“ວັນທີ 25–31 ເດືອນສິງຫາ: ‘ຮັບເອົາຄວາມສົມບູນຂອງພຣະອົງ’: ຄຳສອນ ແລະ ພັນທະສັນຍາ 93,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 93,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ລາຍລະອຽດຈາກ I See the Son of Man [ເຮົາເຫັນບຸດມະນຸດ], ໂດຍ ວາວເຕີ ເຣນ

ວັນທີ 25–31 ເດືອນສິງຫາ: “ຮັບເອົາຄວາມສົມບູນຂອງພຣະອົງ”

ຄຳສອນ ແລະ ພັນທະສັນຍາ 93

“ເມື່ອທ່ານຂຶ້ນຂັ້ນໄດ,” ໂຈເຊັບ ສະມິດ ໄດ້ສິດສອນ, “ທ່ານຈະຕ້ອງເລີ່ມຕົ້ນແຕ່ຂັ້ນທຳອິດ, ແລະ ຂຶ້ນໄປເທື່ອລະຂັ້ນ ເຖິງຂັ້ນສຸດທ້າຍ; ແລະ ຫລັກທຳຂອງພຣະກິດຕິຄຸນກໍເປັນເຊັ່ນນັ້ນ—ທ່ານຈະຕ້ອງເລີ່ມຕົ້ນແຕ່ຂໍ້ທຳອິດ, ແລະ ຕໍ່ໄປຈົນກະທັ້ງທ່ານຮຽນຮູ້ຫລັກທຳທັງໝົດຂອງຄວາມສູງສົ່ງ” (Teachings of Presidents of the Church: Joseph Smith [2007], 268).

ບາງເທື່ອຂັ້ນໄດແຫ່ງຄວາມສູງສົ່ງເບິ່ງຄືສູງເກີນກວ່າຈະຂຶ້ນເຖິງໄດ້, ແຕ່ເຮົາໄດ້ເກີດມາເພື່ອຈະປີນຂຶ້ນຈົນເຖິງຂັ້ນສຸດທ້າຍດ້ວຍຄວາມຊ່ວຍເຫລືອສະເໝີຈາກພຣະຜູ້ຊ່ວຍໃຫ້ລອດ. ຄວາມຈຳກັດໃດກໍຕາມທີ່ເຮົາອາດເຫັນຢູ່ໃນຕົວເຮົາເອງ, ແຕ່ພຣະບິດາເທິງສະຫວັນ ແລະ ພຣະບຸດຂອງພຣະອົງເຫັນບາງສິ່ງທີ່ສະຫງ່າລາສີໃນຕົວເຮົາ, ບາງສິ່ງທີ່ເປັນເໝືອນພຣະເຈົ້າ. ຄືກັນກັບທີ່ພຣະເຢຊູຄຣິດ “ໄດ້ຢູ່ໃນການເລີ່ມຕົ້ນກັບພຣະບິດາ,” ແລະ “ພວກເຈົ້າຄືກັນ” (ຄຳສອນ ແລະ ພັນທະສັນຍາ 93:21, 23). ຄືກັນກັບທີ່ພຣະອົງ “ໄດ້ຮັບຈາກພຣະຄຸນໜຶ່ງຫາອີກພຣະຄຸນໜຶ່ງ, ຈົນກວ່າພຣະອົງໄດ້ຮັບຄວາມສົມບູນ,” ແລະ ເຊັ່ນດຽວກັນ “ພວກເຈົ້າຈະໄດ້ຮັບພຣະຄຸນແທນພຣະຄຸນ” (ຂໍ້ທີ 13, 20). ພຣະກິດຕິຄຸນທີ່ຟື້ນຟູສິດສອນກ່ຽວກັບສະພາບທີ່ແທ້ຈິງຂອງພຣະເຈົ້າ, ແລະ ມັນກໍໄດ້ສິດສອນອີກກ່ຽວກັບສະພາບ ແລະ ຈຸດໝາຍປາຍທາງທີ່ແທ້ຈິງຂອງທ່ານ. ທ່ານເປັນລູກແທ້ໆຂອງພຣະເຈົ້າ ພ້ອມດ້ວຍສັກກະຍະພາບ ທີ່ຈະ “ຮັບເອົາຄວາມສົມບູນຂອງພຣະອົງໃນເວລາອັນເໝາະສົມ” (ຂໍ້ທີ 19).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ເຊັ່ນດຽວກັນກັບພຣະເຢຊູຄຣິດ, ເຮົາສາມາດໄດ້ຮັບລັດສະໝີພາບ ແລະ “ຄວາມສົມບູນ” ຂອງພຣະເຈົ້າ.

ສາດສະດາໂຈເຊັບ ສະມິດ ໄດ້ສິດສອນວ່າ, “ຖ້າຫາກມະນຸດບໍ່ເຂົ້າໃຈລັກສະນະຂອງພຣະເຈົ້າ, ແລ້ວເຂົາກໍບໍ່ເຂົ້າໃຈຕົວເຂົາເອງ” (Teachings: Joseph Smith, 40). ຂະນະທີ່ທ່ານຮຽນຮູ້ກ່ຽວກັບພຣະຜູ້ຊ່ວຍໃຫ້ລອດໂດຍການສຶກສາ ຄຳສອນ ແລະ ພັນທະສັນຍາ 93, ໃຫ້ຊອກຫາສິ່ງທີ່ທ່ານຮຽນຮູ້ກ່ຽວກັບຕົວເອງ. ຍົກຕົວຢ່າງ, ທ່ານຮຽນຮູ້ຫຍັງແດ່ກ່ຽວກັບພຣະອົງຈາກ ຂໍ້ທີ 3, 12–13, 21, ແລະ 26? ຄວາມຈິງທີ່ຄ້າຍຄືກັນຢ່າງໃດແດ່ທີ່ທ່ານພົບເຫັນກ່ຽວກັບຕົວທ່ານເອງຢູ່ໃນ 20, 23, ແລະ 28–29? (ເບິ່ງ 1 ໂຢຮັນ 3:2; 3 ນີໄຟ 27:27 ນຳອີກ). ຄຳຖາມຕໍ່ໄປນີ້ ສາມາດຊ່ວຍທ່ານໃຫ້ເຂົ້າໃຈ ແລະ ນຳໃຊ້ຄວາມຈິງໃນພາກນີ້:

ຄວາມຮູ້ສຶກຂອງທ່ານກັບຄຳວ່າການໄດ້ຮັບ “ພຣະຄຸນແທນພຣະຄຸນ” ແລະ ການສືບຕໍ່ “ຈາກພຣະຄຸນໜຶ່ງຫາອີກພຣະຄຸນໜຶ່ງ” ໝາຍຄວາມວ່າແນວໃດ? (ຂໍ້ທີ 12–13). ຖ້າມັນອາດຊ່ວຍໄດ້, ທ່ານສາມາດອ່ານ “ພຣະຄຸນ” ໃນຄູ່ມືພຣະຄຳພີ (ຫ້ອງສະໝຸດພຣະກິດຕິຄຸນ).
ທ່ານຄົ້ນພົບຫຍັງແດ່ໃນການເປີດເຜີຍນີ້ ກ່ຽວກັບວິທີທີ່ພຣະເຈົ້າຊ່ວຍທ່ານໃຫ້ເຕີບໃຫຍ່ ແລະ ຮຽນຮູ້? ການຮູ້ຈັກສິ່ງນີ້ມີຜົນກະທົບຕໍ່ວິທີທີ່ທ່ານປະຕິບັດຕໍ່ຄົນອື່ນ—ແລະ ຕໍ່ຕົວທ່ານເອງແນວໃດ?
ທ່ານໄດ້ຮຽນຮູ້ຫຍັງແດ່ກ່ຽວກັບ “ວິທີນະມັດສະການຢ່າງໃດ, ແລະ … ນະມັດສະການສິ່ງໃດ”? (ຂໍ້ທີ 19; ເບິ່ງ ຄູ່ມືພຣະຄຳພີ, “ນະມັດສະການ,” ຫ້ອງສະໝຸດພຣະກິດຕິຄຸນ ນຳອີກ).

ຄຳສອນ ແລະ ພັນທະສັນຍາ 93:1–39

ລັດສະໝີພາບຂອງພຣະເຈົ້າຄືຄວາມສະຫວ່າງ ແລະ ຄວາມຈິງ.

ທ່ານອາດສັງເກດເຫັນຄຳວ່າ ລັດສະໝີພາບ, ຄວາມສະຫວ່າງ, ແລະ ຄວາມຈິງ ປະກົດເລື້ອຍໆ ຢູ່ໃນການເປີດເຜີຍນີ້. ຂະນະທີ່ທ່ານສຶກສາ ຂໍ້ທີ 20–39 ໂດຍສະເພາະ, ໃຫ້ຂຽນຄວາມຈິງຕ່າງໆລົງໄວ້ ອັນທີ່ທ່ານໄດ້ຮຽນຮູ້ກ່ຽວກັບແນວຄິດເຫລົ່ານີ້. ສ້າງຕາຕະລາງທີ່ຄ້າຍຄືກັບແນວນີ້ອາດຊ່ວຍທ່ານໄດ້:

ຂໍ້ທີ	ສິ່ງທີ່ເຮົາໄດ້ຮຽນຮູ້	ຄຳຖາມໃຫ້ໄຕ່ຕອງ
ຂໍ້ທີ 24	ສິ່ງທີ່ເຮົາໄດ້ຮຽນຮູ້	ຄຳຖາມໃຫ້ໄຕ່ຕອງ ມີການລໍ້ລວງຫລາຍຢ່າງຢູ່ເທິງໂລກ. ເຮົາຈະສາມາດຮູ້ຈັກຄວາມຈິງໄດ້ແນວໃດ? (ເບິ່ງ ຢາໂຄບ 4:13 ນຳອີກ).
ຂໍ້ທີ 28	ສິ່ງທີ່ເຮົາໄດ້ຮຽນຮູ້	ຄຳຖາມໃຫ້ໄຕ່ຕອງ
ຂໍ້ທີ 36	ສິ່ງທີ່ເຮົາໄດ້ຮຽນຮູ້ ພຣະເຈົ້າເປັນຄວາມສະຫວ່າງ ແລະຄວາມຈິງ.	ຄຳຖາມໃຫ້ໄຕ່ຕອງ
ຂໍ້ທີ 37	ສິ່ງທີ່ເຮົາໄດ້ຮຽນຮູ້	ຄຳຖາມໃຫ້ໄຕ່ຕອງ ເຮົາຮູ້ຈັກໃຜແດ່ທີ່ອາດຈະສາມາດຕ້ານທານອິດທິພົນຂອງຄວາມຊົ່ວຮ້າຍໄດ້? ເປັນຫຍັງເຂົາເຈົ້າຈຶ່ງສາມາດເຮັດໄດ້?
ຂໍ້ທີ	ສິ່ງທີ່ເຮົາໄດ້ຮຽນຮູ້	ຄຳຖາມໃຫ້ໄຕ່ຕອງ
ຂໍ້ທີ	ສິ່ງທີ່ເຮົາໄດ້ຮຽນຮູ້	ຄຳຖາມໃຫ້ໄຕ່ຕອງ
ຂໍ້ທີ ເບິ່ງ: ຄຳສອນ ແລະ ພັນທະສັນຍາ 50:24 ນຳອີກ.	ສິ່ງທີ່ເຮົາໄດ້ຮຽນຮູ້	ຄຳຖາມໃຫ້ໄຕ່ຕອງ

ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ທີ່ດົນໃຈທ່ານໃຫ້ຄົ້ນຫາຄວາມສະຫວ່າງ ແລະ ຄວາມຈິງທີ່ຍິ່ງໃຫຍ່ກວ່າ? ເປັນຫຍັງຄຳວ່າ ແສງສະຫວ່າງ ແລະ ຄວາມຈິງ ຈຶ່ງເປັນຫົວຂໍ້ທີ່ດີສຳລັບພຣະເຢຊູຄຣິດ (ເບິ່ງ ໂຢຮັນ 5:22; 14 ນີໄຟ 9:41). ຄວາມຈິງເຫລົ່ານີ້ສົ່ງຜົນສະທ້ອນໃຫ້ແກ່ຊີວິດຂອງທ່ານແນວໃດ?

ທ່ານກໍອາດຈົດບັນທຶກຄຳສັນຍາກ່ຽວກັບຈຸດໝາຍນິລັນດອນຂອງທ່ານທີ່ບອກຢູ່ໃນ ຂໍ້ທີ 20, 22, 28, 33–35. ຄຳສັນຍາເຫລົ່ານີ້ ແລະ ການໄດ້ຮັບແສງສະຫວ່າງມີຄວາມສຳພັນກັນແນວໃດແດ່?

ໃຫ້ພິຈາລະນາການຄົ້ນຫາຫົວຂໍ້ “ເດີນໄປໃນຄວາມສະຫວ່າງຂອງພຣະເຈົ້າ” (ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ, 18–21) ເພື່ອຄົ້ນພົບວ່າທ່ານສາມາດເຮັດຫຍັງໄດ້ແດ່ ເພື່ອຈະໄດ້ຮັບຄວາມສະຫວ່າງ ແລະ ພຣະຜູ້ເປັນເຈົ້າໄດ້ສັນຍາວ່າຈະໃຫ້ພອນແກ່ທ່ານແນວໃດ. ວິດີໂອ “Light and Truth, Part 1” ແລະ “Part 2” ໃນ (ຫ້ອງສະໝຸດພຣະກິດຕິຄຸນ) ອາດຈະໃຫ້ແນວຄິດເພີ່ມເຕີມໄດ້.

ເບິ່ງ “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72; Topics and Questions, “Holy Ghost,” ຫ້ອງສະໝຸດພຣະກິດຕິຄຸນ ນຳອີກ.

Light and Truth, Part 1
(D&C 88:6-13) This video examines God's attributes of light and truth as explained in section 88 of the Doctrine and Covenants.

Light and Truth, Part 2
(D&C 93:28,36-40) This video examines God's attributes of light and truth as explained in section 88 of the Doctrine and Covenants.

ປ່ອງຢ້ຽມໃນພຣະວິຫານ — “ລັດສະໝີພາບຂອງພຣະເຈົ້າຄື … ຄວາມສະຫວ່າງ ແລະ ຄວາມຈິງ.”

ຄຳສອນ ແລະ ພັນທະສັນຍາ 93:40–50

“ຈົ່ງຈັດບ້ານເຮືອນຂອງພວກເຈົ້າເອງໃຫ້ເປັນລະບຽບ.”

ພຣະບັນຊາທີ່ວ່າ “ຈົ່ງຈັດບ້ານເຮືອນຂອງພວກເຈົ້າເອງໃຫ້ເປັນລະບຽບ” (ຂໍ້ທີ 43) ບໍ່ແມ່ນກ່ຽວກັບການຈັດລະບຽບເຄື່ອງເຮືອນຂອງຊານ ແຕ່ກ່ຽວກັບການສິດສອນ—ແລະ ການຮຽນຮູ້—“ຄວາມສະຫວ່າງ ແລະ ຄວາມຈິງ” (ຂໍ້ທີ 42). ໃຫ້ພິຈາລະນາເບິ່ງວ່າທ່ານຈະເຮັດຕາມຄຳແນະນຳນີ້ໄດ້ແນວໃດ? ມີການທ້າທາຍໃດແດ່ທີ່ທ່ານປະເຊີນ? ຄວາມຈິງໃດແດ່ໃນ ຄຳສອນ ແລະ ພັນທະສັນຍາ 93 ທີ່ສາມາດຊ່ວຍໄດ້?

ທ່ານໄດ້ຮັບຄວາມຮູ້ໃດແດ່ ຈາກການສິດສອນເຫລົ່ານີ້ໂດຍ ແອວເດີ ເດວິດ ເອ ແບ໊ດນາ?

“ໃນຫ້ອງການຂອງຂ້າພະເຈົ້າມີຮູບແຕ້ມຂອງທົ່ງເຂົ້າຫວີດທີ່ສວຍງາມພາບໜຶ່ງ. ຮູບພາບນີ້ເປັນການທາສີໂດຍແກວ່ງແປງໄປມາຫລາຍຄັ້ງລວມກັນໃຫ້ເປັນຮອຍແຕ້ມ—ຮອຍແຕ້ມທີ່ຢູ່ດ່ຽວຈະບໍ່ມີຫຍັງທີ່ເປັນຕາໜ້າສົນໃຈ ຫລື ປະທັບໃຈ. ແທ້ຈິງແລ້ວ, ຖ້າທ່ານຢືນເບິ່ງໃກ້ໆຜ້າໃບ, ທັງໝົດທີ່ທ່ານສາມາດເຫັນກໍຄືຮອຍແຕ້ມສີເຫລືອງ ແລະ ສີຄຳ ແລະ ສີນ້ຳຕານຫລາຍໆຮອຍທີ່ເບິ່ງຄືວ່າບໍ່ສຳພັນກັນ ແລະ ບໍ່ໜ້າດຶງດູດໃຈເລີຍ. ແຕ່ວ່າ, ເມື່ອທ່ານຍ້າຍອອກໄປເທື່ອລະໜ້ອຍຫ່າງອອກໄປຈາກຜ້າໃບ, ຮອຍແຕ້ມທີ່ແກວ່ງໄປມາແຕ່ລະຮອຍຂອງແປງໄດ້ປະສົມປະສານເຂົ້າກັນ ແລະ ອອກມາເປັນຮູບທົ່ງເຂົ້າຫວີດທີ່ສວຍງາມໜ້າປະທັບໃຈທີ່ສຸດ. ຮອຍແປງທາສີທຳມະດາຫລາຍໆຮອຍ, ຂົນແປງແຕ່ລະຮອຍທີ່ເຮັດວຽກຮ່ວມກັນໄດ້ສ້າງພາບວາດທີ່ສວຍງາມ ແລະ ໜ້າດຶງດູດໃຈ.

“ການອະທິຖານເປັນຄອບຄົວ, ການສຶກສາພຣະຄຳພີເປັນຄອບຄົວ, ແລະ ການສັງສັນໃນຄອບຄົວທຸກເທື່ອ ປຽບເໝືອນຮອຍໆໜຶ່ງ ໃນພາບຈິດວິນຍານຂອງເຮົາ. ບໍ່ມີເຫດການອັນໃດອັນໜຶ່ງທີ່ປະກົດວ່າ ໜ້າປະທັບໃຈ ຫລື ໜ້າຊົງຈຳ. ແຕ່ເໝືອນດັ່ງທີ່ຮອຍຂອງສີເຫລືອງ ແລະ ສີຄຳ ແລະ ສີນ້ຳຕານເຮັດໃຫ້ຮອຍສົມບູນ ແລະ ສ້າງໃຫ້ຜົນງານທີ່ດີເລີດເປັນທີ່ປະທັບໃຈ, ການກະທຳທີ່ເບິ່ງຄືວ່າເລັກໆນ້ອຍໆ ທີ່ສະໝ່ຳສະເໝີຂອງເຮົາ ກໍສາມາດນຳໄປສູ່ຜົນງານທີ່ສຳຄັນທີ່ສຸດທາງວິນຍານໄດ້ຄືກັນ. ‘ດັ່ງນັ້ນ, ຢ່າເມື່ອຍລ້າໃນການເຮັດວຽກງານດີ, ເພາະພວກເຈົ້າພວມວາງຮາກຖານຂອງວຽກງານອັນຍິ່ງໃຫຍ່. ແລະ ຈາກສິ່ງເລັກນ້ອຍ ສິ່ງຍິ່ງໃຫຍ່ຈະເກີດຂຶ້ນ’ [ຄຳສອນ ແລະ ພັນທະສັນຍາ 64:33]. ຄວາມສະໝ່ຳສະເໝີເປັນຫລັກທຳສຳຄັນເມື່ອເຮົາວາງຮາກຖານຂອງວຽກງານອັນຍິ່ງໃຫຍ່ໃນຊີວິດຂອງເຮົາ ແລະ ໃນຂະນະທີ່ເຮົາພາກພຽນ ແລະ ເປັນຫ່ວງໃນບ້ານຂອງເຮົາຫລາຍຂຶ້ນ” (“More Diligent and Concerned at Home,” Liahona, Nov. 2009, 19–20).

ເບິ່ງ Henry B. Eyring, “A Home Where the Spirit of the Lord Dwells,” Liahona, May 2019, 22–25 ນຳອີກ.

ຄອບຄົວກຳລັງອະທິຖານນຳກັນ — ພຣະຜູ້ເປັນເຈົ້າໄດ້ບັນຊາພໍ່ແມ່ໃຫ້ “ລ້ຽງດູລູກໆຂອງ [ເຂົາເຈົ້າ] ໃນຄວາມສະຫວ່າງ ແລະ ຄວາມຈິງ.”

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 93:2–21

ພຣະເຢຊູຄຣິດຄືຄວາມສະຫວ່າງ ແລະ ຊີວິດຂອງໂລກ.

ຈົ່ງພິຈາລະນາການສະແດງຮູບພາບຂອງພຣະຜູ້ຊ່ວຍໃຫ້ລອດ ແລະ ຖາມລູກໆຂອງທ່ານວ່າເປັນຫຍັງມັນຈຶ່ງສຳຄັນທີ່ຈະຮຽນຮູ້ ແລະ ເຮັດຕາມພຣະເຢຊູຄຣິດ. ແລ້ວພວກທ່ານກໍສາມາດອ່ານ ຄຳສອນ ແລະ ພັນທະສັນຍາ 93:19 ນຳກັນ ເພື່ອຄົ້ນຫາເຫດຜົນຢ່າງໜຶ່ງທີ່ສຳຄັນ.
ທ່ານອາດຕ້ອງການເລືອກຄວາມຈິງສອງສາມຢ່າງກ່ຽວກັບພຣະຄຣິດໃນ ພາກທີ 93 ທີ່ດົນໃຈທ່ານແລະ ຊ່ວຍລູກໆຂອງທ່ານໃຫ້ຄົ້ນພົບ ແລະ ເຂົ້າໃຈມັນ (ເບິ່ງ “ບົດທີ 33: ການເປີດເຜີຍກ່ຽວກັບພຣະເຢຊູຄຣິດ,” ໃນ ເລື່ອງຄຳສອນ ແລະ ພັນທະສັນຍາ, 126–27, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ ນຳອີກ). ສຳລັບຄວາມຈິງແຕ່ລະຢ່າງທີ່ທ່ານເລືອກ, ທ່ານສາມາດເອົາຄຳ ຫລື ວະລີໃດໜຶ່ງໃຫ້ລູກໆຂອງທ່ານຄອຍຟັງໃນຂະນະທີ່ພວກທ່ານອ່ານຂໍ້ພຣະຄຳພີນຳກັນ. ຍົກຕົວຢ່າງເຊັ່ນ, ພຣະເຢຊູຄຣິດ:
- ປະຕິບັດວຽກງານຂອງພຣະບິດາ (ຂໍ້ທີ 5).
- ຄືຄວາມສະຫວ່າງຂອງໂລກນີ້ (ຂໍ້ທີ 9).
- ຄືພຣະຜູ້ສ້າງຂອງໂລກນີ້ (ຂໍ້ທີ 10).
- ໄດ້ຮັບອຳນາດທັງໝົດທັງໃນສະຫວັນ ແລະ ເທິງແຜ່ນດິນໂລກ (ຂໍ້ທີ 17).
- ໄດ້ຢູ່ໃນການເລີ່ມຕົ້ນກັບພຣະເຈົ້າ (ຂໍ້ທີ 21).
1:18
Chapter 33: A Revelation about Jesus Christ: May 1833

ຮູບແຕ້ມຂອງພຣະຄຣິດ — ລາຍລະອຽດຈາກ Light of the World [ຄວາມສະຫວ່າງຂອງໂລກ], ໂດຍ ຮາວເວີດ ລີອອນ

ຄຳສອນ ແລະ ພັນທະສັນຍາ 93:23, 29, 38

ເຮົາໄດ້ຢູ່ກັບພຣະບິດາເທິງສະຫວັນກ່ອນທີ່ເຮົາຈະມາສູ່ໂລກນີ້.

ພຣະຜູ້ຊ່ວຍໃຫ້ລອດໄດ້ເນັ້ນສາມຄັ້ງໃນ ພາກທີ 93 ວ່າເຮົາໄດ້ອາໄສຢູ່ກັບພຣະເຈົ້າ “ໃນການເລີ່ມຕົ້ນ” (ຂໍ້ທີ 23, 29, 38). ເພື່ອຊ່ວຍລູກໆຂອງທ່ານໃຫ້ຄົ້ນພົບສິ່ງນີ້, ທ່ານສາມາດເຊື້ອເຊີນພວກເຂົາໃຫ້ອ່ານ ຄຳສອນ ແລະ ພັນທະສັນຍາ 93:23, 29, 38 ແລະ ຊອກຫາຄວາມຈິງກ່ຽວກັບໂຕເຂົາເອງທີ່ໄດ້ກ່າວຊ້ຳໃນຂໍ້ເຫລົ່ານີ້. ເປັນຫຍັງພຣະບິດາເທິງສະຫວັນຈຶ່ງປະສົງໃຫ້ເຮົາຮູ້ຄວາມຈິງນີ້? ທ່ານອາດຈະຖາມລູກໆຂອງທ່ານເຖິງສີ່ງທີ່ພວກເຂົາຮູ້ກ່ຽວກັບຊີວິດຂອງເຮົາກັບພຣະບິດາເທິງສະຫວັນ ກ່ອນເຮົາໄດ້ມາເກີດເຊັ່ນກັນ. ເພື່ອຊ່ວຍພວກເຂົາໃຫ້ຮຽນຮູ້ຫລາຍຂຶ້ນ, ໃຫ້ອ່ານຂໍ້ພຣະຄຳພີຕໍ່ໄປນີ້ ໜຶ່ງຂໍ້ ຫລື ຫລາຍກວ່ານັ້ນ: ເຢເຣມີຢາ 1:5; ຄຳສອນ ແລະ ພັນທະສັນຍາ 138:53–56; ໂມເຊ 3:5; ອັບຣາຮາມ 3:22–26.
ພວກທ່ານຍັງສາມາດຮ້ອງເພງ “ເຮົາເປັນລູກຂອງພຣະເຈົ້າ” ຫລື “ຮັກທີ່ບ້ານ” (ເພງສວດ ແລະ ເພງຂອງເດັກນ້ອຍ, 64, 48) ນຳກັນນຳອີກ ແລະ ສົນທະນາກັນເຖິງຄວາມຈິງທີ່ເຮົາຮຽນຮູ້ຈາກບົດເພງເຫລົ່ານີ້ ກ່ຽວກັບຈຸດປະສົງຂອງການມາສູ່ໂລກນີ້ຂອງເຮົາ.

ຄຳສອນ ແລະ ພັນທະສັນຍາ 93:24–39

ເຮົາໄດ້ຮັບຄວາມສະຫວ່າງ ແລະ ຄວາມຈິງ ເມື່ອເຮົາເຊື່ອຟັງພຣະເຈົ້າ.

ເພື່ອຊ່ວຍເຫລືອລູກໆຂອງທ່ານໃຫ້ນຳໃຊ້ຄວາມຈິງກ່ຽວກັບການເຊື່ອຟັງໃນ ຄຳສອນ ແລະ ພັນທະສັນຍາ 93, ໃຫ້ພິຈາລະນາທີ່ຈະຂຽນຂໍ້ພຣະຄຳພີອ້າງອີງສອງສາມຂໍ້ຈາກພາກນີ້ລົງໃນເຈ້ຍໃບໜຶ່ງ. ຢູ່ໃນເຈ້ຍອີກໃບໜຶ່ງຕ່າງຫາກ, ໃຫ້ຂຽນຄວາມຈິງທີ່ແຕ່ລະຂໍ້ເຫລົ່ານີ້ໄດ້ສິດສອນ. ລູກໆຂອງທ່ານສາມາດຮ່ວມມືກັນ ເພື່ອອ່ານຂໍ້ພຣະຄຳພີ ແລະ ໝາຍຄວາມຈິງໃສ່ກັບຂໍ້ພຣະຄຳພີອ້າງອີງ. ຕົວຢ່າງອາດລວມທັງ:
- ຂໍ້ທີ 24: ຄວາມຈິງຄື ຄວາມຮູ້ເຖິງສິ່ງທີ່ເປັນຢູ່, ແລະ ດັ່ງທີ່ໄດ້ເປັນມາ, ແລະ ດັ່ງທີ່ຈະເປັນ.
- ຂໍ້ທີ 28: ເຮົາສາມາດຮັບຄວາມສະຫວ່າງ ແລະ ຄວາມຈິງ ເມື່ອຮັກສາພຣະບັນຍັດ.
- ຂໍ້ທີ 37: ເມື່ອເຮົາມີຄວາມສະຫວ່າງ ແລະ ຄວາມຈິງ, ເຮົາສາມາດປະຖິ້ມຄວາມຊົ່ວຮ້າຍ.
- ຂໍ້ທີ 39: ເຮົາສູນເສຍຄວາມສະຫວ່າງ ແລະ ຄວາມຈິງເມື່ອເຮົາບໍ່ເຊື່ອຟັງ.
ທ່ານອາດຈະແບ່ງປັນຕົວຢ່າງຂອງຄວາມຈິງທີ່ທ່ານໄດ້ມາຮູ້ຈັກ ເມື່ອທ່ານຮັກສາພຣະບັນຍັດຂອງພຣະຜູ້ເປັນເຈົ້າ.

ໃຫ້ປັບປ່ຽນຕາມອາຍຸຂອງລູກໆຂອງທ່ານ. ທ່ານຮູ້ຈັກຄວາມຕ້ອງການ ແລະ ຄວາມສາມາດຂອງລູກໆຂອງທ່ານ; ຈົ່ງປັບປ່ຽນແນວຄິດກິດຈະກຳຕ່າງໆໃຫ້ເຂົ້າກັບຄວາມຕ້ອງການຂອງພວກເຂົາ. ຍົກຕົວຢ່າງເຊັ່ນ, ໃນກິດຈະກຳນີ້, ຖ້າທ່ານກຳລັງສິດສອນລູກຜູ້ນ້ອຍ, ມັນອາດຈະດີກວ່າທີ່ຈະສຸມໃສ່ຕົວຢ່າງຄວາມຈິງອັນໜຶ່ງທີ່ລຽບງ່າຍຈາກ ພາກທີ 93.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບແຕ້ມຂອງພຣະຄຣິດກຳລັງສັ່ງສອນຈາກໜັງສືໂທຣາ — Light and Truth [ຄວາມສະຫວ່າງ ແລະ ຄວາມຈິງ], ໂດຍ ຊາຍມັນ ດູວີ