Isuro ti maipapan ken ni Jesucristo Ania Man ti Isursurom

Adu dagiti banag nga isuro maipapan iti naisubli nga ebanghelio ni Jesucristo—dagiti pagbatayan, bilin, padto, ken estoria iti nasantuan a kasuratan. Ngem amin dagitoy ti sangsanga ti maymaysa a kayo, gapu ta maysa ti paggepda amin: tapno mangtulong iti amin a tao nga umasideg ken ni Cristo ken agbalin a naan-anay Kenkuana (kitaen iti Jarom 1:11; Moroni 10:32). Ania man ti isursurom, panunotem a talaga nga isursurom ti maipapan ken ni Jesucristo ken no kasano ti agbalin a kas Kenkuana. Matulongannaka ti Espiritu Santo a masursuruan a mangbigbig kadagiti kinapudno maipapan iti Mangisalakan ken iti panangsubbot a bilegna iti tunggal pagbatayan ti ebanghelio, bilin, ken panangisuro a naimpadtuan (kitaen iti Jacob 7:10–11).

Mangisursuroka kadi maipapan iti sakripisio? Ibilang ti panangsukisok a kaduam dagiti agad-adal no kasano a maitudo dagiti sakripisio nga aramidentayo dagiti kararuatayo iti “naindaklan ken maudi a sakripisio” ti Mangisalakan” (Alma 34:10). Mangisursuroka kadi maipapan iti panagkaykaysa? Ibilang ti panangilawlawag iti panagkaykaysa a nagun-od ni Jesucristo iti Amana ken ti awisna a makipagmaymaysatayo Kadakuada (kitaen iti Juan 17). Kitaen ti tunggal topiko ti ebanghelio kas maysa a gundaway a mangisuro ken masursuruan maipapan ken ni Jesucristo.

Mangipaay pay ti tunggal bilin iti daytoy a gundaway. Saan laeng nga agpokus kadagiti linteg ti ebanghelio—sursuruen pay maipapan iti Mangmangted iti linteg. No ilawlawagmo ti Word of Wisdom ket agsardengka kadagiti aramiden ken saan nga aramiden iti nasalun-at a panagbiag, malibtawam ti gundaway nga agutob no kasano ti kadakkel ti panangipateg ni Jesucristo maipapan kadatayo—agpada iti naespirituan ken pisikal a pagimbagantayo—tapno itedna kadatayo daytoy a linteg. Agpokus maipapan no kasano ti kinaayat ken kinagagar ti Mangisalakan tapno paraburannatayo iti bilegna a mangtulong kadatayo nga agbiag kadagiti lintegna. Ipalgak ti tunggal bilin nga itedna kadatayo ti maysa a banag maipapan iti panunot ken pagayatan ken pusona—mangsarak iti rag-o iti panangtakuat iti daytoy a sangkamaysa!

Mangyunay-unay iti Pagwadan ni Jesucristo

Maikabiltayo ni Jesucristo iti sentro ti panangisuro ken panagsursuro babaen ti panangbigbig ken panangyunay-unay nga Isu ti naan-anay a pagwadan ti amin a pagbatayan ti ebanghelio. Kas disipulo, saantayo laeng a sumurot kadagiti pagbatayan—surotentayo ni Jesucristo. No agpokustayo iti naan-anay a pagwadan ti Mangisalakan, ipaneknekto ti Espiritu Santo ti maipapan Kenkuana ken paregtaennatayo a sumurot Kenkuana.

Arapaapem iti apagkanito a mangisursuroka iti pagbatayan ti panagibtur agingga iti panungpalan. Ti panaglilinnawag maipapan iti no kasano a maysa a pagwadan ti Mangisalakan iti panagibtur agingga iti panungpalan ket makaisangbay kadagiti rikna ti napasnek a panagraem Kenkuana. Ania ti mabalin a masursuro ken marikna dagiti sursuruam manipud iti pagwadanna?

Nangipakita ti Mangisalakan iti naan-anay a pagwadan para iti amin kadatayo. Inagasanna Amin Ida, ni Michael Malm

Isuro maipapan kadagiti Pangawag, Akem, ken Kababalin ni Jesucristo

Adu ti pangawag ken ni Jesucristo kadagiti nasantuan a kasuratan. Iparangarang ti tunggal maysa ti maysa kadagiti akemna iti plano ti Dios ken isurona kadatayo maipapan kadagiti nadiosan a kababalinna. Mabalinmo nga ibilang ti panangsukisok a kaduam dagiti agad-adal no ania ti isuro kadatayo dagiti pangawag kas iti Kordero ti Dios, Mangibabaet, Mangilepleppas iti Pammatitayo, ken Silaw ti Lubong maipapan ken ni Jesucristo. Kasta met a, no tulongam dagiti agad-adal a mangammo iti ad-adu pay maipapan iti Mangisalakan, iti no ania ti kinuna ken inaramidna iti no asino Isuna ken no ania nga akem ti tarigagayanna nga akmen iti biagtayo. Bayat ti aggigiddan a panagsursuroyo maipapan iti kinatao ken dagiti kababalin ti Mangisalakan, paunegento ti Espiritu Santo ti pannakaawat ken ayatyo para Kenkuana.

Sapulen dagiti Simbolo a Mangpaneknek ken ni Jesucristo

“Amin a banag,” impakdaar ti Apo, “naparsua ken naaramid a mangpaneknek kaniak” (Moises 6:63; kitaen met iti 2 Nephi 11:4). Pampanunoten dayta a kinapudno, masursurotayo a mangkita iti adu a simbolo kadagiti nasantuan a kasuratan a mangipaneknek iti Mangisalakan. Iraman dagitoy a simbolo dagiti banag kas iti tinapay, danum, ken silaw. Apaman a maawatantayo no kasano a mainaig dagitoy a banag iti Mangisalakan, masuruandatayo maipapan ti bileg ken dagiti kababalinna. Mabalin pay a masarakam dagiti pagpapapadaan iti biag ti Mangisalakan iti biag dagiti propeta ken dadduma pay a napudno a lallaki ken babbai kadagiti nasantuan a kasuratan. Ti panagsapsapul kadagiti simbolo ti mangipalgak kadagiti kinapudno maipapan iti Mangisalakan kadagiti lugar a mabalin a saanmo a nakita.