“ວັນທີ 18–24 ເດືອນສິງຫາ: ‘ຫລັກທຳພ້ອມດ້ວຍຄຳສັນຍາ’: ຄຳສອນ ແລະ ພັນທະສັນຍາ 89–92,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 89–92,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 18–24 ເດືອນສິງຫາ: “ຫລັກທຳພ້ອມດ້ວຍຄຳສັນຍາ”

ຄຳສອນ ແລະ ພັນທະສັນຍາ 89–92

ຢູ່ໃນໂຮງຮຽນຂອງສາດສະດາ, ສາດສະດາໂຈເຊັບ ສະມິດ ໄດ້ສິດສອນພວກແອວເດີຂອງອິດສະຣາເອນ ກ່ຽວກັບການສ້າງສາອານາຈັກຂອງພຣະເຈົ້າຢູ່ເທິງໂລກ. ເຂົາເຈົ້າໄດ້ສົນທະນາກ່ຽວກັບຄວາມຈິງທາງວິນຍານ, ໄດ້ອະທິຖານນຳກັນ, ຖືສິນອົດເຂົ້າ, ແລະ ກະກຽມທີ່ຈະສັ່ງສອນພຣະກິດຕິຄຸນ. ແຕ່ໄດ້ມີບາງສິ່ງກ່ຽວກັບບັນຍາກາດທີ່ອາດເບິ່ງຄືວ່າແປກຕໍ່ເຮົາໃນປະຈຸບັນ, ແລະ ເບິ່ງຄືວ່າມັນບໍ່ຖືກຕ້ອງຕໍ່ນາງເອມມາ ສະມິດ ຄືກັນ. ລະຫວ່າງການປະຊຸມ, ພວກຜູ້ຊາຍໄດ້ສູບຢາ, ຊຶ່ງບໍ່ໄດ້ເປັນເລື່ອງທີ່ຜິດປົກກະຕິສຳລັບສະໄໝນັ້ນ, ແຕ່ມັນເຮັດໃຫ້ພື້ນຫ້ອງທີ່ເປັນໄມ້ ເປື້ອນດຳ ແລະ ມີກິ່ນແຮງ. ນາງເອມມາໄດ້ບອກໂຈເຊັບກ່ຽວກັບຄວາມເປັນຫ່ວງຂອງນາງ, ແລະ ໂຈເຊັບໄດ້ທູນຖາມພຣະຜູ້ເປັນເຈົ້າ. ຄຳຕອບຂອງເພິ່ນແມ່ນການເປີດເຜີຍທີ່ເກີນກວ່າເລື່ອງການສູບຢາ ແລະ ຮອຍເປື້ອນຢູ່ພື້ນຫ້ອງ. ການເປີດເຜີຍດັ່ງກ່າວໄດ້ມອບ “ຫລັກທຳພ້ອມດ້ວຍຄຳສັນຍາ” ໃຫ້ແກ່ໄພ່ພົນ, ຫລາຍລຸ້ນຄົນຕໍ່ໆໄປ—ສັນຍາເຖິງສຸຂະພາບທີ່ແຂງແຮງ, “ສະຕິປັນຍາ,” ແລະ “ຂຸມຊັບແຫ່ງຄວາມຮູ້ທີ່ຍິ່ງໃຫຍ່” (ຄຳສອນ ແລະ ພັນທະສັນຍາ 89:3, 19).

ເບິ່ງ Saints, 1:166–68 ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 89

ພຣະຜູ້ເປັນເຈົ້າໄດ້ປະທານພຣະວາຈາແຫ່ງປັນຍາໃຫ້ແກ່ເຮົາເພື່ອຊ່ວຍໃຫ້ເຮົາມີສຸຂະພາບຮ່າງກາຍ ແລະ ສຸຂະພາບວິນຍານທີ່ແຂງແຮງ.

ເມື່ອພວກແອວເດີຢູ່ໃນໂຮງຮຽນຂອງສາດສະດາໄດ້ຍິນໂຈເຊັບ ສະມິດ ອ່ານພຣະວາຈາແຫ່ງປັນຍາ ເປັນເທື່ອທຳອິດ, ເຂົາເຈົ້າກໍໄດ້ “ໂຍນກອກຢາ ແລະ ປ່ຽງຢາດູດໃສ່ກອງໄຟທັນທີ” (Saints, 1:168). ເຂົາເຈົ້າຕ້ອງການສະແດງຄວາມເຕັມໃຈທີ່ຈະເຊື່ອຟັງພຣະຜູ້ເປັນເຈົ້າ. ບາງເທື່ອທ່ານເຄີຍ “ໄດ້ໂຍນ” ສິ່ງທີ່ພຣະວາຈາແຫ່ງປັນຍາເຕືອນຕ້ານ ອອກໄປຈາກຊີວິດຂອງທ່ານມາແລ້ວ, ແຕ່ທ່ານສາມາດຮຽນຮູ້ສິ່ງໃດແດ່ຕື່ມອີກ ຈາກການເປີດເຜີຍນີ້? ໃຫ້ພິຈາລະນາແນວຄິດເຫລົ່ານີ້:

ໃຫ້ຄິດວ່າການເປີດເຜີຍເປັນ “ຫລັກທຳພ້ອມດ້ວຍຄຳສັນຍາ” (ຂໍ້ທີ 3)—ຂອງຄວາມຈິງແຫ່ງການອົດທົນທີ່ນຳພາໃນການຕັດສິນໃຈ. ຫລັກທຳໃດແດ່ທີ່ທ່ານພົບເຫັນວ່າ ສາມາດນຳພາທ່ານໃນການຕັດສິນໃຈຂອງທ່ານ? ພອນຢ່າງໃດແດ່ທີ່ພຣະຜູ້ເປັນເຈົ້າໄດ້ສັນຍາໄວ້? (ເບິ່ງ ຂໍ້ທີ 18–21). ພຣະອົງໄດ້ບັນລຸຄຳສັນຍາເຫລົ່ານັ້ນໃນຊີວິດຂອງທ່ານແນວໃດ?
ມີຕົວຢ່າງໃດແດ່ທີ່ທ່ານໄດ້ເຫັນກ່ຽວກັບ “ຄວາມຊົ່ວຮ້າຍ ແລະ ແຜນການ … ໃນຫົວໃຈຂອງມະນຸດ ທີ່ວາງແຜນຮ້າຍ” ກ່ຽວຂ້ອງກັບພຣະວາຈາແຫ່ງປັນຍາ? (ຂໍ້ທີ 4). ນອກເໜືອຈາກການເປີດເຜີຍນີ້ແລ້ວ, ພຣະຜູ້ເປັນເຈົ້າໄດ້ມອບຫຍັງແດ່ເພື່ອຊ່ວຍເຫລືອທ່ານໃຫ້ຫລີກລ້ຽງ ຫລື ເອົາຊະນະຄວາມຊົ່ວຮ້າຍເຫລົ່ານີ້?
ການເປີດເຜີຍນີ້ສິດສອນທ່ານຫຍັງແດ່ກ່ຽວກັບພຣະຜູ້ເປັນເຈົ້າ? ພຣະວາຈາແຫ່ງປັນຍາກ່ຽວຂ້ອງກັບຂ່າວສານຂອງ ຄຳສອນ ແລະ ພັນທະສັນຍາ 29:34–35 ແນວໃດ?
ທ່ານຖືກກະຕຸ້ນໃຫ້ເຮັດຫຍັງ ເພື່ອຮັກສາຮ່າງກາຍຂອງທ່ານໃຫ້ດີກວ່າເກົ່າ?

ທ່ານອາດຈະມີໂອກາດອະທິບາຍໃຫ້ກັບຄົນອື່ນຟັງວ່າເປັນຫຍັງທ່ານຈຶ່ງດຳລົງຊີວິດຕາມພຣະວາຈາແຫ່ງປັນຍາ—ແລະ ທ່ານອາດຈະມີໂອກາດຫລາຍຂຶ້ນໃນອະນາຄົດ. ໃຫ້ພິຈາລະນາວ່າທ່ານອາດຈະໃຊ້ໂອກາດເຫລົ່ານີ້ໃນການເປັນພະຍານເຖິງພຣະຜູ້ຊ່ວຍໃຫ້ລອດ, ຄວາມສັກສິດຂອງຮ່າງກາຍຂອງເຮົາ, ແລະ ຄວາມຈິງອື່ນໆທາງວິນຍານແນວໃດ. ສຳລັບແນວຄິດ, ເບິ່ງ “ຮ່າງກາຍຂອງເຈົ້າສັກສິດ,” ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ, 22–29.

ເບິ່ງ 1 ໂກຣິນໂທ 6:19–20; Thomas S. Monson, “Principles and Promises,” Liahona, Nov. 2016, 78–79; Topics and Questions, “Word of Wisdom,” ຫ້ອງສະໝຸດພຣະກິດຕິຄຸນ; “The Word of Wisdom,” ໃນ Revelations in Context, 183–91; “Addiction,” “Physical Health,” Life Help, ຫ້ອງສະໝຸດພຣະກິດຕິຄຸນ ນຳອີກ.

Principles and Promises
President Monson testifies of the blessings that come as we obey the Word of Wisdom.

ຮຽນຮູ້ ແລະ ສິດສອນຜ່ານທາງຄຳສອນ. ແທນທີ່ຈະສ້າງລາຍການສິ່ງທີ່ຄວນເຮັດ ແລະ ບໍ່ຄວນເຮັດ, ເຮົາສາມາດດຳລົງຊີວິດຕາມຫລັກຄຳສອນເພື່ອໃຊ້ອຳເພີໃຈ ແລະ ສັດທາຂອງເຮົາໃນພຣະຄຣິດ. ຍົກຕົວຢ່າງ, ໃຫ້ພິຈາລະນາຄຳຖາມທີ່ອີງໃສ່ຫລັກທຳ ດັ່ງຄຳຖາມເຫລົ່ານີ້ກ່ຽວກັບພຣະວາຈາແຫ່ງປັນຍາ: ມີຫລັກທຳໃດແດ່ທີ່ສາມາດຊ່ວຍຊຸກຍູ້ຄົນໃດຄົນໜຶ່ງທີ່ກຳລັງດີ້ນຮົນທີ່ຈະເຊື່ອຟັງພຣະວາຈາແຫ່ງປັນຍາ? ມີຫລັກທຳໃດແດ່ທີ່ສາມາດປອບໂຍນເຮົາເມື່ອເຮົາມີບັນຫາທາງດ້ານສຸຂະພາບເຖິງແມ່ນວ່າເຮົາດຳລົງຊີວິດຕາມພຣະວາຈາແຫ່ງປັນຍາກໍຕາມ?

ຜູ້ຍິງກຳລັງເຮັດໂຍຄະ — ພຣະບິດາເທິງສະຫວັນຕ້ອງການໃຫ້ເຮົາດູແລຮ່າງກາຍຂອງເຮົາ.

ຄຳສອນ ແລະ ພັນທະສັນຍາ 90:1–17

ຝ່າຍປະທານສູງສຸດດຳລົງ “ຂໍກະແຈຂອງອານາຈັກ.”

ໃນ ພາກທີ 90, ພຣະຜູ້ເປັນເຈົ້າໄດ້ໃຫ້ຄຳແນະນຳກ່ຽວກັບ “ການປະຕິບັດສາດສະໜາກິດ ແລະ ໃນການເປັນຝ່າຍປະທານ” (ຂໍ້ທີ 12) ຂອງໂຈເຊັບ ສະມິດ, ຊິດນີ ຣິກດອນ, ແລະ ເຟຣ໌ເດຣິກ ຈີ ວິວລຽມສ໌—ສະມາຊິກຂອງກຸ່ມທີ່ເຮົາເອີ້ນໃນປະຈຸບັນນີ້ວ່າ ຝ່າຍປະທານສູງສຸດ. ທ່ານຮຽນຮູ້ຫຍັງແດ່ກ່ຽວກັບຝ່າຍປະທານສູງສຸດຈາກ ຂໍ້ທີ 1–17? ໃຫ້ພິຈາລະນາການທົບທວນຂ່າວສານເມື່ອບໍ່ດົນມານີ້ ຈາກສະມາຊິກຂອງຝ່າຍປະທານສູງສຸດ. ພວກເພິ່ນເຮັດຫຍັງແດ່ເພື່ອ “ຈັດຕັ້ງພາລະກິດທັງໝົດຂອງສາດສະໜາຈັກ ແລະ ອານາຈັກໃຫ້ເປັນລະບຽບ”? (ຂໍ້ທີ 16). ທ່ານຈະສະແດງວ່າ ການເປີດເຜີຍນັ້ນບໍ່ໄດ້ເປັນ “ເລື່ອງເລັກນ້ອຍ” ຕໍ່ທ່ານແນວໃດ? (ຂໍ້ທີ 5)

ໃຫ້ພິຈາລະນາທີ່ຈະຮ້ອງເພງ ຫລື ອ່ານເນື້ອເພງຂອງ “ເຮົາຂອບພຣະໄທສຳລັບສາດສະດາ” (ເພງສວດ ແລະ ເພງຂອງເດັກນ້ອຍ, 40) ຫລື ເພງອື່ນກ່ຽວກັບສາດສະດາທີ່ສອດຄ່ອງກັບການສິດສອນໃນຂໍ້ຕ່າງໆເຫລົ່ານີ້. ການຮັບໃຊ້ຂອງຝ່າຍປະທານສູງສຸດໄດ້ຊ່ວຍທ່ານໃຫ້ຮູ້ຈັກພຣະບິດາເທິງສະຫວັນ ແລະ ພຣະເຢຊູຄຣິດແນວໃດ?

ຄຳສອນ ແລະ ພັນທະສັນຍາ 90:24

“ທຸກສິ່ງທັງປວງຈະທຳງານນຳກັນໄປເພື່ອຄວາມດີ [ຂອງເຮົາ].”

ໃຫ້ໄຕ່ຕອງປະສົບການໃດໜຶ່ງທີ່ທ່ານເຄີຍມີ ຊຶ່ງເປັນພະຍານເຖິງຄຳສັນຍາຂອງພຣະຜູ້ເປັນເຈົ້າ ຢູ່ໃນ ຄຳສອນ ແລະ ພັນທະສັນຍາ 90:24. ໃຫ້ຄິດທີ່ຈະບັນທຶກປະສົບການຂອງທ່ານໄວ້ ແລະ ແບ່ງປັນມັນກັບສະມາຊິກໃນຄອບຄົວ ຫລື ຄົນທີ່ທ່ານຮັກ—ບາງທີກັບບາງຄົນທີ່ຕ້ອງການຄວາມໝັ້ນໃຈ ຫລື ກຳລັງໃຈ. ຖ້າຫາກທ່ານຍັງລໍຖ້າພອນບາງປະການຢູ່, ໃຫ້ໄຕ່ຕອງສິ່ງທີ່ທ່ານສາມາດເຮັດ ເພື່ອຄົງຢູ່ຢ່າງຊື່ສັດ ຂະນະທີ່ທ່ານລໍຖ້າທີ່ຈະໄດ້ເຫັນວິທີທີ່ “ທຸກສິ່ງທັງປວງຈະທຳງານນຳກັນໄປເພື່ອຄວາມດີຂອງທ່ານ.”

ຄຳສອນ ແລະ ພັນທະສັນຍາ 90:28–31

ວີແອນນາ ແຈ໊ກກີ ແມ່ນໃຜ?

ວີແອນນາ ແຈ໊ກກີ ໄດ້ເກີດໃນວັນທີ 10 ເດືອນມິຖຸນາ, 1787, ໃນລັດມາສາຊູເສດສ໌. ເປັນຜູ້ຍິງແຫ່ງສັດທາ ທີ່ມີຊັບສິນຫລາຍ, ນາງວີແອນນາໄດ້ພົບກັບຜູ້ສອນສາດສະໜາ ເປັນເທື່ອທຳອິດ ໃນປີ 1831. ຫລັງຈາກທີ່ໄດ້ຮັບການເປັນພະຍານທາງວິນຍານ ວ່າຂ່າວສານຂອງເຂົາເຈົ້າເປັນຄວາມຈິງ, ນາງຈຶ່ງໄດ້ເດີນທາງໄປພົບກັບສາດສະດາ ໃນເມືອງເຄີດແລນ, ລັດໂອໄຮໂອ, ບ່ອນທີ່ນາງໄດ້ຮັບບັບຕິສະມາ.

ນາງວີແອນນາໄດ້ເຊື່ອຟັງຄຳແນະນຳຂອງພຣະຜູ້ເປັນເຈົ້າແກ່ນາງ ຢູ່ໃນ ຄຳສອນ ແລະ ພັນທະສັນຍາ 90:28–31. ການອຸທິດຖວາຍຂອງນາງໃຫ້ແກ່ພຣະຜູ້ເປັນເຈົ້າ, ຊຶ່ງລວມທັງການບໍລິຈາກທີ່ນາງໄດ້ມອບໃຫ້ກ່ອນແລ້ວ ຢູ່ໃນເມືອງເຄີດແລນ, ໄດ້ເກີດຂຶ້ນໃນເວລາທີ່ສຳຄັນສຳລັບສາດສະໜາຈັກ, ຕອນທີ່ຜູ້ນຳພະຍາຍາມທີ່ຈະຊື້ທີ່ດິນ ບ່ອນທີ່ພຣະວິຫານເຄີດແລນ ຈະຖືກສ້າງຂຶ້ນ. ນາງວີແອນນາໄດ້ “ຊື່ສັດ, ແລະ ບໍ່ … ກຽດຄ້ານ” ຕະຫລອດຊີວິດຂອງນາງ ແລະ ໃນທີ່ສຸດກໍສາມາດ “ຕັ້ງຖິ່ນຖານຢ່າງສັນຕິ” (ຂໍ້ທີ 31) ຢູ່ໃນຮ່ອມພູເຊົາເລັກ, ບ່ອນທີ່ນາງໄດ້ເສຍຊີວິດ ຕອນມີອາຍຸ 96 ປີ.

ຄຳສອນ ແລະ ພັນທະສັນຍາ 91

“ພຣະວິນຍານສະແດງເຖິງຄວາມຈິງ.”

ເຮົາທຸກຄົນພົບເຫັນຂ່າວສານທີ່ມີ “ຫລາຍສິ່ງ … ນັ້ນເປັນຄວາມຈິງ” ແລະ “ມີຫລາຍສິ່ງ … ທີ່ບໍ່ເປັນຄວາມຈິງ” (ຄຳສອນ ແລະ ພັນທະສັນຍາ 91:1–2). ມີຄຳແນະນຳໃດແດ່ ທີ່ທ່ານພົບເຫັນຢູ່ໃນ ຂໍ້ທີ 91 ທີ່ສາມາດຊ່ວຍທ່ານໃຫ້ຫລິງເຫັນຄວາມຈິງໃນຂ່າວສານທີ່ທ່ານພົບເຫັນ? ພຣະວິນຍານໄດ້ຊ່ວຍໃຫ້ທ່ານຫລິງເຫັນຄວາມຈິງ ຈາກຄວາມຜິດແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 89

ພຣະວາຈາແຫ່ງປັນຍາຊ່ວຍໃຫ້ເຮົາມີສຸຂະພາບຮ່າງກາຍ ແລະ ສຸຂະພາບວິນຍານທີ່ແຂງແຮງ.

ເພື່ອແນະນຳ ພາກທີ 89, ບາງທີທ່ານ ແລະ ລູກໆຂອງທ່ານອາດຈະເບິ່ງຮູບພາບພຣະວິຫານ ຫລື ຮ້ອງເພງໜຶ່ງກ່ຽວກັບສຸຂະພາບທາງຮ່າງກາຍ, ເຊັ່ນ “ພຣະເຈົ້າມອບພຣະວິຫານແກ່ເຮົາ” (ເພງສວດ ແລະ ເພງຂອງເດັກນ້ອຍ, 68), ເພື່ອສິດສອນວ່າຮ່າງກາຍກໍເປັນເໝືອນດັ່ງວິຫານສຳລັບວິນຍານຂອງເຮົາ. ຊ່ວຍລູກໆຂອງທ່ານສະແດງວິທີທີ່ພວກເຂົາຈະຮັກສາຮ່າງກາຍຂອງພວກເຂົາ.
ເພື່ອຮຽນຮູ້ກ່ຽວກັບພຣະບັນຍັດຂອງພຣະຜູ້ເປັນເຈົ້າໃນ ຄຳສອນ ແລະ ພັນທະສັນຍາ 89:10–17, ທ່ານ ແລະ ລູກໆຂອງທ່ານສາມາດແຕ້ມ ຫລື ເບິ່ງຮູບພາບຂອງສິ່ງດີໆທີ່ເຮົາກິນ ຫລື ກະທຳເພື່ອຮັກສາຮ່າງກາຍຂອງເຮົາໃຫ້ແຂງແຮງ (ເບິ່ງຮູບ ແລະ ໜ້າກິດຈະກຳ ໃນທ້າຍຂອງໂຄງຮ່າງນີ້). ພຣະຜູ້ເປັນເຈົ້າໄດ້ເຕືອນເຮົາບໍ່ໃຫ້ໃຊ້ຫຍັງ? ເປັນຫຍັງພຣະອົງຈຶ່ງຕ້ອງການໃຫ້ເຮົາຮັກສາຮ່າງກາຍຂອງເຮົາ?
ແອວເດີ ແກຣີ ອີ ສະຕີບເວັນສັນ ໄດ້ແນະນຳຊາວໜຸ່ມໃຫ້ວາງແຜນລ່ວງໜ້າວ່າພວກເຂົາຈະເຮັດແນວໃດເມື່ອພວກເຂົາຖືກລໍ້ລວງດ້ວຍສິ່ງມຶນເມົາ ຫລື ຢາເສບຕິດ. ເພິ່ນໄດ້ສິດສອນວ່າ: “ພວກເຈົ້າຈະພົບວ່າ ການລໍ້ລວງບໍ່ສາມາດຄອບງຳພວກເຈົ້າໄດ້. ພວກເຈົ້າໄດ້ຕັດສິນໃຈແລ້ວ ວ່າຈະເຮັດແນວໃດ ແລະ ເຮັດສິ່ງໃດກັບການລໍ້ລວງ. ພວກເຈົ້າບໍ່ຈຳເປັນຕ້ອງຕັດສິນໃຈໃນນາທີນັ້ນ” (“Your Priesthood Playbook,” Liahona, May 2019, 48). ຫລັງຈາກທີ່ອ່ານ ຄຳສອນ ແລະ ພັນທະສັນຍາ 89:4 ແລະ ອ່ານບົດຄວາມຂອງແອວເດີ ສະຕີບເວັນສັນ ນຳກັນ, ຈົ່ງປຶກສາກັບລູກໆຂອງທ່ານວ່າບັດນີ້ພວກເຂົາຈະຕັດສິນໃຈແນວໃດ—ສຳລັບຊີວິດທີ່ເຫລືອຂອງພວກເຂົາ—ເພື່ອດຳລົງຊີວິດຕາມພຣະວາຈາແຫ່ງປັນຍາ. ທ່ານຍັງສາມາດສະແດງສະຖານະການຈຳລອງວ່າພວກເຂົາຈະໂຕ້ຕອບວິທີໃດຖ້າມີຄົນໃດຄົນໜຶ່ງ, ແມ່ນແຕ່ໝູ່ເພື່ອນ, ສະເໜີບາງສິ່ງບາງຢ່າງທີ່ຂັດກັບພຣະວາຈາແຫ່ງປັນຍາ. ພຣະຜູ້ເປັນເຈົ້າປະທານພອນໃຫ້ເຮົາແນວໃດ ຖ້າເຮົາເຊື່ອຟັງພຣະວາຈາແຫ່ງປັນຍາ? (ເບິ່ງ ຂໍ້ທີ 18–21).

ເດັກນ້ອຍກຳລັງຫລິ້ນຢູ່ແຄມທະເລ — ຮ່າງກາຍຂອງເຮົາເປັນຂອງປະທານຈາກພຣະເຈົ້າ.

ຄຳສອນ ແລະ ພັນທະສັນຍາ 90:5

ພຣະເຈົ້າໄດ້ປະທານສາດສະດາໃຫ້ກັບເຮົາເພື່ອນຳພາ ແລະ ປົກປ້ອງເຮົາ.

ພວກທ່ານສາມາດເບິ່ງຮູບພາບຂອງສາດສະດາໃນສະໃໝບູຮານ ຫລື ຮ້ອງເພງເຊັ່ນ “ເຮົາຂອບພຣະໄທສຳລັບສາດສະດາ” (ເພງສວດ ແລະ ເພງຂອງເດັກນ້ອຍ, 40). ພຣະເຈົ້າອວຍພອນລູກໆຂອງພຣະອົງຜ່ານທາງສາດສະດາຂອງພຣະອົງແນວໃດ? ເປັນຫຍັງເຮົາຈຶ່ງຄວນຟັງຄຳຂອງສາດສະດາຂອງພຣະເຈົ້າ? (ເບິ່ງ ຄຳສອນ ແລະ ພັນທະສັນຍາ 90:5). ຈາກນັ້ນທ່ານ ແລະ ລູກໆຂອງທ່ານສາມາດເບິ່ງຮູບພາບຂອງສາດສະດາຄົນປະຈຸບັນ ແລະ ແບ່ງປັນກ່ຽວກັບບາງສິ່ງບາງຢ່າງທີ່ພຣະຜູ້ເປັນເຈົ້າໄດ້ສິດສອນ ຫລື ເຕືອນເຮົາໂດຍຜ່ານທາງເພິ່ນ. ເຮົາຈະເຮັດຕາມສາດສະດາແນວໃດ?

ຄຳສອນ ແລະ ພັນທະສັນຍາ 91

ພຣະວິນຍານສາມາດຊ່ວຍເຮົາໃຫ້ຮູ້ຈັກສິ່ງທີ່ຖືກຕ້ອງ.

ທ່ານສາມາດສະຫລຸບຫົວຂໍ້ພາກຂອງ ຄຳສອນ ແລະ ພັນທະສັນຍາ 91 ເພື່ອຊ່ວຍລູກໆຂອງທ່ານໃຫ້ເຂົ້າໃຈວ່າເປັນຫຍັງຈຶ່ງມີການເປີດເຜີຍນີ້. ຈາກນັ້ນເຂົາເຈົ້າສາມາດຄິດຫາສະຖານທີ່ຕ່າງໆ, ເຊັ່ນໃນສື່, ທີ່ເຮົາພົບເຫັນ “ຫລາຍສິ່ງ … ນັ້ນເປັນຄວາມຈິງ” ແລະ “ມີຫລາຍສິ່ງ … ທີ່ບໍ່ເປັນຄວາມຈິງ” (ຂໍ້ທີ 1–2). ຂໍ້ທີ 4–6 ນີ້ສິດສອນເຮົາຫຍັງແດ່ກ່ຽວກັບພຣະວິນຍານບໍລິສຸດ? ພຣະວິນຍານບໍລິສຸດຊ່ວຍເຮົາໃຫ້ຮູ້ສິ່ງຖືກຕ້ອງແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

“ເມັດພືດທຸກຊະນິດແມ່ນດີສຳລັບເປັນອາຫານຂອງມະນຸດ; ທັງໝາກໄມ້ຈາກເຄືອກໍຄືກັນ.”