“Chikunguru 14–20: ‘Ndinozokutungamirirai’: Dzidziso neZvibvumirano 77–80,” Huyai, Munditevere—Bhuku reKumba uye kuChechi: Dzidziso neZvibvumirano 2025 (2025)
Dzidziso neZvibvumirano 77–80,” Huyai, Munditevere—Bhuku reKumba uye kuChechi: 2025
Going Home [Kuenda Kumba], naYongsung Kim
Chikunguru 14–20: “Ndinozokutungamirirai”
Dzidziso neZvibvumirano 77–80
Pasi pemakore maviri mushure mekunge Chechi yaJesu Kristu yadzorerwa, yakanga yava nenhengo dzinodarika 2000 uye ichikura nekukurumidza. Muna Chivabvu 1832, Joseph Smith akasangana nevamwe vatungamiri veChechi kuti “vakurukure nezve nyaya dzeChechi” dzaiva: kudikanwa kwekushambadza zvakazarurwa, kutenga nzvimbo yekuunganira, uye nekutaririra varombo (ona Dzidziso neZvibvumirano 78, musoro wenyaya wechikamu). Kuti vazadzikise zvidikanwi izvi, Ishe vakadaidza vatungamiri veChechi vashoma kuti vaumbe United Firm, chikwata chaizobatanidza kuedza kwavo kwekuti “vasimudzire basa” raIshe (ndima 4) munharaunda idzi. Asi kunyangwe munyaya dzekuronga zvinhu dzakadayi, Ishe vakanangisa pfungwa pazvinhu zvekusingaperi. Pakupedzisira, chinangwa chemushini wekudhinda kana chedura—sezvimwe zvinhu zvose muumambo hwaMwari—ndechekugadzirira vana Vavo kuti vagamuchire “nzvimbo munyika yeseresitiyaro” uye “upfumi hwekusingaperi”(ndima 7, 18). Uye kana maropafadzo iwayo akaoma kunzwisisa ikozvino, mukati mebishi-bishi reupenyu hwezuva nezuva, Vanotisimbisa kuti “Ivai makafara, nokuti ndinozokutungamirirai” (ndima 18).
Mazano eKudzidza Kumba uye kuChechi
Mwari vanopa ruzivo kuvanhu vanorwutsvaga.
Apo Joseph Smith naSidney Rigdon pavaishanda mukududzirwa kwakafemerwa kweBhaibheri, vakanga vaine mibvunzo pamusoro pebhuku raZvakazarurwa, sezvinoitawo vanhu vazhinji. Uye sekunyatsoziva kwaiita Joseph kuti, apo paanoshaya ungwaru, aikwanisa kubvunza kuna Mwari. Nzwisiso dzaakawana dziri muDzidziso neZvibvumirano 77. Apo paunoveranga chikamu ichi, funga pamusoro pekunyora pasi nzwisiso dzako muzvitsauko zvinoenderana zviri mubhuku raZvakazarurwa. Chii chaunodzidza kubva mukunzvera kwako pamusoro pekugamuchira zvakazarurwa?
Translation of the Bible [Dudziro yeBhaihberi], naLiz Lemon Swindle
United Firm yaiva chii?
United Firm yakamiswa kutaririra nyaya dzekushambadza nedzebhizimisi dzeChechi muOhio neMissouri. Yaisanganisira Joseph Smith, Newek K Whitney, nevamwe Vatungamiri veChechi avo vakabatanidza zviwanikwa zvavo kuti vazadzikise zvidikanwi zvepanyama zveChechi yaikura. Zvinosuwisa ndezvekuti, United Firm yakawira muchikwereti uye ikavharwa muna 1834 apo zvikwereti pazvakange zvisisakwanisike kubhadharwa.
Onawo “Newel K. Whitney and the United Firm,” in Revelations in Context, 142–47; Church History Topics, “United Firm (‘United Order’),” Gospel Library.
Dzidziso neZvibvumirano 78:1–7
Ndinokwanisa kubatsira “kusimudzira basa” raKristu neChechi Yake.
Ishe vakataurira Joseph Smith nevamwe Vatungamiri veChechi kuti kuchengeta dura nemushini wekudhinda zvaizobatsira “kufambisa mberi basa, iro ramakatambira” (Dzidziso neZvibvumirano 78:4.). Chii chaungati “ibasa” reChechi yeMuponesi? Fungisisa izvi apo paunoverenga Dzidziso neZvibvumirano 78:1-7 Ndedzipi dzimwe nzira dzakasiyana-siyana idzo dzaungakwanisa kubatsira kusimudzira basa iri—kusanganisira mumhuri yako?
Onawo General Handbook, 1.2.
Dzidziso neZvibvumirano 78:17–18
Ishe Vanozonditungamirira.
Sei uchifunga kuti Ishe dzimwe nguva vanodaidza vateveri Vavo kuti “vana vadiki”? (Dzidziso neZvibvumirano 78:17). Ndepapi pawakambonzwa kuita semwana mudiki, pamwe nekuda kwechimwe chinhu “chausati wanzwisisa pari zvino” kana “chausingakwanise kutakura”? (ndima 17–18). Chii chaunowana mundima idzi chinokwanisa kukubatsira “kuva unofara” (ndima 18) munguva dzakadai? Funga kutsvaga mufananidzo wako iwe apo pawakanga uri mudiki, uye wofungisisa makuriro awaita pane zvepamweya kubva panguva iyoyo. Kana kuti funga nezvechimwe chinhu chakanga chakakuomera apo pawaiva muduku asi chava nyore iyezvino. Munzira dzipi idzo Baba Vokudenga dzavachirikuda kuti uve semwana? (ona Mosaya 3:19). Vari “kuku[tungamira]”sei?
Ndinokwanisa kugamuchira zvinhu zvose ndiine ruvongo.
Kuti ugadzirire kunzvera Dzidziso neZvibvumirano 78:19, unokwanisa kuita mudorongodzwa wezvinhu zvakanaka zvaitika kwauri nhasi. Zvino woita mudorongodzwa wezvinhu zvisinganyatsoratidzika semaropafadzo kwauri. Fungisisa mudorongodzwa uyu apo paunoverenga Dzidziso neZvibvumirano 78:19. Zvinoita mutsauko upi muupenyu hwako kana ukagamuchira “zvose zvinhu” neruvongo—kunyangwe zvinhu zvingangova zvisingaratidzike semaropafadzo?
Kuti udzidze zvakawanda pamusoro pekuti ruvongo kuna Mwari rwunokwanisa sei kushandura upenyu hwako, wongorora zvinyorwa zvitsvene izvi uye woita mudorongodzwa wezvokwadi zvaunowana: Pisarema 107:8–9; Ruka 17:11–19; VaFiripi 4:6–7; Mosaya 2:19–24; Aruma 34:38; 37:37; Dzidziso neZvibvumirano 46:32; 59:7, 15–21.
Funga pamusoro pekutsvakurudza mushoko raMutungamiri Dieter F. Uchtdorf rinoti “Grateful in Any Circumstances” (Liahona, Chivabvu 2014, 70–77) kuti uwane rairo pamusoro pemavongero okuita. Unokwanisa kutsvaga rairo imwecheteyo muvhidhiyo inoti “President Russell M. Nelson on the Healing Power of Gratitude” (Gospel Library). Ruvongo rwunoshandura sei hukama hwako naJesu Kristu?
President Russell M. Nelson on the Healing Power of Gratitude
In his 96 years, President Russell M. Nelson of The Church of Jesus Christ of Latter-day Saints has seen many trials. But he says there's a simple remedy to help us find joy in hard times—gratitude.
Tsvakurudza uye wogovera. Kana wapuwa basa rokudzidzisa, tsvaka nzira dzekubatsira vanhu kutsvakurudza mumagwaro matsvene kana mumashoko evaporofita—vari voga kana kuti mumapoka madiki—uye vogovera zvavanodzidza. Semuenzaniso, muchiitwa chino unokwanisa kupa munhu woga woga kana boka chikamu cheshoko reMutungamiri Uchtdorf wovakumbira kuti vagovere mashoko kana mutsara wavanonzwa kuti unotsanangura muchidimbu zvavakadzidzisa.
Onawo “Verenga Zvikomborero Zvako,” Nziyo neDzevana Vadiki, nhamba 14; Topics and Questions, “Gratitude,” Gospel Library.
Daidzo yekushandira Mwari yakakosha kupfuura uko kwandinoshandira.
Maererano neDzidziso neZvibvumirano 80, Gosa David A. Bednar vakadzidzisa kuti, “Pamwe chimwe chezvidzidzo zvatiri kudzidziswa neMuponesi muzvakazarurwa zvino ndechekuti basa rekushanda muneimwe nzvimbo rinodikanwa uye rakakosha asi harina kunyanya kukosha sedaidzo yacho yekushanda” (“Called to the Work,” Liahona, Chivabvu 2017, 68). Zviitiko zvipi zvakakubatsira kudzidza kuti mashoko aGosa Bednar ndeechokwadi? Ndezvipi zvimwezve zvidzidzo zvaunokwanisa kuwana muDzidziso neZvibvumirano 79-80 zvingakwanisa kubatsira mumwe munhu uyo achangotambira daidzo itsva?
Mazano eKudzidzisa Vana
Mwari vakasika zvisikwa zvose zviri panyika.
-
Apo iwe nevana vako pamunoverenga Dzidziso neZvibvumirano 77:2 pamwechete, mungangotarisa mifananidzo yemhuka, kusanganisira twumbuyu neshiri. Vana vako vanokwanisa kunongedzera kumifananidzo yacho apo paunoverenga mashoko okuti “mhuka,” “zvinhu zvinokambaira,” uye “shiri dzemudenga.” Goveranai mabatsirirwo amunoitwa nezvisikwa zvaMwari kuti munzwe rudo Rwavo.
Mwari vakasika zvisikwa zvose zviri panyika.
Ndinokwanisa kubatsira “kusimudzira basa” raJesu Kristu.
-
Kuti ubatsire vana vako kufunga pamusoro pemabasa avo mubasa raIshe, funga pamusoro pekuverenga navo Dzidziso neZvibvumirano 78:4 kuti vaone “basa” iro “ratakatambira” (ratakabvuma kana ratakasarudza kutsigira) apo patakabhabhatidzwa. Vabatsire kutarisa mundima dzemagwaro matsvene dzakaita seidzi kuti vawane mhinduro dzinobvira: Mosaya 18:8–10; Dzidziso neZvibvumirano 20:37; Mosesi 1:39. Vana vako vangangonakidzwa nekuita mutambo wemabatsiriro avangaita mubasa raIshe. Semuenzaniso, zvinoratidzika sei “kutakurirana mitoro” kana “kutora [patiri] zita raJesu Kristu”? Izvi “zvinofambisa mberi basa” raKristu sei?
Ndinokwanisa kugoverana navamwe izvo zvandiinazvo.
-
Kudzidzisa izvo zvinoreva kuva “takaenzana muzvinhu zvepanyika” (ndima 6), unokwanisa kupa vana vako mifananidzo yevanhu vanoshaiwa (vanenzara, vakakuvara, kana kuti vanotonhorwa) uye zvinhu zvingabatsira (zvakaita sezvekudya, bhandiji, kana gumbeze). Zvino vana vako vanokwanisa kufananisa mifananidzo yevarikutambura nemifananidzo yezvinhu zvingabatsira. Chii chatingakwanisa kugovera kuti tibatsire vanhu vanoshaiwa?
-
Kuti muwane imwe nzwisiso yechikamu 78, verenga nevana vako mitsara iripasi pemifananidzo miviri yekutanga “yeChapter 28: The Prophet Joseph Goes to Missouri Again” (muDoctrine and Covenants Stories, 108). Zvino vana vako vanokwanisa kunyepedzera kuti vari kubatsira mumwe munhu kuvaka imba, kugovera zvekudya, kana kushandira muneimwe nzira.
2:39Chapter 28: The Prophet Joseph Goes to Missouri Again: March–May 1832
Jesu Kristu Achanditungamirira.
-
Zvingava zvinonakidza kuti vana vako vataure pamusoro pezvazvinoreva kuva mutungamiri uye zvino votungamira chiitwa. Mushure mekuverenga pamwechete Dzidziso neZvibvumirano 78:18, munokwanisa kukurukura nguva idzo dzatinoda Jesu kuti atitungamirire. Funga pamusoro pekuimba rumbo rwakaita serwokuti, “I Will Walk with Jesus” (Gospel Library).
Ndinokwanisa kugamuchira “zvinhu zvose neruvongo.”
-
Verenga nevana vako Dzidziso neZvibvumirano 78:19 kuti muwane zvakavimbiswa naIshe kuvanhu vanovonga. Batsira vana vako kunzwisisa kuti “zvakapetwa kazana” zvinorevei, pamwe kuburikidza nekuvaratidza chinhu chiduku uye zana rechinhu chimwechetecho. Pamwe vanokwanisa kudhirowa mifananidzo yezvinhu zvavakagamuchira kubva kuna Mwari “neruvongo.”
Godʼs Garden [Bindu raMwari], naSam Lawlor