Nkyerɛmu firi Melkisedek Asɔfodie no Mmaeɛ bio,, ɛfiri Liz Lemon Swindle hɔ

Kutawonsa 28–Ɔsanaa 3: “Nyamesom pa Tumi”

Nkyerɛkyerɛ ne Apam 84

Firi berɛ a wɔsan de asɔfodie no maae wɔ 1829 no, Awurade tumi kronkron no ahyira kane Ahotefoɔ no. Wɔnam asɔfodie tumidie so bɔɔ wɔn asu, hyɛɛ wɔn den, na wɔfrɛɛ wɔn sɛ wɔnsom, te sɛ deɛ ɛteɛ ɛnnɛ yi. Nanso worenya asɔfodie tumi hokwan ne worete aseɛ yie nyɛ adekorɔ, na na Onyankopɔn wɔ bebree a Ɔpɛ sɛ N’Ahotefoɔ te aseɛ—nkanka ne tɛmpol ayɛyɛdeɛ mmaeɛbio a na ɛreba. 1832 asɔfodieho adiyisɛm, seesei Nkyerɛkyerɛ ne Apam 84, trɛɛ Ahotefoɔ no anisoadehunu mu fa deɛ asɔfodie no teɛ ankasa ho. Na ɛbɛtumi ayɛ saa ara ama yɛn ɛnnɛ. Nokorɛ ne sɛ, pii na ɛwɔ hɔ a yɛbɛsua afa ɔsoro tumi a ɛkura “Onyankopɔn ho nimdeɛ safoa,” a ɛda “onyamesom pa tumi,” adi na ɛsiesie yɛn sɛ “yɛbɛhunu Onyankopɔn anim, mpo Agya no, na yɛatena ase” (nkyekyɛmu 19–22).

Nsusuiɛ de ma Adesua wɔ Efie ne Asɔre

Nkyerɛkyerɛ ne Apam 84:17–32

Mewɔ Onyankopɔn asɔfodie tumi hokwan.

Sɛ wodwene asɛmfua asɔfodie, ho a deɛn na ɛba w’adwene mu? Sɛn na Onyankopɔn asɔfodie tumi no nya nkɛntɛnsoɔ wɔ w’abrabɔ so?

Wodwene saa nsɛmmisa yeinom ho wie a, wobɛtumi asua Nkyerɛkyerɛ ne Apam 84:17–32, de ahwehwɛ deɛ Onyankopɔn pɛ sɛ wohunu fa N’asɔfodie tumi ho. Dwene sɛdeɛ wode saa nkyekyɛmu yeinom bɛkyerɛkyerɛ asɔfodie no ne ne botaeɛ ase akyerɛ obi.

Adeɛ baako a wobɛhunu ne sɛ ɛnam asɔfodie ayɛyɛdeɛ so “onyamesom pa tumi da adi” (hwɛ verses 19–21). Ebia wobɛtumi ayɛ asɔfodie ayɛyɛdeɛ a woaka ho ayɛ bi mmoano (mmoano a ɛwɔ Amansan Akwankyerɛ nwoma, 18.1, 18.2, bɛtumi aboa). Sɛn na saa ayɛyɛdeɛ yeinom—ne apam a ɛkeka ho—de Onyankopɔn tumi aba w’abrabɔ mu? Sɛ ɛnka ho a anka sɛn na w’abrabɔ bɛyɛ?

Titenani Russell M. Nelson kyerɛkyerɛɛ sɛ: “Ɔbaa biara ne ɔbarima biara a ɔne Onyankopɔn yɛ apam na ɔkora saa apam no, na ɔde ahoteɛ yɛ asɔfodie ayɛyɛdeɛ no, wɔ Onyankopɔn tumi hokwan tee” (“Honhom mu Ademudeɛ,” Liahona, Obubuo 2019, 77). Dwene ho sɛ wobɛsua Titenani Nelson nkrasɛm, worehwehwɛ akwan a wobɛtumi de “atwe Agyenkwa no tumi aba [wo] abrabɔ mu.”

San hwɛ Nkyerɛkyerɛ ne Apam 25:10, 13, 15; 121:34–37, 41–46; Tinsɛm ne Nsɛmmisa, “Asɔfodie,” “Joseph Smith Nkyerɛkyerɛ fa Asɔfodie, Tɛmpol, ne Mmaa ho,” Asɛmpa nwoma Akoraeɛ; Amansan Akwankyerɛ nwoma,, 3.6, Asɛmpa nwoma Akoraeɛ.

Nkyerɛkyerɛ ne Apam 84:31–44

Wɔde ntam ne apam na ɛgye asɔfodie no.

Asɔfodie no ntam ne apam (hwɛ Nkyerɛkyerɛ ne Apam 84: 31--44) wɔ adebisa sononko ma Ɔsoro Agya mmammarima a wɔhyɛ wɔn asɔfoɔ kɔ asɔfodie diberɛ, nanso nhyira bɔhyɛ a ɛwɔ saa nkyekyɛmu yeinom mu no bebree wɔ hɔ ma Onyankopɔn mma nyinaa. Deɛn ne saa bɔhyɛ yeinom, na deɛn na Onyankopɔn se yɛnyɛ na yɛn nsa nka?

Elder Paul B. Pieper kyerɛkyerɛɛ sɛ: “Ɛyɛ anigyeɛ sɛ wɔ asɔfodie no ntam ne apam mu no [hwɛ Nkyerɛkyerɛ ne Apam 84:31–44], Awurade fa adeyɛ nsɛm nya ne gye. Ɔmfa adeyɛ asɛm hyɛ sɔfoɔ. Tɛmpol mu na mmarima ne mmaa—bɔ mu—nya na wɔgye Aaron ne Melkisedek Asɔfodie nhyira ne tumi nyinaa” (“Revealed Realities of Mortality,” Ensign, Ɔpɛpɔn 2016, 21).

Berɛ a wosua Nkyerɛkyerɛ ne Apam 84:31–44, dwene deɛ “nya” ne “gye” asɔfodie no aseɛ bɛtumi akyerɛ ho. Sɛn na yei yɛ nsonoeɛ firi wɔrehyɛ akɔ asɔfodie diberɛ ho? Deɛn bio na Awurade frɛ wo sɛ gye wɔ saa nkyekyɛmu yeinom mu? Sɛn na woreyɛ no?

Deɛn na wohunu a ɛkanyan wo sɛ yɛ nokwafoɔ yie wɔ Agyenkwa no, N’Agya, N’asomfoɔ, ne N’asɔfodie tumi gyeɛ ho?

San hwɛ Nkyerɛkyerɛ ne Apam 121:36–46.

Nkyerɛkyerɛ ne Apam 84:43–61

Sɛ mede Onyankopɔn asɛm bɔ bra a ɛde hann ne nokorɛ ba m’abrabɔ mu.

Nokorɛ bɛn na wohunu wɔ Nkyerɛkyerɛ ne Apam 84:43–61 a ɛboa ma wote deɛ nti a wohia sɛ wokɔso ara sua Onyankopɔn asɛm no ase? Hyɛ abirabɔ a ɛda hann ne esum ntam wɔ saa nkyekyɛmu yeinom mu nso; sɛn na “nsiyɛ a wode tie ɛniiawieeɛ nkwa nsɛm” no de hann, nokorɛ, ne “Yesu Kristo Honhom” aba w’abrabɔ mu? (nkyekyɛmu 43, 45).

San hwɛ 2 Nephi 32:3.

Fa asɛmpa nnyinasonsɛm toto nneɛma a wonim ho. Wobɛtumi adwene mfatoho bi ho a ɛbɛtumi akyerɛ nokorɛ a ɛwɔ nkyekyɛmu 43–44? Nhwɛsoɔ, sɛn na woredi akwankyerɛ a ɛwɔ aduanenoa bi ho so te sɛ woredi “Onyankopɔn asɛm biara so”?

“Fa nsiyɛ tie ɛniiawieeɛ nkwa nsɛm.”

Nkyerɛkyerɛ ne Apam 84:62–91

Awurade bɛka me ho berɛ a meyɛ N’adwuma.

Berɛ a wokenkan saa nkyekyɛmu yeinom no, wobɛtumi ahunu akwan a Awurade se Ɔbɛboa N’asomfoɔ. Sɛn na saa bɔhyɛ yeinom bɛtumi ayɛ adwuma wɔ adwuma a Ɔse yɛ no mu? Nhwɛsoɔ, sɛn na bɔhyɛ a ɛwɔ nkyekyɛmu 88 no aba mu wɔ w’abrabɔ mu?

Nkyerɛkyerɛ ne Apam 84:106–110

Obiara bɛtumi aboa Onyankopɔn adwuma.

Deɛn na wosua firi saa nkyekyɛmu yeinom mu fa sɛdeɛ Awurade wie N’adwuma ho? Afotuo ne nhyira bɛn na wohunu? Wobɛtumi nso adwene sɛdeɛ woanya “nkɔsoɔ wɔ ɔdwoɔ nyinaa mu” ɛnam sɛ wo ne obi a na ɔwɔ “ahoɔden wɔ Honhom mu,” a nkorɔfoɔ a wɔwɔ w’abusua mu ka ho somee.

Sɛ wopɛ nsusuiɛ bebree a, hwɛ bosome yi Liahona ne De ma Mmabunu Ahoɔden nsɛmma nwoma mu.

Nsusuiɛ de ma Nkwadaa Adekyerɛ

Nkyerɛkyerɛ ne Apam 84:4–5

Tɛmpol ayɛyɛdeɛ boa ma mesiesie me ho sɛ me ne Ɔsoro Agya bɛtena bio.

• Sɛdeɛ ɛbɛboa ma wo nkwadaa ahwɛ kwan sɛ wɔbɛkɔ tɛmpol no, wobɛtumi ayɛ ahintasɛm bi afiri tɛmpol mfonin bi mu. Krataa ketewa biara akyi no, wobɛtumi atwerɛ biribi a wɔyɛ wɔ tɛmpol, te sɛ wɔrebɔ asu ama awufoɔ, wɔresɔ yɛn ne yɛn mmusua ano, ne yɛne Onyankopɔn reyɛ apam. Wo ne wo nkwadaa nkenkan Nkyerɛkyerɛ ne Apam 84:4–5 na ma wɔntie deɛ Awurade hyɛɛ Ahotefoɔ no sɛ wɔnsi. Berɛ a wo ne wo nkwadaa de ahintasɛm no bɔ mu no, mo ne mo ho nkyekyɛ nneɛma a yɛbɛtumi ayɛ de awura tɛmpol mu.

Nkyerɛkyerɛ ne Apam 84:19–22

Mɛtumi afa asɔfodie ayɛyɛdeɛ so agye Ɔsoro Agya tumi.

• Sɛdeɛ ɛbɛboa ma wo nkwadaa ate ayɛyɛdeɛ ase no, dwene ho sɛ wo ne wɔn bɛhwɛ asɔfodie ayɛyɛdeɛ pii, te sɛ Asɛmpa Adwinnie Nwoma, ɛtɔ so 103–8, anaasɛ nnawɔtwe yi dwumadie krataafa. Ma wɔnkyerɛkyerɛ deɛ ɛrekɔso wɔ mfonin biara mu. Afei mobɛtumi abɔ mu akenkan Nkyerɛkyerɛ ne Apam 84:19–22. Adɛn nti na Ɔsoro Agya pɛ sɛ yɛgye saa ayɛyɛdeɛ yeinom? Ka sɛdeɛ woate Onyankopɔn tumi nka ɛnam ayɛyɛdeɛ a wogyeeɛ ne apam a woyɛɛe kyerɛ wo nkwadaa. (San hwɛ “Asɔfodie Tumi, Tumidie, ne Nsafoa” wɔ mmataho A anaasɛ mmataho B.)

Nkyerɛkyerɛ ne Apam 84:77

Meyɛ Yesu adamfo berɛ a medi N’akyi.

• Sɛ mobɔ mu kenkan Nkyerɛkyerɛ ne Apam 84:77 wie a, bisa wo nkwadaa fa sɛdeɛ wɔte adamfoɔ ase ho. Wobɛtumi akasa afa nnamfo pa a woanya ho. Sɛn na Yesu kyerɛ sɛ Ɔpɛ sɛ yɛyɛ Ne nnamfonom? Sɛn na yɛbɛtumi akyerɛ sɛ yɛn nso saa ara? Dwom te sɛ “I’m Trying to Be like Jesus” (Nkwadaa Nnwomnwoma, 78–79) bɛtumi aboa saa nkitahodie yi.

Nkyerɛkyerɛ ne Apam 84:88

Ɔsoro Agya boa N’asomfoɔ.

• Wo nkwadaa ani bɛtumi agye wɔ sɛdeɛ asɛmpatrɛfoɔ boaae maa wo, w’abusua, anaasɛ wo nananom gyee asɛmpa no. Afei mobɛtumi akenkan afa bɔhyɛ sononko a Awurade de maa asɛmpatrɛfoɔ wɔ Nkyerɛkyerɛ ne Apam 84:88. Ebia wo nkwadaa bɛtumi adwene nneyɛɛ bi a ɛne saa nkyekyɛmu yi kɔ ho. Dwene ho sɛ wobɛkyɛ berɛ bi a na woresom Awurade na wotee nka sɛ Ɔka wo ho, sɛdeɛ wɔakyerɛkyerɛ no wɔ nkyekyɛmu 88. Wobɛtumi nso aboa wo nkwadaa ma wɔadwene akwan a wɔbɛtumi ayɛ asɛmpatrɛfoɔ seesei ho. Di adanseɛ sɛ Ɔsoro Agya boa ma yɛhunu deɛ yɛbɛka berɛ a yɛne afoforɔ kasa fa Yesu Kristo ho.

Sɛ wopɛ nsusuiɛ bebree a, hwɛ bosome yi Adamfoɔ nsɛmma nwoma mu.

Rome Italy Tɛmpol