“ວັນທີ 22–28 ເດືອນກັນຍາ: ‘ລະບຽບຂອງພຣະບຸດຂອງພຣະເຈົ້າ’: ຄຳສອນ ແລະ ພັນທະສັນຍາ 106–108,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 106–108,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 22–28 ເດືອນກັນຍາ: “ລະບຽບຂອງພຣະບຸດຂອງພຣະເຈົ້າ”

ຄຳສອນ ແລະ ພັນທະສັນຍາ 106–108

ເມື່ອເບິ່ງພຽງເຜີນໆ, ຄຳສອນ ແລະ ພັນທະສັນຍາ 107 ເບິ່ງຄືວ່າພຽງກ່ຽວກັບການຈັດຕັ້ງຕຳແໜ່ງໃນຖານະປະໂລຫິດເຂົ້າເປັນໂຄງຮ່າງການເປັນຜູ້ນຳສຳລັບສາດສະໜາຈັກຂອງພຣະຜູ້ເປັນເຈົ້າເທົ່ານັ້ນ. ເມື່ອເຖິງຕອນທີ່ການເປີດເຜີຍນີ້ໄດ້ຖືກຈັດພິມ, ຈຳນວນສະມາຊິກຂອງສາດສະໜາຈັກໄດ້ມີຫລາຍເກີນກວ່າຄວາມສາມາດຂອງຜູ້ນຳຈຳນວນໜ້ອຍໜຶ່ງທີ່ໄດ້ຖືກແຕ່ງຕັ້ງໄວ້ໃຫ້ດູແລ. ການລະບຸບົດບາດ ແລະ ໜ້າທີ່ຮັບຜິດຊອບຂອງຝ່າຍປະທານສູງສຸດ, ກຸ່ມອັກຄະສາວົກສິບສອງ, ສາວົກເຈັດສິບ, ອະທິການ, ແລະ ຝ່າຍປະທານກຸ່ມ ຈຶ່ງເປັນສິ່ງຈຳເປັນ ແລະ ເປັນປະໂຫຍດຫລາຍ. ແຕ່ມີຄຳແນະນຳຈາກສະຫວັນຢູ່ໃນ ພາກທີ 107 ຫລາຍກວ່ານີ້ອີກ ທີ່ນອກເໜືອໄປຈາກວິທີທີ່ຈະຈັດຕັ້ງຕຳແໜ່ງຂອງການເປັນຜູ້ນຳຂອງສາດສະໜາຈັກແນວໃດ. ໃນຂໍ້ນີ້, ພຣະຜູ້ເປັນເຈົ້າສິດສອນເຮົາກ່ຽວກັບອຳນາດ ແລະ ສິດອຳນາດຂອງພຣະອົງ, “ຖານະປະໂລຫິດສັກສິດ, ຕາມລະບຽບຂອງພຣະບຸດຂອງພຣະເຈົ້າ” (ຂໍ້ທີ 3). ຈຸດປະສົງຂອງຖານະປະໂລຫິດແມ່ນເພື່ອປົດລັອກ “ພອນທາງວິນຍານທັງໝົດຂອງສາດສະໜາຈັກ” ເພື່ອວ່າລູກໆຂອງພຣະເຈົ້າທຸກຄົນຈະສາມາດ “ໃຫ້ຟ້າສະຫວັນເປີດແກ່ພວກເຂົາ” ແລະ “ຊື່ນຊົມກັບການພົວພັນ ແລະ ການປະທັບຢູ່ຂອງພຣະເຈົ້າອົງເປັນພຣະບິດາ, ແລະ ພຣະເຢຊູຜູ້ເປັນກາງຂອງພັນທະສັນຍາໃໝ່” (ຂໍ້ທີ 18–19). ໃນການສິດສອນເຮົາກ່ຽວກັບຖານະປະໂລຫິດຂອງພຣະອົງ, ພຣະຜູ້ຊ່ວຍໃຫ້ລອດກຳລັງສິດສອນເຮົາກ່ຽວກັບພຣະອົງເອງ ແລະ ວ່າເຮົາຈະສາມາດມາຫາພຣະອົງໄດ້ແນວໃດ.

ເບິ່ງ “Restoring the Ancient Order,” ໃນ Revelations in Context, 208–12.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 106; 108

ພຣະຜູ້ເປັນເຈົ້າສະໜັບສະໜູນເຮົາເມື່ອພຣະອົງເອີ້ນເຮົາໃຫ້ຮັບໃຊ້.

ໃນ ຄຳສອນ ແລະ ພັນທະສັນຍາ 106 ແລະ 108, ພຣະຜູ້ເປັນເຈົ້າໄດ້ໃຫ້ຄຳແນະນຳ ແລະ ຄຳສັນຍາກັບສະມາຊິກສອງຄົນທີ່ຖືກເອີ້ນໃຫ້ຮັບໃຊ້ຢູ່ໃນສາດສະໜາຈັກຂອງພຣະອົງ. ຂະນະທີ່ທ່ານສຶກສາຄຳແນະນຳຂອງພຣະອົງ, ທ່ານອາດຄິດກ່ຽວກັບໂອກາດຂອງທ່ານເອງທີ່ຈະຮັບໃຊ້ພຣະຜູ້ເປັນເຈົ້າ—ບາງທີໃນໜ້າທີ່ມອບໝາຍການປະຕິບັດສາດສະໜາກິດ, ການເອີ້ນຂອງສາດສະໜາຈັກ, ໜ້າທີ່ຮັບຜິດຊອບໃນຄອບຄົວຂອງທ່ານ, ຫລື ການກະຕຸ້ນທາງວິນຍານໃຫ້ເຮັດຄວາມດີ.

ທ່ານຮູ້ສຶກວ່າແມ່ນຫຍັງຄືຂ່າວສານຂອງພຣະຜູ້ເປັນເຈົ້າຕໍ່ທ່ານໃນການເປີດເຜີຍເຫລົ່ານີ້? ວະລີໃດແດ່ທີ່ເບິ່ງຄືວ່າມີຄວາມໝາຍຕໍ່ທ່ານໂດຍສະເພາະ? ຕໍ່ໄປນີ້ແມ່ນຈຳນວນໜ້ອຍໜຶ່ງ ເພື່ອໃຫ້ພິຈາລະນາ:

ພຣະຜູ້ເປັນເຈົ້າໄດ້ມອບ “ພຣະຄຸນ [ຫລື ຄວາມຊ່ວຍເຫລືອຈາກສະຫວັນ] ແລະ ຄວາມແນ່ນອນໃຈ” ໃຫ້ແກ່ທ່ານເມື່ອໃດ ເພື່ອຈະສາມາດຮັບໃຊ້ພຣະອົງ? (ຄຳສອນ ແລະ ພັນທະສັນຍາ 106:8).
ທ່ານຄິດວ່າການທີ່ຈະເພີ່ມຄວາມເຂັ້ມແຂງໃຫ້ແກ່ຄົນອື່ນ “ໃນການກະທຳທັງໝົດຂອງເຈົ້າ” ໝາຍຄວາມວ່າແນວໃດ? ຄຳສອນ ແລະ ພັນທະສັນຍາ 108:7.

ເມື່ອແອວເດີ ຄາຣ໌ ບີ ຄຸກ ໄດ້ຮັບການມອບໝາຍຂອງສາດສະໜາຈັກທີ່ຍາກລຳບາກ, ເພິ່ນໄດ້ດຶງເອົາຄວາມເຂັ້ມແຂງຈາກປະສົບການຂອງບັນພະບຸລຸດຄົນໜຶ່ງ. ອ່ານກ່ຽວກັບເລື່ອງນີ້ໃນຂ່າວສານຂອງເພິ່ນ “Serve” (Liahona, Nov. 2016, 110–12). ໃຫ້ຄິດທີ່ຈະຂຽນຈົດໝາຍເພື່ອໃຫ້ກຳລັງໃຈລູກຫລານຂອງທ່ານ—ຫລື ຕົວທ່ານເອງໃນອະນາຄົດ—ທີ່ຈະຮັບເອົາໂອກາດເພື່ອຮັບໃຊ້ພຣະຜູ້ເປັນເຈົ້າ. ໃຫ້ລວມເອົາຄວາມຈິງທີ່ທ່ານຮຽນຮູ້ຈາກຂ່າວສານຂອງແອວເດີ ຄຸກ ໃສ່ໃນຈົດໝາຍຂອງທ່ານ, ຄຳສອນ ແລະ ພັນທະສັນຍາ 106 ແລະ 108, ແລະ ປະສົບການຂອງທ່ານເອງ.

ເບິ່ງ Henry B. Eyring, “Walk with Me,” Liahona, May 2017, 82–85; Topics and Questions, “Serving in Church Callings,” ຫ້ອງສະໝຸດພຣະກິດຕິຄຸນ; “Warren Cowdery” ແລະ “‘Wrought Upon’ to Seek a Revelation,” ໃນ Revelations in Context, 219–23, 224–28 ນຳອີກ.

ຄຳສອນ ແລະ ພັນທະສັນຍາ 107:1–4, 18–20

ຖານະປະໂລຫິດແມ່ນ “ຕາມລະບຽບຂອງພຣະບຸດຂອງພຣະເຈົ້າ.”

ພຣະຜູ້ເປັນເຈົ້າເລີ່ມ “ການເປີດເຜີຍເລື່ອງຖານະປະໂລຫິດ” ຂອງພຣະອົງ (ຄຳສອນ ແລະ ພັນທະສັນຍາ 107, ພາກຫົວຂໍ້) ໂດຍການສິດສອນເຮົາຊື່ດັ້ງເດີມຂອງຖານະປະໂລຫິດແຫ່ງເມນຄີເສເດັກ (ເບິ່ງ ຂໍ້ທີ 1–4). ທ່ານຄິດວ່າເປັນຫຍັງມັນຈຶ່ງສຳຄັນທີ່ຈະຮູ້ເລື່ອງນີ້? ຊື່ນີ້ມີອິດທິພົນຕໍ່ວິທີທີ່ທ່ານຄິດກ່ຽວກັບຖານະປະໂລຫິດແນວໃດ?

ໃຫ້ເກັບຄວາມຄິດເຫລົ່ານີ້ໄວ້ໃນໃຈ ຂະນະທີ່ທ່ານອ່ານກ່ຽວກັບຖານະປະໂລຫິດ, ໂດຍສະເພາະ ຢູ່ໃນ ຂໍ້ທີ 18–20. ການທີ່ “ໃຫ້ຟ້າສະຫວັນເປີດ” ໝາຍຄວາມວ່າແນວໃດ? ການທີ່ຈະ “ຊື່ນຊົມກັບການພົວພັນ ແລະ ການປະທັບຢູ່ຂອງພຣະເຈົ້າອົງເປັນພຣະບິດາ, ແລະ ພຣະເຢຊູ” ໝາຍຄວາມວ່າແນວໃດ? ອຳນາດ ແລະ ສິດອຳນາດຂອງຖານະປະໂລຫິດຂອງພຣະຜູ້ຊ່ວຍໃຫ້ລອດ ເຮັດໃຫ້ທຸກສິ່ງທັງໝົດນີ້ມີໄວ້ໃຫ້ທ່ານແນວໃດ?

ເບິ່ງ ແອວມາ 13:2, 16; ຄຳສອນ ແລະ ພັນທະສັນຍາ 84:19–27 ນຳອີກ.

ສຸມໃຈໃສ່ພຣະເຢຊູຄຣິດ. “ມັນມີຫລາຍສິ່ງທີ່ຈະສິດສອນຢູ່ໃນພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດ—ຫລັກທຳ, ພຣະບັນຍັດ, ຄຳທຳນາຍ, ແລະ ເລື່ອງລາວພຣະຄຳພີ. ແຕ່ທັງໝົດນີ້ແມ່ນກິ່ງງ່າຈາກຕົ້ນດຽວກັນ, ເພາະທັງໝົດມີຈຸດປະສົງດຽວຄື: ເພື່ອຊ່ວຍໃຫ້ທຸກຄົນມາຫາພຣະຄຣິດ ແລະ ດີພ້ອມໃນພຣະອົງ (ເບິ່ງ ເຈຣອມ 1:11; ໂມໂຣໄນ 10:32). ສະນັ້ນບໍ່ວ່າທ່ານກຳລັງສິດສອນຫຍັງ, ຈົ່ງຈື່ຈຳວ່າ ທ່ານກຳລັງສິດສອນກ່ຽວກັບພຣະເຢຊູຄຣິດແທ້ໆ ແລະ ວິທີທີ່ຈະກາຍເປັນເໝືອນດັ່ງພຣະອົງ” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 6). ຍົກຕົວຢ່າງ, ຂະນະທີ່ທ່ານສິດສອນ—ແລະ ຮຽນຮູ້—ກ່ຽວກັບຖານະປະໂລຫິດຢູ່ໃນ ຄຳສອນ ແລະ ພັນທະສັນຍາ 107, ໃຫ້ຖາມເລື້ອຍໆວ່າ, “ເຮົາກຳລັງຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ?”

ຄຳສອນ ແລະ ພັນທະສັນຍ 107:22

ຜູ້ຮັບໃຊ້ຂອງພຣະຜູ້ເປັນເຈົ້າໄດ້ຮັບ “ການສະໜັບສະໜູນໂດຍຄວາມໝັ້ນໃຈ, ສັດທາ, ແລະ ຄຳອະທິຖານຂອງສາດສະໜາຈັກ.”

ທ່ານຄິດວ່າ ການສະໜັບສະໜູນຜູ້ຮັບໃຊ້ຂອງພຣະຜູ້ເປັນເຈົ້າ ໂດຍຄວາມໝັ້ນໃຈຂອງທ່ານໝາຍຄວາມວ່າແນວໃດ? ໂດຍສັດທາຂອງທ່ານ? ໂດຍຄຳອະທີຖານຂອງທ່ານ?

ເບິ່ງ “ເຮົາຂອບພຣະໄທສຳລັບສາດສະດາ,” ເພງສວດ ແລະ ເພງຂອງເດັກນ້ອຍ, 40 ນຳອີກ.

ຄຳສອນ ແລະ ພັນທະສັນຍາ 107:23–24, 33–35, 38, 91–92

ສາດສະດາ ແລະ ອັກຄະສາວົກເປັນພະຍານເຖິງພຣະເຢຊູຄຣິດ.

ໂຈເຊັບ ສະມິດ ໄດ້ແບ່ງປັນ ພາກທີ 107 ໃນປີ 1835 ກັບກຸ່ມອັກຄະສາວົກສິບສອງທີ່ຫາກໍຖືກເອີ້ນ (ເບິ່ງຫົວຂໍ້ພາກ). ພຣະຜູ້ເປັນເຈົ້າໄດ້ສິດສອນພວກເພິ່ນຫຍັງແດ່ກ່ຽວກັບການເອີ້ນຂອງພວກເພິ່ນຢູ່ໃນ ຂໍ້ທີ 23–24, 33–35, 38? ການເປັນພະຍານຂອງທ່ານເຖິງພຣະເຢຊູຄຣິດ ຖືກເສີມສ້າງໂດຍການສິດສອນ ແລະ ການປະຕິບັດສາດສະໜາກິດຂອງອັກຄະສາວົກທີ່ມີຊີວິດຢູ່ຂອງພຣະອົງແນວໃດ?

ໃນ ຂໍ້ທີ 91–92, ພຣະຜູ້ເປັນເຈົ້າສິດສອນກ່ຽວກັບອັກຄະສາວົກຜູ້ອາວຸໂສຂອງພຣະອົງ, ປະທານຂອງສາດສະໜາຈັກ. ເພິ່ນເປັນ “ເໝືອນດັ່ງໂມເຊ” ແນວໃດ? (ເບິ່ງຄູ່ມືພຣະຄຳພີ, “ໂມເຊ,” ຫ້ອງສະໝຸດພຣະກິດຕິຄຸນ).

ເບິ່ງ David A. Bednar, “Chosen to Bear Testimony of My Name,” Liahona, Nov. 2015, 128–31 ນຳອີກ.

ຄຳສອນ ແລະ ພັນທະສັນຍາ 107:27–31, 85–89

ພຣະຜູ້ເປັນເຈົ້າສຳເລັດວຽກງານຂອງພຣະອົງຜ່ານທາງສະພາ.

ໃຫ້ສັງເກດເຫັນສິ່ງທີ່ພຣະຜູ້ເປັນເຈົ້າໄດ້ສິດສອນກ່ຽວກັບສະພາ ຢູ່ໃນ ຄຳສອນ ແລະ ພັນທະສັນຍາ 107:27–31, 85–89. ແມ່ນຫຍັງເຮັດໃຫ້ສະພາມີປະສິດທິພາບ? ທ່ານຈະນຳໃຊ້ຫລັກທຳເຫລົ່ານີ້ໃນການເອີ້ນຂອງທ່ານໃນສາດສະໜາຈັກ, ໃນບ້ານເຮືອນຂອງທ່ານ, ຫລື ໜ້າທີ່ຮັບຜິດຊອບອື່ນໆຂອງທ່ານແນວໃດ?

ເບິ່ງ M. Russell Ballard, “Family Councils,” Liahona, May 2016, 63–65; ຄູ່ມືທົ່ວໄປ, 4.3–4.4, ຫ້ອງສະໝຸດພຣະກິດຕິຄຸນ ນຳອີກ.

ຄອບຄົວກຳລັງວາງແຜນນຳກັນ — ພຣະຜູ້ເປັນເຈົ້າເຊື້ອເຊີນຄອບຄົວໃຫ້ປຶກສາຫາລືນຳກັນ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 107:18–20

ພຣະເຢຊູຄຣິດອວຍພອນເຮົາຜ່ານທາງອຳນາດຂອງຖານະປະໂລຫິດຂອງພຣະອົງ.

ຂະນະທີ່ທ່ານ ແລະ ລູກໆຂອງທ່ານອ່ານ ຄຳສອນ ແລະ ພັນທະສັນຍາ 107:18–19 ນຳກັນ, ໃຫ້ເນັ້ນວະລີ “ພອນທາງວິນຍານທັງໝົດ.” ບາງເທື່ອທ່ານ ແລະ ລູກໆຂອງທ່ານ ສາມາດຂຽນພອນຕ່າງໆທີ່ມາຈາກຖານະປະໂລຫິດ. ທ່ານອາດຈະຫລິ້ນເກມ—ເບິ່ງວ່າໃຜຈະສາມາດຂຽນພອນຕ່າງໆໄດ້ຍາວກວ່າກັນ. ລູກໆຂອງທ່ານຍັງສາມາດແຕ້ມ ຫລື ຊອກຫາຮູບທີ່ເປັນຕົວແທນຂອງພອນເຫລົ່ານີ້ນຳອີກ (ເບິ່ງ ໜ້າກິດຈະກຳ ຂອງອາທິດນີ້). ແລ້ວພວກທ່ານສາມາດເວົ້າລົມກັນກ່ຽວກັບວ່າ ພິທີການຂອງຖານະປະໂລຫິດ (ດັ່ງ ການບັບຕິສະມາ ຫລື ສິນລະລຶກ) ຊ່ວຍເຮົາຮັບເອົາພອນຂອງພຣະເຈົ້າແນວໃດ.

ຄຳສອນ ແລະ ພັນທະສັນຍາ 107:21–26, 33–35, 91–92

ຜູ້ຮັບໃຊ້ທີ່ຖືກເລືອກຂອງພຣະຜູ້ເປັນເຈົ້ານຳພາສາດສະໜາຈັກຂອງພຣະອົງ.

ວາລະສານ Liahona ສະບັບກອງປະຊຸມໃຫຍ່ທຸກສະບັບຈະມີໜ້າໜຶ່ງທີ່ມີຮູບຂອງເຈົ້າໜ້າທີ່ຊັ້ນຜູ້ໃຫຍ່ລວມຢູ່ດ້ວຍ. ໃຫ້ຄິດທີ່ຈະເບິ່ງຮູບເຫລົ່ານີ້ກັບລູກໆຂອງທ່ານ ຂະນະທີ່ພວກທ່ານອ່ານກ່ຽວກັບໜ້າທີ່ຮັບຜິດຊອບຂອງພວກເພິ່ນຢູ່ໃນ ຄຳສອນ ແລະ ພັນທະສັນຍາ 107:21–26, 33–35, 91–92. ທ່ານ ແລະ ລູກໆຂອງທ່ານສາມາດເວົ້າລົມກັນກ່ຽວກັບວ່າ ເປັນຫຍັງທ່ານຈຶ່ງຮູ້ສຶກຂອບພຣະຄຸນທີ່ພຣະຜູ້ເປັນເຈົ້າໄດ້ປະທານໜ້າທີ່ຮັບຜິດຊອບເຫລົ່ານີ້ໃຫ້ແກ່ພວກເພິ່ນ.
ລູກໆຂອງທ່ານສາມາດຮຽນຮູ້ຫລາຍຂຶ້ນກ່ຽວກັບຜູ້ຮັບໃຊ້ຂອງພຣະຜູ້ເປັນເຈົ້າຢູ່ທີ່ “General Church Leadership” ໃນ ChurchofJesusChrist.org. ບາງທີລູກໆຂອງທ່ານແຕ່ລະຄົນສາມາດຮຽນຮູ້ກ່ຽວກັບຄົນໜຶ່ງໃນບັນດາຜູ້ນຳເຫລົ່ານີ້ ແລະ ສິດສອນກັນແລະກັນກ່ຽວກັບເພິ່ນຄົນນັ້ນ. ແບ່ງປັນນຳກັນວ່າທ່ານຮູ້ໄດ້ແນວໃດວ່າຜູ້ນຳເຫລົ່ານີ້ເປັນຜູ້ຮັບໃຊ້ທີ່ແທ້ຈິງຂອງພຣະເຢຊູຄຣິດ.
ຫລັງຈາກທີ່ອ່ານ ຄຳສອນ ແລະ ພັນທະສັນຍາ 107:22 ນຳກັນ, ທ່ານ ແລະ ລູກໆຂອງທ່ານສາມາດປ່ຽນຜຽນກັນຈັບຮູບຂອງຝ່າຍປະທານສູງສຸດຂຶ້ນ ແລະ ແບ່ງປັນວິທີທີ່ພວກທ່ານສາມາດສະໜັບສະໜູນພວກເພິ່ນໃນຖານະຜູ້ຮັບໃຊ້ຂອງພຣະຜູ້ເປັນເຈົ້າແນວໃດ.

ຄຳສອນ ແລະ ພັນທະສັນຍາ 108:3

ເຮົາສາມາດລະມັດລະວັງໃນການດຳລົງຊີວິດຕາມພັນທະສັນຍາຂອງເຮົາ.

ເພື່ອເລີ່ມການສົນທະນາກ່ຽວກັບຂໍ້ນີ້, ທ່ານສາມາດເຊື້ອເຊີນລູກໆຂອງທ່ານໃຫ້ເຮັດສິ່ງໃດສິ່ງໜຶ່ງທີ່ຮຽກຮ້ອງຄວາມເອົາໃຈໃສ່ຢ່າງລະມັດລະວັງ, ດັ່ງການຖອກນ້ຳໃສ່ຈອກໂດຍບໍ່ໃຫ້ມັນເຮ່ຍ. ຈະມີຫຍັງເກີດຂຶ້ນຖ້າເຮົາບໍ່ລະມັດລະວັງ? ແລ້ວທ່ານສາມາດອ່ານ ຄຳສອນ ແລະ ພັນທະສັນຍາ 108:3 ເພື່ອພົບເຫັນວ່າ ພຣະຜູ້ເປັນເຈົ້າຢາກໃຫ້ເຮົາເຮັດຫຍັງຢ່າງລະມັດລະວັງ. ມີ “ຄຳປະຕິຍານ” (ຄຳສັນຍາ ຫລື ພັນທະສັນຍາ) ຫຍັງແດ່ທີ່ເຮົາເຮັດໄວ້ກັບພຣະເຈົ້າ? ເຮົາຈະລະມັດລະວັງຫລາຍຂຶ້ນກ່ຽວກັບການຮັກສາມັນໄດ້ແນວໃດ? ທ່ານອາດແບ່ງປັນບາງສ່ວນຈາກຂ່າວສານຂອງຊິດສະເຕີ ແບັກກີ້ ຄະເຣເວັນ “Careful versus Casual” (Liahona, May 2019, 9–11) ທີ່ທ່ານຮູ້ສຶກວ່າຈະສາມາດດົນໃຈລູກໆຂອງທ່ານໃຫ້ຮັກສາພັນທະສັນຍາຂອງພວກເຂົາ. ທ່ານຍັງສາມາດຮ້ອງໜຶ່ງເພງທີ່ກ່ຽວກັບການຮັກສາພັນທະສັນຍານຳອີກ ເຊັ່ນ “ຂໍໃຫ້ເຮົາເດີນໄປ” (ເພງສວດ ແລະ ເພງຂອງເດັກນ້ອຍ, 10).

ເດັກຍິງກຳລັງຖອກນ້ຳ — ການຖອກນ້ຳຢ່າງລະມັດລະວັງກໍສາມາດຖືກປຽບທຽບໃສ່ກັບການຮັກສາພັນທະສັນຍາຂອງເຮົາຢ່າງລະມັດລະວັງ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບທາສີຂອງ ເມນຄີເສເດັກ ແລະ ອັບຣາຮາມ — Melchizedek Blesses Abram [ເມນຄີເສເດັກໃຫ້ພອນແກ່ອັບຣາຮາມ], ໂດຍ ວາວເຕີ ເຣນ