“Nyamavhuvhu 18–24: ‘Musimboti une Vimbiso’: Dzidziso neZvibvumirano 89–92,” Huyai, Munditevere—Bhuku reKumba uye kuChechi: Dzidziso neZvibvumirano 2025 (2025)
Dzidziso neZvibvumirano 89–92,” Huyai, Munditevere—Bhuku reKumba uye kuChechi: 2025
Nyamavhuvhu 18–24: “Musimboti une Vimbiso”
Dzidziso neZvibvumirano 89–92
MuChikoro cheVaporofita, Muporofita Joseph Smith akadzidzisa magosa eIsraeri pamusoro pekuvaka umambo hwaMwari panyika. Vakakurukura zvokwadi zvepamweya, vakanamata pamwechete, vakatsanya, uye vakagadzirira kuparidza vhangeri. Asi paiva nechimwe chinhu pamusoro pemweya waivamo icho chingataridzika sechisina kunaka kwatiri nhasi, uye hachinawo kutaridzika sechakanaka kuna Emma Smith. Munguva yemisangano, varume vaiputa nekutsenga fodya, chinhu icho chakanga chisingashamisi panguva iyoyo, asi fodya iyi yaisvibisa uriri hwemapango kuhwuita hutema uye yaisiya mupanda uchinhuhwa zvikuru. Emma akataura zvinhu zvaimunetsa kuna Joseph, uye Joseph akabvunza Ishe. Mhinduro Yavo yakanga iri chakazarurwa icho chaiva chikurusa kupfuura chiutsi nemavara matema efodya. Chakapa Vatendi, kwezvizvarwa zvakawanda zvaitevera , “musimboti une vimbiso”—vimbiso dzeutano hwenyama, “ungwaru,” uye “upfumi hukuru hweruzivo” (Dzidziso neZvibvumirano 89:3, 19.
Onawo Saints, 1:166–68.
Mazano eKudzidza Kumba uye kuChechi
Ishe vakandipa Shoko reUngwaru kuti rindibatsire kuva neutano mumuviri nemumweya.
Apo magosa muChikoro cheVaporofita pavakatanga kunzwa Joseph Smith achiverenga Shoko reUngwaru, pakarepo “vakakanda zvikwepa zvavo uye zvibimvu zvefodya yekutsenga mumoto” (Saints,, 1:168). Vaida kuratidza chido chavo chekuteerera Ishe. Pamwe “wakatokanda” nechekare kubva muupenyu hwako zvinhu izvo Shoko reUngwaru zvarinokuyambira nezvazvo, asi chii chimwe chaunokwanisa kudzidza kubva muchakazarurwa ichi? Funga pamusoro pemazano aya:
-
Funga nezvechakazarurwa ichi “semusimboti une vimbiso” (ndima 3)—zvokwadi zvisingaperi zvinotungamira mukuita sarudzo. Misimboti ipi yaunowana inokwanisa kutungamira sarudzo dzako. Ndeapi maropafadzo anovimbiswa naIshe? (ona ndima 18–21). Vakazadzikisa sei vimbiso idzodzo muupenyu hwako?
-
Ndeipi mienzaniso yawakaona “yehuipi uye zvirongwa … mumwoyo yevanhu vanorangana” zvinoenderana neShoko reUngwaru? (ndima 4). Pamusoro pechakazarurwa chino, chii chakapuwa naIshe kuti chikubatsire kunzvenga kana kukunda huipi uhwu?
-
Chakazarurwa ichi chinokudzidzisa chii pamusoro paIshe? Shoko reUngwaru rinoenderana sei neDzidziso neZvibvumirano 29:34–35?
-
Chii chaunokurudzirwa kuita kuti utaririre zvirinani muviri wako?
Ungava wakambova nemikana yekutsanangurira vamwe kuti sei uchirarama Shoko reUngwaru—uye ungangovawo nemimwe mikana yakawanda munguva inotevera. Funga pamusoro pemashandisiro aungaita mikana iyi kupupura nezveMuponesi, kuera kwemiviri yedu, nezvimwewo zvokwadi zvepamweya. Kuti uwane mazano, ona “Your body is sacred,” muFor the Strength of Youth: A Guide for Making Choices, 22–29.
Onawo 1 Vakorinte 6:19–20; Thomas S. Monson, “Principles and Promises,” Liahona, Mbudzi 2016, 78–79; Topics and Questions, “Word of Wisdom,” Gospel Library; “The Word of Wisdom,” muRevelations in Context, 183–91; “Addiction,” “Physical Health,” Life Help, Gospel Library.
Principles and Promises
President Monson testifies of the blessings that come as we obey the Word of Wisdom.
Dzidza uye dzidzisa kuburikidza nemisimboti. Panzvimbo pekugadzira mudorongodzwa wezvekuita nezvekusaita, tinokwanisa kurarama nemisimboti yokushandisa kwaniso yokuzvisarudzira uye nerutendo muna Kristu. Semuenzaniso, funga pamusoro pemibvunzo yakamisirwa pamisimboti yakaita seiyi maererano neShoko reUngwaru: Ndeipi misimboti inokwanisa kupa kurudziro kune mumwe munhu anonetsekana nokuteerera Shoko reUngwaru? Misimboti ipi inokwanisa kundinyaradza apo pandinenge ndiine matambudziko ehutano zvisinei nokurarama kwangu Shoko reUngwaru?
Baba Vokudenga vanoda kuti titaririre miviri yedu.
Dzidziso neZvibvumirano 90:1–17
Vatungamiri Vokutanga vane “makiyi eumambo.”
Muchikamu 90, Ishe vakapa mirairidzo pamusoro “pehushumiri nehutungamiri” (ndima 12) hwaJoseph Smith, Sidney Rigdon, uye Frederick G. Williams—nhengo dzezvatava ikozvino kudaidza kuti Hutungamiri Hwekutanga. Chii chaunodzidza pamusoro peHutungamiri Hwekutanga kubva mundima 1–17? Funga pamusoro pekuwongorora mashoko achangopfuura akabva kunhengo dzeHutungamiri Hwekutanga. Vanoita sei kuti vave “vanoronga dzose nyaya dzechechi ino neumambo hwuno”? (ndima 16). Ungakwanisa sei kuratidza kuti hachisi “chinhu chisina basa” kwauri? (ndima 5).
Funga pamusoro pekuimba kana kuverenga mashoko “eCome, Listen to a Prophet’s Voice” (Hymns, nhamba 21) kana rwumwe rumbo pamusoro pevaporofita rwunoenderana nedzidziso dziri mundima idzi. Kushandira kweVatungamiri Vekutanga kwakakubatsira sei kuziva Baba Vokudenga naJesu Kristu?
“Zvinhu zvose zvichashanda pamwechete kuitira zvakanaka [zvangu].”
Fungisisa zviitiko zvipi zvazvo zvawakava nazvo zvinopupura nezve vimbiso yaIshe iri muDzidziso neZvibvumirano 90:24. Funga pamusoro pekunyora pasi zviitiko zvako uye kuzvigoverana nenhengo yemhuri kana mudikanwi—pamwe mumwe munhu anoda simbiso kana kurudziro. Kana paine mamwe maropafadzo auchakamirira, fungisisa zvaungakwanisa kuita kuti urambe wakatendeka apo paunomirira kuona kuti “zvinhu zvose zvichashanda pamwechete kuitira kupunduka kwako.”
Dzidziso neZvibvumirano 90:28–31
Ndiani aiva Vienna Jaques?
Vienna Jaques akazvarwa musi waChikumi 10, 1787, muMassachusetts. Mudzimai werutendo uyo akanga akapfuma zvikuru, Vienna akasangana nevashumiri kekutanga muna 1831. Mushure mokuwana uchapupu hwemweya kuti shoko ravo raiva rechokwadi, akaenda kunosangana neMuporofita muKirtland, Ohio, uko kwaakabhabhatidzwa.
Vienna akateerera rairo yaIshe kwaari muDzidziso neZvibvumirano 90:28–31. Mukumikidzo wake kuna Ishe, uyo waisanganisira zvipo zvaakanga apa kare muKirtland, wakauya panguva yakakosha zvikuru kuChechi, apo vatungamiri pavaiedza kutenga nzvimbo iyo yaizovakwa Temberi yeKirtland. Vienna akanga “akatendeka, uye asina … unyope” nemuupenyu hwake hwose uye pokupedzisira akazokwanisa “kugara murunyararo” (ndima 31) muNhika yeSalt Lake, umo maakazofa ava namakore makumi mapfumbamwe nematanhatu.
“Mweya unotaridza chokwadi.”
Tose tinosangana nemashoko ane “zvinhu zvizhinji … zviri zvechokwadi” uye “zvinhu zvizhinji … zvisiri zvechokwadi” (Dzidziso neZvibvumirano 91:1–2). Ndeipi rairo yaunowana mundima 91 inokwanisa kukubatsira kuziva chokwadi chiri mumashoko aunosangana nawo? Mweya wakakubatsira sei kuziva chokwadi kubva kune zvisiri kwazvo?
Mazano eKudzidzisa Vana
Shoko reUngwaru rinondibatsira kuti ndive neutano mumuviri nemumweya.
-
Kusuma chikamu 89, pamwe iwe nevana vako munokwanisa kutarisa mufananidzo wetemberi kana kuimba rumbo rwunotaura pamusoro peutano hwemuviri, sezvakaita “The Lord Gave Me a Temple” (Children’s Songbook, 153), kudzidzisa kuti miviri yedu yakaita setemberi dzemweya yedu. Batsira vana vako kuita mutambo wenzira dzavanokwanisa kutaririra miviri yavo.
-
Kuti udzidze pamusoro pemirairo yaIshe muDzidziso neZvibvumirano 89:10–17, iwe nevana vako munokwanisa kudhirowa kana kutarisa mifananidzo yezvinhu zvakanaka zvatinokwanisa kudya kana kuita kuti tichengete miviri yedu iine hutano (ona mufananidzo uye peji yechiitwa iri kumagumo kwechidzidzo chino). Chii chatakayambirwa naIshe kuti tisashandisa? Sei Vachida kuti titaririre miviri yedu?
-
Gosa Gary E. Stevenson vakaraira vechidiki kuti vafanoronga zvavanozoita kana vakayedzwa nedoro kana zvinodhaka. Vakadzidzisa kuti: “Unozowana kuti muyedzo une simba shoma pauri. Unenge watoita nechekare sarudzo yemadaviriro aunozoita uye izvo zvaunozoita. Hauzofanira kusarudza nguva dzose” (“Your Priesthood Playbook,” Liahona, Chivabvu 2019, 48). Mushure mekuverenga pamwechete Dzidziso neZvibvumirano 89:4 uye chirevo chaGosa Stevenson, kurukura nevana vako pamusoro pemakwanisiro avangaita kusarudza ikozvino—muupenyu hwavo hwose—kurarama Shoko reUngwaru. Munokwanisa kunyangwe kuita mutambo wemadaviriro avangaita kana mumwe munhu, kunyagwe shamwari, akavapa chimwe chinhu chisingapindirane neShoko reUngwaru. Ishe vanotiropafadza sei apo patinoteerera Shoko reUngwaru? (ona ndima 18–21).
Miviri yedu zvipo zvinobva kuna Mwari.
Mwari vanondipa vaporofita kuti vanditungamirire nokundidzivirira.
-
Munokwanisawo kutarisa mifananidzo yevaporofita vechinyakare kana kuimba rumbo rwakaita “saTinokutendai neMuporofita” (Nziyo neDzevana Vadiki, 70). Mwari vakaropafadza sei vana Vavo kuburikidza nevaporofita Vavo? Sei tichifanira kuteerera kuvaporofita vaMwari? (ona Dzidziso neZvibvumirano 90:5). Zvino iwe nevana vako munokwanisa kutarisa mufananidzo wemuporofita anorarama uye mogoverana zvimwe zvinhu izvo Ishe zvavakadzidzisa kana zvavakatiyambira pamusoro pazvo kuburikidza naye. Tingakwanisa sei kutevera muporofita?
Mweya unokwanisa kundibatsira kuziva izvo zviri zvechokwadi.
-
Unokwanisa kupfupikisa musoro wenyaya wechikamu cheDzidziso neZvibvumirano 91 kuti ubatsire vana vako kunzwisisa kuti sei zvakazarurwa izvi zvakapuwa. Vanokwanisa zvino kufunga nezvenzvimbo, dzakaita semunhepfenuro dzenhau, umo matinowana “zvinhu zvizhinji … zviri zvechokwadi” uye “zvinhu zvizhinji … zvisiri zvechokwadi” (ndima 1–2). Chii chatinodzidziswa nendima 4–6 pamusoro peMweya Mutsvene? Mweya Mutsvene unotibatsira sei kuziva izvo zvakarurama?
“Dzose mbeu dzakanaka sechekudya chevanhu; semucherowo wemuzambiringa”.