Septiembre 22–28: “ Ti Urnos ti Anak ti Dios”

Doktrina ken Katulagan 106–108

Iti umuna a panangkita, ti Doktrina ken Katulagan 107 ket kasla maipapan laeng iti panangbuangay kadagiti saad (office) ti priesthood iti maysa nga estruktura iti panangidaulo para iti Simbaan ti Apo. Idi panawen a naipablaak daytoy a paltiing, narimbawanen ti bilang ti miembro ti Simbaan dagiti sumagmamano a lider nga addan iti Simbaan. Ti pannakabalabala dagiti akem ken pagrebbengan ti Umuna a Panguluen, awan duadua a kasapulan ken makatulong ti Korum dagiti Sangapulo-ket-dua nga Apostol, ti Pitupulo, dagiti bishop, ken dagiti panguluen ti korum. Ngem ad-adu pay ti adda iti dayta a nasantuan a pangiturong iti benneg 107 ngem iti no kasano ti nasken a pannakabuangay ti panangidaulo iti Simbaan. Ditoy, isuro kadatayo ti Apo maipapan iti bileg ken turayna, “ti Nasantuan a Priesthood, babaen ti Urnos ti Anak ti Dios” (bersikulo:3). Ti panggep ti priesthood ket manglukat iti “amin a naespirituan a bendision ti simbaan” tapno amin nga annak ti Dios ket “maluktan ti langit kadakuada” ken “sagrapenda ti pannakikaysa ken ti kaadda ti Dios nga Ama, ken ni Jesus a mangibabaet ti baro a katulagan” (dagiti bersikulo 18–19). Iti panangisurona kadatayo maipapan iti kinasaserdotena, isursuronatayo ti Mangisalakan maipapan iti Bagina ken no kasano a makaasidegtayo Kenkuana.

Kitaen iti “Restoring the Ancient Order,” iti Revelations in Context, 208–12.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 106; 108

Suportarannak ti Apo no awagannak nga agserbi.

Iti Doktrina ken Katulagan 106 ken 108, nangted ti Apo iti pammagbaga ken kari iti dua a miembro a naawagan nga agserbi iti Simbaanna. Bayat ti panangadalyo iti balakadna, mabalin a panunotenyo maipapan kadagiti bukodyo a gundaway nga agserbi iti Apo—nalabit maysa a naituding nga aramiden iti ministering, calling iti Simbaan, dagiti pagrebbengan iti pamiliayo, wenno dagiti naespirituan a pannignay nga agaramid iti naimbag.

Ania ti mariknayo iti mensahe ti Apo kadakayo nga adda kadagitoy a paltiing? Ania kadagiti ragup ti balikas a kasla nangnangruna a napateg kadakayo? Adtoy ti sumagmamano nga ibilang:

• Kaano nga inted kadakayo ti Apo ti “parabur [wenno nadiosan a tulong] ken namnama” tapno makapagserbikayo Kenkuana? (Doktrina ken Katulagan 106:8).

• Ania ti panagkunayo a kaipapanan ti patibkerem dagiti dadduma “iti amin nga aramidmo”? (Doktrina ken Katulagan 108:7).

Idi nakaawat ni Elder Carl B. Cook iti narigat a naituding nga aramiden iti Simbaan, nakagun-od iti pigsa manipud iti padas ti maysa a kapuonan. Basaen maipapan iti daytoy iti mensahena a “Serve” (Liahona, Nob. 2016, 110–12). Ibilangyo ti panangaramid iti maysa a surat a mangparegta kadagiti kaputotanyo—wenno ti masakbayan a bagiyo —nga umawat kadagiti gundaway nga agserbi iti Apo. Iramanyo iti suratyo dagiti kinapudno a masursuroyo manipud iti mensahe ni Elder Cook, Doktrina ken Katulagan 106 ken 108, ken dagiti bukodyo a padas.

Kitaen met iti Henry B. Eyring, “Walk with Me,” Liahona, Mayo 2017, 82–85; Topics and Questions, “Serving in Church Callings,” Gospel Library; “Warren Cowdery” ken “‘Wrought Upon’ to Seek a Revelation,” iti Revelations in Context, 219–23, 224–28.

Doktrina ken Katulagan 107:1–4, 18–20

Ti priesthood ket “maibatay iti Urnos ti Anak ti Dios.”

Mangrugi ti Apo iti daytoy a “paltiing iti kinasaserdote” (Doktrina ken Katulagan 107, paulo ti benneg) babaen ti panangisurona kadatayo iti orihinal a nagan ti Melchizedek Priesthood (kitaen kadagiti bersikulo 1–4). Apay iti panagkunayo a napateg a maammuan dayta? Kasano nga impluensiaan daytoy a nagan ti wagas ti panangpanunotyo maipapan iti priesthood?

Laglagipenyo dagitoy a kapanunotan bayat ti panagbasayo maipapan iti priesthood, nangruna kadagiti bersikulo 18–20. Ania ti kaipapanan ti “maluktan ti langit”? Ania ti kaipapanan ti “sagrapen ti pannakikaysa ken ti kaadda ti Dios nga Ama ken ni Jesus”? Kasano a ti bileg ken turay ti priesthood ti Mangisalakan ket pagbalinenna amin daytoy a sidadaan a magun-odyo?

Kitaen met iti Alma 13:2, 16; Doktrina ken Katulagan 84:19–27.

Agpokus ken ni Jesucristo. “Adu dagiti banag nga isuro maipapan iti naisubli nga ebanghelio ni Jesucristo—dagiti pagbatayan, bilin, padto, ken estoria iti nasantuan a kasuratan. Ngem amin dagitoy ket sangsanga ti maymaysa a kayo, gapu ta maysa ti panggepda amin: ti mangtulong iti amin a tao nga umasideg ken ni Cristo ken agbalin a naan-anay Kenkuana (kitaen iti Jarom 1:11; Moroni 10:32). Ania man ti isursuroyo, panunotenyo a talaga nga isursuroyo ti maipapan ken ni Jesucristo ken no kasano ti agbalin a kas Kenkuana” (Panangisuro iti Wagas ti Mangisalakan, 6). Kas pagarigan, bayat ti panangisuroyo—ken panagsursuro—maipapan iti priesthood iti Doktrina ken Katulagan 107, masansan a masaludsod, “Ania ti masursurotayo maipapan iti Mangisalakan?”

Doktrina ken Katulagan 107:22

Dagiti katulongan ti Apo ket “pinasingkedan ti panagtalek, pammati, ken kararag ti Simbaan.”

Ania ti panagkunayo a kaipapanan ti pasingkedan dagiti katulongan ti Apo babaen ti panagtalekyo? babaen ti pammatiyo? babaen ti kararagyo?

Kitaen met iti “God Bless Our Prophet Dear,” Hymns, no. 24.

Doktrina ken Katulagan 107:23–24, 33–35, 38, 91–92

Agpaneknek dagiti Propeta ken Apostol maipapan ken ni Jesucristo.

Imbinglay ni Joseph Smith ti benneg 107 idi 1835 iti kabarbaro a naawagan a Korum dagiti Sangapulo-ket-dua nga Apostol (kitaen ti paulo ti benneg). Ania ti insuro ti Apo kadakuada iti pannakaawagda kadagiti bersikulo 23–24, 33–35, 38? Kasano a napapigsa ti panangsaksiyo ken ni Jesucristo babaen ti pannursuro ken panagministro dagiti sibibiag nga Apostolna?

Kadagiti bersikulo 91–92, isuro ti Apo maipapan iti senior nga Apostolna, ti Presidente ti Simbaan. Kasano isuna a “maipada ken ni Moises”? (Kitaen iti Pangiwanwan iti Nasantuan a Kasuratan, “Moises,” Gospel Library).

Kitaen met iti David A. Bednar, “Chosen to Bear Testimony of My Name,” Liahona, Nob. 2015, 128–31.

Doktrina ken Katulagan 107:27–31, 85–89

Ipatungpal ti Apo ti aramidna babaen kadagiti konseho.

Kitaen no ania ti insuro ti Apo maipapan kadagiti konseho iti Doktrina ken Katulagan 107:27–31, 85–89. Ania ti mangaramid nga epektibo ti maysa a konseho? Kasano a mayaplikaryo dagitoy a pagbatayan iti calling-yo iti Simbaan, pagtaenganyo, wenno kadagiti dadduma pay a pagrebbenganyo?

Kitaen met iti M. Russell Ballard, “Family Councils,” Liahona, Mayo 2016, 63–65; General Handbook, 4.3–4.4, Gospel Library.

Awisennatayo ti Apo nga agiinnuman.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 107:18–20

Bendisionannak ni Jesucristo babaen iti bilegna iti priesthood.

• Bayat ti aggigiddan a panagbasayo ken dagiti annakyo iti Doktrina ken Katulagan 107:18–19, yunay-unayyo ti ragup ti balikas nga “amin a naespirituan a bendision.” Nalabit a mabalinyo ken dagiti annakyo ti mangilista kadagiti bendision a sumangbay manipud iti priesthood. Mabalin nga agay-ayamkayo iti dayta—kitaenyo no asino ti makaaramid iti kaatiddogan a listaan. Mabalin met nga agdrowing wenno agsapul dagiti annakyo kadagiti ladawan a mangibagi kadagitoy a bendision (kitaen ti panid ti aktibidaddaytoy a lawas). Kalpasanna, mabalinyo nga isarita no kasano a dagiti ordinansa ti priesthood (kas iti panagbuniag wenno sakramento) ket tumulong kadatayo nga umawat kadagiti bendision ti Dios.

Doktrina ken Katulagan 107:21-26, 33–35, 91–92

Dagiti pinili ti Apo a katulonganna ti mangidaulo iti Simbaanna.

• Mairaman iti tunggal isyu ti kumperensia ti Liahona ti panid dagiti ladawan dagiti General Authority. Ibilangyo ti panangkita kadagitoy a ladawan a kaduayo dagiti annakyo bayat ti panangbasayo maipapan kadagiti pagrebbenganda iti Doktrina ken Katulagan 107:21–26, 33–35, 91–92. Mabalin a pagsasaritaanyo kadagiti annakyo maipapan no apay nga agyamankayo nga inikkan ti Apo ida kadagitoy a pagrebbengan.

• Mabalin a masursuro dagiti annakyo ti ad-adu pay maipapan kadagiti katulongan ti Apo iti “General Church Leadership” iti ChurchofJesusChrist.org. Mabalin a masursuro ti tunggal maysa kadagiti annakyo ti maipapan iti maysa kadagitoy a lider ken mangisuro iti tunggal maysa maipapan kenkuana. Ibinglayyo iti tunggal maysa no kasano nga ammoyo a dagitoy a lider ti pudno a katulongan ni Jesucristo.

• Kalpasan ti panangbasa iti Doktrina ken Katulagan 107:22 nga aggigiddan, mabalinyo ken dagiti annakyo ti agsisinnublat a mangitag-ay iti ladawan ti Umuna a Panguluen ken mangibinglay kadagiti wagas a mabalinyo a kanunongan ida kas katulongan ti Apo.

Ti Umuna a Panguluen

Doktrina ken Katulagan 108:3

Makapagannadak iti panangtungpal kadagiti katulagak.

• Tapno mairugi ti saritaan maipapan iti daytoy a bersikulo, mabalinyo nga awisen dagiti annakyo nga agaramid iti maysa a banag nga agkasapulan iti naannad a panangasikaso, kas iti panangpunno iti maysa a tasa a saan a maibukbok. Ania ti mapasamak no saantayo a naannad? Kalpasanna mabalinyo a basaen ti Doktrina ken Katulagan 108:3 tapno maammuan no ania ti kayat ti Apo nga aramidentayo a siaannad. Ania dagiti “sapata” (kari wenno katulagan) nga aramidentayo iti Dios? Kasano nga ad-adda a makapagannadtayo iti panangpatalinaed kadagitoy? Mabalin nga ibinglayyo dagiti paset ti mensahe ni Sister Becky Craven a “Careful versus Casual” (Liahona, Mayo 2019, 9–11) a mariknayo a mabalin a mangparegta kadagiti annakyo a mangtungpal iti katulaganda. Mabalinyo pay ti agkansion iti kanta maipapan iti panagtungpal kadagiti katulagan, kas iti “I Will Be ValiantChildren’s Songbook, 162).

Ti siaannad a panangibukbok iti danum ket mabalin a maidilig iti siaannad a panagtungpal kadagiti katulagantayo.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Bendisionan ni Melchizedek ni Abram, ni Walter Rane