“ວັນທີ 1–7 ເດືອນກັນຍາ: ‘ສຳລັບຄວາມລອດຂອງຊີໂອນ’: ຄຳສອນ ແລະ ພັນທະສັນຍາ 94–97,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 94–97,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

Kirtland Temple [ພຣະວິຫານເຄີດແລນ], ໂດຍ ອາລ໌ ຣາວສ໌

ວັນທີ 1–7 ເດືອນກັນຍາ: “ສຳລັບຄວາມລອດຂອງຊີໂອນ”

ຄຳສອນ ແລະ ພັນທະສັນຍາ 94–97

ໃນສະໄໝບູຮານ, ພຣະຜູ້ເປັນເຈົ້າໄດ້ບັນຊາໂມເຊໃຫ້ສ້າງຫໍເຕັນສັກສິດ “ເຮັດທຸກສິ່ງຕາມແບບຢ່າງທີ່ [ພຣະອົງ] ໄດ້ສະແດງແກ່ເພິ່ນ ທີ່ເທິງພູນັ້ນ” (ເຮັບເຣີ 8:5; ເບິ່ງ ອົບພະຍົບ 25:8–9 ນຳອີກ). ຫໍເຕັນສັກສິດມີຈຸດປະສົງໃຫ້ເປັນຈຸດສູນກາງຂອງຄ້າຍຊາວອິດສະຣາເອນຢູ່ໃນຖິ່ນແຫ້ງແລ້ງກັນດານ (ເບິ່ງ ຈົດບັນຊີ 2:1–2).

ໃນປີ 1833, ພຣະຜູ້ເປັນເຈົ້າໄດ້ບັນຊາໂຈເຊັບ ສະມິດ ໃຫ້ສ້າງພຣະວິຫານ “ບໍ່ແມ່ນຕາມວິທີຂອງໂລກ” ແຕ່ “ຕາມວິທີຊຶ່ງເຮົາຈະສະແດງ” (ຄຳສອນ ແລະ ພັນທະສັນຍາ 95:13–14; ເບິ່ງ 97:10 ນຳອີກ). ຄືກັນກັບຫໍເຕັນສັກສິດຢູ່ໃນຖິ່ນແຫ້ງແລ້ງກັນດານ, ພຣະວິຫານມີຈຸດປະສົງໃຫ້ເປັນຈຸດສູນກາງທີ່ໂດດເດັ່ນຢູ່ໃນເມືອງເຄີດແລນ (ເບິ່ງ ຄຳສອນ ແລະ ພັນທະສັນຍາ 94:1).

ທຸກວັນນີ້, ພຣະວິຫານມີຢູ່ທົ່ວໂລກ. ເຖິງແມ່ນວ່າມັນບໍ່ໄດ້ເປັນສູນກາງຂອງເມືອງຂອງເຮົາ, ແຕ່ມັນກໍຊີ້ໃຫ້ເຮົາໄປທີ່ພຣະຄຣິດ, ຜູ້ເປັນສູນກາງຂອງຊີວິດຂອງເຮົາ. ເຖິງແມ່ນວ່າພຣະວິຫານແຕ່ລະແຫ່ງແຕກຕ່າງກັນໃນຮູບແບບ, ແຕ່ຢູ່ໃນນັ້ນ ເຮົາຮຽນຮູ້ແບບແຜນຈາກສະຫວັນຢ່າງດຽວກັນ—ຄືແຜນຂອງສະຫວັນທີ່ຈະພາເຮົາກັບຄືນສູ່ທີ່ປະທັບຂອງພຣະເຈົ້າ. ພິທີການ ແລະ ພັນທະສັນຍາສັກສິດເຊື່ອມຕໍ່ເຮົາໃສ່ກັບພຣະຄຣິດ ແລະ ເພີ່ມຄວາມເຂັ້ມແຂງໃຫ້ແກ່ຄອບຄົວຂອງເຮົາ “ບໍ່ແມ່ນຕາມວິທີຂອງໂລກ” ແຕ່ຕາມແບບແຜນທີ່ພຣະເຈົ້າສະແດງແກ່ເຮົາ.

ເບິ່ງ Saints, 1:169–70; “A House for Our God,” ໃນ Revelations in Context, 165–73.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 94; 97:10–17

ເຮົາສາມາດ “ອຸທິດຖວາຍ [ທັງໝົດ] ໃຫ້ແກ່ພຣະຜູ້ເປັນເຈົ້າ.”

ໃນ ຄຳສອນ ແລະ ພັນທະສັນຍາ 94, ພຣະຜູ້ເປັນເຈົ້າປະທານຄຳແນະນຳກ່ຽວກັບການສ້າງອາຄານບໍລິຫານໃນເມືອງເຄີດແລນ—ຫ້ອງການ ແລະ ໂຮງພິມ. ແມ່ນຫຍັງທີ່ປະທັບໃຈທ່ານກ່ຽວກັບສິ່ງທີ່ພຣະຜູ້ເປັນເຈົ້າກ່າວກ່ຽວກັບອາຄານເຫລົ່ານີ້ ຢູ່ໃນ ຄຳສອນ ແລະ ພັນທະສັນຍາ 94:2–12? ມັນປຽບທຽບກັບສິ່ງທີ່ພຣະອົງກ່າວກ່ຽວກັບພຣະວິຫານໃນ 97:10–17 ແນວໃດ?

ຄຳວ່າ “ທັງຫລັງຈະຕ້ອງຖືກອຸທິດຖວາຍໃຫ້ແກ່ພຣະຜູ້ເປັນເຈົ້າ” ໝາຍຄວາມວ່າແນວໃດ?

ຄຳສອນ ແລະ ພັນທະສັນຍາ 95

ພຣະຜູ້ເປັນເຈົ້າຕີສອນຜູ້ທີ່ພຣະອົງຮັກ.

ເມື່ອໄດ້ຮັບການເປີດເຜີຍນີ້ໃນ ພາກທີ 95, ປະມານຫ້າເດືອນຜ່ານໄປນັບຕັ້ງແຕ່ພຣະຜູ້ເປັນເຈົ້າໄດ້ບັນຊາໄພ່ພົນໃຫ້ສ້າງບ້ານຂອງພຣະເຈົ້າ (ເບິ່ງ ຄຳສອນ ແລະ ພັນທະສັນຍາ 88:117–19)—ແລະ ພວກເຂົາຍັງບໍ່ໄດ້ເລີ່ມຕົ້ນ. ໃຫ້ສັງເກດວ່າ ພຣະຜູ້ເປັນເຈົ້າໄດ້ວ່າກ່າວພວກເຂົາແນວໃດໃນການເປີດເຜີຍ. ທ່ານອາດຂຽນລາຍການກ່ຽວກັບຫລັກທຳທີ່ທ່ານພົບເຫັນ ເລື່ອງການວ່າກ່າວທີ່ດົນໃຈນັ້ນ. ທ່ານຮຽນຮູ້ຫຍັງແດ່ກ່ຽວກັບພຣະຜູ້ເປັນເຈົ້າ ຈາກວິທີທີ່ພຣະອົງໄດ້ວ່າກ່າວໄພ່ພົນຂອງພຣະອົງ?

ເບິ່ງ ຄຳສອນ ແລະ ພັນທະສັນຍາ 121:43–44; D. Todd Christofferson, “As Many as I Love, I Rebuke and Chasten,” Liahona, May 2011, 97–100 ນຳອີກ.

God Loves His Children
Elder Wakolo testifies of God’s love and describes how He shows that love to His children.

ຄຳສອນ ແລະ ພັນທະສັນຍາ 95:8, 11–17; 97:10–17

ພຣະວິຫານແມ່ນບ້ານຂອງພຣະຜູ້ເປັນເຈົ້າ.

ຫລັງຈາກໄດ້ຖືກຕີສອນເພາະການບໍ່ໄດ້ສ້າງບ້ານຂອງພຣະຜູ້ເປັນເຈົ້າຢູ່ໃນເມືອງເຄີດແລນ, ແລ້ວຜູ້ນຳຂອງສາດສະໜາຈັກໄດ້ເລືອກເອົາບ່ອນໜຶ່ງຢູ່ໃນທົ່ງເຂົ້າຫວີດ ບ່ອນທີ່ເຂົາເຈົ້າຈະສ້າງ. ໄຮຣຳ ສະມິດ, ອ້າຍຂອງສາດສະດາ, ໄດ້ແລ່ນໄປເອົາກ່ຽວໃຫຍ່ທັນທີ ແລະ ໄດ້ເລີ່ມຕົ້ນຖາງທົ່ງ. “ພວກເຮົາກະກຽມທີ່ຈະສ້າງບ້ານແຫ່ງໜຶ່ງໃຫ້ແກ່ພຣະຜູ້ເປັນເຈົ້າ,” ເພິ່ນກ່າວ, “ແລະ ຂ້ອຍຕັ້ງໃຈທີ່ຈະເປັນຄົນທຳອິດໃນການລົງມື” (ໃນ Teachings of Presidents of the Church: Joseph Smith [2007], 271, 273). ທ່ານຄິດວ່າເປັນຫຍັງໄຮຣຳຈຶ່ງກະຕືລືລົ້ນຫລາຍແທ້ທີ່ຈະສ້າງພຣະວິຫານ? ໃຫ້ໄຕ່ຕອງສິ່ງນີ້ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 95:8, 11–17; 97:10–17.

ໃນວັນເວລາຂອງເຮົາ, ພຣະຜູ້ເປັນເຈົ້າ “ກຳລັງເລັ່ງຄວາມໄວໃນການໃຫ້ພວກເຮົາສ້າງພຣະວິຫານ” (Russell M. Nelson, “Focus on the Temple,” Liahona, Nov. 2022, 121). ຖ້າມີຄົນຖາມທ່ານວ່າ ເປັນຫຍັງສາດສະໜາຈັກຂອງພຣະເຢຊູຄຣິດຈຶ່ງສ້າງພຣະວິຫານຢ່າງຫລວງຫລາຍ, ທ່ານຈະວ່າແນວໃດ? ໃຫ້ຊອກຫາຄຳຕອບທີ່ເປັນໄປໄດ້ໃນ:

ຂ່າວສານຂອງປະທານຣະໂຊ ເອັມ ແນວສັນ ທີ່ປະກາດພຣະວິຫານໃໝ່ (ເຊັ່ນ “Now Is the Time,” Liahona, May 2022, 126).
“Why Latter-day Saints Build Temples” (temples.ChurchofJesusChrist.org).
ວິດີໂອ “Temples” (ຫ້ອງສະໝຸດພຣະກິດຕິຄຸນ).

What Is a Temple?
The difference between chapels, where Latter-day Saints meet for regular Sunday worship, and temples is also explained.

ທ່ານອາດປຽບທຽບຄວາມພະຍາຍາມຂອງໄພ່ພົນໃນການສ້າງພຣະວິຫານເຄີດແລນ ກັບຄວາມພະຍາຍາມຂອງທ່ານໃນການກຽມຮັບປະສົບການທີ່ມີຄວາມໝາຍກັບພຣະຜູ້ເປັນເຈົ້າໃນພຣະວິຫານ. ທ່ານຈະສາມາດສະແດງໃຫ້ເຫັນຄວາມຮູ້ສຶກຮີບຮ້ອນແບບດຽວກັນ ທີ່ໄຮຣຳ ສະມິດ ຮູ້ສຶກຕໍ່ບ້ານທີ່ສັກສິດຂອງພຣະຜູ້ເປັນເຈົ້າໄດ້ແນວໃດ? ຍົກຕົວຢ່າງ, ທ່ານຈະສາມາດເຮັດຫຍັງໄດ້ແດ່ ທີ່ເປັນເໝືອນດັ່ງການຖາງພື້ນທີ່, ດັ່ງທີ່ໄຮຣຳໄດ້ເຮັດ? ທ່ານຮູ້ສຶກວ່າພຣະຜູ້ເປັນເຈົ້າຕ້ອງການໃຫ້ທ່ານເຮັດຫຍັງ? (ເບິ່ງ ຄຳສອນ ແລະ ພັນທະສັນຍາ 97:12).

ເບິ່ງ “Holy Temples on Mount Zion,” Hymns, no. 289; Topics and Questions, “Temples,” ຫ້ອງສະໝຸດພຣະກິດຕິຄຸນ ນຳອີກ

ຊາວສວນກຳລັງເກັບກ່ຽວ — ໄຮຣຳ ສະມິດ ກຳລັງຖາງທີ່ດິນສຳລັບພຣະວິຫານເຄີດແລນ.

ຄຳສອນ ແລະ ພັນທະສັນຍາ 97:8–9

“ພວກເຂົາໄດ້ຮັບການຍອມຮັບຈາກເຮົາ.”

ໃຫ້ຄິດເຖິງຊ່ວງເວລາທີ່ທ່ານໄດ້ຮັບການຍອມຮັບ—ຫລື ບໍ່ໄດ້ຮັບການຍອມຮັບ—ເຂົ້າໃນກຸ່ມ ຫລື ທີມ. ສິ່ງນີ້ເໝືອນ ຫລື ແຕກຕ່າງຈາກສິ່ງທີ່ ຄຳສອນ ແລະ ພັນທະສັນຍາ 97:8–9 ສິດສອນກ່ຽວກັບຄວາມໝາຍຂອງການຍອມຮັບຈາກພຣະຜູ້ເປັນເຈົ້າແນວໃດ? ທ່ານຄິດວ່າພຣະຜູ້ເປັນເຈົ້າພະຍາຍາມສິດສອນທ່ານດ້ວຍຄຳອຸປະມາໃນ ຂໍ້ທີ 9 ແນວໃດ?

ເບິ່ງ Erich W. Kopischke, “Being Accepted of the Lord,” Liahona, May 2013, 104–6 ນຳອີກ.

ໃຫ້ສ້າງສະພາບແວດລ້ອມທາງວິນຍານສຳລັບການຮຽນຮູ້ ແລະ ການສິດສອນ. “ພຣະວິນຍານບໍລິສຸດ,” ພຣະເຢຊູໄດ້ສັນຍາ, “ຈະສັ່ງສອນພວກເຈົ້າທຸກສິ່ງ” (ໂຢຮັນ 14:26). ສະນັ້ນບໍ່ວ່າທ່ານຈະຮຽນຮູ້ດ້ວຍຕົນເອງ ຫລື ກັບຄົນອື່ນ, ຈົ່ງໃຫ້ການເຊື້ອເຊີນພຣະວິນຍານເປັນສິ່ງສຳຄັນທີ່ສຸດ. ດົນຕີສັກສິດ, ການອະທິຖານ, ແລະ ການປະຕິສຳພັນດ້ວຍຄວາມຮັກ ສາມາດຊ່ວຍສ້າງສະພາບແວດລ້ອມທາງວິນຍານທີ່ສະຫງົບໄດ້, ຊຶ່ງພຣະວິນຍານບໍລິສຸດສາມາດສິດສອນຄວາມຈິງແກ່ທ່ານ.

ຄຳສອນ ແລະ ພັນທະສັນຍາ 97:18–28

ຊີໂອນຄື “ຜູ້ທີ່ມີໃຈບໍລິສຸດ.”

ຕໍ່ໄພ່ພົນໃນຊ່ວງຊຸມປີ 1830, ຊີໂອນເປັນສະຖານທີ່. ໃນການເປີດເຜີຍຢູ່ໃນ ພາກທີ 97, ພຣະຜູ້ເປັນເຈົ້າໄດ້ຂະຫຍາຍຄຳນິຍາມ ເພື່ອບັນລະຍາຍເຖິງຜູ້ຄົນ—“ຜູ້ທີ່ມີໃຈບໍລິສຸດ” (ຂໍ້ທີ 21). ຂະນະທີ່ທ່ານອ່ານ ຂໍ້ທີ 18–28, ທ່ານສາມາດໃຊ້ຄຳນິຍາມນີ້ ເມື່ອທ່ານອ່ານຄຳວ່າ ຊີໂອນ. ຄຳວ່າ ໃຈບໍລິສຸດ ໝາຍຄວາມວ່າແນວໃດຕໍ່ທ່ານ?

ເບິ່ງ ໂມເຊ 7:18 ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 95:8; 97:10–17

ພຣະວິຫານແມ່ນບ້ານຂອງພຣະຜູ້ເປັນເຈົ້າ.

ສຳລັບບາງພື້ນຖານຂອງ ພາກທີ 95 ແລະ 97, ທ່ານສາມາດແບ່ງປັນ “ພຣະວິຫານເຄີດແລນ” ໃນ ຄຳສອນ ແລະ ພັນທະສັນຍາສຳລັບຜູ້ອ່ານທີ່ອາຍຸນ້ອຍ ກັບລູກໆຂອງທ່ານ (ຫ້ອງສະໝຸດພຣະກິດຕິຄຸນ; ເບິ່ງ Saints, 1:210 ນຳອີກ). ລູກໆຂອງທ່ານອາດມັກທຳທ່າວ່າ ພວກເຂົາກຳລັງຊ່ວຍສ້າງພຣະວິຫານເຄີດແລນ (ຕັດໄມ້, ຕອກຕະປູ, ທາຝາ, ແລະ ອື່ນໆ). ທ່ານສາມາດສະແດງຮູບພຣະວິຫານເຄີດແລນໃຫ້ພວກເຂົາເບິ່ງ, ເຊັ່ນຮູບທີ່ຢູ່ໃນໂຄງຮ່າງນີ້, ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 95:8 ເພື່ອສິດສອນລູກໆຂອງທ່ານວ່າ ເປັນຫຍັງພຣະຜູ້ເປັນເຈົ້າຈຶ່ງຢາກໃຫ້ເຮົາສ້າງພຣະວິຫານ.

ຫລັງຈາກການອ່ານ ຄຳສອນ ແລະ ພັນທະສັນຍາ 97:15–16 ນຳກັນ, ທ່ານ ແລະ ລູກໆຂອງທ່ານສາມາດແບ່ງປັນນຳກັນວ່າ ເປັນຫຍັງພຣະວິຫານຈຶ່ງສຳຄັນຕໍ່ພວກທ່ານ. ພວກທ່ານກໍສາມາດຮ້ອງເພງນຳກັນນຳອີກ ເພງທີ່ຊ່ວຍລູກໆຂອງທ່ານໃຫ້ຮູ້ສຶກມີຄວາມຄາລະວະຕໍ່ບ້ານຂອງພຣະຜູ້ເປັນເຈົ້າ ເຊັ່ນ “ພຣະເຈົ້າມອບພຣະວິຫານແກ່ເຮົາ” (ເພງສວດ ແລະ ເພງຂອງເດັກນ້ອຍ, 68). ເປັນຫຍັງພຣະວິຫານຈຶ່ງສັກສິດ?

ຄຳສອນ ແລະ ພັນທະສັນຍາ 97:1–2, 8–9, 21

ຊີໂອນຄື “ຜູ້ທີ່ມີໃຈບໍລິສຸດ.”

ເພື່ອຊ່ວຍໃຫ້ລູກໆຂອງທ່ານເຂົ້າໃຈວ່າ ຄຳວ່າ ບໍລິສຸດ ໝາຍເຖິງສິ່ງໃດໃນ ຄຳສອນ ແລະ ພັນທະສັນຍາ 97:21, ທ່ານສາມາດຫລຽວເບິ່ງຈອກແກ້ວທີ່ມີນ້ຳສະອາດນຳກັນ ແລະ ຕື່ມບາງສິ່ງໃສ່ນ້ຳທີ່ເຮັດໃຫ້ມັນບໍ່ບໍລິສຸດ (ເຊັ່ນ ຂີ້ດິນ ຫລື ພິກໄທ). ເປັນຫຍັງມັນຈຶ່ງສຳຄັນທີ່ນ້ຳຕ້ອງບໍລິສຸດ? ແລ້ວລູກໆຂອງທ່ານສາມາດອ່ານ ຂໍ້ທີ 21 ແລະ ວາງນິ້ວມືຂອງພວກເຂົາໃສ່ເທິງຄຳວ່າ ບໍລິສຸດ. ໃຈເຮົາບໍລິສຸດໝາຍຄວາມວ່າແນວໃດ? ຂໍ້ທີ 1–2 ແລະ 8–9 ສາມາດໃຫ້ແນວຄິດບາງຢ່າງໄດ້. ພຣະຜູ້ຊ່ວຍໃຫ້ລອດຊ່ວຍເຮັດໃຫ້ໃຈເຮົາບໍລິສຸດໄດ້ແນວໃດ?

ນ້ຳເປື້ອນ ແລະ ນ້ຳສະອາດ — ພຣະບິດາເທິງສະຫວັນຕ້ອງການໃຫ້ເຮົາມີໃຈບໍລິສຸດ.

ຄຳສອນ ແລະ ພັນທະສັນຍາ 97:8–9

ພຣະຜູ້ເປັນເຈົ້າອວຍພອນຜູ້ຄົນທີ່ຮັກສາພັນທະສັນຍາກັບພຣະອົງ.

ລູກໆຂອງທ່ານຮູ້ຫລືບໍ່ວ່າ ເຮົາເຮັດພັນທະສັນຍາຢ່າງໃດກັບພຣະຜູ້ເປັນເຈົ້າ ເມື່ອເຮົາຮັບບັບຕິສະມາ ຫລື ໃນພຣະວິຫານ? ໃຫ້ພິຈາລະນາທີ່ຈະທົບທວນພັນທະສັນຍາກັບພວກເຂົາ ໂດຍການອ່ານ ໂມໄຊຢາ 18:9–10, 13 ຫລື ຄູ່ມືທົ່ວໄປ, 27.2. ແບ່ງປັນນຳກັນແລະກັນວ່າ ພວກທ່ານກຳລັງພະຍາຍາມ “ຍຶດຖືພັນທະສັນຍາ [ຂອງພວກທ່ານ] ໂດຍການເສຍສະລະ” ແນວໃດ (ຄຳສອນ ແລະ ພັນທະສັນຍາ 97:8).
ທ່ານສາມາດເຊື້ອເຊີນລູກໆຂອງທ່ານໃຫ້ແຕ້ມຮູບສິ່ງທີ່ ຄຳສອນ ແລະ ພັນທະສັນຍາ 97:9 ບັນຍາຍ. ຂະນະທີ່ພວກເຂົາແບ່ງປັນຮູບພາບຂອງພວກເຂົາ, ໃຫ້ເວົ້າກ່ຽວກັບວິທີທີ່ພຣະຜູ້ເປັນເຈົ້າອວຍພອນພວກທ່ານສຳລັບການຮັກສາພັນທະສັນຍາຂອງພວກທ່ານແນວໃດ. ພອນເຫລົ່ານັ້ນເປັນເໝືອນດັ່ງ “ຕົ້ນໄມ້ທີ່ອອກຜົນຫລາຍ ຊຶ່ງຖືກປູກໄວ້ … ແຄມຮ່ອງນ້ຳບໍລິສຸດ”?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ການກໍ່ສ້າງພຣະວິຫານເຄີດແລນ — Building the Kirtland Temple [ການສ້າງພຣະວິຫານເຄີດແລນ], ໂດຍ ວາວເຕີ ເຣນ