“ວັນທີ 15–21 ເດືອນກັນຍາ: ‘ຫລັງຈາກຄວາມທຸກຍາກລຳບາກ … ພອນຈະມາເຖິງ’: ຄຳສອນ ແລະ ພັນທະສັນຍາ 102–105,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 102–105,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

C.C.A. Christensen (1831–1912), Zion’s Camp [ຄ້າຍຊີໂອນ], ປະມານ 1878, ສີຖາວອນແຫ້ງໄວ ເທິງຜ້າຝ້າຍມັດສະລິນ, 78 x 114 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລ ບຣິກຳ ຢັງ, ຂອງຂວັນຈາກຫລານຂອງ C.C.A. Christensen, 1970.

ວັນທີ 15–21 ເດືອນກັນຍາ: “ຫລັງຈາກຄວາມທຸກຍາກລຳບາກ … ພອນຈະມາເຖິງ”

ຄຳສອນ ແລະ ພັນທະສັນຍາ 102–105

ໄພ່ພົນຢູ່ໃນເມືອງເຄີດແລນໄດ້ໂສກເສົ້າເມື່ອໄດ້ຍິນວ່າ ອ້າຍເອື້ອຍນ້ອງຂອງເຂົາເຈົ້າຢູ່ໃນເຂດແຈ໊ກສັນ, ລັດມີເຊີຣີ ໄດ້ຖືກຂັບໄລ່ອອກຈາກບ້ານເຮືອນຂອງເຂົາເຈົ້າ. ມັນຄົງເປັນສິ່ງໃຫ້ກຳລັງໃຈ, ໃນເວລານັ້ນ, ເມື່ອພຣະຜູ້ເປັນເຈົ້າໄດ້ປະກາດວ່າ “ການໄຖ່ຊີໂອນ” ຈະ “ມາເຖິງໂດຍອຳນາດ” (ຄຳສອນ ແລະ ພັນທະສັນຍາ 103:15). ດ້ວຍຄຳສັນຍານັ້ນ ຢູ່ໃນຫົວໃຈຂອງເຂົາເຈົ້າ, ຜູ້ຊາຍຫລາຍກວ່າ 200 ຄົນ, ແລະ ຜູ້ຍິງກັບເດັກນ້ອຍ 25 ຄົນໄດ້ຖືກເກນເຂົ້າໃນກຸ່ມທີ່ເອີ້ນວ່າ ຄ້າຍອິດສະຣາເອນ, ຕໍ່ມາຖືກເອີ້ນວ່າ ຄ້າຍຊີໂອນ. ພາລະກິດຂອງຄ້າຍນີ້ ແມ່ນເພື່ອເດີນທາງໄປລັດມີເຊີຣີ ແລະ ໄຖ່ຊີໂອນ.

ສຳລັບສະມາຊິກຂອງຄ້າຍນີ້, ການໄຖ່ຊີໂອນໝາຍເຖິງການໃຫ້ໄພ່ພົນສາມາດກັບຄືນໄປຢູ່ໃນທີ່ດິນຂອງຕົນ. ແຕ່ກ່ອນທີ່ເຂົາເຈົ້າໄດ້ໄປເຖິງເຂດແຈ໊ກສັນ, ພຣະຜູ້ເປັນເຈົ້າໄດ້ບອກໂຈເຊັບ ສະມິດ ໃຫ້ຍຸບຄ້າຍຊີໂອນ. ສະມາຊິກໃນຄ້າຍບາງຄົນໄດ້ເກີດສັບສົນ ແລະ ບໍ່ພໍໃຈ; ເບິ່ງຄືວ່າການເດີນທາງລົ້ມເຫລວ ແລະ ຄຳສັນຍາຂອງພຣະຜູ້ເປັນເຈົ້າບໍ່ໄດ້ເກີດເປັນຈິງ. ເຖິງຢ່າງໃດກໍຕາມ, ກໍມີບາງຄົນທີ່ເຫັນມັນໃນທາງທີ່ແຕກຕ່າງ. ໃນຂະນະທີ່ໄພ່ພົນທີ່ໜີໄປ ບໍ່ໄດ້ທີ່ດິນ ແລະ ບ້ານເຮືອນຂອງເຂົາເຈົ້າຄືນ, ແຕ່ປະສົບການນັ້ນໄດ້ນຳ “ການໄຖ່” ມາສູ່ຊີໂອນ, ແລະ ມັນກໍໄດ້ “ມາເຖິງໂດຍອຳນາດ” ໃນລະດັບໃດໜຶ່ງ. ສະມາຊິກທີ່ຊື່ສັດຂອງຄ້າຍຊີໂອນ, ຫລາຍຄົນຊຶ່ງຕໍ່ມາໄດ້ກາຍເປັນຜູ້ນຳຂອງສາດສະໜາຈັກ, ໄດ້ເປັນພະຍານວ່າ ປະສົບການນັ້ນໄດ້ເຮັດໃຫ້ເຂົາເຈົ້າມີສັດທາຫລາຍຂຶ້ນໃນອຳນາດຂອງພຣະເຈົ້າ, ໃນການເອີ້ນຈາກສະຫວັນຂອງໂຈເຊັບ ສະມິດ, ແລະ ໃນຊີໂອນ—ຊີໂອນທີ່ບໍ່ພຽງແຕ່ເປັນສະຖານທີ່ເທົ່ານັ້ນ ແຕ່ຊີໂອນຄືຜູ້ຄົນຂອງພຣະເຈົ້ານຳອີກ. ແທນທີ່ຈະຂ້ອງໃຈກ່ຽວກັບຄຸນຄ່າຂອງພາລະກິດທີ່ເບິ່ງຄືວ່າບໍ່ສຳເລັດນີ້, ເຂົາເຈົ້າໄດ້ຮຽນຮູ້ວ່າ ພາລະກິດທີ່ແທ້ຈິງ ຄືການຕິດຕາມພຣະຜູ້ຊ່ວຍໃຫ້ລອດ, ແມ່ນແຕ່ເມື່ອເຮົາບໍ່ເຂົ້າໃຈທຸກສິ່ງທຸກຢ່າງ. ນີ້ຄືວິທີທີ່, ໃນທີ່ສຸດ, ຊີໂອນຈະຖືກໄຖ່.

ເບິ່ງ Saints, 1:194–206; “The Acceptable Offering of Zion’s Camp,” ໃນ Revelations in Context, 213–18.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 102:12–23

ແມ່ນຫຍັງຄືຈຸດປະສົງຂອງສະພາສະມາຊິກກະພາບ?

ພາກທີ 102 ບັນຈຸລາຍງານຫຍໍ້ຂອງກອງປະຊຸມຢູ່ໃນເມືອງເຄີດແລນ, ລັດໂອໄຮໂອ, ບ່ອນທີ່ສະພາສູງກຸ່ມທຳອິດຂອງສາດສະໜາຈັກໄດ້ຖືກຈັດຕັ້ງຂຶ້ນ. ຢູ່ໃນ ຂໍ້ທີ 12–23, ພຣະຜູ້ເປັນເຈົ້າບັນຍາຍລະບຽບການທີ່ສະພາສູງຈະປະຕິບັດຕາມ ເມື່ອຈັດສະພາວິໄນຂຶ້ນ ສຳລັບຜູ້ທີ່ໄດ້ລ່ວງລະເມີດຢ່າງຮ້າຍແຮງ.

ປະທານເອັມ ຣະໂຊ ບາເລີດ ໄດ້ສິດສອນວ່າ, “ບາງເທື່ອສະມາຊິກກໍຖາມວ່າ ເປັນຫຍັງຈຶ່ງມີສະພາວິໄນຂອງສາດສະໜາຈັກ. ຈຸດປະສົງມີຢູ່ດ້ວຍກັນສາມຢ່າງ: ເພື່ອຮັກສາຈິດວິນຍານຂອງຜູ້ລ່ວງລະເມີດ, ເພື່ອປົກປ້ອງຜູ້ບໍ່ມີຄວາມຜິດ, ແລະ ເພື່ອຮັກສາຄວາມບໍລິສຸດ, ຄວາມສຸດຈະລິດ, ແລະ ຊື່ສຽງຂອງສາດສະໜາຈັກເອົາໄວ້” (“A Chance to Start Over: Church Disciplinary Councils and the Restoration of Blessings,” Ensign, Sept. 1990, 15).

ເບິ່ງ Topics and Questions, “Membership Councils,” ຫ້ອງສະໝຸດພຣະກິດຕິຄຸນ ນຳອີກ.

ຄຳສອນ ແລະ ພັນທະສັນຍາ 103:1–12, 36; 105:1–19

ຊີໂອນສາມາດຖືກສ້າງຂຶ້ນໄດ້ພຽງແຕ່ຢູ່ເທິງຫລັກທຳແຫ່ງຄວາມຊອບທຳເທົ່ານັ້ນ.

ເປັນຫຍັງໄພ່ພົນຈຶ່ງສູນເສຍທີ່ດິນທີ່ຖືກສັນຍາໄວ້ຂອງເຂົາເຈົ້າຢູ່ໃນລັດມີເຊີຣີ? ອາດມີຫລາກຫລາຍເຫດຜົນ—ວ່າຢ່າງໜ້ອຍ, ພຣະຜູ້ເປັນເຈົ້າໄດ້ກ່າວວ່າ, ເຫດຜົນໜຶ່ງແມ່ນ “ການລ່ວງລະເມີດຂອງຜູ້ຄົນຂອງເຮົາ. ຖ້າຫາກບໍ່ເປັນເພາະສິ່ງນັ້ນ, ຊີໂອນ “ອາດໄດ້ຮັບການໄຖ່ແລ້ວ” (ຄຳສອນ ແລະ ພັນທະສັນຍາ 105:2). ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 103:1–12, 36; 105:1–19, ທ່ານອາດສັງເກດເຫັນບາງສິ່ງທີ່ຢຸດຢັ້ງການສະຖາປະນາຊີໂອນ ຢູ່ໃນລັດມີເຊີຣີ ແລະ ບາງສິ່ງທີ່ອາດຊ່ວຍໄດ້. ທ່ານຮຽນຮູ້ຫຍັງແດ່ທີ່ຈະສາມາດຊ່ວຍທ່ານໃຫ້ສະຖາປະນາຊີໂອນຢູ່ໃນໃຈ, ຢູ່ໃນບ້ານເຮືອນ, ແລະ ຢູ່ໃນຊຸມຊົນຂອງທ່ານ?

ຄຳສອນ ແລະ ພັນທະສັນຍາ 103:12–13, 36; 105:1–6, 9–19

ພອນຈະມີມາຫລັງຈາກການທົດລອງສັດທາ.

ໃນຫລາຍວິທີທາງ, ການມີສ່ວນຮ່ວມຢູ່ໃນຄ້າຍຊີໂອນ ແມ່ນການທົດລອງສັດທາ. ການເດີນທາງນັ້ນແມ່ນຍາວໄກ, ອາກາດກໍຮ້ອນອົບເອົ້າ, ແລະ ບາງຄັ້ງກໍຂາດແຄນອາຫານ ແລະ ນ້ຳ. ແລະ ຫລັງຈາກທັງໝົດທີ່ເຂົາເຈົ້າໄດ້ອົດທົນຕໍ່, ຄ້າຍຊີໂອນກໍຍັງບໍ່ສາມາດນຳໄພ່ພົນກັບຄືນໄປຢູ່ໃນທີ່ດິນຂອງເຂົາເຈົ້າໄດ້. ໃຫ້ວາດພາບເຫັນວ່າທ່ານໄດ້ມີໂອກາດທີ່ຈະຂຽນຈົດໝາຍໄປຫາສະມາຊິກຂອງຄ້າຍຊີໂອນ ຜູ້ທີ່ສັດທາຂອງເຂົາເຈົ້າໃນພຣະຜູ້ເປັນເຈົ້າຖືກຫວັ່ນໄຫວໂດຍປະສົບການຂອງເຂົາເຈົ້າ. ທ່ານອາດເວົ້າຫຍັງແດ່ເພື່ອໃຫ້ກຳລັງໃຈຄົນຄົນນີ້? ທ່ານພົບເຫັນຄວາມຈິງໃດແດ່ຢູ່ໃນ ຄຳສອນ ແລະ ພັນທະສັນຍາ 103:5–7, 12–13, 36; 105:1–6, 9–19 ທີ່ສາມາດຊ່ວຍໄດ້?

ແລ້ວທ່ານອາດຄິດກ່ຽວກັບຕົວຢ່າງສະໄໝໃໝ່ຢ່າງອື່ນ ທີ່ຄ້າຍຄືກັນກັບການທົດລອງຂອງຄ້າຍຊີໂອນ—ດັ່ງເຊັ່ນຜູ້ສອນສາດສະໜາທີ່ເຮັດວຽກໜັກ, ແຕ່ບໍ່ມີໃຜເຂົ້າຮ່ວມສາດສະໜາຈັກເພາະຄວາມພະຍາຍາມຂອງລາວ. ອີງຕາມສິ່ງທີ່ທ່ານໄດ້ສຶກສາ, ທ່ານຈະຊ່ວຍຜູ້ສອນສາດສະໜາຄົນນັ້ນໃຫ້ເຫັນວ່າ ການເຜີຍແຜ່ຂອງລາວກໍຍັງເປັນຜົນສຳເລັດຢູ່ແນວໃດ?

ພຣະຜູ້ເປັນເຈົ້າໄດ້ອວຍພອນທ່ານ “ຫລັງຈາກຄວາມທຸກຍາກລຳບາກຢ່າງຫລວງຫລາຍ,” ແນວໃດ? (ຄຳສອນ ແລະ ພັນທະສັນຍາ 103:12).

ເບິ່ງ 1 ນີໄຟ 11:16–17; ແອວມາ 7:11–12; ຄຳສອນ ແລະ ພັນທະສັນຍາ 6:33–36; 84:88; 101:35–36; David A. Bednar, “On the Lord’s Side: Lessons from Zion’s Camp,” Ensign, July 2017, 26–35, ຫລື Liahona, July 2017, 14–23; Topics and Questions, “Endure to the End,” ຫ້ອງສະໝຸດພຣະກິດຕິຄຸນ; “ພື້ນໝັ້ນຄົງໜັກໜາ,” ເພງສວດ ແລະ ເພງຂອງເດັກນ້ອຍ, 6 ນຳອີກ.

ຈົ່ງກະກຽມໂດຍການສຶກສາສະພາບການທາງປະຫວັດສາດຂອງການເປີດເຜີຍ. ການເຂົ້າໃຈສະພາບການຂອງການເປີດເຜີຍຢູ່ໃນຄຳສອນ ແລະ ພັນທະສັນຍາ ສາມາດຊ່ວຍທ່ານໃຫ້ເຂົ້າໃຈ ແລະ ນຳໃຊ້ຫລັກທຳທີ່ມັນສິດສອນ. ຈົ່ງຕາມເຮົາມາ ໃຫ້ລິ້ງຕໍ່ເຖິງແຫລ່ງຊ່ວຍເຫລືອທັງຫລາຍເຫລົ່ານີ້. ສຳລັບ ຄຳສອນ ແລະ ພັນທະສັນຍາ 102–5, ເບິ່ງ Saints, 1:194–206; “The Acceptable Offering of Zion’s Camp,” ໃນ Revelations in Context, 213–18; ແລະ “ສຽງຂອງການຟື້ນຟູ: ຄ້າຍຊີໂອນ.”

ແມ່ນ້ຳໃນລັດມີເຊີຣີ, ສະຫະລັດອາເມຣິກາ — ຄ້າຍອິດສະຣາເອນ ໄດ້ຕັ້ງຄ້າຍຕາມຕາຫລິ່ງຂອງແມ່ນ້ຳລິດໂຕ ຟິດຊິງ.

ແມ່ນຫຍັງຄືຈຸດປະສົງຂອງການທົດລອງ?

ໃຫ້ພິຈາລະນາຄຳແນະນຳຂອງແອວເດີ ອໍສັນ ແອັຟ ວິດນີ ກ່ຽວກັບຈຸດປະສົງຂອງການທົດລອງ: “ບໍ່ມີຄວາມເຈັບປວດໃດທີ່ເຮົາທົນທຸກ, ບໍ່ມີການທົດລອງໃດທີ່ເຮົາປະສົບຈະໄຮ້ປະໂຫຍດ. ມັນປະຕິບັດຕໍ່ການສຶກສາຂອງເຮົາ, ຕໍ່ການພັດທະນາຄຸນສົມບັດດັ່ງເຊັ່ນຄວາມອົດທົນ, ສັດທາ, ຄວາມເຂັ້ມແຂງ ແລະ ຄວາມຖ່ອມຕົວ. ທຸກສິ່ງທີ່ເຮົາທົນທຸກ ແລະ ທຸກສິ່ງທີ່ເຮົາອົດທົນ, ໂດຍສະເພາະເມື່ອເຮົາທົນກັບມັນດ້ວຍຄວາມອົດທົນ, ຈະສ້າງບຸກຄະລິກລັກສະນະຂອງເຮົາ, ເຮັດໃຫ້ໃຈເຮົາບໍລິສຸດ, ຂະຫຍາຍຈິດວິນຍານຂອງເຮົາ, ແລະ ເຮັດໃຫ້ເຮົາອ່ອນໂຍນ ແລະ ເປັນຄົນໃຈບຸນຫລາຍຂຶ້ນ, ມີຄຸນຄ່າຫລາຍຂຶ້ນທີ່ຈະຖືກເອິ້ນວ່າລູກໆຂອງພຣະເຈົ້າ … ແລະ ມັນແມ່ນຜ່ານຄວາມເສົ້າສະຫລົດໃຈ ແລະ ຄວາມທຸກທໍລະມານ, ວຽກງານໜັກ ແລະ ຄວາມຍາກລຳບາກ, ທີ່ເຮົາຈະໄດ້ມີການສຶກສາທີ່ເຮົາໄດ້ມາທີ່ນີ້ເພື່ອຈະໄດ້ຮັບ ຊຶ່ງຈະເຮັດໃຫ້ເຮົາເປັນເໝືອນດັ່ງພຣະບິດາ ແລະ ພຣະມານດາໃນສະຫວັນຂອງເຮົາຫລາຍຂຶ້ນ” (ໃນ Spencer W. Kimball, Faith Precedes the Miracle [1972], 98).

ຄຳສອນ ແລະ ພັນທະສັນຍາ 104:11–18, 78–83

ພຣະຜູ້ເປັນເຈົ້າໄດ້ເຮັດໃຫ້ເຮົາເປັນ “ຜູ້ພິທັກຮັກສາພອນຝ່າຍແຜ່ນດິນໂລກ.”

ນອກເໜືອຈາກການທົດລອງຢູ່ໃນລັດມີເຊີຣີແລ້ວ, ໃນປີ 1834 ສາດສະໜາຈັກໄດ້ປະເຊີນກັບບັນຫາເລື່ອງການເງິນ, ລວມທັງການມີໜີ້ສິນ ແລະ ມີລາຍຈ່າຍຢ່າງຫລວງຫລາຍ. ຢູ່ໃນ ພາກທີ 104 ພຣະຜູ້ເປັນເຈົ້າໄດ້ໃຫ້ຄຳແນະນຳເລື່ອງສະພາບການເງິນຂອງສາດສະໜາຈັກ. ທ່ານຈະສາມາດນຳໃຊ້ຫລັກທຳຢູ່ໃນ ຂໍ້ທີ 11–18 ແລະ 78–83 ໃນການຕັດສິນໃຈເລື່ອງການເງິນຂອງທ່ານເອງແນວໃດ?

ເບິ່ງ “Treasure in Heaven: The John Tanner Story” ແລະ “The Labor of His Hands” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

Treasure in Heaven: The John Tanner Story
John Tanner freely gave all he had, giving us an example of generosity and consecration in serving the Lord.

The Labor of His Hands
Church members around the world volunteer both time and money to serve others-- members and nonmembers alike--as Christ would serve.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 103:9

ເຮົາສາມາດເປັນ “ຄວາມສະຫວ່າງໃຫ້ແກ່ໂລກ” ໂດຍການຕິດຕາມພຣະເຢຊູ.

ທ່ານສາມາດເຊື້ອເຊີນລູກໆຂອງທ່ານໃຫ້ຈັບຮູບດອກໄຟ, ທຽນ, ຫລື ແຫລ່ງຂອງແສງສະຫວ່າງຢ່າງອື່ນ ໃນຂະນະທີ່ທ່ານອ່ານ ຄຳສອນ ແລະ ພັນທະສັນຍາ 103:9. ເຮົາຈະສາມາດເປັນເໝືອນແສງສະຫວ່າງໃຫ້ກັບຄົນອື່ນໄດ້ແນວໃດເມື່ອເຮົາຕິດຕາມພຣະເຢຊູຄຣິດ? ເບິ່ງ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72) ນຳອີກ.

ທຽນທີ່ໄຕ້ — ເຮົາຈະສາມາດເປັນເໝືອນແສງສະຫວ່າງໃຫ້ກັບຄົນອື່ນໄດ້ເມື່ອເຮົາຕິດຕາມພຣະເຢຊູຄຣິດ.

ຄຳສອນ ແລະ ພັນທະສັນຍາ 104:13–18

ພຣະຜູ້ເປັນເຈົ້າຢາກໃຫ້ເຮົາແບ່ງປັນສິ່ງທີ່ເຮົາມີກັບຜູ້ຄົນທີ່ຂັດສົນ.

ທ່ານສາມາດໃຫ້ເວລາລູກໆຂອງທ່ານສາມສີ່ນາທີເພື່ອຂຽນລາຍຊື່ຂອງພອນທີ່ພຣະເຈົ້າໄດ້ປະທານໃຫ້ພວກເຂົາ (ເຊັ່ນ ອາຫານ, ເສື້ອຜ້າ, ພອນສະຫວັນ, ສັດທາ, ແລະ ບ້ານເຮືອນ). ຊຸກຍູ້ໃຫ້ພວກເຂົາຂຽນລາຍຊື່ໃຫ້ໄດ້ຫລາຍເທົ່າທີ່ພວກເຂົາສາມາດເຮັດໄດ້. ແລ້ວພວກທ່ານສາມາດອ່ານ ຄຳສອນ ແລະ ພັນທະສັນຍາ 104:13–18 ນຳກັນ, ເພື່ອຊອກຫາຄຳຕອບຕໍ່ຄຳຖາມດັ່ງຕໍ່ໄປນີ້: ໃຜເປັນເຈົ້າຂອງທີ່ແທ້ຈິງຂອງທຸກສິ່ງທັງປວງ? ພຣະອົງຢາກໃຫ້ເຮົາເຮັດຫຍັງກັບສິ່ງເຫລົ່ານີ້? ທ່ານ ແລະ ລູກໆຂອງທ່ານສາມາດແບ່ງປັນປະສົບການ ຊຶ່ງໃນນັ້ນຄົນໃດຄົນໜຶ່ງໄດ້ມອບບາງສິ່ງໃຫ້ແກ່ທ່ານທີ່ທ່ານຕ້ອງການ (ເບິ່ງ “The Coat” [ວິດີໂອ], ຫ້ອງສະໝຸດພຣະກິດຕິຄຸນ ນຳອີກ).

2:7
The Coat
The Coat is a children’s story that depicts a young boy giving selflessly to another child in need.

ຄຳສອນ ແລະ ພັນທະສັນຍາ 104:42

ພຣະຜູ້ເປັນເຈົ້າຈະໃຫ້ພອນແກ່ເຮົາ ເມື່ອເຮົາຮັກສາພຣະບັນຍັດຂອງພຣະອົງ.

ຫລາຍເທື່ອຢູ່ໃນ ພາກທີ 104 ພຣະຜູ້ເປັນເຈົ້າສັນຍາ “ພອນຢ່າງຫລວງຫລາຍ” ຕໍ່ຜູ້ຄົນທີ່ເຊື່ອຟັງພຣະບັນຍັດຂອງພຣະອົງຢ່າງຊື່ສັດ. ເພື່ອຊ່ວຍໃຫ້ລູກໆເຂົ້າໃຈວ່າ “ຢ່າງຫລວງຫລາຍ” ໝາຍຄວາມວ່າແນວໃດ, ທ່ານສາມາດແຕ້ມວົງມົນ ແລະ ຂໍໃຫ້ລູກໆຂອງທ່ານຊ່ວຍທ່ານຄູນຈຳນວນວົງມົນ—ແຕ້ມສອງວົງ, ແລ້ວສີ່, ແລ້ວແປດ, ແລ້ວສິບຫົກ, ແລະ ຕໍ່ໆໄປ. ທຸກເທື່ອທີ່ທ່ານຕື່ມວົງມົນ, ຊ່ວຍໃຫ້ລູກໆຂອງທ່ານຄິດເຖິງຂອງປະທານທີ່ພຣະບິດາເທິງສະຫວັນໄດ້ປະທານໃຫ້ແກ່ພວກເຂົາ.

ຄຳສອນ ແລະ ພັນທະສັນຍາ 105:38–40

ເຮົາສາມາດເປັນຜູ້ສ້າງສັນຕິພາບ.

ເພື່ອຊ່ວຍລູກໆຂອງທ່ານໃຫ້ຮຽນຮູ້ເລື່ອງລາວຂອງຄ້າຍຊີໂອນ, ທ່ານສາມາດແບ່ງປັນ “ບົດທີ 36: ຄ້າຍຊີໂອນ” (ໃນ ເລື່ອງຄຳສອນ ແລະ ພັນທະສັນຍາ, 135–39, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ). ໃຫ້ຢຸດເປັນໄລຍະໆເພື່ອເວົ້າລົມກ່ຽວກັບບົດຮຽນທີ່ເຮົາສາມາດຮຽນຮູ້ຈາກ ຄ້າຍຊີໂອນ—ຍົກຕົວຢ່າງ, ວ່າພຣະຜູ້ເປັນເຈົ້າຢາກໃຫ້ເຮົາສ້າງສັນຕິພາບ ແລະ ຮ່ວມມືກັນແທນທີ່ຈະໂຕ້ຖຽງ ແລະ ຂັດແຍ້ງກັນ (ເບິ່ງ Russell M. Nelson, “Peacemakers Needed,” Liahona, May 2023, 98–101) ນຳອີກ.

3:30
Chapter 36: Zion’s Camp: February–June 1834
ທ່ານຍັງສາມາດອ່ານ ຄຳສອນ ແລະ ພັນທະສັນຍາ 105:38–40 ນຳອີກ ແລະ ຂໍໃຫ້ລູກໆຢືນຂຶ້ນທຸກໆເທື່ອທີ່ພວກເຂົາໄດ້ຍິນຄຳວ່າ “ສັນຕິພາບ.” ໃຫ້ອະທິບາຍວ່າ ພຣະຜູ້ເປັນເຈົ້າຢາກໃຫ້ໄພ່ພົນສ້າງຄວາມສັນຕິພາບກັບຜູ້ຄົນທີ່ບໍ່ມີຄວາມເມດຕາ. ຊ່ວຍໃຫ້ລູກໆຂອງທ່ານຄິດເຖິງສິ່ງທີ່ພວກເຂົາສາມາດເຮັດໄດ້ເພື່ອຈະເປັນຜູ້ສ້າງສັນຕິພາບ, ແລະ ເຊື້ອເຊີນພວກເຂົາໃຫ້ຫລິ້ນລະຄອນກ້ອມກ່ຽວກັບສະພາບການບາງຢ່າງ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບທາສີຂອງຄ້າຍຊີໂອນ — Zion’s Camp (Zion’s Camp at Fishing River) ຄ້າຍຊີໂອນ (ຄ້າຍຊີໂອນ ຢູ່ທີ່ແມ່ນ້ຳຟິດຊິງ), ໂດຍ ຈູດິດ ເອ ເມີ