Ayatem dagiti Sursuruam

Amin a banag nga inaramid ti Mangisalakan iti unos ti panagserbina iti daga ket pinaregta ti ayat. No ikagumaanantayo ti agbalin a pudno a pasurot ni Cristo, mapnotayo iti daytoy isu met la nga ayat (kitaen iti Juan 13:34–35; Moroni 7:47–48; 8:26). No adda ti ayat ti Mangisalakan iti puspusotayo, sapulentayo ti tunggal posible a wagas tapno mangtulong iti dadduma a masursuruan maipapan ken Cristo ken umasideg Kenkuana. Ti ayat ti agbalinto a motibasion iti panangisurotayo.

Tapno Ayatem dagiti Sursuruam

• Kitaem dagiti agad-adal iti wagas a panangkita ti Dios kadakuada.

• Kaam-ammom ida—maawatam dagiti kasasaad, kasapulan, ken pagpigsaanda.

• Ikararagam ida babaen ti naganda.

• Mangparnuay iti natalged nga aglawlaw a pakadayawan ti amin ken ammoda a maik-ikkan pateg dagiti kontribusionda.

• Agsapul kadagiti maitutop a wagas a pakaipeksaan ti ayatmo.

Nakita ti Mangisalakan ti Nadiosan a Potensial iti Tunggal Maysa a Sinuruanna

Impagarup ti kaaduan a tattao iti Jerico nga ammoda ti amin a nasken nga ammuenda maipapan ken ni Zaqueo. Maysa isuna a publikano ken agsingsingir iti buis—ti pangulo a publikano, kinapudnona—ken nabaknang daytoy. Silalawag, a napanunotda, a mabalin a nakusit ken mannanakaw. Ngem kinita ni Jesus ti puso ni Zaqueo ken nakitana ti maysa a madaydayaw nga “anak ni Abraham” (kitaen iti Lucas 19:1–10). Nakita ti Mangisalakan dagiti tao saan laeng a kas iti talaga a panaglangada—ken kas iti pakapagbalinanda. Kadagiti awan adalna a dumadaklis a kas kada Simon, Andres, Santiago, ken Juan, nakitana dagiti masakbayan a lider ti Simbaanna. Iti pagbutbutngan a mangidaddadanes a Saul, nakitana ti “maysa a napili a vaso,” a mangikasabanto iti ebangheliona iti sanguanan dagiti ari ken nasion (kitaen iti Dagiti Aramid 9:10–15). Ken kenka ken iti tunggal tao a suruam, makita ti Mangisalakan ti maysa nga anak a lalaki ken anak a babai ti Dios nga addaan iti awan patinggana a potensial.

Maibilang kadagiti tao a suruam, nalabit nga addaanka kadagiti kasla napudno ken napasurot ken dadduma pay a kasla saan nga interesado wenno nasukir. Agannadka a saanka nga agaramid kadagiti panangipapan a maibatay iti no ania ti makitam. Matulongannaka ti Espiritu Santo a kumita iti tunggal tao ti sumagmamano a no ania ti makita ti Mangisalakan—ket tulongannaka a mangrugi nga ayaten ida a kas iti panagayatna.

Dagiti Saludsod nga Utoben: Panunotem ti maipapan iti tunggal tao a suruam, ket utobem no kasano ti rikna ti Nailangitan nga Ama ken Jesus iti tunggal maysa. Ania ti mabalin a makitada kenkuana? Kasano nga apektuanto dagitoy a kapanunotan ti wagas a panangisurom iti dayta a tao?

Manipud kadagiti Nasantuan a Kasuratan: 1 Samuel 16:7; Salmo 8:4–5; Taga Roma 8:16–17; Doktrina ken Katulagan 18:10–14

Am-ammonatayo ti Mangisalakan ken Maawatanna dagiti Kasasaad, Kasapulan, ken Pagpigsaantayo

Saan nga immay iti bubon ti babai a taga Samaria tapno dumngeg iti mensahe ti ebanghelio. Immay tapno sumakdo iti danum. Ngem mabalin a naawatan ti Mangisalakan nga ad-adda pay ngem pisikal ti pannakawawna. Ammona nga adda naparikut a napalabasna kadagiti saan a nagpaut a relasionna. Isu nga inusar ni Jesus ti kasapulan ti bagi a mangpagusto iti dagus a panagessemma—danum a kasapulan ti biag—ket innaigna daytoy iti naun-uneg a kasapulan ti espiritu para iti “nabiag a danum” ken “biag nga agnanayon.” Iti gibus ti panagsarsaritada, adda personal a saksi ti babai a ni Jesus isu ti Cristo, a naparegta babaen iti no kasano unay ti pannakaam-ammona kenkuana. “Imbaga[na] ti amin a banag kaniak nga inaramidko,” kinunana. “Saan kadi a daytoy ti Cristo ?” (kitaen iti Juan 4:6–29).

Ti panagbalin a mannursuro a kas ken ni Cristo iramanna ti pannakiam-ammo kadagiti tao a suruam ken panangikagumaan a maawatan no ania ti adda iti puspusoda. Mabalinmo ti agessem iti biagda ken ipakitam ti panangngaasim. Mabalinmo a sapulen dagiti wagas tapno maawatam dagiti nagtaudan, talento, pagesman, ken kasapulanda. Mabalinmo nga ammuen no kasano a makasursuroda a nalaing. Mabalinmo ti agsaludsod, dumngeg a nasayaat, ken agpaliiw. Kangrunaan ti amin, mabalinmo nga ikararagan a maaddaanka iti pannakaawat a ti laeng Espiritu ti makaited. Ti nasaysayaat a pannakaam-ammom iti maysa a tao, nasaysayaat a kabaelam ti mangtulong kenkuana a mangsapul iti personal a kaipapanan ken bileg iti ebanghelio ni Jesucristo. Apaman a maawatam ti pannakawaw ti maysa a tao, maisuronaka ti Espiritu no kasano a tulongan a mangpedped iti waw babaen iti nabiag a danum ti Mangisalakan.

Dagiti Saludsod nga Utoben: Ania ti ammomon maipapan kadagiti tao a suruam? Ania ti napateg kadakuada? Ania dagiti pagpigsaanda? Ania ti ikarkarigatanda? Ania ti maaramidmo tapno maawatam ida a nasaysayaat?

Manipud kadagiti Nasantuan a Kasuratan:: Salmo 139:1–5; Mateo 6:25–32; Marcos 10:17–21; Juan 10:14; 3 Nephi 17:1–9

Inkararagan ti Mangisalakan dagiti Sinuruanna

Panunoten no ania koma ti narikna ni Simon Pedro idi nangngegna a kuna ti Mangisalakan kenkuana, “Simon, Simon, adtoy, ni Satanas dinawatnakayo tapno riidennakayo, … ngem siak indawatanka, tapno ti pammatim saan koma a mapukaw” (Lucas 22:31–32). Kasano a naaringanka a makaammo a nagkararag ni Jesucristo iti Ama para kenka? Adda kastoy a padas dagiti tao iti nagkauna nga America, ket inladawanda daytoy iti kastoy a wagas: Awan ti asino man a makaipalawag iti ragsak a nangpunno iti kararuami iti kanito a nangngegmi [ni Jesus] nga inkararagannakami iti Ama” (3 Nephi 17:17).

Mabalin met a panunotem no ania ti mapasamak iti kaunggam no sika ikararagam ti maysa a tao—nga agtultuloy, a dakamatem ti naganna. Kasano nga aringan dagiti kararagmo ti marikriknam maipapan iti dayta a tao? Kasano nga aringanda dagiti tignaymo? Awan duadua a denggen ken sungbatan ti Ama iti Langit dagiti napudno a kararag ti maysa a mannursuro nga agtarigagay a mangtulong iti maysa nga agad-adal. Ken iti adu a kasasaad, maysa a wagas a pangsungbatanna kadagita a kararag ti panangsagidna iti puso ti mannursuro ken panangparegtana kenkuana nga aramiden ken sawenna ti maysa a banag a mangtulongto iti agad-adal a mangrikna iti ayatna.

Dagiti Saludsod nga Utoben: No panunotem maipapan kadagiti tao a suruam, adda kadi asino man a mariknam nga addaan iti naisangsangayan a panagkasapulan para kadagiti kararagmo? Ania ti mariknam a makaparegta nga ikararagan nga agpaay kenkuana? Ania dagiti bendision a mabalin a sumangbay no awisem dagiti agad-adal nga ikararaganda ti tunggal maysa?

Manipud kadagiti Nasantuan a Kasuratan: Juan 17; Alma 31:24–36; 3 Nephi 18:15–24; 19:19–23, 27–34

Pinennek ti Mangisalakan a Narikna ti Amin a Narespeto ken Naikkan-pategda

Ti sapasap a galad dagiti lider iti relihion iti aldaw ni Jesus ket nasken a mapapanaw dagiti managbasol. Gapu iti daytoy, idi nakita dagitoy a lider a makipulpulapol ni Jesus kadagiti managbasol, nakigtotda. Kasano a ti maysa a tao a nakipulapol iti kasta a tattao agbalin a naespirituan a mannursuro?

Agpayso, a sabali ti wagas ni Jesus. Inkalikagumna nga agasan dagiti naespirituan a masakit (kitaen iti Marcos 2:15–17; Lucas 4:17–18). Nagtultuloy a tinulonganna dagiti maisabsabali kadagiti adda iti aglawlawda wenno dagiti nagparikut iti napalabas, ken nakipulapol kadagiti nakabasol. Dinayawna ti pammati ti maysa a soldado a Romano (kitaen iti Mateo 8:5–13). Inawaganna ti di mapagtalkan nga agsingsingir iti buis tapno agbalin a maysa kadagiti mapagtalkan a disipulona (kitaen iti Marcos 2:14). Idi mapabasol ti maysa a babai iti pannakiabig, inpariknana kenkuana a natalged ken paregtaenna nga agbabawi ken agbiag a nasaysayaat (kitaen iti Juan 8:1–11).

Ngem ad-adda pay ti inaramid ni Jesus ngem iti dayta. Impatungpalna daytoy isu met la a galad ti pannakaawat ken panagayat kadagiti pasurotna. Awan duadua a ti pagwadanna adda iti puspuso dagiti Apostolna idi dimteng ti kanito a panangidanonda iti ebanghelio iti amin a tao. Nailadawan daytoy kadagiti balikas ni Pedro: “Kinapudnona a makitak ti Dios saan a mangidumduma kadagiti tao” (Dagiti Aramid 10:34).

Adda napintas unay a gundaway a dumani tunggal maysa a nakaawagam a masuruam ket mangikarkarigatan iti wagas a pakariknaan a madayaw ken maikkan-pateg. Babaen iti wagas a panagayat ken panangdayawmo kadakuada, mabalinmo nga isarita a saanda laeng a mapasangbay no di ketdi kasapulan ida. Matulongam dagiti saan a dumar-ay, dagiti agkarigatan, wenno dagit kasla saan a naessem, babaen ti panagbalin a naanus no kasla nabayag ti panagdur-as. Matulongam ti tunggal maysa a makarikna a natalged ken nanam-ay iti panangibinglay kadagiti pakaseknanda kadagiti kapada iti pammatida. Ngem makaaramidka iti ad-adda pay ngem iti dayta. Maparegtam ti amin nga agad-adal a tulongandaka a mangparnuay iti aglawlaw a pakaisuruan ti doktrina iti maysa nga espiritu ti respeto, pannakaibilang, ken ayat.

Dagiti Saludsod nga Utoben: Ania ti mangtulong iti maysa a tao a makarikna a narespeto ken naikkan-pateg? Ania ti mangparegta iti maysa a tao a mangrespeto ken mangipateg iti dadduma? Bayat ti nainkararagan a panangpanunotmo maipapan kadagiti tao a suruam, ania ti pakaguyugoyam nga aramiden tapno mariknada amin a mapasangbay ken kasapulan ida?

Manipud kadagiti Nasantuan a Kasuratan: Juan 4; 2 Nephi 26:27–28, 33; Alma 1:26; 3 Nephi 18:22–25

Makatulong dagiti mannursuro kadagiti suruanda a makarikna a maayatda.

Impeksa ti Mangisalakan ti Ayatna para kadagiti Sinuruanna

Iti gibus ti maysa a nakaskasdaaw, makaitag-ay nga aldaw ti panangisuro ken panagministerna kadagiti Nephite, napaliiw ni Jesus nga orasen tapno pumanaw. Adda dagiti dadduma pay a tao a sarungkaranna. “Agawidkayon iti balbalayyo,” kinunana, “ken isaganayo ti panunotyo iti sumuno a bigat.” Ngem nagtugaw laeng idiay dagiti tao “nga aglulua,” a “sititibkerda a nangperreng kenkuana a kasla kayatda a dawaten ti panagbayagna pay bassit kadakuada.” Iti panangawatna iti saan a maisawang a kasapulanda ken “umukuok ti asina,” nagbayag pay bassit ti panagtalinaed ni Jesus (3 Nephi 17:3, 5–6). Binendisionanna dagiti masakit ken agsagsagaba kadakuada. Nakipagparintumeng ken nakipagkararag isuna kadakuada. Nakipagsangit kadakuada, ken nakipagrag-o kadakuada.

Nainkararagan nga ibilang ti panagadal kadagiti balikas ken tignay ti Mangisalakan iti 3 Nephi 17. Utoben ti ayat nga impeksana para kadagiti sinuruanna. Saraken dagiti pannakayebkas ti ayatna iti dadduma pay a lugar kadagiti nasantuan a kasuratan. Kalpasanna panunotem maipapan dagiti tao a sursuruam. Kasano a siuumno nga ipeksam ti ayatmo kadakuada? Agpatarabayka iti Espiritu. No makitam a narigat a marikna wenno mayebkas ti ayat para kadagiti sursuruam, rugiam babaen ti panangipaneknekmo iti ayat ti Dios. Kalpasanna “agkararagkayo iti Ama iti amin a kabaelan ti pusoyo, tapno maaddaankayo iti daytoy nga ayat, nga impaayna iti amin a napudno a pasurot ti anakna, ni Jesucristo” (Moroni 7:48). Ken laglagipem a ti pakaseknam iti panangisuro iti lesson ket saan koma a mangsinga kenka iti panangipeksam iti ayat babaen kadagiti balikas ken tignaymo. Masansan a ti wagas a pannakilangenmo kadagiti tao ket kapada ti pateg dagiti isursurom kadakuada.

Dagiti Saludsod nga Utoben: kasano a natulongannaka ti Mangisalakan a mangammo iti ayatna para kenka? Kasano a natulongannaka ti maysa a nagannak wenno sabali pay a mannursuro a makarikna iti ayatna? Ammo kadi dagiti tao a sursuruam nga ay-ayatem ida? Ammoda kadi nga ay-ayaten ida ti Mangisalakan?

Manipud kadagiti Nasantuan a Kasuratan: Marcos 6:31–42; Juan 13:3–16, 34–35; 15:12–13; 1 Taga Corinto 13:1–7; 1 Juan 4:7–11

Sumagmamano a Wagas a Payaplikaran No Ania ti Masursurom

• No mangisursuroka iti maysa a klase, ammuem dagiti nagan dagiti agad-adal ket usarem ida no mangisuroka.

• Ipeksam ti panagyamanmo no agibingay dagiti agad-adal.

• Makipulapolka kadagiti agad-adal kasakbayan ken kalpasan ti panangisurom.

• Tulongam dagiti agad-adal a mangpadur-as iti aglawlaw nga addaan iti ayat ken respeto iti tunggal maysa.

• Dumngeg a sipapasnek—no mangisursuroka ken iti dadduma pay a gundaway.

• Aramidem dagiti panagserbi kadagiti sursuruam.

• Agbalinka a natallugod a mangbaliw kadagiti planom iti panangisuro tapno mangbubos iti ad-adu pay kadagiti pagbatayan a napnuan kaipapanan kadagiti sursuruam.