“ວັນທີ 11–17 ເດືອນສິງຫາ: ‘ສະຖາປະນາ … ບ້ານຂອງພຣະເຈົ້າ’: ຄຳສອນ ແລະ ພັນທະສັນຍາ 88,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 88,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ໂຮງຮຽນຂອງສາດສະດາກໍຖືກຈັດຂຶ້ນຢູ່ໃນຫ້ອງນີ້.

ວັນທີ 11–17 ເດືອນສິງຫາ: “ສະຖາປະນາ … ບ້ານຂອງພຣະເຈົ້າ”

ຄຳສອນ ແລະ ພັນທະສັນຍາ 88

ບາງຄັ້ງບາງຄາວ, ພຣະຜູ້ເປັນເຈົ້າກໍໃຫ້ເຮົາເຫັນໜ້ອຍໜຶ່ງເຖິງ “ເດຊານຸພາບ ແລະ ອຳນາດ” ອັນບໍ່ມີຂອບເຂດຂອງພຣະອົງ (ຄຳສອນ ແລະ ພັນທະສັນຍາ 88:47) ຜ່ານທາງການເປີດເຜີຍທີ່ດີເລີດຢ່າງຫລວງຫລາຍ. ຄຳສອນ ແລະ ພັນທະສັນຍາ 88 ເປັນການເປີດເຜີຍດັ່ງນັ້ນ—ກ່ຽວກັບຄວາມສະຫວ່າງ ແລະ ລັດສະໝີພາບ ແລະ ອານາຈັກ ທີ່ສາມາດເຮັດໃຫ້ບັນຫາຢູ່ໃນໂລກ ເບິ່ງຄືວ່າບໍ່ສຳຄັນໂດຍການປຽບທຽບ. ແມ່ນແຕ່ຖ້າຫາກເຮົາບໍ່ສາມາດເຂົ້າໃຈທຸກສິ່ງທັງປວງ, ແຕ່ຢ່າງໜ້ອຍເຮົາກໍສາມາດຮູ້ສຶກໄດ້ວ່າ ມີຫລາຍສິ່ງກ່ຽວກັບນິລັນດອນ ຊຶ່ງເກີນກວ່າທີ່ເຮົາເຄີຍຮັບຮູ້. ແນ່ນອນ, ພຣະຜູ້ເປັນເຈົ້າບໍ່ໄດ້ກ່າວເຖິງຄວາມຈິງທີ່ຍິ່ງໃຫຍ່ເຫລົ່ານີ້ ເພື່ອເຮັດໃຫ້ເຮົາຢ້ານກົວ ຫລື ເຮັດໃຫ້ເຮົາຮູ້ສຶກບໍ່ມີຄ່າ. ຕາມຈິງແລ້ວ, ພຣະອົງໄດ້ສັນຍາວ່າ, “ວັນນັ້ນຈະມາເຖິງ ເມື່ອພວກເຈົ້າ ຈະ ເຂົ້າໃຈແມ່ນແຕ່ພຣະເຈົ້າ” (ຂໍ້ທີ 49; ເນັ້ນຄຳເນີ້ງ). ບາງທີເປັນເພາະຈຸດປະສົງທີ່ຮຸ່ງໂລດນັ້ນ ພຣະຜູ້ເປັນເຈົ້າຈຶ່ງໄດ້ບັນຊາໄພ່ພົນຂອງພຣະອົງຢູ່ໃນເມືອງເຄີດແລນ ໃຫ້ຈັດຕັ້ງໂຮງຮຽນຂອງສາດສະດາຂຶ້ນ. “ຈົ່ງວາງລະບຽບຕົວເອງ,” ພຣະອົງໄດ້ກ່າວ. “ຕຽມສິ່ງທີ່ຈຳເປັນທຸກຢ່າງ, ແລະ ສະຖາປະນາ … ບ້ານຂອງພຣະເຈົ້າ” (ຂໍ້ທີ 119). ຫລາຍກວ່າບ່ອນອື່ນໃດ, ຢູ່ພາຍໃນບ້ານສັກສິດຂອງພຣະເຈົ້າ—ແລະ ໃນບ້ານເຮືອນຂອງເຮົາ—ທີ່ພຣະອົງສາມາດເຮັດໃຫ້ເຮົາເຫັນພາບທີ່ເກີນກວ່າໂລກມະຕະ, “ເປີດເຜີຍພຣະພັກຂອງພຣະອົງແກ່ [ເຮົາ],” ແລະ ກະກຽມເຮົາໃຫ້ “ທົນກັບລັດສະໝີພາບຂອງອານາຈັກຊັ້ນສູງ” (ຂໍ້ທີ 68, 22).

ເບິ່ງ Saints, 1:164–66.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ພຣະເຢຊູຄຣິດສະເໜີມອບສັນຕິສຸກໃຫ້ເຮົາ.

ບໍ່ຫລາຍມື້ຫລັງຈາກຄຳເຕືອນທີ່ວ່າສົງຄາມ “ຈະລຸກລາມໄປເຖິງປະຊາຊາດທັງປວງ” (ຄຳສອນ ແລະ ພັນທະສັນຍາ 87:2), ພຣະຜູ້ເປັນເຈົ້າໄດ້ມອບການເປີດເຜີຍທີ່ ໂຈເຊັບ ສະມິດ ເອີ້ນວ່າ “ໃບໝາກກອກ,” ຊຶ່ງເປັນເຄື່ອງໝາຍແຫ່ງສັນຕິສຸກ (ຄຳສອນ ແລະ ພັນທະສັນຍາ 88, ຫົວຂໍ້ພາກ; ເບິ່ງ ປະຖົມມະການ 8:11) ນຳອີກ. ຕະຫລອດການສຶກສາ ພາກທີ 88 ຂອງທ່ານໃນອາທິດນີ້, ໃຫ້ຊອກຫາຂ່າວສານແຫ່ງສັນຕິສຸກຂອງພຣະຜູ້ເປັນເຈົ້າຕໍ່ທ່ານ.

ຄຳສອນ ແລະ ພັນທະສັນຍາ 88:6–67

ຄວາມສະຫວ່າງ ແລະ ກົດ ມາຈາກພຣະເຢຊູຄຣິດ.

ຄຳວ່າ ຄວາມສະຫວ່າງ ແລະ ກົດ ໄດ້ຖືກກ່າວຊ້ຳຫລາຍເທື່ອຢູ່ໃນ ພາກທີ 88. ຂີດໝາຍ ຫລື ໝາຍເຫດຂໍ້ພຣະຄຳພີ ບ່ອນທີ່ທ່ານພົບເຫັນຖ້ອຍຄຳເຫລົ່ານີ້ຢູ່ໃນ ຂໍ້ທີ 6–67, ແລະ ຂຽນສິ່ງທີ່ທ່ານຮຽນຮູ້ກ່ຽວກັບຄວາມສະຫວ່າງ ແລະ ກົດ—ແລະ ກ່ຽວກັບພຣະເຢຊູຄຣິດ. ທ່ານຮູ້ສຶກດົນໃຈໃຫ້ເຮັດຫຍັງແດ່ເພື່ອຈະໄດ້ຮັບຄວາມສະຫວ່າງ ແລະ ດຳລົງຊີວິດຕາມ “ກົດຂອງພຣະຄຣິດ”? (ຂໍ້ທີ 21).

ເບິ່ງ ເອຊາຢາ 60:19; ໂຢຮັນ 1:1–9; 3 ນີໄຟ 15:9; Timothy J. Dyches, “Light Cleaveth unto Light,” Liahona, May 2021, 112–15; Sharon Eubank, “Christ: The Light That Shines in Darkness,” Liahona, May 2019, 73–76 ນຳອີກ.

ຄອບຄົວກຳລັງອ່ານພຣະຄຳພີນຳກັນ — ພຣະຄຳພີບັນຈຸກົດຂອງພຣະຄຣິດ.

ຄຳສອນ ແລະ ພັນທະສັນຍາ 88:62–64

“ຈົ່ງເຂົ້າມາໃກ້ເຮົາ.”

ປະສົບການໃດແດ່ທີ່ສະແດງໃຫ້ທ່ານເຫັນວ່າຄຳສັນຍາຢູ່ໃນຂໍ້ເຫລົ່ານີ້ເປັນຄວາມຈິງ? ແມ່ນຫຍັງຄືບາດກ້າວຕໍ່ໄປຂອງທ່ານເພື່ອຈະ “ເຂົ້າມາໃກ້” ພຣະຄຣິດ? ໃຫ້ຄິດທີ່ຈະເຮັດໃຫ້ເພງສວດ “ພຣະບິດາໂປດຟັງເຮົາວອນ” (ເພງສວດ ແລະ ເພງຂອງເດັກນ້ອຍ, 23) ເປັນພາກສ່ວນຂອງການສຶກສາ ແລະ ການນະມັດສະການຂອງທ່ານ.

ຄຳສອນ ແລະ ພັນທະສັນຍາ 88:67–76

ເຮົາສາມາດກາຍເປັນຄົນສະອາດໄດ້ຜ່ານທາງການຊົດໃຊ້ຂອງພຣະເຢຊູຄຣິດ.

ພຣະບັນຊາຂອງພຣະຜູ້ເປັນເຈົ້າທີ່ໃຫ້ “ຊຳລະຕົນເອງໃຫ້ບໍລິສຸດ” ມີປະກົດຢູ່ສອງເທື່ອຢູ່ໃນ ພາກທີ 88 (ຂໍ້ທີ 68, 74). ທ່ານຄິດວ່າວະລີນີ້ໝາຍຄວາມວ່າຫຍັງ? ທ່ານອາດທົບທວນຂໍ້ພຣະຄຳພີບາງຂໍ້ ກ້ອງຫົວຂໍ້ “ການຊຳລະໃຫ້ບໍລິສຸດ” ໃນຄູ່ມືພຣະຄຳພີ (ຫ້ອງສະໝຸດພຣະກິດຕິຄຸນ). ເຮົາຈະກາຍເປັນຄົນທີ່ຊຳລະຕົນເອງໃຫ້ບໍລິສຸດແນວໃດ? ໃຫ້ຄຳຖາມນີ້ຊີ້ນຳການສຶກສາ ຄຳສອນ ແລະ ພັນທະສັນຍາ 88:67–76, ຂອງທ່ານ, ແລະ ບັນທຶກຄວາມຮູ້ທາງວິນຍານໃດໆທີ່ທ່ານໄດ້ຮັບ.

ຄຳສອນ ແລະ ພັນທະສັນຍາ 88:77–80, 118–26

“ຈົ່ງສະແຫວງຫາການຮຽນຮູ້, ແມ່ນແຕ່ໂດຍການສຶກສາ ແລະ ໂດຍສັດທານຳອີກ.”

ພຣະຜູ້ເປັນເຈົ້າໄດ້ບອກໄພ່ພົນໃຫ້ສະຖາປະນາ “ໂຮງຮຽນຂອງສາດສະດາ” ໃນເມືອງເຄີດແລນ (ຄຳສອນ ແລະ ພັນທະສັນຍາ 88:137). ຄຳແນະນຳສ່ວນຫລາຍຢູ່ໃນ ພາກທີ 88 ໄດ້ສິດສອນເຂົາເຈົ້າວ່າຕ້ອງເຮັດແນວໃດ. ຄຳແນະນຳນີ້ຍັງສາມາດຊ່ວຍທ່ານໃຫ້ “ສະຖາປະນາ … ບ້ານແຫ່ງການຮຽນຮູ້” (ຂໍ້ທີ 119) ໃນຊີວິດຂອງທ່ານເອງນຳອີກ. ຕາມຈິງແລ້ວ, ທ່ານສາມາດເບິ່ງ ຂໍ້ທີ 77–80 ແລະ 118–26 ໃຫ້ເປັນແຜນຜັງເພື່ອ “ສ້ອມແປງບ້ານເຮືອນຂອງທ່ານ [ຫລື ຊີວິດຂອງທ່ານ] ໃຫ້ເປັນສູນກາງການຮຽນຮູ້ພຣະກິດຕິຄຸນ” ແລະ “ສະຖານທີ່ສັກສິດແຫ່ງສັດທາ” (Russell M. Nelson, “Becoming Exemplary Latter-day Saints,” Liahona, Nov. 2018, 113). ມັນສາມາດເປັນເລື່ອງທີ່ໜ້າສົນໃຈທີ່ຈະແຕ້ມຮູບໃຫ້ເຫັນວ່າ “ການສ້ອມແປງ” ສ່ວນຕົວຂອງທ່ານຈະເປັນແບບໃດ, ລວມທັງວະລີທີ່ມາຈາກຂໍ້ເຫລົ່ານີ້ທີ່ທ່ານຮູ້ສຶກວ່າທ່ານຈຳເປັນຕ້ອງນຳໃຊ້.

ມັນອາດຊ່ວຍທີ່ຈະຄົ້ນຫາຄຳຖາມເຫລົ່ານີ້ນຳອີກ: ເປັນຫຍັງ ການຮຽນຮູ້ ແລະ ການສຶກສາຈຶ່ງສຳຄັນຕໍ່ພຣະຜູ້ເປັນເຈົ້າ? ແມ່ນຫຍັງ ຄືສິ່ງທີ່ພຣະອົງຢາກໃຫ້ເຮົາຮຽນຮູ້? ພຣະອົງຢາກໃຫ້ເຮົາຮຽນຮູ້ແນວໃດ ? ຊອກຫາຄຳຕອບຕໍ່ຄຳຖາມເຫລົ່ານີ້ຢູ່ໃນ ຂໍ້ທີ 77–80 ແລະ ຢູ່ໃນ “ຄວາມຈິງຈະເຮັດໃຫ້ເຈົ້າເປັນອິດສະລະ” (ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ, 30–33).

ທ່ານຄິດວ່າ ການຮຽນຮູ້ “ໂດຍການສຶກສາ ແລະ ໂດຍສັດທານຳອີກ” ໝາຍຄວາມວ່າແນວໃດ? (ຂໍ້ທີ 118). ມີຄວາມຮູ້ແຈ້ງຫຍັງແດ່ທີ່ທ່ານໄດ້ຮັບຈາກຂ່າວສານຂອງແອວເດີ ມາຕີອາສ໌ ແຮວດ໌ “Seeking Knowledge by the Spirit”? (Liahona, May 2019, 31–33).

ເບິ່ງ Topics and Questions, “Seeking Truth and Avoiding Deception,” ຫ້ອງສະໝຸດພຣະກິດຕິຄຸນ; “A School and an Endowment,” ໃນ Revelations in Context, 174–82 ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 88:33

ພຣະບິດາເທິງສະຫວັນມອບຂອງປະທານທີ່ດີ.

ທ່ານສາມາດເລີ່ມຕົ້ນສົນທະນາກ່ຽວກັບ ຄຳສອນ ແລະ ພັນທະສັນຍາ 88:33 ໂດຍການຂໍໃຫ້ລູກໆຂອງທ່ານເວົ້າລົມກັນກ່ຽວກັບຂອງຂວັນທີ່ພວກເຂົາໄດ້ຮັບ—ທັງສິ່ງທີ່ພວກເຂົາໄດ້ຮັບດ້ວຍຄວາມຊື່ນຊົມ ແລະ ບາງສິ່ງທີ່ພວກເຂົາບໍ່ໄດ້ຊື່ນຊົມ. ບາງທີພວກເຂົາສາມາດທຳທ່າໄດ້ຮັບຂອງຂວັນດ້ວຍຄວາມຊື່ນຊົມ. ແລ້ວພວກທ່ານສາມາດເວົ້າລົມກັນກ່ຽວກັບຂອງປະທານທີ່ພຣະບິດາເທິງສະຫວັນປະທານໃຫ້ເຮົາ (ເຊັ່ນຂອງປະທານແຫ່ງພຣະວິນຍານບໍລິສຸດ). ເຮົາຈະຮັບເອົາຂອງປະທານເຫລົ່ານີ້ດ້ວຍຄວາມຊື່ນຊົມໄດ້ແນວໃດ?

ຄຳສອນ ແລະ ພັນທະສັນຍາ 88:63

ຖ້າຫາກເຮົາສະແຫວງຫາພຣະຜູ້ຊ່ວຍໃຫ້ລອດ, ເຮົາຈະໄດ້ພົບພຣະອົງ.

ຄຳສອນ ແລະ ພັນທະສັນຍາ 88:63 ບັນຈຸຄຳສັບທີ່ເປັນການກະທຳ ທີ່ອາດດົນໃຈໃຫ້ເຮັດກິດຈະກຳທີ່ມ່ວນຊື່ນບາງຢ່າງ ເພື່ອຊຸກຍູ້ລູກໆຂອງທ່ານໃຫ້ສະແຫວງຫາທີ່ປະທັບຂອງພຣະຜູ້ເປັນເຈົ້າໃນຊີວິດຂອງພວກເຂົາ. ຍົກຕົວຢ່າງ, ທ່ານ ແລະ ລູກໆຂອງທ່ານສາມາດຄິດເຖິງເກມເພື່ອສົນທະນາວະລີ “ຈົ່ງສະແຫວງຫາ ເຮົາດ້ວຍຄວາມພາກພຽນ ແລະ ພວກເຈົ້າຈະ ພົບ ເຮົາ” (ເນັ້ນຄຳເນີ້ງ) ຫລື “ຈົ່ງໝັ່ນເຄາະ, ແລ້ວຈະມີຜູ້ໄຂປະຕູໃຫ້” ໄດ້ບໍ?

ເດັກນ້ອຍຕ້ອງການຄວາມຫລາກຫລາຍ. “ເດັກນ້ອຍສ່ວນຫລາຍຈະຮຽນຮູ້ໄດ້ດີທີ່ສຸດເມື່ອມີປະສາດສຳພັດຫລາຍຢ່າງກ່ຽວຂ້ອງ. ຫາທາງຊ່ວຍໃຫ້ເດັກນ້ອຍໃຊ້ປະສາດສຳພັດໃນການເບິ່ງເຫັນ, ການໄດ້ຍິນ, ແລະ ການແຕະຕ້ອງ ຂະນະທີ່ພວກເຂົາຮຽນຮູ້. ໃນບາງກໍລະນີ, ທ່ານອາດຕ້ອງຫາທາງລວມການໄດ້ກິ່ນ ແລະ ການຊີມລົດຊາດເຂົ້າໄປນຳ!” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 32).

ເພື່ອເນັ້ນຄຳເຊື້ອເຊີນຂອງພຣະຜູ້ຊ່ວຍໃຫ້ລອດໃຫ້ “ເຂົ້າມາໃກ້ເຮົາ,” ທ່ານສາມາດຂໍໃຫ້ເດັກນ້ອຍຄົນໜຶ່ງຈັບຮູບພາບຂອງພຣະເຢຊູ (ເຊັ່ນຮູບທີ່ຢູ່ທ້າຍໂຄງຮ່າງນີ້) ຢູ່ອີກຂ້າງໜຶ່ງຂອງຫ້ອງ ໃນຂະນະທີ່ເດັກນ້ອຍຄົນອື່ນໆຢືນຢູ່ອີກຂ້າງກົງກັນຂ້າມ. ຂະນະທີ່ລູກໆຂອງທ່ານຄິດເຖິງສິ່ງທີ່ພວກເຂົາສາມາດເຮັດໄດ້ເພື່ອຈະເຂົ້າມາໃກ້ພຣະຜູ້ຊ່ວຍໃຫ້ລອດຫລາຍຂຶ້ນ, ພວກເຂົາສາມາດຍ່າງໜຶ່ງກ້າວໄປຫາຮູບ, ແລະ ລູກຄົນໜຶ່ງຜູ້ທີ່ຖືຮູບກໍສາມາດຍ່າງໜຶ່ງກ້າວໄປຫາລູກອີກຄົນອື່ນໆ. ເວົ້າລົມກັບລູກໆຂອງທ່ານກ່ຽວກັບວິທີທີ່ທ່ານເຂົ້າມາໃກ້ພຣະຜູ້ຊ່ວຍໃຫ້ລອດ ແລະ ວ່າພຣະອົງເຂົ້າມາໃກ້ທ່ານແນວໃດ? ພວກທ່ານກໍສາມາດຮ້ອງໜຶ່ງເພງກັບພວກເຂົາກ່ຽວກັບຫົວຂໍ້ນີ້, ເຊັ່ນ “ນັບພຣະພອນຂອງທ່ານ” (ເພງສວດ ແລະ ເພງຂອງເດັກນ້ອຍ, 8).

ຄຳສອນ ແລະ ພັນທະສັນຍາ 88:77–80, 118

ພຣະບິດາເທິງສະຫວັນຢາກໃຫ້ເຮົາຮຽນຮູ້.

ຂໍໃຫ້ລູກໆຂອງທ່ານບອກທ່ານກ່ຽວກັບສິ່ງທີ່ພວກເຂົາກຳລັງຮຽນຮູ້ຢູ່ໃນໂຮງຮຽນ ຫລຶ ປະຖົມໄວ. ທ່ານອາດຢາກແບ່ງປັນບາງສິ່ງທີ່ທ່ານກຳລັງຮຽນຮູ້ຢູ່ນຳອີກ. ແລ້ວທ່ານສາມາດສະແດງຖ້ອຍຄຳທີ່ວ່າ ແມ່ນຫຍັງ, ເປັນຫຍັງ, ແລະ ແນວໃດ ໃຫ້ລູກໆຂອງທ່ານເຫັນ. ຊ່ວຍພວກເຂົາໃຫ້ຄົ້ນຄວ້າ ຄຳສອນ ແລະ ພັນທະສັນຍາ 88:77–79 ເພື່ອຊອກຫາວ່າ ແມ່ນຫຍັງ ຄືສິ່ງທີ່ພຣະຜູ້ເປັນເຈົ້າຢາກໃຫ້ເຮົາຮຽນຮູ້. ແລ້ວໃຫ້ເບິ່ງໃນ ຂໍ້ທີ 80 ນຳກັນເພື່ອຈະພົບວ່າ ເປັນຫຍັງ ພຣະອົງຈຶ່ງຢາກໃຫ້ເຮົາຮຽນຮູ້ ແລະ ຢູ່ໃນ ຂໍ້ທີ 118 ເພື່ອຈະພົບເຫັນວ່າເຮົາຄວນຮຽນຮູ້ ແນວໃດ.

ຄຳສອນ ແລະ ພັນທະສັນຍາ 88:119

ບ້ານຂອງເຮົາສາມາດສັກສິດໄດ້ເໝືອນດັ່ງພຣະວິຫານ.

ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 88:119 ໃຫ້ລູກໆຂອງທ່ານຟັງ, ພວກເຂົາສາມາດເຮັດຍອດພຣະວິຫານດ້ວຍແຂນຂອງພວກເຂົາ ທຸກໆເທື່ອທີ່ພວກເຂົາໄດ້ຍິນຄຳວ່າ “ບ້ານ.” ໃຫ້ອະທິບາຍວ່າ ພຣະບິດາເທິງສະຫວັນຢາກໃຫ້ ໂຈເຊັບ ສະມິດ ແລະ ໄພ່ພົນສ້າງພຣະວິຫານ, ຫລື “ບ້ານຂອງພຣະເຈົ້າ.”
ທ່ານສາມາດຂໍໃຫ້ລູກໆຂອງທ່ານເລືອກເຈັດຖ້ອຍຄຳທີ່ບັນຍາຍເຖິງບ້ານຂອງພວກເຂົາ. ເພື່ອຊ່ວຍພວກເຂົາຊອກຫາ, ຢູ່ໃນ ຄຳສອນ ແລະ ພັນທະສັນຍາ 88:119, ມີເຈັດຖ້ອຍຄຳທີ່ພຣະຜູ້ເປັນເຈົ້າໃຊ້ເພື່ອບັນຍາຍບ້ານຂອງພຣະອົງ. ເຮົາຈະເຮັດໃຫ້ບ້ານເຮືອນຂອງເຮົາເປັນ “ບ້ານຂອງພຣະເຈົ້າ” ໄດ້ແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ພຣະຄຣິດສະເດັດກັບຄືນມາ — Be Not Afraid [ຢ່າສູ່ຢ້ານ], ໂດຍ ໄມໂກ ມອມ