C.C.A. Christensen (1831–1912), Dagiti Santo a Napapanaw manipud iti Jackson County Missouri, c. 1878, tempera on muslin, 77 ¼ × 113 inches. Brigham Young University Museum of Art, sagut dagiti appoko ni C. C. A. Christensen, 1970.

Septiembre 8–14: “Agtalnakayo ken Ammuenyo a Siak ti Dios”

Doktrina ken Katulagan 98–101

Para kadagiti Santo iti 1830, ti Independence, Missouri, ti literal a naikari a daga. Isu idi ti “kangrunaan a lugar” ti Zion (Doktrina ken Katulagan 57:3)—ti siudad ti Dios iti daga—ken ti panaguummong dagiti Santo sadiay ti maysa a makapagagar a pakauna ti Maikadua a Yaay. Ngem sabali ti panagkita dagiti kaarrubada iti dayta a lugar. Sinuppiatda ti panangpati nga inteden ti Dios ti daga kadagiti Santo, ken saanda a komportable kadagiti nagbanagan a mainaig iti politika, ekonomia, ken kagimongan ti nagadu a saan nga am-ammo a tattao a simmangbay iti lugar iti kasta a kadaras. Di nagbayag nagbalin a pannakaidadanes ken kinaranggas ti saan a pannakakomportable. Idi 1833, nadadael ti opisina ti pagimalditan ti Simbaan, ket napilitan dagiti Santo a pumanaw manipud kadagiti pagtaenganda.

Nalablabes ngem 800 a milia ti kaadayo ni Joseph Smith iti Kirtland, ket immabot iti adu a lawas daytoy a damag tapno dumanon kenkuana. Ngem ammo ti Apo no ania ti napaspasamak, ket impalgakna iti Propetana dagiti pagbatayan ti kappia ken pammaregta a mangliwliwa kadagiti Santo—dagiti pagbatayan a mabalin pay a makatulong kadatayo no mapadasantayo ti pannakaidadanes, no dagiti nalinteg a tarigagaytayo ket saan a maipatungpal, wenno no kasapulantayo ti maysa a palagip nga iti inaldaw a panagrigattayo ket iti kamaudianan, uray no kaskasano nga, “agbalindanto a pagimbagan[tayo]” (Doktrina ken Katulagan 98:3).

Kitaen iti Saints, 1:171–93; “Waiting for the Word of the Lord,” iti Revelations in Context, 196–201.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 98:1–3, 11–14, 22; 101:1–16, 22–31, 36

Agkaykaysa ti amin a pannubokko para iti pagimbagak.

Sumagmamano kadagiti karittayo iti biag ket gapu kadagiti bukodtayo a pili. Dagiti dadduma ket gapu kadagiti pili dagiti sabali. Ket no dadduma mapasamak laeng dagiti banag a paset ti mortalidad. Ania man ti makaigapu, makatulong ti rigat a mangipatungpal kadagiti nadiosan a panggep no umasidegtayo iti Dios.

Pudno daytoy kadagiti Santo iti Missouri idi 1833, ken pudno daytoy kadatayo ita. Bayat ti panangbasayo iti imbaga ti Apo kadagiti Santo iti Doktrina ken Katulagan 98 ken 101, utobenyo no kasano a mayaplikar ti mensahena iti nadumaduma a pannubok wenno pakarigatan a mabalin nga adda kadakayo. Adtoy ti sumagmamano a saludsod ken resources a makatulong kadakayo.

No maysa a bunga ti pannubok ti:

• Dagiti bukod a pili: Ania a balakad—ken dagiti kari—a masarakanyo iti Doktrina ken Katulagan 98:11–12; 101:1–9? Ania ti masursuroyo manipud kadagitoy a bersikulo maipanggep iti Nailangitan nga Ama ken ni Jesucristo? Ania ti mariknayo a paaramid ti Dios kadakayo?

• Dagiti pili ti dadduma: Ania a liwliwa ti masarakanyo iti Doktrina ken Katulagan 98:1–3, 22; 101:10–16, 22? Kasano ti kayat ti Apo nga isungbattayo iti pannakaabuso, pannaka-bully, wenno pannakaidadanes? (Kitaen iti Life Help, “Abuse,” Gospel Library; Topics and Questions, “Abuse,” Gospel Library.) Ania ti isuro dagitoy a bersikulo maipapan iti no kasano nga agtalekkayo iti Apo?

• Dagiti rigat ti mortalidad: Ania a pannirigan ti magun-odyo iti Doktrina ken Katulagan 98:1–3; 101:22–31, 36? Ania dagiti masursuroyo manipud kadagiti pannubokyo? Ania ti ar-aramidenyo tapno maawis ti tulong ti Dios? Kasano a tultulongannakayo?

Tapno masursuro ti ad-adu pay maipapan no kasano a maaramid ti Dios ti “amin a banag a nagrigatanyo … agbalindanto a pagimbaganyo” (Doktrina ken Katulagan 98:3), ibilang ti panangadal iti mensahe ni Elder Anthony D. Perkins “Remember Thy Suffering Saints, O Our God” (Liahona, Nob. 2021, 103–5). Mabalinyo a sapulen ti binatog iti mensahena a tumulong kadakayo a mangawat no kasano nga awisennakayo ti Mangisalakan a mangkita kadagiti karityo. Iti ania a wagas a nagkaykaysa dagiti pannubokyo para iti pagimbaganyo wenno nangipatungpal kadagiti panggep ti Dios?

Kitaen met iti Taga Roma 8:28; 2 Nephi 2:2; Doktrina ken Katulagan 90:24; D. Todd Christofferson, “Come to Zion,” Liahona, Nob. 2008, 37–40; “Trial of Adversity,” “Feeling the Lord’s Love and Goodness in Trials,” “The Refiner’s Fire” (videos), ChurchofJesusChrist.org.

Trial of Adversity

Katie, who was paralyzed in an auto accident, shares how she exercises her faith to embrace her new life.

Feeling the Lord's Love and Goodness in Trials

When Darlyn learned of her illness, she feared she would not see her children grow up. But through her trial, she felt the Lord’s love and immense goodness. How does He comfort you in times of trial?

The Refiner's Fire

The refiner’s fire is not a comfortable place to be. It involves intense heat and repeated hammering. But it is in the refiner’s fire we are purified and prepared to meet God.

Doktrina ken Katulagan 98:23–48

Tarigagayan ti Apo a sapulek ti talna iti wagasna.

Insuro ni Presidente Russell M. Nelson: “Nasken nga ipakita dagiti pasurot ni Jesucristo ti pagwadan a suroten ti amin iti lubong. Ipakpakaasik kadakayo nga aramidenyo ti amin a kabaelanyo tapno agpatingga dagiti personal a panagsusupiat nga agdama a sumsumged iti puspusoyo ken iti biagyo” (“The Power of Spiritual Momentum,” Liahona, Mayo 2022, 97).

Idinto a saan amin a banag iti Doktrina ken Katulagan 98:23–48 ket mayaplikar kadagiti bukod a pannakilangenyo kadagiti dadduma, ania dagiti pagbatayan a masarakanyo a makatarabay kadakayo a manggibus kadagiti personal a panagsusupiat iti biagyo? Mabalinyo ti agkansion iti maysa a kanta maipapan iti talna wenno pammakawan, kas iti “Truth Reflects upon Our Senses” (Hymns, no. 273).

Detalye manipud iti Ni Cristo ken ti Nabaknang nga Agtutubo nga Agturay, ni Heinrich Hofmann

Doktrina ken Katulagan 99–100

Aywanan ti Apo dagiti tao nga agserbi Kenkuana.

Dagiti paltiing kadagiti benneg 99 ken 100 naited kadagiti tao nga addaan iti napapateg a pagrebbengan iti Simbaan ngem maseknanda pay maipapan kadagiti pamiliada. Ania ti masarakanyo kadagitoy a paltiing a nakatulong koma kadakuada? Ania dagiti adda a mensahe ti Apo para kadakayo kadagitoy a paltiing?

Kitaen met iti “John Murdock’s Missions to Missouri” iti “‘I Quit Other Business’: Early Missionaries” ken “A Mission to Canada,” iti Revelations in Context, 87–89, 202–7.

Doktrina ken Katulagan 101:43–65

Ti panangsurot iti balakad ti Dios ti mangtulong nga agtalinaedak a natalged.

Ti pangngarig iti Doktrina ken Katulagan 101:43–62 ti mangilawlawag no apay nga impalubos ti Apo a napapanaw dagiti Santo iti Zion. Bayat ti panangbasayo kadagitoy a bersikulo, adda kadi ania man a makitayo a wagas a maipadakayo kadagiti katulongan iti pangngarig? Kasano a maipakitayo iti Dios a “siaayat[kayo] a paiwanwan iti umno ken umisu a wagas para iti pannakaisalakan[yo]”? (kitaen kadagiti bersikulo 63–65).

Mangyakem kadagiti salaysay wenno pangngarig. No dadduma nalaklaka ti mangsursuro ken mangisarita kadagiti estoria ken pangngarig kadagiti nasantuan a kasuratan no yarigtayo ti bagitayo nga addatayo iti lugar dagiti tao nga iladawanda. No mangisursurokayo iti Doktrina ken Katulagan 101:43–62, mabalinyo nga awisen dagiti agad-adal a mangyakem iti pangngarig bayat ti panangbasa daytoy iti napigsa ti maysa a tao. Ania dagiti nalawag a pannakaammo ken pannakaawat a magun-odyo manipud iti panangyakemyo kadagiti balikas?

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 98:1–3

Mapagbalin ni Jesucristo a bendision dagiti pannubokko.

• Mabalinyo a rugian ti panaglilinnawag babaen ti panangidawat kadagiti annakyo iti sumagmamano kadagiti karit a pakaipaspasanguan dagiti ubbing a kapatadada. Mabalinyo nga aggigiddan a basaen ti Doktrina ken Katulagan 98:1–3 ket pagsasaritaan no kasano a pagbalinen ni Jesucristo dagiti pannubok a bendision. Mabalinyo nga ibinglay kadagiti annakyo dagiti pagarigan no kasano a pinagbalinna dagiti pannubokyo a bendision.

Doktrina ken Katulagan 98:39–40

Tulongannak ti Mangisalakan a mamakawan.

Palagip: Bayat ti panangisuroyo kadagiti annakyo iti kinapateg ti panangpakawan, siguraduen a maawatanda pay a no adda ti mangdangran kadakuada, nasken a kanayon nga ibagada iti maysa a mapagtalkan a nataengan.

• Dagiti kapitulo 34 ken 35 iti Dagiti Estoria iti Doktrina ken Katulagan (128–34) ket matulongannakayo a mangisuro maipapan iti no kasano ti pannakatrato dagiti Santo idiay Missouri idi 1833. Mabalin a pagsasaritaanyo kadagiti annakyo maipapan no kasano ti mabalin a narikna dagitoy a Santo. Kalpasanna aggigiddan a basaenyo ti Doktrina ken Katulagan 98:23, 39–40 tapno maammuan no ania ti kayat ti Apo nga aramidenda. Mabalin a pagsasaritaanyo kadagiti annakyo maipapan kadagiti panawen a kasapulanyo a pakawanen ti maysa a tao ken no kasano a tinulongannakayo ti Mangisalakan.

• Mabalinyo pay nga ipakita kadagiti annakyo dagiti ladawan ti naragsak a rupa ken naliday a rupa. Isaritayo dagiti situasion nga adda maysa a natangsit, ket mangisingasing kadagiti wagas a mangsungbat. Tulonganyo dagiti annakyo a mangpili no ti tunggal sungbat ket mangparagsak wenno mangpaladingit kadakuada babaen ti panangitudo iti kabatog a rupa. Apay a kayat ti Apo a pakawanentayo dagiti tao, uray pay dagidiay saan a nasayaat kadatayo?

Chapter 34: God Warns the People of Zion: July–August 1833

Chapter 35: The Saints Leave Jackson County, Missouri: September–December 1833

Doktrina ken Katulagan 101:16, 23–32

Makaisangbay ni Jesucristo iti talna kaniak.

• Kalpasan ti panangbasa iti Doktrina ken Katulagan 101:16, tulonganyo dagiti annakyo a mangbigbig kadagiti natalna a karirikna a sumangbay no natalnatayo ken agpampanunot maipapan ken ni Jesus—kas pagarigan, no agkarkararag wenno makiranranudtayo iti sakramento. Mabalinyo pay ti aggigiddan a mangkansion iti maysa a kanta maipapan iti panagraem, kas iti “Reverently, Quietly” wenno “To Think about Jesus” (Children’s Songbook, 26, 71). Kasano a mariknatayo ti talnana iti pagtaengantayo?

• Mabalin nga interesado dagiti annakyo a mangammo maipapan iti no anianto ti biag inton umay manen ni Jesucristo. Basaen ti Doktrina ken Katulagan 101:23–32 nga aggigiddan, ken pagsaritaan maipapan kadagiti banag a masarakanda kadagitoy a bersikulo a mangyegto kadatayo iti rag-o inton umay Isuna. Apay a makatulong a maammuantayo dagitoy a banag no marigrigatantayo?

Mangyegto ni Jesucristo iti talna ken rag-o inton umay manen.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ti Missouri a Maur-uram, ni Glen S. Hopkinson