Matailalai mai Na Vakalesuimai ni Matabete i Melikiseteki, mai vei Liz Lemon Swindle

28 ni Jiulai–3 ni Okosita: “Na Kaukauwa ni Bula Vakalou”

Vunau kei na Veiyalayalati 84

Tekivu mai na gauna a vakalesui mai kina na matabete ena 1829, era sa vakalougatataki na Yalododonu taumada ena kaukauwa tabu ni Turaga. Era a papitaiso, vakadeitaki, ka kacivi me ra veiqaravi ena lewa ni matabete, me vakai keda nikua. Ia na nodra rawa ni vakayagataka na kaukauwa ni matabete e sega ni tautauvata me vaka na kena kilai vakavinaka sara, ka tu eso tale na ka a vinakata na Kalou me ra kila na Nona Yalododonu—vakabibi na veivakalesui mai ni cakacaka vakalotu ni valetabu ka roro tiko mai. Na ivakatakila ni matabete ni 1832 , ena gauna oqo na Vunau kei na Veiyalayalati 84, a vakarabailevutaka na nodra rai na Yalododonu se cava sara mada na matabete. Ka na rawa ni vakayacora vakakina vei keda nikua. Me ilutua, e vuqa na ka me vulici me baleta na kaukauwa vakalou ka taura tu na “idola ni nona kilai na Kalou,” ka vakaraitaka “na kaukauwa ni bula vakalou,” ka vakarautaki keda oqori me da “raica rawa na … matana na Kalou, io na [Tamada], me qai bula tiko” (tikina e 19–22).

Vakasama eso ni Vuli ena iTikotiko vakakina ena Lotu

Vunau kei na Veiyalayalati 84:17–32

Au sa rawata na kaukauwa ni matabete kei na veivakalougatataki ni Kalou.

Ni o vakananuma na vosa na matabete, na cava na nomu vakasama? E vakayarayarataka vakacava na nomu bula na kaukauwa ni matabete ni Kalou?

Ni o vakasamataka oti vakatitobu na taro oqo, sa rawa mo vulica na Vunau kei na Veiyalayalat 84:17–32, ka vaqara na veika e vinakata na Kalou mo kila me baleta na Nona kaukauwa ni matabete. Navuca na sala e rawa ni o vakayagataka kina na veitikina oqo mo vakamacalataka vua e dua na matabete kei na kena inaki.

E dua na ka o na kunea oya ni mai na cakacaka vakalotu ni matabete “ena vakatakilai mai [kina] na kaukauwa ni bula vakalou” (raica na tikina e 19–21). Sa rawa mo vola na cakacaka vakalotu ni matabete o sa vakaitavi kina (na lisi ena iVoladusidusi Raraba, 18.1, 18.2, e rawa ni veivuke). Era sa kauta mai vakacava na kaukauwa ni Kalou ki na nomu bula—na veicakacaka vakalotu oqo—kei na kena veiyalayalati veisemati? Ena vakacava tu beka na nomu bula ni sega o ira?

A vakavulica o Peresitedi Russell M. Nelson: “Na yalewa kei na tagane kece sara e veiyalayalati kei na Kalou ka rokova na veiyalayalati oqori, ka vakaitavi kilikili ena veicakacaka vakalotu ni matabete, ena lutuki koya mai vakadodonu na mana ni Kalou” (“iYau Vakayalo,” Liaona, Nove. 2019, 77). Vakasamataka mo vulica na itukutuku nei Peresitedi Nelson, ka vakaraica na sala eso o rawa ni “kauta mai kina na kaukauwa ni iVakabula ki na [nomu] bula.”

Raica talega na Vunau kei na Veiyalayalati 25:10, 13, 15; 121:34–37, 41–46; Topics and Questions, “Priesthood,” “Joseph Smith’s Teachings about Priesthood, Temples, and Women,” Gospel Library; iVoladusidusi Raraba, 3.6, Gospel Library.

Vunau kei na Veiyalayalati 84:31–44

Na matabete e dau rawati ena bubului kei na veiyalayalati.

Na bubului kei na veiyalayalati ni matabete (raica na Vunau kei na Veiyalayalati 84:31–44) e tiko na kena ivakavakayagataki digitaki me baleti ira na luvena tagane na Tamada Vakalomalagi era tabaki ki na dua na itutu ni matabete, ia e vuqa na veivakalougatataki yalataki ena veitikina oqo sa vakarautaki tu vei ira kece na luve ni Kalou. Na cava soti na yalayala eso oqo, kei na cava e kerea vei keda na Kalou me da cakava me da ciqoma kina?

A vakavulica o Elder Paul B. Pieper: “E ka taleitaki ni ena bubului kei na veiyalayalati ni matabete [raica na Vunau kei na Veiyalayalati 84:31–44], e vakayagataka na Turaga na vosa na rawata kei na ciqoma. E sega ni vakayagataka o Koya na vosa na tabaka. Sa ikoya ena loma ni valetabu na turaga kei na marama—sa—rawata vata kina ka ciqoma na veivakalougatataki kei na kaukauwa ni Matabete i Eroni kei na Matabete i Melikiseteki ruarua” (“Revealed Realities of Mortality,” Ensign,, Janu. 2016, 21).

Ni o vulica na Vunau kei na Veiyalayalati 84:31–44, vakasamataka vakatitobu na ibalebale ni “rawata” kei na “ciqoma” na matabete. E duidui vakacava oqo mai na tabaki ki na dua na itutu ni matabete? Na cava tale e sureti iko kina na Turaga mo ciqoma ena veitikina oqo? O sa cakava tiko beka vakacava qori?

Na cava beka o raica e vakauqeti iko mo yalodina vakalevu cake ena ciqomi ni iVakabula, na Tamana, ira na Nona italai, kei na Nona kaukauwa ni matabete?

Raica talega na Vunau kei na Veiyalayalati 121:36–46.

Vunau kei na Veiyalayalati 84:43–61

Na bula ena vosa ni Kalou e kauta mai na rarama kei na dina ki na noqu bula.

Na dina cava soti o raica ena Vunau kei na Veiyalayalati 84:43–61 e vukea mo kila na vuna o gadreva kina mo dau vulica vagumatua na vosa ni Kalou? Raica na kedrau veibasai na rarama kei na butobuto ena veitikina oqo; na sala cava e sa kauta mai kina na rarama, dina, kei “na Yaloi Jisu Karisito” ki na nomu bula na nomu “gumatua ni muria na veivosa ni bula tawamudu”? (tikina e 43, 45).

Raica talega na 2 Nifai 32:3.

Veidutaitaka na ivakavuvuli ni kosipeli ki na veika kilai levu. E rawa beka ni o vakasamataka e dua na vosa vakatautauvata ka na vakaraitaka na dina eso ena tikina e 43–44? Me kena ivakaraitaki, e vakamuria vakacava na ituvatuva kece sara ena dua na icakacaka ni kakana me vaka na bula “ena vosa kecega … [ni] Kalou”?

“Dou gumatua ni muria na veivosa ni bula tawamudu.”

Vunau kei na Veiyalayalati 84:62–91

Na Turaga ena tiko vata kei au ni’u tiko ena Nona veiqaravi.

Ni o wilika na veitikina oqo, sa rawa ni o vakaraica na sala eso a kaya kina na Turaga ni na tokoni ira na Nona italai. Ena yaga vakacava beka na yalayala eso oqo ki na cakacaka sa kerei iko o Koya mo cakava? Me ivakaraitaki, sa vakayacori beka vakacava na vosa ni yalayala ena tikina e 88 ena nomu bula?

Vunau kei na Veiyalayalati 84:106–110

Sa rawa ki na tamata kecega me cau ki na cakacaka ni Kalou.

Na cava o vulica mai na veitikina oqo me baleta na sala e vakayacora kina na Turaga na Nona cakacaka? Na ivakasala kei na veivakalougatataki cava o kunea kina? O na vakasamataka tale beka ga na sala o sa “vakatataki cake kina ena yalomalua” baleta ni o a veiqaravi vata kei na dua ka “vakasinaiti ena Yalo,” oka kina o ira na lewe ni nomu matavuvale.

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 84:4–5

Na cakacaka vakalotu ni valetabu e vukei au ena noqu vakavakarau me’u laki bula vata tale kei Tamada Vakalomalagi.

• Me vukei ira na luvemu me ra nanamaki ki na lako ki na valetabu, e rawa ni o bulia e dua na qito iba mai na dua na iyaloyalo ni dua na valetabu. Ena daku ni veitikina yadua, e rawa ni o vola kina e dua na ka eda cakava ena valetabu, me vaka na papitaiso ena vukudra na tubuda, vauci ki na noda matavuvale, kei na caka veiyalayalati kei na Kalou. Wilika vata kei ira na luvemu na Vunau kei na Veiyalayalati 84:4–5 ka kerea me ra vakarogoca na ka a vakarota na Turaga me ra tara na Yalododonu. Ni o ni biuta vata tiko na iba kei ira na luvemu, wasea vata kei ira na veika tale eso eda rawa ni cakava me da vakavakarau ni curuma na valetabu.

Vunau kei na Veiyalayalati 84:19–22

Au rawa ni ciqoma na kaukauwa ni Tamada Vakalomalagi ena cakacaka vakalotu ni matabete.

• Me vukei ira na luvemu me ra kila na cava na cakacaka vakalotu, navuca mo raica vata kei ira na iyaloyalo ni vica na cakacaka vakalotu ni matabete, me vaka na iVola ni iYaloyalo Vakosipeli, naba 103–8, se na tabana ni itaviqaraviena macawa oqo. Kerei ira na gone me ra vakamacalataka na ka e yaco tiko ena iyaloyalo yadua. Mo ni qai wilika vata na Vunau kei na Veiyalayalati 84:19–22. Na cava e vinakata kina na Tamada Vakalomalagi me da ciqoma na cakacaka vakalotu eso oqo? Tukuna vei ira na luvemu na nomu vakila na kaukauwa ni Kalou ena vuku ni cakacaka vakalotu o sa ciqoma kei na veiyalayalati o sa cakava. (Raica talega na “Kaukauwa ni Matabete, Lewa, kei na iDola” ena ikuri ni ivakamacala A se na ikuri ni ivakamacala B.)

Vunau kei na Veiyalayalati 84:77

Au sa itokani i Jisu ni’u muri Koya tu.

• Ni wiliki vata oti na Vunau kei na Veiyalayalati 84:77 tarogi ira na luvemu se cava na kena ibalebale mo dua na itokani. O na rairai veivosakitaka beka me baleta na nomu itokani vinaka eso. E vakaraitaka vakacava vei keda o Jisu ni vinakata o Koya me da Nona itokani? Eda na vakaraitaka vakacava ni da vinakata talega? E dua na sere me vaka na “Meu Na Muri Jisu Tu” (iVolanisere ni Gonelalai, 78-79) ena rawa ni veivuke ena veivosaki oqo.

Vunau kei na Veiyalayalati 84:88

Sa dau vukei ira na Nona italai na Tamada Vakalomalagi.

• Era na taleitaka beka na luvemu me ra rogoca na sala era a vukei iko kina na daukaulotu, nomu matavuvale, se o ira na nomu qase e liu me ciqoma na kosipeli. Mo qai wilika e dua na yalayala digitaki a cakava na Turaga vei ira na daukaulotu ena Vunau kei na Veiyalayalati 84:88. De rawa me ra vakasamataka na luvemu na ivalavala eso e salavata kei na tikina oqo. Tukuna e dua na gauna o a qarava voli kina na Turaga ka vakila ni sa tiko vata kei iko o Koya, me vaka e vakamacalataki ena tikina 88. Vukei ira na gone me ra vakasamataka na sala eso e rawa kina ni ra sa daukaulotu ena gauna oqo. Vakadinadinataka ni sa dau vukei keda na Tamada Vakalomalagi me da kila na ka me da tukuna ni da veivosakitaki Jisu Karisito kei ira tale eso.

Me baleta na vakasama tale eso, raica na ilavelave ni mekasini na iTokani ni vula oqo.

Valetabu e Roma Itali