Ti Panggep ti Panangisuro iti Wagas ti Mangisalakan

Dagiti pagbatayan a nailadawan iti daytoy a resource ket makatulong iti tunggal mannursuro iti ebanghelio a mangisuro iti wagas ti Mangisalakan. Iraman dayta dagiti nagannak, dagiti ministering brother ken sister, dagiti mannursuro iti seminary ken institute, ken asino man a ti calling-da iti Simbaan ket mangted kadakuada kadagiti gundaway a mangisuro.

Mabalinmo nga adalen daytoy a resource iti bukodmo wenno usarem daytoy a pangiwanwan kadagiti panaglilinnawag iti dadduma maipapan iti no kasano ti agbalin a nalalaing a mannursuro. Kas pagarigan, mabalin nga usaren daytoy a resource kadagiti sardam iti pagtaengan (home evening), miting iti panguluen, miting iti konseho iti ward wenno stake, miting iti seminary ken institute, ken miting iti konseho ti mannursuro (kitaen iti “Para kadagiti Mannursuro—Panagtulong kadagiti Mannursuro nga Agballigi”).

Kasano a Naurnos Daytoy a Resource

Paset 1 mangyunay-unay iti kinapateg ti panagpokus ken ni Jesucristo no mangisurotayo kadagiti pagbatayan ti ebangheliona. Iladawan daytoy a benneg no ania ti isurotayo.

Paset 2 mangyunay-unay kadagiti pagbatayan iti panangisuro a kas ken ni Cristo. Iladawan daytoy a benneg no kasano a mangisurotayo.

Paset 3 mangted kadagiti maaramat a singasing a mangtulong kadagiti mannursuro a mangyaplikar kadagiti pagbatayan iti panangisuro a kas ken ni Cristo.