Templo iti Kirtland, ni Al Rounds

Septiembre 1–7: “Para iti Pannakaisalakan ti Zion”

Doktrina ken Katulagan 94–97

Idi un-unana, binilin ti Apo ni Moises a mangbangon iti tabernakulo “kas iti pagwadan a naipakita [kenkuana] idiay bantay” (Hebreo 8:5; kitaen met iti Exodo 25:8–9). Ti tabernakulo idi ti kangrunaan a lugar ti kampo iti langalang iti Israel (kitaen iti Numero 2:1–2).

Idi 1833, binilin ti Apo ni Joseph Smith a mangbangon kadagiti templo “saan a babaen ti wagas ti lubong” ngem ketdi “babaen ti wagas nga ipakitakto” (Doktrina ken Katulagan 95:13–14; kitaen met iti 97:10). Kas iti tabernakulo iti langalang, nairanta ti templo kas maysa a kangrunaan a pasdek iti Kirtland (kitaen iti Doktrina ken Katulagan 94:1).

Ita, masarakan dagiti templo iti sangalubongan. Nupay awanda iti sentro dagiti siudadtayo, itudodatayo ken ni Cristo, a nasken nga agbalinda a sentro ti biagtayo. Numan pay agduduma ti langa ti tunggal templo, masursurotayo ti isu met laeng a nadiosan a pagtuladan—maysa a nailangitan a plano a mangisubli kadatayo iti sanguanan ti Dios. Dagiti sagrado nga ordinansa ken katulagan ti mangikonekta kadatayo ken ni Cristo ken mangpatibker kadagiti pamiliatayo a “saan a babaen iti wagas ti lubong” ngem babaen iti pagtuladan nga ipakita ti Dios kadatayo.

Kitaen iti Saints, 1:169–70; “A House for Our God,” iti Revelations in Context, 165–73.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 94; 97:10–17

Makapagbalinak a “naan-anay a naanep iti Apo.”

Iti Doktrina ken Katulagan 94, mangted ti Apo kadagiti instruksion maipapan iti panangbangon kadagiti administratibo a pasdek idiay Kirtland—maysa nga opisina ken balay a pagimalditan. Ania ti makaawis iti riknayo maipapan iti kuna ti Apo maipapan kadagitoy a pasdek iti Doktrina ken Katulagan 94:2–12? Kasano a maidilig daytoy iti kunana maipapan iti templo iti 97:10–17?

Ania ti kayat a sawen kadakayo ti agbalin a “naan-anay a naanep iti Apo”?

Doktrina ken Katulagan 95

Dusaen ti Apo dagiti ay-ayatenna.

Idi naawat ti paltiing iti benneg 95 , agarup lima a bulan ti napalabas manipud idi binilin ti Apo dagiti Santo a mangbangon iti balay ti Dios (kitaen iti Doktrina ken Katulagan 88:117–19)—ken saanda pay a nagrugi. Kitaen no kasano nga inatur ti Apo ida iti daytoy a paltiing. Mabalinyo met ti mangilista kadagiti pagbatayan a masarakanyo iti panangted iti naparegta a panagatur. Ania ti masursuroyo maipapan iti Apo manipud iti wagas a panangaturna kadagiti Santona?

Kitaen met iti Doktrina ken Katulagan 121:43–44; D. Todd Christofferson, “As Many as I Love, I Rebuke and Chasten,” Liahona, Mayo 2011, 97–100.

God Loves His Children

Elder Wakolo testifies of God’s love and describes how He shows that love to His children.

Doktrina ken Katulagan 95:8, 11–17; 97:10–17

Ti templo ket ti balay ti Apo.

Kalpasan ti pannakadusada gapu iti saanda a panangbangon ti balay ti Apo iti Kirtland, nangpili dagiti lider iti Simbaan iti maysa a lugar iti maysa a talon ti trigo a pangbangonanda. Ni Hyrum Smith, kabsat ti Propeta, ket dagus a nagtaray a nangala iti maysa a kumpay ket nangrugin a nangwada iti talon. “Agsagsaganatayo a mangbangon iti balay para iti Apo,” kinunana, “ket inkeddengko a siak ti umuna nga agobra” (iti Teachings of Presidents of the Church: Joseph Smith [2007], 271, 273). Apay iti panagkunayo nga aggagar unay ni Hyrum a mangbangon iti templo? Utobenyo daytoy bayat ti panangbasayo iti Doktrina ken Katulagan 95:8,11–17; 97:10–17.

Iti kaaldawantayo, ti Apo “padarasenna ti kapartak ti panagbangontayo kadagiti templo” (Russell M. Nelson, “Focus on the Temple,” Liahona, Nob. 2022, 121). No adda maysa a tao nga agdamag kadakayo no apay nga agbangbangon iti adu a templo ti Simbaan ni Jesucristo, ania koma ti isaoyo? Sapulenyo dagiti mabalin a sungbat iti:

• Dagiti mensahe ni Presidente Russell M. Nelson a mangipakpakaammo kadagiti baro a templo (kas iti “Now Is the Time,” Liahona, Mayo 2022, 126).

• “Why Latter-day Saints Build Temples” (temples.ChurchofJesusChrist.org).

• Ti video “Temples” (Gospel Library).

What Is a Temple?

The difference between chapels, where Latter-day Saints meet for regular Sunday worship, and temples is also explained.

Mabalinyo nga idilig ti panagkagumaan dagiti Santo a mangbangon iti Templo ti Kirtland kadagiti panagkagumaanyo nga agsagana para kadagiti napnuan kaipapanan a padas iti Apo iti templo. Kasano a maipakitayo ti isu met laeng a rikna ti kinaganat a narikna ni Hyrum Smith nga agturong iti nasantuan a balay ti Apo? Kas pagarigan, ania ti mabalinyo nga aramiden a kas iti panangdalus iti talon, kas iti inaramid ni Hyrum? Ania dagiti sakripisio a mariknayo a kayat ti Apo nga aramidenyo? (kitaen iti Doktrina ken Katulagan 97:12).

Kitaen met iti “Holy Temples on Mount Zion,” Hymns, no. 289; Topics and Questions, “Temples,” Gospel Library.

Ni Hyrum Smith a mangwadwada iti daga para iti Templo iti Kirtland

Doktrina ken Katulagan 97:8–9

“Awatek ida.”

Panunotenyo ti maysa a panawen a naawatkayo—wenno saan a naawat—iti maysa a grupo wenno team. Kasano nga umasping wenno naiduma dayta iti isursuro ti Doktrina ken Katulagan 97: 8-9 maipapan iti no ania ti kayatna a sawen ti panangawat iti Apo? Ania iti panagkunayo a padpadasen ti Apo nga isuro kadakayo nga addaan iti metapora iti bersikulo 9?

Kitaen met iti Erich W. Kopischke, “Being Accepted of the Lord,” Liahona, Mayo 2013, 104–6.

Mangparnuay iti naespirituan nga aglawlaw para iti panagsursuro ken panangisuro. Inkari ni Jesus, “Isuronto kadatayo ti Espiritu Santo … ti amin a banag” (Juan 14:26). Isu nga agsursurokayo man a bukbukodyo wenno kaduayo dagiti dadduma, ipangpangrunayo nga awisen ti Espiritu. Makatulong amin ti sagrado a musika, kararag, ken naayat a pannakilangen a mangparnuay iti natalna, naespirituan a kasasaad a pakaisuruan kadakayo ti Espiritu Santo iti kinapudno.

Doktrina ken Katulagan 97:18–28

Ti Zion ti “natarnaw ti panagpuspusona.”

Para kadagiti Santo iti 1830, maysa a lugar ti Zion. Iti paltiing iti benneg 97, pinalawa ti Apo ti depinision a mangiladawan iti maysa nga ili—“dagiti natarnaw ti panagpuspusona” (bersikulo 21). Bayat ti panangbasayo kadagiti bersikulo 18–28, mabalinyo a sukatan daytoy a depinision no basaenyo ti balikas a Zion. Ania ti kayat a sawen kadakayo ti agbalin a natarnaw ti panagpuspusona?

Kitaen met iti Moises 7:18.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 95:8; 97:10–17

Ti templo ket ti balay ti Apo.

• Para iti sumagmamano a background kadagiti benneg 95 ken 97, mabalinyo nga ibinglay kadagiti annakyo ti “Ti Templo ti Kirtland” iti Dagiti Estoria iti Doktrina ken Katulagan para kadagiti Agtutubo nga Agbasbasa (Gospel Library; kitaen met iti Saints, 1:210). Mabalin a magustuan dagiti ubbing ti agpammarang a tumultulongda a mangbangon iti Templo ti Kirtland (aggupguped ti kayo, agmarmartilio iti lansa, agpinpinta iti diding, ken dadduma pay). Mabalinyo pay nga ipakita kadakuada ti ladawan ti Templo ti Kirtland, kas kadagidiay adda iti daytoy a balabala, bayat ti panangbasayo iti Doktrina ken Katulagan 95:8 tapno maisuro kadagiti annakyo no apay a kayat ti Apo a mangbangontayo kadagiti templo.

The Kirtland Temple

• Kalpasan ti aggigiddan a panangbasa iti Doktrina ken Katulagan 97:15–16, mabalinyo ken dagiti annakyo nga ibinglay iti tunggal maysa no apay a naisangsangayan kadakayo ti templo. Mabalinyo ti aggigiddan nga agkansion iti maysa a kanta a mangtulong kadagiti annakyo a makarikna iti panagraem iti balay ti Apo, kas iti “I Love to See the Temple” (Children’s Songbook, 95). Apay a sagrado ti templo?

Doktrina ken Katulagan 97:1–2, 8–9, 21

Ti Zion ti “natarnaw ti panagpuspusona.”

• Tapno matulongan dagiti annakyo a makaawat no ania ti kaipapanan ti balikas a natarnaw iti Doktrina ken Katulagan 97:21, mabalinyo nga aggigiddan a kitaen ti sangabaso a nadalus a danum ken mangnayon iti maysa a banag iti danum a mamagbalin iti daytoy a narugit (kas iti rugit wenno sili). Apay a nasken a mapatarnaw ti danum? Kalpasanna, mabalin a basaen dagiti annakyo ti bersikulo 21 ket ikabilda ti ramayda iti balikas a natarnaw. Ania ti kayat na a sawen ti mapatarnaw dagiti pusotayo? Dagiti bersikulo 1–2 ken 8–9 ti makaited iti sumagmamano a kapanunotan. Kasano a tulongan ti Mangisalakan nga agbalin a natarnaw ti puspusotayo?

Kayat ti Nailangitan nga Ama nga agbalinak a natarnaw iti panagpuspuso.

Doktrina ken Katulagan 97:8–9

Bendisionan ti Apo dagiti tao a mangtungpal kadagiti katulagan Kenkuana.

• Ammo kadi dagiti annakyo no ania dagiti katulagan nga aramidentayo iti Apo no mabuniagantayo wenno addatayo iti templo? Ibilangyo ti panangrebyu kadagita a katulagan kadakuada babaen ti panangbasa iti Mosiah 18:9–10, 13 wenno Sapasap a Handbook, 27.2. Agbibinninglay no kasano ti panagkagumaanyo a “mangtungpal kadagiti katulagan[yo] babaen ti sakripisio” (Doktrina ken Katulagan 97:8).

• Mabalinyo nga awisen dagiti annakyo nga agdrowing kadagiti ladawan ti no ania ti iladawan ti Doktrina ken Katulagan 97:9 . Bayat ti panangibinglayda kadagiti ladawanda, isaritayo maipapan no kasano a binendisionannakayo ti Apo gapu iti panangtungpalyo kadagiti katulaganyo. Kasano a maipada dagita a bendision iti panagbalin a “nabunga a kayo a naimula … iti asideg ti natarnaw nga ubbog”?

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Panangbangon iti Templo ti Kirtland, ni Walter Rane