“ວັນທີ 8–14 ເດືອນກັນຍາ: ‘ຈົ່ງສະຫງົບ ແລະ ຮູ້ວ່າເຮົາຄືພຣະເຈົ້າ’: ຄຳສອນ ແລະ ພັນທະສັນຍາ 98–101,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 98–101,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ຊີ ຊີ ເອ ຄຣິສເຕັນເຊັນ (1831–1912), Saints Driven from Jackson County Missouri [ໄພ່ພົນຖືກຂັບໄລ່ອອກຈາກເຂດແຈ໊ກສັນ ລັດມີເຊີຣີ], ປະມານ 1878, ສີຖາວອນແຫ້ງໄວ ເທິງຜ້າຝ້າຍມັດສະລິນ, 77 ¼ × 113 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລ ບຣິກຳ ຢັງ, ຂອງຂວັນຈາກຫລານຂອງ ຊີ ຊີ ເອ ຄຣິສເຕັນເຊັນ, 1970.

ວັນທີ 8–14 ເດືອນກັນຍາ: “ຈົ່ງສະຫງົບ ແລະ ຮູ້ວ່າເຮົາຄືພຣະເຈົ້າ”

ຄຳສອນ ແລະ ພັນທະສັນຍາ 98–101

ສຳລັບໄພ່ພົນໃນຊ່ວງຊຸມປີ 1830, ເມືອງອິນດີເພັນເດັນສ໌, ລັດມີເຊີຣີ, ໄດ້ເປັນແຜ່ນດິນແຫ່ງຄຳສັນຍາແທ້ໆ. ມັນແມ່ນ “ສະຖານທີ່ສູນກາງ” ຂອງຊີໂອນ (ຄຳສອນ ແລະ ພັນທະສັນຍາ 57:3)—ເມືອງຂອງພຣະເຈົ້າຢູ່ເທິງໂລກ—ແລະ ການເຕົ້າໂຮມໄພ່ພົນຢູ່ທີ່ນັ້ນ ເປັນເຫດການອັນໜ້າຕື່ນເຕັ້ນທີ່ເກີດຂຶ້ນກ່ອນການສະເດັດມາຄັ້ງທີສອງ. ແຕ່ເພື່ອນບ້ານຂອງເຂົາເຈົ້າທີ່ອາໄສຢູ່ໃນຂົງເຂດນັ້ນ ບໍ່ໄດ້ຄິດຄືກັນກັບເຂົາເຈົ້າ. ພວກເຂົາຄັດຄ້ານຄຳກ່າວອ້າງທີ່ວ່າ ພຣະເຈົ້າໄດ້ປະທານທີ່ດິນໃຫ້ໄພ່ພົນ, ແລະ ພວກເຂົາກໍບໍ່ສະບາຍໃຈກັບຜົນສະທ້ອນທາງການເມືອງ, ເສດຖະກິດ, ແລະ ສັງຄົມຂອງຜູ້ທີ່ບໍ່ຄຸ້ນເຄີຍຢ່າງຫລວງຫລາຍທີ່ຍ້າຍເຂົ້າມາຢ່າງວ່ອງໄວ. ບໍ່ດົນຄວາມອຶດອັດກໍກາຍເປັນການຂົ່ມເຫັງ ແລະ ຄວາມຮຸນແຮງ. ໃນປີ 1833, ຫ້ອງການພິມຂອງສາດສະໜາຈັກໄດ້ຖືກທຳລາຍ, ແລະ ໄພ່ພົນໄດ້ຖືກບັງຄັບໃຫ້ອອກຈາກບ້ານເຮືອນຂອງເຂົາເຈົ້າ.

ໂຈເຊັບ ສະມິດ ໄດ້ຢູ່ຫ່າງໄກຈາກເມືອງເຄີດແລນ ຫລາຍກວ່າ 800 ໄມ (1288 ກິໂລແມັດ), ແລະ ຂ່າວນັ້ນຕ້ອງໃຊ້ເວລາໜຶ່ງອາທິດຈຶ່ງໄປເຖິງເພິ່ນ. ແຕ່ພຣະຜູ້ເປັນເຈົ້າຮູ້ວ່າມີຫຍັງເກີດຂຶ້ນ, ແລະ ພຣະອົງໄດ້ເປີດເຜີຍຫລັກທຳແຫ່ງຄວາມສະຫງົບ ແລະ ກຳລັງໃຈ ແກ່ສາດສະດາຂອງພຣະອົງ ທີ່ຈະປອບໂຍນໄພ່ພົນໄດ້—ຫລັກທຳເຫລົ່ານັ້ນກໍສາມາດຊ່ວຍເຮົາໃນເວລາທີ່ເຮົາປະເຊີນກັບການຂົ່ມເຫັງ, ເວລາທີ່ຄວາມປະສົງອັນຊອບທຳຂອງເຮົາບໍ່ໄດ້ຮັບຄຳຕອບ, ຫລື ເວລາທີ່ເຮົາຕ້ອງການການເຕືອນໃຈວ່າ ຄວາມທຸກປະຈຳວັນຂອງເຮົາຈະ, “ທຳງານນຳກັນເພື່ອຄວາມດີ [ຂອງເຮົາ]” ໃນທີ່ສຸດ (ຄຳສອນ ແລະ ພັນທະສັນຍາ 98:3).

ເບິ່ງ Saints, 1:171–93; “Waiting for the Word of the Lord,” ໃນ Revelations in Context, 196–201.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 98:1–3, 11–14, 22; 101:1–16, 22–31, 36

ການທົດລອງຂອງເຮົາສາມາດທຳງານນຳກັນເພື່ອຄວາມດີຂອງເຮົາ.

ຄວາມທ້າທາຍບາງຢ່າງໃນຊີວິດຂອງເຮົາ ເກີດຂຶ້ນຈາກການເລືອກຂອງເຮົາເອງ. ບາງຢ່າງເກີດຂຶ້ນຈາກການເລືອກຂອງຄົນອື່ນ. ແລະ ບາງຄັ້ງສິ່ງຕ່າງໆຈະເກີດຂຶ້ນ ຊຶ່ງເປັນສ່ວນໜຶ່ງຂອງຄວາມເປັນມະຕະ. ບໍ່ວ່າຈະເປັນດ້ວຍເຫດໃດ, ຄວາມຍາກລຳບາກສາມາດຊ່ວຍໃຫ້ຈຸດປະສົງທີ່ສູງສົ່ງບັນລຸຄວາມສຳເລັດໄດ້ ເມື່ອເຮົາຫັນໄປຫາພຣະເຈົ້າ.

ສິ່ງນີ້ເປັນຈິງສຳລັບໄພ່ພົນໃນລັດມີເຊີຣີ ໃນປີ 1833, ແລະ ມັນກໍເປັນຈິງສຳລັບເຮົາໃນປະຈຸບັນ. ຂະນະທີ່ທ່ານອ່ານສິ່ງທີ່ພຣະຜູ້ເປັນເຈົ້າໄດ້ບອກໄພ່ພົນໃນ ຄຳສອນ ແລະ ພັນທະສັນຍາ 98 ແລະ 101, ໃຫ້ໄຕ່ຕອງວ່າ ຂ່າວສານຂອງພຣະອົງກ່ຽວຂ້ອງກັບການທົດລອງ ຫລື ຄວາມຍາກລຳບາກຕ່າງໆ ທີ່ທ່ານອາດຈະມີແນວໃດ. ຕໍ່ໄປນີ້ແມ່ນບາງຄຳຖາມ ແລະ ແຫລ່ງຂໍ້ມູນເພື່ອຊ່ວຍທ່ານ.

ຖ້າຫາກການທົດລອງແມ່ນຜົນມາຈາກ:

ການເລືອກສ່ວນຕົວ: ຄຳແນະນຳ—ແລະ ຄຳສັນຍາໃດ—ທີ່ທ່ານພົບເຫັນຢູ່ໃນ ຄຳສອນ ແລະ ພັນທະສັນຍາ 98:11–12; 101:1–9? ທ່ານຮຽນຮູ້ຫຍັງແດ່ຈາກຂໍ້ເຫລົ່ານີ້ກ່ຽວກັບພຣະບິດາເທິງສະຫວັນ ແລະ ພຣະເຢຊູຄຣິດ? ທ່ານຮູ້ສຶກວ່າພຣະເຈົ້າຈະໃຫ້ທ່ານເຮັດຫຍັງ?
ການເລືອກຂອງຄົນອື່ນ: ທ່ານພົບການປອບໂຍນແນວໃດໃນ ຄຳສອນ ແລະ ພັນທະສັນຍາ 98:1–3, 22; 101:10–16, 22? ພຣະຜູ້ເປັນເຈົ້າຕ້ອງການໃຫ້ເຮົາຕອບຮັບຕໍ່ການຂົ່ມເຫັງ, ການກັ່ນແກ້ງ, ຫລື ຄວາມຮຸນແຮງແນວໃດ? (ເບິ່ງ Life Help, “Abuse,” ຫ້ອງສະໝຸດພຣະກິດຕິຄຸນ; Topics and Questions, “Abuse,” ຫ້ອງສະໝຸດພຣະກິດຕິຄຸນ.) ຂໍ້ເຫລົ່ານີ້ສິດສອນຫຍັງແດ່ກ່ຽວກັບວິທີໄວ້ວາງໃຈໃນພຣະຜູ້ເປັນເຈົ້າ?
ຄວາມຫຍຸ້ງຍາກຂອງຄວາມເປັນມະຕະ: ທ່ານໄດ້ຮັບມຸມມອງແນວໃດຈາກ ຄຳສອນ ແລະ ພັນທະສັນຍາ 98:1–3; 101:22–31, 36? ທ່ານຮຽນຮູ້ຫຍັງແດ່ຈາກການທົດລອງຂອງທ່ານ? ທ່ານກຳລັງເຮັດຫຍັງເພື່ອເຊື້ອເຊີນໃຫ້ພຣະເຈົ້າຊ່ວຍເຫລືອ? ພຣະອົງຊ່ວຍເຫລືອທ່ານແນວໃດ?

ເພື່ອຮຽນຮູ້ເພີ່ມເຕີມກ່ຽວກັບວິທີທີ່ພຣະເຈົ້າສາມາດເຮັດ “ທຸກສິ່ງທັງປວງໃນນັ້ນທີ່ພວກເຈົ້າໄດ້ຮັບ … ທຳງານນຳກັນເພື່ອຄວາມດີຂອງພວກເຈົ້າ” ແນວໃດ (ຄຳສອນ ແລະ ພັນທະສັນຍາ 98:3), ພິຈາລະນາທີ່ຈະສຶກສາຂ່າວສານຂອງແອວເດີ ແອນໂທນີ ດີ ເພີຄິນສ໌ “Remember Thy Suffering Saints, O Our God” (Liahona, Nov. 2021, 103–5). ທ່ານອາດຈະເບິ່ງຂໍ້ຄວາມໃນຂ່າວສານຂອງເພິ່ນທີ່ຊ່ວຍໃຫ້ທ່ານເຂົ້າໃຈວ່າ ພຣະຜູ້ຊ່ວຍໃຫ້ລອດເຊື້ອເຊີນທ່ານໃຫ້ເບິ່ງຄວາມທ້າທາຍຂອງທ່ານແນວໃດ. ການທົດລອງຂອງທ່ານເຮັດວຽກນຳກັນເພື່ອຄວາມດີ ຫລື ບັນລຸຈຸດປະສົງຂອງພຣະເຈົ້າໃນທາງໃດແດ່?

ເບິ່ງ ໂຣມ 8:28; 2 ນີໄຟ 2:2; ຄຳສອນ ແລະ ພັນທະສັນຍາ 90:24; D. Todd Christofferson, “Come to Zion,” Liahona, Nov. 2008, 37–40; “Trial of Adversity,” “Feeling the Lord’s Love and Goodness in Trials,” “The Refiner’s Fire” (ວິດີໂອ), ChurchofJesusChrist.org ນຳອີກ.

Trial of Adversity
Katie, who was paralyzed in an auto accident, shares how she exercises her faith to embrace her new life.

Feeling the Lord's Love and Goodness in Trials
When Darlyn learned of her illness, she feared she would not see her children grow up. But through her trial, she felt the Lord’s love and immense goodness. How does He comfort you in times of trial?

The Refiner's Fire
The refiner’s fire is not a comfortable place to be. It involves intense heat and repeated hammering. But it is in the refiner’s fire we are purified and prepared to meet God.

ຄຳສອນ ແລະ ພັນທະສັນຍາ 98:23–48

ພຣະຜູ້ເປັນເຈົ້າປະສົງໃຫ້ເຮົາສະແຫວງຫາຄວາມສະຫງົບ ຢູ່ໃນວິທີທາງຂອງພຣະອົງ.

ປະທານຣະໂຊ ເອັມ ແນວສັນ ໄດ້ສິດສອນວ່າ: ຜູ້ຕິດຕາມພຣະເຢຊູຄຣິດຄວນເປັນຕົວຢ່າງໃຫ້ທຸກຄົນໃນໂລກເພື່ອເຮັດຕາມ. ຂ້າພະເຈົ້າຂໍອ້ອນວອນທ່ານໃຫ້ເຮັດຈົນສຸດຄວາມສາມາດ ເພື່ອຢຸດຕິການຂັດແຍ້ງສ່ວນຕົວ ທີ່ກຳລັງລຸກລາມໃນໃຈ ແລະ ໃນຊີວິດຂອງທ່ານໃນເວລານີ້” (“The Power of Spiritual Momentum,” Liahona, May 2022, 97).

ເຖິງແມ່ນວ່າບໍ່ແມ່ນທຸກສິ່ງຢູ່ໃນ ຄຳສອນ ແລະ ພັນທະສັນຍາ 98:23–48 ຈະຖືກນຳໃຊ້ກັບການພົບປະສັງສັນຂອງທ່ານເປັນສ່ວນຕົວກັບຄົນອື່ນ, ແຕ່ຫລັກທຳຢ່າງໃດແດ່ທີ່ທ່ານພົບເຫັນວ່າ ສາມາດນຳພາທ່ານໃຫ້ຢຸດຕິການຂັດແຍ້ງສ່ວນຕົວໃນຊີວິດຂອງທ່ານໄດ້? ທ່ານສາມາດພົບຄວາມຈິງເພີ່ມເຕີມໃນເພງກ່ຽວກັບຄວາມສະຫງົບ ຫລື ການໃຫ້ອະໄພ, ເຊັ່ນ “ພຣະບິດາໂປດຟັງເຮົາວອນ” (ເພງສວດ ແລະ ເພງຂອງເດັກນ້ອຍ, 23).

ຮູບຂອງພຣະເຢຊູຄຣິດ — ລາຍລະອຽດຈາກ Christ and the Rich Young Ruler [ພຣະຄຣິດ ແລະ ເຈົ້ານາຍມະຫາເສດຖີໜຸ່ມ], ໂດຍ ເຮັນຣິກ ຮ໊ອບແມນ

ຄຳສອນ ແລະ ພັນທະສັນຍາ 99–100

ພຣະຜູ້ເປັນເຈົ້າຈະດູແລຜູ້ທີ່ຮັບໃຊ້ພຣະອົງ.

ການເປີດເຜີຍໃນ ພາກທີ 99 ແລະ 100 ແມ່ນປະທານໃຫ້ແກ່ຜູ້ຄົນທີ່ມີໜ້າທີ່ຮັບຜິດຊອບສຳຄັນຂອງສາດສະໜາຈັກ ແຕ່ກັງວົນເລື່ອງຄອບຄົວຂອງພວກເຂົາເຊັ່ນກັນ. ທ່ານພົບຫຍັງແດ່ໃນການເປີດເຜີຍເຫລົ່ານີ້ທີ່ຈະຊ່ວຍພວກເຂົາໄດ້? ຂ່າວສານໃດແດ່ທີ່ພຣະຜູ້ເປັນເຈົ້າມີສຳລັບທ່ານຢູ່ໃນການເປີດເຜີຍເຫລົ່ານີ້?

ເບິ່ງ “John Murdock’s Missions to Missouri” ໃນ “‘I Quit Other Business’: Early Missionaries” ແລະ “A Mission to Canada,” ໃນ Revelations in Context, 87–89, 202–7 ນຳອີກ.

ຄຳສອນ ແລະ ພັນທະສັນຍາ 101:43–65

ການເຮັດຕາມຄຳແນະນຳຂອງພຣະເຈົ້າ ຊ່ວຍໃຫ້ເຮົາປອດໄພ.

ຄຳອຸປະມາຢູ່ໃນ ຄຳສອນ ແລະ ພັນທະສັນຍາ 101:43–62 ອະທິບາຍເຫດຜົນທີ່ພຣະຜູ້ເປັນເຈົ້າໄດ້ປ່ອຍໃຫ້ໄພ່ພົນຖືກຂັບໄລ່ອອກຈາກຊີໂອນ. ຂະນະທີ່ທ່ານອ່ານຂໍ້ເຫລົ່ານີ້, ທ່ານເຫັນສິ່ງໃດບໍວ່າ ທ່ານເປັນເໝືອນຄົນໃຊ້ຢູ່ໃນຄຳອຸປະມານີ້? ທ່ານຈະສາມາດສະແດງໃຫ້ພຣະເຈົ້າເຫັນວ່າທ່ານ “ເຕັມໃຈຮັບການແນະນຳໃນວິທີທີ່ຖືກຕ້ອງ ແລະ ເໝາະສົມສຳລັບຄວາມລອດ [ຂອງທ່ານ]” ແນວໃດ? (ເບິ່ງ ຂໍ້ທີ 63–65).

ສະແດງເລື່ອງລາວ ຫລື ຄຳອຸປະມາ. ບາງຄັ້ງມັນງ່າຍກວ່າທີ່ຈະຮຽນຮູ້ຈາກ ແລະ ປຽບທຽບໃສ່ກັບເລື່ອງລາວ ແລະ ຄຳອຸປະມາໃນພຣະຄຳພີ ເມື່ອເຮົາວາງຕົວເຮົາໃນຕຳແໜ່ງຂອງຜູ້ຄົນທີ່ເລື່ອງລາວ ແລະ ຄຳອຸປະມາເວົ້າເຖິງ. ຖ້າຫາກທ່ານກຳລັງສິດສອນ ຄຳສອນ ແລະ ພັນທະສັນຍາ 101:43–62, ທ່ານອາດຈະເຊື້ອເຊີນໃຫ້ຜູ້ຮຽນສະແດງຕາມຄຳອຸປະມາ ຂະນະທີ່ບາງຄົນອ່ານມັນອອກສຽງ. ຄວາມຮູ້ແຈ້ງໃດແດ່ທີ່ທ່ານໄດ້ຮັບຈາກການກະທຳຕາມຖ້ອຍຄຳ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 98:1–3

ພຣະເຢຊູຄຣິດສາມາດປ່ຽນການທົດລອງຂອງເຮົາໃຫ້ເປັນພອນໄດ້.

ທ່ານອາດເລີ່ມຕົ້ນການສົນທະນາໂດຍການຖາມລູກໆຂອງທ່ານກ່ຽວກັບຄວາມທ້າທາຍບາງຢ່າງ ທີ່ເດັກນ້ອຍອາຍຸໄວດຽວກັບພວກເຂົາກຳລັງປະເຊີນ. ແລ້ວພວກທ່ານສາມາດສົນທະນາ ຄຳສອນ ແລະ ພັນທະສັນຍາ 98:1–3 ນຳກັນ ແລະ ເວົ້າລົມກ່ຽວກັບວິທີທີ່ພຣະເຢຊູຄຣິດສາມາດປ່ຽນການທົດລອງຂອງທ່ານເປັນພອນໄດ້. ທ່ານອາດແບ່ງປັນຕົວຢ່າງກັບລູກໆຂອງທ່ານ ເຖິງວິທີທີ່ພຣະອົງໄດ້ປ່ຽນການທົດລອງຂອງທ່ານເປັນພອນແນວໃດ.

ຄຳສອນ ແລະ ພັນທະສັນຍາ 98:39–40

ພຣະຜູ້ຊ່ວຍໃຫ້ລອດຊ່ວຍເຮົາໃຫ້ອະໄພ.

ໝາຍເຫດ: ເມື່ອທ່ານສິດສອນລູກໆຂອງທ່ານເຖິງຄວາມສຳຄັນຂອງການໃຫ້ອະໄພ, ໃຫ້ແນ່ໃຈວ່າພວກເຂົາເຂົ້າໃຈວ່າ ຖ້າຫາກບາງຄົນທຳຮ້າຍພວກເຂົາ, ພວກເຂົາຄວນບອກຜູ້ໃຫຍ່ທີ່ໄວ້ໃຈໄດ້ສະເໝີ.

ບົດທີ 34 ແລະ 35 ໃນ ເລື່ອງຄຳສອນ ແລະ ພັນທະສັນຍາ (128–34) ສາມາດຊ່ວຍໄດ້ກ່ຽວກັບວິທີທີ່ໄພ່ພົນຖືກກະທຳໃນລັດມີເຊີຣີ ໃນປີ 1833. ທ່ານ ແລະ ລູກໆຂອງທ່ານສາມາດເວົ້າກ່ຽວກັບວິທີທີ່ໄພ່ພົນເຫລົ່ານີ້ອາດຮູ້ສຶກແນວໃດ. ແລ້ວພວກທ່ານສາມາດອ່ານ ຄຳສອນ ແລະ ພັນທະສັນຍາ 98:23, 39–40 ນຳກັນ ເພື່ອເບິ່ງວ່າ ພຣະຜູ້ເປັນເຈົ້າຕ້ອງການໃຫ້ພວກເຂົາເຮັດຫຍັງ. ທ່ານ ແລະ ລູກໆຂອງທ່ານສາມາດເວົ້າລົມເຖິງເວລາທີ່ທ່ານຕ້ອງໃຫ້ອະໄພບາງຄົນ ແລະ ວິທີທີ່ພຣະຜູ້ຊ່ວຍໃຫ້ລອດໄດ້ຊ່ວຍເຫລືອທ່ານ.
ທ່ານຍັງສາມາດສະແດງຮູບພາບໃບໜ້າທີ່ມີຄວາມສຸກ ແລະ ໃບໜ້າໂສກເສົ້າໃຫ້ລູກໆເບິ່ງ. ເວົ້າລົມກ່ຽວກັບສະຖານະການທີ່ບາງຄົນບໍ່ມີຄວາມກະລຸນາ, ແລະ ແນະນຳວິທີຕອບຮັບ. ຊ່ວຍລູກໆຂອງທ່ານໃຫ້ເລືອກວ່າຄຳຕອບເຮົາແຕ່ລະຄຳຈະເຮັດໃຫ້ພວກເຂົາມີຄວາມສຸກ ຫລື ໂສກເສົ້າ ໂດຍການຊີ້ໄປຫາໃບໜ້າທີ່ກ່ຽວຂ້ອງ. ເປັນຫຍັງພຣະເຢຊູຈຶ່ງຢາກໃຫ້ເຮົາອະໄພໃຫ້ຜູ້ຄົນ, ແມ່ນແຕ່ຜູ້ທີ່ບໍ່ດີກັບເຮົາ?

Chapter 34: God Warns the People of Zion: July–August 1833

Chapter 35: The Saints Leave Jackson County, Missouri: September–December 1833

ຄຳສອນ ແລະ ພັນທະສັນຍາ 101:16, 23–32

ພຣະເຢຊູຄຣິດສາມາດນຳຄວາມສະຫງົບມາໃຫ້ເຮົາ.

ຫລັງຈາກທີ່ອ່ານ ຄຳສອນ ແລະ ພັນທະສັນຍາ 101:16, ໃຫ້ຊ່ວຍລູກໆຂອງທ່ານຮັບຮູ້ຄວາມຮູ້ສຶກສະຫງົບ ທີ່ເກີດຂຶ້ນເມື່ອເຮົາສະຫງົບ ແລະ ຄິດກ່ຽວກັບພຣະເຢຊູ—ຍົກຕົວຢ່າງ, ເມື່ອເຮົາອະທິຖານ ຫລື ຮັບສິນລະລຶກ. ພວກທ່ານກໍສາມາດຮ້ອງເພງນຳກັນກ່ຽວກັບຄວາມຄາລະວະ, ເຊັ່ນ “ຂ້າເຝົ້າພິສະຫວົງ” ຫລື “ເຮົາຄິດເມື່ອເຮົາອ່ານເລື່ອງແສນຫວານນັ້ນ” (ເພງສວດ ແລະ ເພງຂອງເດັກນ້ອຍ, 24, 66). ເຮົາຈະສາມາດຮູ້ສຶກເຖິງຄວາມສະຫງົບສຸກຢູ່ໃນບ້ານເຮືອນຂອງເຮົາໄດ້ແນວໃດ?
ລູກໆຂອງທ່ານອາດສົນໃຈໃນການຮຽນຮູ້ກ່ຽວກັບຊີວິດຈະເປັນແນວໃດເມື່ອພຣະເຢຊູຄຣິດສະເດັດກັບມາອີກ. ອ່ານ ຄຳສອນ ແລະ ພັນທະສັນຍາ 101:23–32 ນຳກັນ, ແລະ ເວົ້າລົມກ່ຽວກັບສິ່ງທີ່ພວກເຂົາພົບເຫັນຢູ່ໃນຂໍ້ເຫລົ່ານີ້ ທີ່ຈະນຳຄວາມຊື່ນຊົມມາໃຫ້ເຮົາ ເມື່ອພຣະອົງສະເດັດມາ. ເປັນຫຍັງມັນຈຶ່ງເປັນປະໂຫຍດທີ່ຮູ້ຈັກກ່ຽວກັບສິ່ງເຫລົ່ານີ້ ເມື່ອເຮົາມີຊ່ວງເວລາທີ່ຍາກລຳບາກ?

ພຣະເຢຊູຄຣິດກຳລັງກອດເດັກນ້ອຍ — ພຣະເຢຊູຄຣິດຈະນຳສັນຕິສຸກ ແລະ ຄວາມຊື່ນຊົມມາໃຫ້ ເມື່ອພຣະອົງສະເດັດມາອີກຄັ້ງ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບພາບກຸ່ມອັນຕະພານກຳລັງຂົ່ມເຫັງໄພ່ພົນຍຸກສຸດທ້າຍລຸ້ນທຳອິດ — Missouri Burning [ການເຜົາຜານຢູ່ລັດມີເຊີຣີ], ໂດຍ ກະເລັນ ແອັສ ຮອບຄິນສັນ