Refuge [Utiziro], naShaelynn Abel

Chikunguru 7–13: “Mubairo Wavo Uchava Mukuru uye Kubwinya Kwavo Kuchava Kwokusingaperi”

Dzidziso neZvibvumirano 76

“Chii chinozoitika kwandiri mushure mekunge ndafa?” Angongova munhu wese anobvunza mubvunzo uyu nenzira dzakasiyana-siyana. Kwemazana emakore, tsika zhinji dzechiKristu, dzichivimba nedzidziso dzeBhaibheri, dzinodzidzisa nezve kudenga negehena, nezve paradhiso yevakarurama nekutambudzwa kukuru kwevakaipa. Asi mhuri yose yevanhu chokwadi inokwanisa here kukamurwa zvakaoma kudaro? Muna Kukadzi 1832, Joseph Smith naSidney Ridgon vakazvibvunza kana kwaiva kuine zvimwe zvakawanda zvekuziva pamusoro wenyaya uyu (ona Dzidziso neZvibvumirano 76, musoro wenyaya wechikamu).

Chokwadi zvakanga zviripo. Apo Joseph naSidney pavaifungisisa zvinhu izvi, Ishe “vakabata maziso enzwisiso [yavo] uye akazarurwa” (ndima 19). Vakatambira chakazarurwa chaishamisa zvikuru, chakakura zvikurusa, uye chaijekesera zvikuru zvekuti Vatendi vakangochidaidza kuti “Chiratidzo.” Chakavhura mahwindo edenga uye chikapa vana vaMwari nzwisiso hurusa yekusingaperi. Chiratidzo ichi chakataridza kuti kudenga kukurusa uye kwakapamhama zvikuru uye kunosanganisira vose kupinda zvaifungidzirwa kare nevanhu vakawanda. Mwari vane ngoni hurusa uye vane ruenzaniso rukurusa kudarika zvatinokwanisa kunzwisisa. Uye vana vaMwari vane magumo ekusingaperi akanaka zvinoshamisa kupfuura zvatingakwaisa kufungidzira.

Ona Saints, 1:147–50; “The Vision,” inowanikwa muRevelations in Context, 148–54.

Mazano eKudzidza Kumba uye kuChechi

Dzidziso neZvibvumirano 76

Ruponesi rwunouya kuburikidza naJesu Kristu, Mwanakonama waMwari.

Chikamu 76 chinoburitsa chokwadi chakakosha pamusoro pemagumo edu ekusingaperi, asi zvinenge zvisina kuzara kutaura kuti chakazarurwa ichi chiri pamusoro pehumambo hutatu hwekubwinya kana kunyangwe kungova pamusoro pechirongwa cheruponeso. Zvazviri chaizvo ndezvekuti chikamu 76 chiri pamusoro paJesu Kristu, uyo anoita kuti chirongwa chaMwari cheruponeso neumambo hwokusingaperi zvedu zvikwanisike. Apo paunoverenga, ungangotsvaga mashoko kana ndevo dzinotsanangura hukama huri pakati paJesu Kristu nevanhu vanogara nhaka yeumambo hwekubwinya hwakasiyana. Pamwe chati yakaita seinotevera ingakwanisa kukubatsira kunyora pasi izvo zvaunowana.

Umambo hwekubwinya	Ukama naJesu Kristu	Maropafadzo ekusingaperi
Umambo hwekubwinya Seresitiyaro (ndima 50–70, 92–96)	Ukama naJesu Kristu Vakagamuchira uchapupu hwaJesu Vakaita nekuchengeta zvibvumirano Naye	Maropafadzo ekusingaperi Vakashanangurwa kubva kuzvivi Kukunda kuburikidza nerutendo
Umambo hwekubwinya Terrestriya (ndima 71–79, 97)	Ukama naJesu Kristu	Maropafadzo ekusingaperi
Umambo hwekubwinya Teresitiyaro (ndima 81–90, 98–106, 109–12)	Ukama naJesu Kristu	Maropafadzo ekusingaperi

Chii chaunokurudzirwa kuita kuti usimbise ukama hwako neMuponesi?

Apo Wilford Woodruff paakaverenga chiratidzo ichi akati, “Ndakanzwa kuda Ishe zvakanyanya kupfuura zvandakambobvira ndaita muupenyu hwangu” (ona “Manzwi eKudzorerwa: Uchapupu ‘hweChiratidzo’”). Chii chaunodzidza pamusoro paJesu Kristu kubva mundima 1–5, 20–24, 39–43, 107–8 chinokukonzera kuti unyanye kuMuda?

Onawo 1 Petro 3:18–19; 4:6; Dallin H. Oaks, “What Has Our Savior Done for Us?,” Liahona, Chivabvu 2021, 75–77; “I Stand All Amazed,” Hymns, nhamba 193.

Nangisa pfungwa kuna Baba Vokudenga, Jesu Kristu, nedzidziso Dzavo. Panezvose zvatinokwanisa kudzidza mumagwaro matsvene, zvokwadi zvakakosha zvikuru zvinotibatsira kuvaka rutendo muna Baba Vokudenga naJesu Kristu, kutendeuka, kuita nekuchengeta zvibvumirano Navo, uye nokugamuchira Mweya Mutsvene. Kunyangwe zvazvo zvingava zvinonakidza kuenzanisa kana kuongorora mafungiro kana maitiro evanhu vanozogamuchira umambo hwakasiyana hwekubwinya, zvakanyanya kukosha kunangisa pfungwa pana Baba Vokudenga neMuponesi. Zvose zvaVanoita kutigadzirira kubwinya ikoko zvinozotiita kuti titendeukire kwaVari.

Mumupanda uyu, Joseph Smith akaona chiratidzo chakanyorwa muDzidziso neZvibvumirano 76.

Dziziso neZvibvumirano 76:5–10, 114–18

Ndinokwanisa kunzwisisa chido chaMwari “kuburikidza nesimba reMweya Mutsvene.”

Hadzisi dzose nhengo dzeChechi dzakagamuchira zviri nyore zvakazarurwa zviri muchikamu 76, nokuti zvaidzidzisa kuti vanhu vangangoita vose vaizoponeswa uye votambira rimwe danho rekubwinya. Seumenzaniso, Brigham Young akati: “Tsika dzangu dzaiva idzodzo, zvekuti apo Chiratidzo pachakauya pakutanga kwandiri, zvaipokana uye zvichipikisana nedzidzo yangu yekare.” Ndikati, Chimbomira. Handina kuzviramba; asi handina kukwanisa kuzvinzwisisa.” Akatsanangura kuti “ndakafunga nokunamata, kuverenga nokufunga, kusvikira ndaziva nokunzwisisa zvizere ini pachangu” (“muThe Vision,” muRevelations in Context, 150). Chii chaunodzidza kubva kuchiitiko chake icho chinokwanisa kukubatsira apo Mwari pavanozarura zvinhu zvakasiyana nemanzwisisiro ako parizvino? Chii chaunodzidza pamusoro paMwari muDzidziso neZvibvumirano 76:5–10, 114–18? Ndima idzi dzinodzidzisa chii pamusoro pekuti ungakwanisa kunzwisisa sei “zvinofadza chido [chaMwari]”? (ndima 7).

Dzidziso neZvibvumirano 76:39–44, 50–70

Kusimudzirwa kumusoro-soro ndiyo mhando yakakwirira zvikurusa yeruponeso .

Dzidziso neZvibvumirano 76:39–44 dzinotsanangura revo yose yeruponeso. Ndima 50–70 dzinotsanangura kusimudzirwa kumusoro-soro, rumwe rudzi rweruponeso. Unongatsanangura sei musiyano uri pakati peruponeso nekusimudzirwa kumusoro-soro? Ibasa ripi reMuponesi mune zvose zviri zviviri. Chii chaunowana mundima idzi icho chinokukurudzira kuti utsvage kusimudzirwa kumusoro-soro?

Onawo Johane 3:16–17; Dzidziso neZvibvumirano 132:20–25.

Dzidziso neZvibvumirano 76:50–70, 92–95

Baba vangu Vokudenga vanoda kuti ndigamuchire upenyu hwekusingaperi muumambo hweseresitiyaro.

Wakambozvibvunza here—kana kunetseka—pamusoro pekuti unokwanisa here kuva rudzi rwemunhu achagamuchira kubwinya kweseresitiyaro, sezvakatsanangurwa muDzidziso neZvibvumirano 76:50–70, 92–95? Kunyangwe zvazvo zvakakosha kuziva zvinotarisirwa naMwari kwatiri, fungawo pamusoro pekutarisa mundima idzi zvatakaitirwa naMwari—uye zvavarikuita—kutibatsira kuti tizove saIvo. Sei uchifunga kuti kuedza kwako kwakakosha kwaVari?

Chiratidzo ichi chekubwinya kweseresitiyaro chinoshandura sei nzira yaunoda kurarama nayo upenyu hwako hwezuva nezuva?

Onawo Mosesi 1:39; J. Devn Cornish, “Am I Good Enough? Will I Make It?,” Liahona, Mbudzi 2016, 32–34.

­

Mazano eKudzidzisa Vana

Dzidziso neZvibvumirano 76:24

Tose tiri vana vaMwari.

• Kubatsira vana vako kunzwisisa kwaniso yehumwari yavo, unokwanisa kuvataridza mifananidzo yevana nevabereki vavo. Munokwanisa zvino kuverenga Dzidziso neZvibvumirano 76:24 uye mogoverana kuti sei muchifara kuziva kuti tose tiri “vanakomana nevanasikaka kuna Mwari.”

• Munokwanisawo kuimba pamwechete rumbo rwekuti, “Ndiri Mwana waMwari” (Nziyo neDzevana Vadiki, 112) uye wokoka vana vako kuti vanongedzere kwavari ivo apo pavanoimba panoti “Ndiri.” Zvino imbai zvakare rumbo rwacho, muchitsiva “Ndiri” “naUri” muchinongedzera kune mumwe munhu.

Dzidziso neZvibvumirano 76:5, 41–42, 69

Jesu Kristu ndiye Muponesi wangu.

• Funga pamusoro pekuita mutambo nevana vako wenyaya umo mumwe munhu maanobvunza kuti, “Chii chandakaitirwa naJesu Kristu?” Iwe nevana vako munokwanisa kutsvaka mhinduro dzingangovapo mundima 5, 41–42, kana 69 muchikamu 76. Munokwanisawo kuimba rumbo rwekuti, “He Sent His Son,” Children’s Songbook, 34–35. Tingakwanisa sei kuratidza ruvongo rwedu rweizvo Muponesi zvaakatiitira?

Chikamu chakabva kuSuffer the Children [Tenderai Vana], naJ. Kirk Richards

Dzidziso neZvibvumirano 76:62

Baba Vokudenga vanoda kuti ndidzokere kunogara Navo nariinhi nariinhi.

• ­­ Ita kuti vana vako vagovere pfungwa dzavo uye manzwiro avo pamusoro pezvazvingazova zvakaita kugara naBaba Vokudenga muumambo hweseresitiyaro.

  Chapter 26: The Three Kingdoms of Heaven: 16•February 1832

• Unokwanisawo kuverenga Dzidziso neZvibvumirano 76:62 uye wokoka vana vako kudhirowa mifananidzo yavo ivo vaina Baba Vokudenga naJesu Kristu muumambo hweseresitiyaro (ona peji yechiitwa yevhiki rino).

Dzidziso neZvibvumirano 76:12, 15–19, 114–16

Kunzvera magwaro matsvene kunokwanisa kundibatsira “kunzwisisa zvinhu zvaMwari.”

• Unokwanisa kukoka vana vako kuverenga ndima 15–19 kuti muwane izvo Joseph Smith naSidney Rigdon zvavaiva vachiita apo pavakaona chiratidzo chiri muDzidziso neZvibvumirano 76. Taurira vana vako pamusoro penguva iyo yawakatambira femero uchiverenga magwaro matsvene, uye wobvunza vana vako kana vakambova nezviitiko zvakafanana neichi.

­

Glory by Degrees [Kubwinya muMatanho], naAnnie Henrie Nader