສະມິດ ໝົກໝຸ້ນຢູ່ກັບໄພຄຸກຄາມຂອງສົງຄາມ. ລັດຊ້າວຄາໂຣລາຍນາໃນສະຫະລັດ ຫາກໍເລີ່ມຕໍ່ຕ້ານລັດຖະບານ ແລະ ກຳລັງກະກຽມສຳລັບການສູ້ຮົບ. ແລະ ພຣະຜູ້ເປັນເຈົ້າໄດ້ເປີດເຜີຍວ່າ ນີ້ເປັນພຽງແຕ່ຈຸດເລີ່ມຕົ້ນ: “ສົງຄາມ,” ພຣະອົງໄດ້ປະກາດ, “ຈະລຸກລາມໄປເຖິງປະຊາຊາດທັງປວງ” (ຄຳສອນ ແລະ ພັນທະສັນຍາ 87:2). ມັນເບິ່ງຄືວ່າ ການທຳນາຍນີ້ຈະສຳເລັດຄົບຖ້ວນໃນໄວໆນີ້.

ແຕ່ແລ້ວ ມັນກໍບໍ່ໄດ້ເປັນເຊັ່ນນັ້ນ. ພາຍໃນສອງສາມອາທິດ, ລັດຊ້າວຄາໂຣລາຍນາ ແລະ ລັດຖະບານສະຫະລັດ ໄດ້ຕົກລົງກັນດ້ວຍດີ, ແລະ ສົງຄາມກໍໄດ້ຖືກບ່າຍບ່ຽງໄປ. ເຖິງຢ່າງໃດກໍຕາມ, ການທຳນາຍຈະບໍ່ສຳເລັດຄົບຖ້ວນຕາມເວລາ ຫລື ຕາມວິທີທີ່ເຮົາຄາດຄິດສະເໝີໄປ. ເກືອບເຖິງ 30 ປີຕໍ່ມາ, ດົນນານຫລັງຈາກໂຈເຊັບ ສະມິດ ໄດ້ຖືກຂ້າເພາະຄວາມເຊື່ອ, ລັດຊ້າວຄາໂຣລາຍນາໄດ້ກະບົດ ແລະ ສົງຄາມກາງເມືອງກໍໄດ້ຕາມມາ. ທຸກມື້ນີ້, ສົງຄາມຕະຫລອດທົ່ວໂລກກໍສືບຕໍ່ກໍ່ໃຫ້ “ແຜ່ນດິນໂລກຄວນຄາງ” (ຄຳສອນ ແລະ ພັນທະສັນຍາ 87:6). ຄຸນຄ່າຂອງການເປີດເຜີຍນີ້ມີໜ້ອຍ ໃນການຄາດການລ່ວງໜ້າກ່ຽວກັບເວລາທີ່ໄພພິບັດຈະມາເຖິງ ແລະ ມີຄຸນຄ່າຫລາຍກວ່າໃນການສິດສອນສິ່ງທີ່ຄວນເຮັດເມື່ອມັນມາເຖິງ. ຄຳແນະນຳຍັງຄືເກົ່າ ໃນປີ 1831, 1861, ແລະ 2025: “ຈົ່ງຢືນຢູ່ໃນສະຖານທີ່ສັກສິດ, ແລະ ບໍ່ຫວັ່ນໄຫວ” (ຂໍ້ທີ 8).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 85:1–2

ພຣະຜູ້ເປັນເຈົ້າປະສົງໃຫ້ເຮົາ “ຮັກສາປະຫວັດ.”

ໃຫ້ສັງເກດວ່າສິ່ງທີ່ພຣະຜູ້ເປັນເຈົ້າຢາກໃຫ້ລວມເຂົ້າໃນ “ປະຫວັດສາດ” ທີ່ບັນຍາຍຢູ່ໃນ ຄຳສອນ ແລະ ພັນທະສັນຍາ 85:1–2. ທ່ານຄິດວ່າເປັນຫຍັງພຣະຜູ້ເປັນເຈົ້າຈຶ່ງປະສົງໃຫ້ໄພ່ພົນຂອງພຣະອົງຮັກສາປະຫວັດສາດໄວ້. ທ່ານສາມາດບັນທຶກຫຍັງແດ່ກ່ຽວກັບ “ຊີວິດນາໆປະການ, ສັດທາຂອງ [ທ່ານ], ແລະ ວຽກງານ” ທີ່ອາດເປັນພອນໃຫ້ແກ່ທ່ານ ແລະ ຄົນລຸ້ນຫລັງ? ການຮັກສາປະຫວັດສ່ວນຕົວຊ່ວຍໃຫ້ທ່ານມາຫາພຣະຄຣິດແນວໃດ?

ເບິ່ງ “Journals: ‘Of Far More Worth than Gold,’” Teachings of Presidents of the Church: Wilford Woodruff (2011), 125–33; “Turning Hearts” (ວິດີໂອ), ChurchofJesusChrist.org ນຳອີກ.

Turning Hearts
A Great-Grandfather's journal helps a young man gain direction in his life and appreciation for his ancestors.

ຄຳສອນ ແລະ ພັນທະສັນຍາ 85:6

ພຣະວິນຍານກ່າວດ້ວຍ “ສຽງອັນເບົາໆ.”

ໃຫ້ໄຕ່ຕອງຖ້ອຍຄຳທີ່ໂຈເຊັບ ສະມິດ ໄດ້ໃຊ້ ເພື່ອບັນຍາຍເຖິງພຣະວິນຍານ ຢູ່ໃນ ຄຳສອນ ແລະ ພັນທະສັນຍາ 85:6. ໃນແງ່ໃດແດ່ທີ່ສຸລະສຽງຂອງພຣະວິນຍານເປັນສຽງ “ອັນເບົາໆ”? ໃຫ້ພິຈາລະນາຄຳອະທິບາຍເພີ່ມເຕີມເຫລົ່ານີ້ ທີ່ໄດ້ໃຫ້ໄວ້ຜ່ານທາງໂຈເຊັບ ສະມິດ: ຄຳສອນ ແລະ ພັນທະສັນຍາ 6:22–24; 8:2–3; 9:7–9; 11:12–13; 128:1. ພຣະວິນຍານກ່າວກັບທ່ານແນວໃດ?

ເບິ່ງ ລູກາ 24:32; ໂມໄຊຢາ 5:2; ແອວມາ 32:28; ຮີລາມັນ 5:30; ຄຳສອນ ແລະ ພັນທະສັນຍາ 6:22–23; 11:12–13.

ໃຊ້ບົດຮຽນທີ່ໃຊ້ສິ່ງຂອງ. ຄົນທັງຫລາຍຈົດຈຳບົດຮຽນພຣະກິດຕິຄຸນໄດ້ດີກວ່າ ເມື່ອພວກເຂົາເຫັນ ຫລື ມີສ່ວນຮ່ວມໃນບົດຮຽນທີ່ໃຊ້ສິ່ງຂອງ ຊຶ່ງກ່ຽວຂ້ອງກັບສິ່ງທີ່ພວກເຂົາກຳລັງຮຽນຮູ້. ຍົກຕົວຢ່າງ, ເມື່ອສິດສອນກ່ຽວກັບສຽງອັນເບົາໆຂອງພຣະວິນຍານ, ບາງເທື່ອ ທ່ານກໍສາມາດເປີດເພງສັກສິດເບົາໆ, ແລະ ຜູ້ຮຽນກໍສາມາດເວົ້າກ່ຽວກັບວ່າ ເພງນັ້ນເຮັດໃຫ້ພວກເຂົາຮູ້ສຶກແນວໃດ ແລະ ມັນຈະຍາກກວ່າເກົ່າຫລາຍສໍ່າໃດທີ່ຈະໄດ້ຍິນ ຖ້າມີສຽງລົບກວນ. ສິ່ງນີ້ສາມາດນຳໄປສູ່ການສົນທະນາກ່ຽວກັບສິ່ງລົບກວນໃນຊີວິດເຮົາ ທີ່ກີດກັນເຮົາຈາກການໄດ້ຍິນສຽງອັນເບົາໆ.

ຍິງໜຸ່ມກຳລັງອ່ານພຣະຄຳພີ — ພຣະຄຳພີບັນຍາຍເຖິງສຸລະສຽງຂອງພຣະວິນຍານວ່າເປັນສຽງເບົາໆ.

ຄຳສອນ ແລະ ພັນທະສັນຍາ 86

ຄົນຊອບທຳຖືກເຕົ້າໂຮມເຂົ້າກັບພຣະຄຣິດໃນຍຸກສຸດທ້າຍ.

ຄຳສອນ ແລະ ພັນທະສັນຍາ 86 ບັນຈຸການຕີຄວາມໝາຍຂອງຄຳອຸປະມາເລື່ອງເຂົ້ານົກປົນເຂົ້າດີ, ຊຶ່ງພົບເຫັນໃນ ມັດທາຍ 13:24–30, 37–43. ຂະນະທີ່ທ່ານສຶກສາກ່ຽວກັບຄວາມໝາຍຂອງຄຳອຸປະມານີ້, ໃຫ້ພິຈາລະນາທີ່ຈະຕື່ມໃສ່ຕາຕະລາງຄືກັນກັບໂຕນີ້:

ສັນຍາລັກ	ຄວາມໝາຍທີ່ເປັນໄປໄດ້	ຄຳຖາມໃຫ້ໄຕ່ຕອງ
ສັນຍາລັກ ຜູ້ຫວ່ານເມັດພືດ	ຄວາມໝາຍທີ່ເປັນໄປໄດ້ ສາດສະດາ ແລະ ອັກຄະສາວົກ	ຄຳຖາມໃຫ້ໄຕ່ຕອງ “ເມັດພືດ” ປະເພດໃດທີ່ສາດສະດາ ແລະ ອັກຄະສາວົກຫວ່ານ?
ສັນຍາລັກ ສັດຕູ	ຄວາມໝາຍທີ່ເປັນໄປໄດ້ ຊາຕານ	ຄຳຖາມໃຫ້ໄຕ່ຕອງ ຜູ້ປໍລະປັກພະຍາຍາມຢຸດວຽກງານຂອງພຣະຜູ້ເປັນເຈົ້າແນວໃດ?
ສັນຍາລັກ	ຄວາມໝາຍທີ່ເປັນໄປໄດ້	ຄຳຖາມໃຫ້ໄຕ່ຕອງ
ສັນຍາລັກ	ຄວາມໝາຍທີ່ເປັນໄປໄດ້	ຄຳຖາມໃຫ້ໄຕ່ຕອງ

ຕໍ່ໄປນີ້ ແມ່ນຄຳຖາມເພີ່ມເຕີມທີ່ຄວນພິຈາລະນາ:

ຫລັງຈາກທີ່ຕີຄວາມໝາຍຂອງຄຳອຸປະມາແລ້ວ, ພຣະຜູ້ເປັນເຈົ້າໄດ້ກ່າວກ່ຽວກັບຖານະປະໂລຫິດ, ການຟື້ນຟູ, ແລະ ຄວາມລອດຂອງຜູ້ຄົນຂອງພຣະອົງ (ເບິ່ງ ຂໍ້ທີ 8–11). ທ່ານເຫັນການເຊື່ອມຕໍ່ໃດແດ່ລະຫວ່າງຫົວຂໍ້ເຫລົ່ານີ້ ແລະ ຄຳອຸປະມາເລື່ອງເຂົ້ານົກປົນເຂົ້າດີ?
ບົດບາດຂອງທ່ານແມ່ນຫຍັງໃນການເປັນ “ຄວາມສະຫວ່າງແກ່ຄົນຕ່າງຊາດ” ແລະ “ຜູ້ຊ່ວຍໃຫ້ລອດແກ່ຜູ້ຄົນຂອງ [ພຣະຜູ້ເປັນເຈົ້າ]”? (ຂໍ້ທີ 11).

ຄຳສອນ ແລະ ພັນທະສັນຍາ 87

ຄວາມສະຫງົບແມ່ນພົບຢູ່ໃນ “ສະຖານທີ່ສັກສິດ.”

ຄຳທຳນາຍໃນ ພາກທີ 87 ເຕືອນກ່ຽວກັບອັນຕະລາຍທາງຮ່າງກາຍທີ່ກ່ຽວຂ້ອງກັບສົງຄາມໃນຍຸກສຸດທ້າຍ. ແຕ່ຄຳແນະນຳໃນການເປີດເຜີຍນີ້ຍັງໃຊ້ກັບອັນຕະລາຍທາງວິນຍານອີກດ້ວຍ. ໃຫ້ໄຕ່ຕອງຄຳຖາມເຊັ່ນດັ່ງລຸ່ມນີ້:

ຄຳທຳນາຍ ແມ່ນການເປີດເຜີຍຈາກພຣະເຈົ້າແກ່ສາດສະດາ, ສ່ວນຫລາຍແມ່ນກ່ຽວກັບອະນາຄົດ. ມີຕົວຢ່າງໃດແດ່ກ່ຽວກັບຄຳທຳນາຍທີ່ສາດສະດາສະໄໝບູຮານ ແລະ ສະໄໝໃໝ່ໄດ້ມອບໃຫ້? (ເບິ່ງ ໂຢຮັນ 3:14; ໂມໄຊຢາ 3:5; ຮີລາມັນ 14:2–6). ມັນໄດ້ສຳເລັດຄົບຖ້ວນແນວໃດ? (ເບິ່ງ ລູກາ 23:33; ມັດທາຍ 15:30–31; 3 ນີໄຟ 1:15–21).
ພອນຂອງການຮັບຄຳທຳນາຍຂອງສາດສະດາຂອງພຣະເຈົ້າມີຫຍັງແດ່?

ໂດຍມີຄວາມຄິດນັ້ນໃນຈິດໃຈ, ໃຫ້ອ່ານ ພາກທີ 87. (ສຳລັບບໍລິບົດທາງປະຫວັດສາດ, ທ່ານອາດຕ້ອງການອ່ານຄຳແນະນຳຂອງໂຄງຮ່າງນີ້.) ທ່ານຮຽນຮູ້ຫຍັງແດ່ກ່ຽວກັບຄຳທຳນາຍຈາກການເປີດເຜີຍນີ້ ແລະ ວິທີທີ່ມັນໄດ້ສຳເລັດຄົບຖ້ວນ? ທ່ານຈະເວົ້າແນວໃດກັບບາງຄົນທີ່ສົງໄສຄຳທຳນາຍຍ້ອນວ່າມັນບໍ່ສຳເລັດຄົບຖ້ວນໂດຍທັນທີ?

ຄຳແນະນຳໃດທີ່ພຣະຜູ້ເປັນເຈົ້າໄດ້ມອບໃຫ້ໃນ ຂໍ້ທີ 8? ແມ່ນຫຍັງຄື “ສະຖານທີ່ສັກສິດ” ຂອງທ່ານ ບ່ອນທີ່ທ່ານພົບຄວາມສະຫງົບ ແລະ ຄວາມປອດໄພ? ແມ່ນຫຍັງເຮັດໃຫ້ສະຖານທີ່ໃດໜຶ່ງສັກສິດ? ນອກເໜືອຈາກສະຖານທີ່ ທີ່ເປັນອາຄານແລ້ວ, ບາງທີມັນມີເວລາທີ່ສັກສິດ, ການປະຕິບັດທີ່ສັກສິດ, ຫລື ຄວາມຄິດທີ່ສັກສິດ ທີ່ສາມາດໃຫ້ຄວາມສະຫງົບໄດ້. ຍົກຕົວຢ່າງ, ຖ້ອຍຄຳຂອງສາດສະດາຂອງພຣະເຈົ້າສາມາດເປັນສະຖານທີ່ສັກສິດສຳລັບທ່ານໄດ້ແນວໃດ? ການ “ຢືນ” ແລະ “ບໍ່ຫວັ່ນໄຫວ” ຈາກສະຖານທີ່ເຫລົ່ານີ້ ໝາຍຄວາມວ່າແນວໃດ?

ເບິ່ງ “Where Love Is,” Children’s Songbook, 138–39; Saints, 1:163–64; “Peace and War,” ໃນ Revelations in Context, 158–64 ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 85:6

ພຣະວິນຍານກ່າວດ້ວຍ “ສຽງອັນເບົາໆ.”

ລູກໆຂອງທ່ານຈະວ່າແນວໃດ ຖ້າມີຄົນຖາມພວກເຂົາວ່າ ພວກເຂົາຮູ້ໄດ້ແນວໃດເມື່ອພຣະວິນຍານບໍລິສຸດກ່າວກັບພວກເຂົາ? ເຊື້ອເຊີນໃຫ້ພວກເຂົາອ່ານກ່ຽວກັບວິທີໜຶ່ງທີ່ ໂຈເຊັບ ສະມິດ ໄດ້ບັນຍາຍສຸລະສຽງຂອງພຣະວິນຍານໃນ ຄຳສອນ ແລະ ພັນທະສັນຍາ 85:6. ແລ້ວພວກເຂົາກໍສາມາດຝຶກຟັງ ແລະ ເວົ້າດ້ວຍສຽງທີ່ແຜ່ວເບົາ. ທ່ານກໍສາມາດແບ່ງປັນປະສົບການຕອນທີ່ພຣະວິນຍານໄດ້ກ່າວກັບທ່ານດ້ວຍສຽງອັນເບົາໆ.
ເພື່ອຊ່ວຍໃຫ້ລູກໆຂອງທ່ານເຂົ້າໃຈວະລີທີ່ວ່າ “ສຽງອັນເບົາໆ,” ທ່ານສາມາດເປີດເພງຂອງເດັກນ້ອຍຄ່ອຍໆ, ເຊັ່ນ “ພຣະວິນຍານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 30). ຂໍໃຫ້ລູກຜູ້ໜຶ່ງເດົາວ່າແມ່ນເພງໃດ ຂະນະທີ່ລູກຄົນອື່ນໆເຮັດສຽງລົບກວນ. ແລ້ວທ່ານກໍສາມາດເປີດເພງນັ້ນຊໍ້າອີກຄັ້ງ ໂດຍບໍ່ມີສຽງລົບກວນ. ສິ່ງລົບກວນໃດແດ່ທີ່ເຮົາສາມາດກຳຈັດອອກຈາກຊີວິດເຮົາເພື່ອຮູ້ສຶກເຖິງພຣະວິນຍານເລື້ອຍຍິ່ງຂຶ້ນ?

ຄຳສອນ ແລະ ພັນທະສັນຍາ 86

ເຮົາສາມາດຊ່ວຍເຕົ້າໂຮມຜູ້ຄົນຂອງພຣະເຈົ້າ.

ເພື່ອຊ່ວຍໃຫ້ລູກໆຂອງທ່ານເຂົ້າໃຈຄຳອຸປະມາທີ່ບັນຍາຍຢູ່ໃນ ພາກທີ 86, ທ່ານສາມາດກຽມຮູບພາບ ຫລື ຮູບແຕ້ມນ້ອຍໆຂອງເຂົ້າດີສອງສາມຮູບ ແລະ ເຊື່ອງມັນຢູ່ອ້ອມໆຫ້ອງ. ອະທິບາຍແກ່ລູກໆຂອງທ່ານກ່ຽວກັບຄຳອຸປະມາເລື່ອງເຂົ້ານົກ ແລະ ເຂົ້າດີ (ເບິ່ງ ມັດທາຍ 13:24–30), ແລະ ອ່ານຄວາມຄິດເຫັນຂອງພຣະຜູ້ເປັນເຈົ້ານຳກັນໃນ ຄຳສອນ ແລະ ພັນທະສັນຍາ 86:1–7. ແລ້ວລູກໆຂອງທ່ານກໍສາມາດເຕົ້າໂຮມຮູບຂອງເຂົ້າດີທີ່ຖືກເຊື່ອງໄວ້ ແລະ ຂຽນຊື່ຂອງຄົນທີ່ພວກເຂົາສາມາດ “ເຕົ້າໂຮມ” ເຂົ້າກັບພຣະເຢຊູຄຣິດເທິງຮູບນັ້ນ. ການເຕົ້າໂຮມຜູ້ຄົນເຂົ້າກັບພຣະເຢຊູຄຣິດໝາຍຄວາມວ່າແນວໃດ? ມີວິທີໃດແດ່ທີ່ເຮົາສາມາດເຮັດສິ່ງນີ້ໄດ້?

ຄຳສອນ ແລະ ພັນທະສັນຍາ 86:11

ເຮົາສາມາດເປັນຄວາມສະຫວ່າງໃຫ້ແກ່ຄົນອື່ນ.

ນີ້ແມ່ນຄຳຖາມບາງຂໍ້ທີ່ທ່ານສາມາດຖາມລູກໆຂອງທ່ານຂະນະທີ່ທ່ານສົນທະນາກ່ຽວກັບ ຄຳສອນ ແລະ ພັນທະສັນຍາ 86:11: ຄວາມສະຫວ່າງເປັນພອນໃຫ້ແກ່ເຮົາແນວໃດ? ຕອນທີ່ເຮົາບໍ່ມີຄວາມສະຫວ່າງນັ້ນເປັນແນວໃດ? ເຮົາຈະສາມາດເປັນຄວາມສະຫວ່າງໃຫ້ແກ່ຄົນອື່ນແນວໃດ? ຊ່ວຍລູກໆຂອງທ່ານນຶກເຖິງວິທີທີ່ເຮົາສາມາດ “ສືບຕໍ່ຢູ່ໃນຄຸນຄວາມດີ [ຂອງພຣະເຢຊູ]” ແລະ ແບ່ງປັນກັບຄົນອື່ນ.

ຄຳສອນ ແລະ ພັນທະສັນຍາ 87:6, 8

ເຮົາສາມາດ “ຢືນຢູ່ໃນສະຖານທີ່ສັກສິດ.”

ອ່ານ ຄຳສອນ ແລະ ພັນທະສັນຍາ 87:6 ນຳກັນ ເພື່ອຮຽນຮູ້ກ່ຽວກັບສິ່ງທີ່ພຣະຜູ້ເປັນເຈົ້າໄດ້ກ່າວວ່າຈະເກີດຂຶ້ນໃນຍຸກສຸດທ້າຍ. ແລ້ວພວກທ່ານກໍສາມາດເວົ້າກ່ຽວກັບຄວາມທ້າທາຍບາງຢ່າງທີ່ທ່ານ ແລະ ລູກໆຂອງທ່ານປະເຊີນ. ໃນ ຂໍ້ທີ 8, ພຣະຜູ້ເປັນເຈົ້າໄດ້ກ່າວວ່າເຮົາສາມາດເຮັດສິ່ງໃດໃນຊ່ວງເວລາທີ່ຍາກລຳບາກ?
ຊ່ວຍລູກໆຂອງທ່ານເຮັດລາຍການສະຖານທີ່ຕ່າງໆທີ່ສັກສິດ, ຄວາມຄິດທີ່ສັກສິດ, ແລະ ການກະທຳທີ່ສັກສິດ ທີ່ສາມາດຊ່ວຍພວກເຂົາປະເຊີນກັບອັນຕະລາຍທາງວິນຍານ. ສຳລັບແນວຄິດ, ໃຫ້ເບິ່ງວິດີໂອ “Standing in Holy Places” ແລະ “Stand Ye in Holy Places—Bloom Where You’re Planted” (ຫ້ອງສະໝຸດພຣະກິດຕິຄຸນ).

5:36
Standing in Holy Places
A young woman reflects on the blessings of walking the covenant path as she makes her journey to the temple.

4:36
Stand Ye in Holy Places - Bloom Where You’re Planted
Three hundred youth in Las Vegas come together to share their testimony of Jesus Christ.

ແມ່ກຳລັງຊີ້ໃຫ້ລູກເບິ່ງພຣະວິຫານ — ພຣະວິຫານເປັນສະຖານທີ່ສັກສິດ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ເຂົ້າດີໃນທົ່ງນາ — ພຣະຜູ້ເປັນເຈົ້າເຕົ້າໂຮມຜູ້ຄົນຂອງພຣະອົງເໝືອນດັ່ງເຂົ້າດີ.