“Tulongan dagiti Agad-adal nga Umasideg ken ni Jesucristo,” Panangisuro iti Wagas ti Mangisalakan: Para iti Amin a Mangisuro iti Pagtaengan ken iti Simbaan (2022)
“Tulongan dagiti Agad-adal nga Umasideg ken ni Jesucristo,” Panangisuro iti Wagas ti Mangisalakan
Kas mannursuro iti ebanghelio ni Jesucristo, tulongantayo dagiti dadduma a makaawat, ken agpannuray kadagit pannursuro, bileg ken ayatna.
Tulongan dagiti Agad-adal nga Umasideg ken ni Jesucristo
Awan ti maaramidmo kas maysa a mannursuro nga ad-adda pay a maggtulong kadakuada a mangammo a marikna ti Nailangitan nga Ama ken ni Jesucristo ti ayatda (kitaen iti Juan 17:3). Panunotem dagiti padas a nangtulong kenka a maam-ammo ken maayat ti Nailangitan nga Ama ken ni Jesucristo. Ania ti inaramidmo a nangsursuro maipapan kadagiti kababalin, bileg, ken ayatda? Kasano a nangyeg iti rag-o ti ayatmo para iti Nailangitan nga Ama ken ni Jesucristo? Kalpasanna panunoten ti maaramid ti ayat ken bilegda para iti tunggal tao a sursuruam. (Kitaen iti Alma 26:16; Moises 5:11.)
Ti ultimo a panggeptayo a tun-oyen ditoy a biag ket agbalin nga ad-adda a kas iti Nailangitan nga Amatayo ken agsubli Kenkuana. Ti wagas a panngipatungpaltayo iti dayta a panggep a tun-oyen ket babaen ti yaasideg ken ni Jesucristo (kitaen iti Juan 14:6). Daytoy ti gapu no apay, kas iti insuro ni propeta Nephi, “agsaotayo maipapan ken Cristo, agrag-otayo ken ni Cristo” (2 Nephi 25:26).
Kasapulan ti tunggal anak ti Dios ti silaw ken kinapudno a sumangbay manipud iti Mangisalakan ken mapilitayo a sumungbat iti daytoy. Tapno agbalin a maysa a mannursuro iti ebanghelio ni Jesucristo kaipapananna a tulongantayo dagiti dadduma a makaawat ken agpannuray kadagit pannursuro, panangsubbot a bileg, ken naan-anay nga ayatna. Ibilang no kasano a makatulong kenka dagiti sumaganad a kapanunotan a mangparegta iti dadduma a mangam-ammo a nasaysayaat ken ni Jesucristo ken sumurot Kenkuana.
Tulongam dagiti Agad-adal a Mangbigbig iti Ayat, Bileg, ken Asi ti Apo iti Biagda
Nasayaat nga ammuen maipapan ti ayat, bileg, ken asi ti Mangisalakan, ngem kasapulantayo a padasen daytoy. Ti panangkita no kasano a binendisionan ken inagasanna dagiti tao iti nasantuan a kasuratan ket matulongannatayo a mangpadur-as iti dakdakkel a pammati a mabendisionan ken maagasannatayo. Kas pagarigan, saan a naan-anay ti panagsursuro maipapan kadagiti padas ni Daniel no saannatayo a maparegta nga agtalek iti Apo no maipasangotayo iti bukodtayo a rukib dagiti leon.
No tulonganyo dagiti agad-adal a mangbigbig iti “nadungngo nga asi ti Apo” (1 Nephi 1:20), agpada iti nasantuan a kasuratan ken iti bukodda a padpadas, marikna ken maammuandanto nga adda ti Apo kadakuada ken siaayatto a tumakder iti abayda (kitaen iti Doktrina ken Katulagan 68:6). Makita ken mariknadanto ti kinapudno ti ayat ken asi ti Apo kadagiti bukod a kasapulan ken kasasaadda.
Matulongan dagiti mannursuro dagiti agad-adal a mangbigbig iti ayat, bileg, ken asi ti Mangisalakan iti biagda.
Tulongan dagiti Agad-adal a Mangpapigsa iti Pammatida iti Nailangitan nga Ama ken ni Jesucristo
Ti panggep ti panangisuro ken panagsursuro maipapan ken ni Jesucristo ket tulongan ti tunggal tao nga umas-asideg Kenkuana ken iti Nailangitan nga Amatayo. Tulongam dagiti tao nga isurom a kitaenda a kanayon dayta a panggep. Allukoyem ida a mangpapigsa iti relasionda iti Nailangitan nga Ama ken Jesucristo babaen ti panagadal iti nasantuan a kasuratan, agtultuloy a panagbabawi, pannakisao iti Ama iti kararag, ken panangpaneknek maipapan iti Ama ken Anak. Suruan dagiti agad-adal babaen ti balikas ken pagwadan no kasano nga ibegkesnatayo Kadakuada ti panagaramid ken panagtungpal kadagiti katulagan. Tulongam ida a mangammo no kasano ti kapateg ken kadungngotayo Kadakuada. Papigsaen ti pammatida a ni Jesucristo, gapu iti naan-anay a Pannubbotna, isu laeng ti wagas a makasublitayo iti Amatayo. Mangipaay kadagiti gundaway a maawat dagiti agad-adal ti maysa a saksi manipud iti Espiritu Santo, “a mamaneknek iti Ama ken ti Anak” (Moises 5:9).
Tulongan dagiti Agad-adal a Siraranta nga Agpasnek nga Agbalin nga Ad-adda a Kas ken ni Jesucristo
Kamaudiananna, ti panagsursuro maipapan ken ni Jesucristo ti mangparegta kadatayo nga agbalin nga ad-adda a kas Kenkuana. Ngem ti panagbalin a kas Kenkuana mapasamak laeng no agtignaytayo iti pammati, agpada iti uneg ken iti ruar ti klase, nga agar-aramid kadagiti nairanta a pili a sumurot iti pagawadanna ken umawat iti paraburna. Awisen dagiti agad-adal nga agkiddaw iti tulong ti Espiritu Santo a mangilasin kadagiti wagas a pakapagbalinanda nga ad-adda a kas iti Mangisalakan. Mangidiaya iti pangiwanwan ken suporta bayat ti panangikagumaan dagiti agad-adal tapno agbalinda a kas Kenkuana agingga iti tungpal biagda.
Insuro ni Jacob nga “amin dagiti banag nga inted ti Dios manipud iti punganay ti lubong” makaisuro kadatayo maipapan ken ni Jesucristo (2 Nephi 11:4). Mabalin a ti panangisurom ti maysa kadagita a banag. Pagbalinem ni Jesucristo a sentro ti tunggal padasmo iti panangisuro ken panagsursuro. No sika ken dagiti sursuruam ti “agsarita maipapan ken ni Cristo, … agrag-o ken ni Cristo, … ikasaba maipapan ken ni Cristo” (2 Nephi 25:26), maimula ti Espiritu Santo ti maysa a pammaneknek ti Mangisalakan iti uneg ti panunot ken puso ti maysa a tao. No tulongam dagiti agad-adal a mangam-ammo iti Nailangitan nga Ama ken ni Jesucristo para iti bagbagida, nalabit nga ad-ada nga umasidegda Kadakuada para iti tulong, namnama, ken pannakapaimbag iti unos ti biagda.