Para kadagiti Lider—Panangtulong kadagiti Mannursuro nga Agballigi

Dagiti Sinaggaysa a Pannakilangen [One-on-One Interaction]

Masansan a ti kasayaatan a wagas a pangipaay kadagiti naidumduma a kasapulan dagiti mannursuro ket babaen ti sinaggaysa a pannakilangen. Kas pagarigan, kas maysa a lider, mabalinmo ti maaddaan iti ababa a panaglilinnawag iti maysa a mannursuro sakbay wenno kalpasan ti klase tapno paglinnawagan dagiti pagbatayan ti Panangisuro iti Wagas ti Mangisalakan. Makapagsaganaka para iti daytoy a panaglilinnawag babaen ti panangbuyam iti mannursuro a mangisuro. Kalikagumam a maawatam a nasaysayaat dagiti pagpigsaan ti mannursuro ken takuatem dagiti wagas a makaidiayaka iti suporta.

Ti panangbukel kadagiti pagpigsaan ti maysa a mannursuro ket kas iti kinapateg ti panangilasin kadagiti gundaway para iti panagdur-as. Daytoy ti makatulong a mangirugi kadagiti panaglilinnawag kadagiti mannursuro babaen ti panangidawat kadakuada a mangibilang para iti bagbagida no ania ti nasayaat a maar-aramid ken pakariknaanda a mabalin nga aramiden ti panagdur-as.

No makipagkitaka kadagiti mannursuro, ibilangmo dagiti wagas a mangpapigsa kadakuada ken mangallukoy kadakuada nga addaan iti kinaasi ken panagyaman para iti serbisio nga itedda.

Dagiti Teacher Council Meeting [Miting ti Konseho iti Mannursuro]

Nasken a mangangay iti tunggal ward kadagiti teacher council meeting iti tunggal tallo a bulan a mabalin a pagbibinnalakadan wenno paggiinnumanan dagiti mannursuro maipapan kadagiti pagbatayan ti panangisuro a kas ken ni Cristo. Mabalin pay a maangay dagiti teacher council meeting para kadagiti nagannak (kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 13.5, ChurchofJesusChrist.org).

Kaano a Nasken a Maangay Dagitoy a Miting?

Maangay dagiti teacher council meeting kabayatan ti 50-minuto nga oras ti klase iti Domingo.

• Mabalin a dumar-ay dagiti mannursuro iti priesthood, Relief Society, ken Young Women iti umuna wenno maikatlo a Domingo, kas ikeddeng dagiti lokal a lider.

• Mabalin a dumar-ay dagiti mannursuro iti Sunday School iti maikadua wenno maikapat a Domingo, kas ikeddeng dagiti lokal a lider.

• Mabalin a dumar-ay dagiti mannursuro iti Primary iti ania man a Domingo, kas inkeddeng dagiti panguluen ti Primary ken Sunday School iti ward. No tarigagayan, mabalin nga agsisina nga agmimiting dagiti mannursuro iti Primary manipud iti dadduma pay a mannursuro tapno agiinnuman maipapan kadagiti naidumduma nga aspekto iti panangisuro kadagiti ubbing. Mabalin a mapasamak daytoy kabayatan ti 20-minuto nga oras iti panagkanta, sakbay wenno kalpasan dagiti regular a miting iti Domingo, wenno iti sabali pay nga aldaw ti lawas. Mabalin a maangay ti nasurok ngem maysa a teacher council meeting iti tunggal tallo a bulan para kadagiti mannursuro iti Primary tapno saanda a malibtawan ti amin a klase iti Primary iti isu met la a lawas. (Palagip: No kasapulan, mangdutok ti panguluen ti Primary kadagiti mangsukat a mannursuro, pagtitiponen dagiti klase, wenno agaramid iti dadduma pay a pannakipagurnos tapno makadar-ay dagiti mannursuro iti Primary kadagiti teacher council meeting.)

• Mabalin nga angayen dagiti teacher council meeting iti ania man a Domingo, kas inkeddeng ti konseho iti ward.

Asino ti Nasken a Dumar-ay?

Nasken a dumar-ay ti tunggal maysa a mangisursuro iti maysa a korum wenno klase iti ward, a kaduana ti uray maysa laeng a priesthood wenno dagiti lider ti organisasion nga akinrebbeng kadagita a korum wenno klase. No kasapulan, mabalin a bingaybingayen iti grupo dagiti participant a mayannurot iti kasapulan dagiti sursuruanda. Kas pagarigan, mabalin a mangted pagimbagan kadagiti mannursuro dagiti agtutubo wenno ubbing nga agsina nga agmiting iti sagpaminsan tapno paglilinnawagan dagiti isyu nangnangruna a mainaig iti panangisuro kadagiti agtutubo wenno ubbing.

Para kadagiti teacher council meeting para kadagiti nagannak, ikeddeng ti ward council no awisenna dagiti masinunuo a nagannak wenno aramiden a siwawaya a dumar-ay ti amin nga agtarigagay a makiraman.

Asino ti Mangidaulo Kadagitoy a Miting?

Ti ward council, iti tulong manipud iti panguluen ti Sunday School, ti mangimaton kadagiti teacher council meeting. Aggiinnumanda maipapan kadagiti kasapulan dagiti mannursuro ken agad-adal a maibatay iti no ania ti napaliiwda kadagiti klase ken miting. Agtitinnulongda a mangikeddeng no ania dagiti pagbatayan ken kannawidan manipud iti Panangisuro iti Wagas ti Mangisalakan a kasayaatanto a mangipaay kadagiti kasapulan dagiti nailasinda.

Gagangay nga, idauluan ti panguluen ti Sunday School dagiti teacher council meeting. Nupay kasta, mabalin a madutokan ti dadduma pay a miembro ti ward tapno idauluan dagiti miting iti sagpaminsan. Papigsaen dagiti panguluen ti korum ken organisasion kadua dagiti mannursuroda dagiti pagbatayan ken kannawidan a nailawlawag iti miting.

Ania ti Nasken a Mapasamak iti Teacher Council Meeting?

Nasken a suroten ti teacher council meeting daytoy a pormat:

• Agbibinninglay ken agbibinnalakad. Mangawis kadagiti mannursuro a mangibinglay kadagiti kaudian a padasda iti panangisuro, agdamag kadagiti saludsod nga adda pakainaiganna iti panangisuro, ken mangibinglay kadagiti ideya iti panangparmek kadagiti karit. Mabalin a mairaman ditoy a paset ti miting ti panangrebyu kadagiti pagbatayan a nailawlawag kadagiti napalabas a miting.

• Aggigiddan nga agsursuro. Awisen dagiti mannursuro a mangilawlawag iti maysa kadagiti sumaganad a pagbatayan a naidatag iti daytoy a resource: agpokus ken ni Jesucristo, ayaten dagiti sursuruam, mangisuro babaen ti Espiritu, isuro ti doktrina, ken mangyawis iti napasnek a panagsursuro. Mabalin a paglilinnawagan dagiti pagbatayan iti saan a napagsasaganad, malaksid no ibilin ti ward council, mabalin a pilien dagiti participant iti miting ti sumaruno a pagbatayan a paglilinnawagan. Mabalinmo a bubosen ti ad-adu ngem maysa a miting iti maysa a pagbatayan no kasapulan.

• Agplano ken agawis. Tulongam dagiti mannursuro a mangplano no kasano a yaplikarda ti pagbatayan a napaglilinnawaganda. No maitutop, mabalin pay ti aggigiddankayo a mangsanay iti maysa a paglaingan a napaglilinnawaganyo. Awisem ida a mangilista ken agtignay kadagiti ania man nga impresion nga awatenda maipapan ti no kasano a mayaplikar ti pagbatayan iti panangisuroda—agraman kadagiti panagkagumaanda a mangisuro kadagiti pagtaenganda. Allukoyen ida a mangrugi iti panagadal iti sumaruno a pagbatayan a paglilinnawagan.

Agingga a mabalin, nasken a dagiti teacher council meeting ti mangipagwadan kadagiti pagbatayan a mapaglilinnawagan.

Makatulong dagiti teacher council meeting kadagiti mannursuro a makaawat a nasaysayaat ken mangyaplikar kadagiti pagbatayan ti panangisuro a kas ken ni Cristo.

Panangsanay kadagiti Kaaw-awag a Mannursuro

Kas maysa a lider, addaanka iti pagrebbengan a “mangmiting kadagiti kaaw-awag a mannursuro” iti organisasionmo ken “mangtulong kadakuada para kadagiti calling wenno takemda” (Sapasap a Handbook, 17.3, ChurchofJesusChrist.org). Dagitoy a miting ket gundaway a mangyam-ammo kadagiti baro a mannursuro kadagiti sagrado a calling-da ken ikkan ida iti inspirasion iti konsepto ti kaipapanan ti panangisuro iti wagas ti Mangisalakan. Kas maysa a lider, makatulongka kadagiti baro a mannursuro nga agsagana nga agserbi babaen ti panangaramid kadagiti sumaganad:

• Ipeksam ti panagtalek a tulonganto ida ti mangisalakan iti calling wenno takemda (kitaen iti Doktrina ken Katulagan 88:78).

• Ikkam dagiti baro a mannursuro iti maysa a kopia daytoy a resource, ket allukoyem ida a mangsapul kadagiti wagas a pakaaramatan dagiti pagbatayanna iti panangisuroda.

• Ibinglaymo kadagiti baro a mannursuro ti maysa a banag maipapan iti organisasionmo a makatulong a maammuanda.

• No kasapulan, ibagam kadagiti baro a mannursuro no sadino a siled ti pangisuruanna ken no ania a lesson ti irugina. Mangipaay iti ania man nga impormasion a kasapulanda maipapan ti klaseda ken dagiti miembro ti klase.

• Ilawlawag kadagiti baro a mannursuro a matulongam ida iti calling wenno takemda. Mangidiaya iti suporta iti siled ti klase ken pananggun-od kadagiti resources iti panangisuro no kasapulan.

• Sagpaminsan a mangidiaya nga agpaliiw kadagiti klase dagiti mannursuro, ket mangipaay iti masao wenno feedback no tignayen ti Espiritu.

• Awisem dagiti mannursuro a makiraman kadagiti teacher council meeting iti tunggal tallo a bulan.