Ni Jesucristo a mangisursuro iti templo idi agtawen iti 12

Ni Cristo iti Getsemani, ni Heinrich Hofmann

Isuro ti Doktrina

Nupay dimmakkel ni Jesus iti kinasirib ken pannakaammo iti unos ti biagna, saan a pormal a nagadal kas iti dadduma a lider iti relihion ti panawenna. Ngem idi nangisuro, nasdaaw dagiti tao, a kunkunada, “Kasano ti pannakaammo daytoy a tao kadagiti pagbasaan idinto a di nagadal?” Apay a nabileg unay dagiti pannursurona? “Saanko a kukua ti doktrina,” inlawlawag ti Mangisalakan, “no di ti nangibaon kaniak” (Juan 7:15–16). Agnanayon a kinapudno ti doktrina—a masarakan kadagiti nasantuan a kasuratan ken balikas dagiti propeta iti ud-udina nga aldaw—a mangipakita kadatayo iti wagas tapno agbalin a kas iti Amatayo iti Langit ken agsubli Kenkuana. Kasano man ti kadakkel ti padasmo kas maysa a mannusuro, makaisuroka nga addaan iti bileg, kas iti inaramid ti Mangisalakan, babaen ti panangisuro iti doktrina ti Ama. Masdaawkanto ken dagiti sursuruam kadagiti bendision nga ipatulod ti Dios no ti panangisurom ken panagsursurom ket mairamut iti balikasna.

Tapno Mangisuro iti Doktrina

• Sursuruem ti doktrina ni Jesucristo para iti bagim.

• Mangisuro manipd kadagiti nasantuan a kasuratan ken balikas dagiti propeta iti ud-udina nga aldaw.

• Tulongam dagiti agad-adal a mangsapul, mangbigbig, ken makaawat kadagiti kinapudno iti nasantuan a kasuratan.

• Agpokus kadagiti kinapudno a mangiturong iti kumbersion ken mangbukel iti pammati ken ni Jesucristo.

• Tulongam dagiti agad-adal a mangsapul iti bukod a pakainaigan iti doktrina ni Jesucristo.

Nasursuro ti Mangisalakan ti Doktrina

Kasla nalawag a nagsursuro ti Mangisalakan manipud kadagiti nasantuan a kasuratan iti kinaagtutubona bayat ti panangdakkelna “iti kinasirib … ken iti gundaway ti Dios” (Lucas 2:52). Nagbalin a nalawag ti nauneg a pannakaawatna iti doktrina ti Ama idi masarakan dagiti nagannak Kenkuana iti templo idi ubing pay, a mangisursuro kadagiti mannursuro a Judio ken mangsungsungbat kadagiti saludsodda (kitaen iti Patarus ni Joseph Smith, Lucas 2:46 [iti Lucas 2:46, footnote c]). Idi agangay, idi indatag ni Satanas kenkuana ti nalaus a pannakasulisog iti let-ang, ti pannakaammo ni Jesus iti doktrina iti nasantuan a kasuratan ti nangtulong Kenkuana a mangsupring iti sulisog (kitaen iti Lucas 4:3–12).

Makapagadalka met iti pudno a doktrina a naun-uneg sakbay nga isurom daytoy. Bayat ti panagsaganam a mangisuro ken agsursuro a kaduam ti dadduma, kitaem a nasayaat no ania ti kinua ti Apo maipapan kadagiti kinapudno nga isursurom. Sukisokem dagiti nasantuan a kasuratan ken balikas dagiti sibibiag a propeta para iti panangilawlawag ken balakad. Ti panagbiag ken panangyaplikar kadagiti kinapudno nga adalem ti mangawisto iti Espiritu a mangisuro kenka iti doktrina iti naun-uneg a wagas ken mangpasingked iti kinapudno ti doktrina iti puspuso dagiti sursuruam.

Dagiti Saludsod nga Utoben: Apay a napateg a maawatan dagiti kinapudno ti ebanghelio para iti bagim? Kasano a nagun-odmo ti naun-uneg a pannakaawat kadagiti kinapudno ti ebanghelio? Ania ti mariknam a makaparegta nga aramidem tapno mapasayaat ti panangadalmo kadagiti nasantuan a kasuratan ken balikas dagiti sibibiag a propeta?

Manipud kadagiti Nasantuan a Kasuratan: Dagiti Proverbio 7:1–3; 2 Nephi 4:15–16; Doktrina ken Katulagan11:21; 88:118

Nangisuro ti Mangisalakan manipud kadagiti Nasantuan a kasuratan

Kalpasan ti ipapatay ti Mangisalakan, dua kadagiti disipulona ti nagnagna ken nagsarsarita a binuyogan ti kinaliday ken siddaaw iti puspusoda. Kasano koma ti pannakariknada iti kapaspasamak laeng? Ni Jesus a Nazareno, ti tao a tinalkanda nga agbalin a Mannubbotda, natayen iti uneg ti tallo nga aldaw itan. Ket kalpasanna adda dagiti damag nga awan ti nagyan ti tanemna, nga ipakpakaammo dagiti anghel a sibibiag Isuna! Iti daytoy napateg a punto iti pammati dagitoy a disipulo, kimmadua ti maysa a ganggannaet iti panagdaliasatda. Liniwliwana ida babaen ti “[panang]ipalawagna kadakuada ti amin a nasantuan a kasuratan a mangsarita ti maipapan [iti Mangisalakan]” Kamaudiananna, naamiris dagiti agdaldaliasat a ni Jesucristo Mismo ti mannursuroda ken pudno a nagungaren Isuna. Kasano ti pannakabigbigda Kenkuana? “Saan aya a rumayrayray ti pusota iti unegta,” nautobda idi agangay, “itay madama nga agsasao iti dalan, ken itay ilawlawagna kadata dagiti nasantuan a kasuratan?” (Lucas 24:27, 32).

Insuro ni Elder D. Todd Christofferson, “Ti kangrunaan a panggep ti amin a nasantuan a kasuratan ket mangpunno kadagiti kararuatayo iti pammati iti Dios Ama ken iti Anakna, ni Jesucristo” (“The Blessing of Scripture,” Liahona, Mayo 2010, 34). Iti unos ti panangministrona, inusar ni Jesus dagiti nasantuan a kasuratan tapno mangisuro, mangatur, ken mangparegta kadagiti dadduma. Siguraduen a ti panangisurom ket saan a mang kadagiti nasantuan a kasuratan ken pannursuro dagiti propeta. No sipupudnoka nga agpannuray iti balikas ti Dios iti panangisurom, maaramidmo para iti dadduma ti inaramid ti Mangisalakan. Matulongam ida a mangam-ammo Kenkuana, gapu ta kasapulantayo amin a mapapigsa a kanayon ti pammatitayo iti Mangisalakan. Ti ayatmo para kadagiti nasantuan a kasuratan agbalinto a nalawag kadagiti sursuruam, ket ti panangisurom ti mangawis iti Espiritu a mangigapu iti puspusoda nga agrayray iti pammaneknek iti ama ken ti Anak.

Dagiti Saludsod nga Utoben: Kasano nga inimpluensiaannaka ti maysa a mannursuro a nagusar kadagiti nasantuan a kasuratan tapno mangtulong kenka a mangam-ammo a nasaysayaat iti Mangisalakan? Ania ti mabalin nga aramidem tapno ad-adda nga agpannurayka kadagiti nasantuan a kasuratan ken balikas dagiti propeta bayat ti panangisurom? Kasano a matulongam dagiti sursuruam a mangammo ken mangipateg iti balikas ti Dios?

Manipud kadagiti Nasantuan a Kasuratan: Lucas 4:14–21; Alma 31:5; Helaman 3:29–30;3 Nephi 23

Tinulongan ti Mangisalakan dagiti Tao nga Agsapul, Magbigbig, ken Makaawat iti Kinapudno

Naminsan a sinaludsod ti maysa a masirib iti linteg ni Jesus, “Mannursuro, anianto ti aramidek tapno matawidko ti biag nga agnanayon?” Kas sungbat, inturong ti Mangisalakan ti agsalsaludsod iti nasantuan a kasuratan: “Ania ti adda a naisurat iti linteg? kasano ti panangbasam?” Daytiy ti nangiturong iti lalaki saan laeng iti sungbatna—“Ayatem ti Apo a Diosmo … ken ti kaarrubam”—ngem iti pay pangsurnad a saludsod: “Ket asino ti kaarrubak?” Sinungbatan ti Mangisalakan daytoy a saludsod babaen iti pangngarig maipapan iti tallo a lallaki a nakakita iti pada nga agbambaniaga nga agkasapulan. Maysa laeng kadagiti tallo, maysa a Samaritano, a ginura dagiti Judio gapu laeng iti naggapuanna, ti nagsardeng a timmulong. Kalpasanna inawis ni Jesus ti masirib iti linteg tapno sungbatan ti bukodna a saludsod: “Asino ngarud kadagitoy tallo ti pagarupem a kaarruba daydi natulisan?” (kitaen iti Lucas 10:25–37).

Apay iti panangkunam nga insuro ti Mangisalakan iti kastoy a wagas—panangsungbat kadagiti saludsod nga addaan kadagiti awis a agsukisok, agutob, ken agtakuat? Paset ti sungbat ket ipateg ti Apo ti panagkagumaan nga agsapul iti kinapudno. “Agdawatkayo, ket maikkankayto,” inulit-ulitna nga inyawis (kitaen, kas pagarigan, iti Mateo 7:7; Lucas 11:9; Doktrina ken Katulagan 4:7). Ginunggonaanna dagiti aramid ti pammati ken anus ti agsapsapul.

Kas iti Mangisalakan, matulongam dagiti sursuruam a mangbigbig ken makaawat iti kinapudno. Kas pagarigan, napnuan dagiti nasantuan a kasuratan kadagiti kinapudno ti ebanghelio, ngem no dadduma, kasapulan ti naregta a panagkagumaan a mangsarak kadagitoy. Bayat ti aggigiddan a panagsursuroyo manipud kadagiti nasantuan a kasuratan, agsardeng ket agsaludsod kadagiti sursuruam no ania dagiti kinapudno ti ebanghelio a makitada. Tulongam ida a mangkita no kasano a mainaig dagitoy a kinapudno iti plano ti pannakaisalakan ti Nailangitan nga Ama. No dadduma nadakamat dagiti agnanayon a kinapudno kadagiti nasanutan a kasuratan, ken no dadduma nailadawanda kadagiti estoria ken biag dagiti tao a nabasatayo. Makatulong pay ti agggiddan nga agsukisok iti nagtaudan ti pakasaritaan dagiti bersikulo a basbasaem, kasta met dagiti kaipapanan dagiti bersikulo ken no kasano a mayaplikarda kadatayo iti agdama.

Dagiti Saludsod nga Utoben: Kasano nga ilasinmo dagiti agnanayon a kinapudno kadagiti nasantuan a kasuratan wenno balikas dagiti propeta? Ania ti ammomon maipapan kadagiti tao a suruam? Kasano a bendision dagita a kinapudno iti biagmo? Ania dagiti sumagmamano a wagas a pakatulongam kadagiti agad-adal a mangbigbig ken makaawat kadagiti kinapudno a napnuan kaipapananto kadakuada ken mangyas-asideg kadakuada iti Dios?

Manipud kadagiti Nasantuan a Kasuratan: Juan 5:39; 1 Nephi 15:14; Doktrina ken Katulagan 42:12

dagiti estudiante nga agad-adal

Matulongantayo dagiti sursuruantayo a mangsapul ken mangbigbig iti kinapudno para iti bagbagida

Nangisuro ti Mangisalakan kadagiti Kinapudno a Mangiturong iti Kumbersion ken Mangbukel iti Pammati

Maysa nga aldaw ti Sabbath, napagnaan ti Mangisalakan ken dagiti disipulona, a nakarikna iti bisin, ti maysa a talon ken nangrugianda a nangan iti bukbukel. Inlawlawag dagiti Fariseo, a kanayon a naggagar a mangyunay-unay iti nasaysayaat a punto ti linteg ni Moises, a ti panangummong iti bukbukel ket maysa a kita ti trabaho, a maiparit iti Sabbath (kitaen iti Marcos 2:23–24). Tapno maaramat ti ragup ti balikas ti propeta iti Libro Mormon a ni Ja cob, dagiti Fariseo “kumitada iti labes ti tun-oyen” (Jacob 4:14). Iti sabali a balikas, nakapokusda unay kadagiti naikannawidan a pannakayulog dagiti bilin tapno maliwayanda ti nadiosan a panggep dagita a bilin—a mangyas-asideg kadatayo iti Dios. Kinapudnona, saan uray pay naamiris dagiti Fariseo nga agtaktakder iti sangoda ti Maysa a nangted iti bilin a mangdayaw iti Sabbath.

Innala ti Mangisalakan daytoy a gundaway tapno mangpaneknek iti nadiosan a kinataona ken tapno mangisuro no apay a napateg ti Sabbath. Napartuat daytoy para kadatayo kas maysa nga aldaw a pagdaydayaw iti Apo ti Sabbath, a ni Jesucristo Mismo (kitaen iti Marcos 2:27–28). Dagita a kinapudno ti mangtulong kadatayo a makaawat nga ad-adda pay dagiti bilin ti Dios ngem iti akinruar nga ugali laeng. Nairantada a mangtulong kadatayo a mangbalbaliw iti puspusotayo ken agbalin nga ad-adda pay a naan-anay a converted.

Siaannad nga ibilang ti doktrina ken dagiti pagbatayan nga ikeddengmo nga ipamaysa. Idinto nga adu dagiti kinapudno iti nasantuan a kasuratan a mabalin nga ilawlawag, kasayaatan nga ipamaysa dagiti kinapudno ti ebanghelio ni Jesucristo a mangiturong iti kumbersion ken mangbukel iti pammati ken ni Jesucristo. Dagiti simple, pangrugian a kinapudno nga insuro ken impagwadan ti Mangisalakan addaanda iti kaindaklan a bileg a mangbalbaliw iti biagtayo—dagiti kinapudno maipapan iti Pannubbotna, ti plano ti pannakaisalakan, dagiti bilin nga ayaten ti Dios ken ayaten ti kaarrubatayo, ken dadduma pay. Awisen ti Espiritu a mangipaneknek kadagitoy a kinapudno, a mangtultulong kadakuada a mangipauneg iti puspuso dagiti sursuruam.

Dagiti Saludsod nga Utoben: Ania dagiti sumagmamano a kinapudno ti ebanghelio a nangtulong kenka nga agbalin nga ad-adda a converted ken ni Jesucristo ken addaan iti dakdakkel a pammati Kenkuana? Kasano a nakatulong kenka daytoy a mannursuro a mangipamaysa kadagiti kapatgan a kinapudno iti ebanghelio? Aniaa ti mabalinmo nga isuro a mangtulongto kadagiti dadduma nga agbalin a naun-uneg a converted ken ni Jesucristo?

Manipud kadagiti Nasantuan a Kasuratan: 2 Nephi 25:26; 3 Nephi 11:34–41; Doktrina ken Katulagan 19:31–32; 68:25–28; 133:57; Moises 6:57–62

Tinulongan ti Mangisalakan dagiti Tao nga Agsapul iti Bukod a Pakainaigan iti Doktrinana

“Daytoy a tao awatenna dagiti manangbasol ken makipangan kadakuada” nagtanabutob dagiti Fariseo maipapan ken ni Jesus—a mangipapanan a saan a mayannatup nga ugali para iti naespirituan a mannursuro (Lucas 15:2). Nakita ni Jesus a daytoy ti maysa a gundaway a mangisuro kadakuada iti sumagmamano a nauneg a naespirituan a kinapudno. Kasano nga aramidenna daytoy? Kasano a tulonganna dagiti Fariseo a mangkita a ti pusoda—saan a ti pusona—a saan a natarnaw ken agkasapulan iti pannakaagas? Kasano nga usarenna ti doktrinana a mangipakita kadakuada a kasapulan nga agbalbaliw ti panagpampanunot ken ugalida?

Inaramidna daytoy babaen ti pannakisaritana kadakuada maipapan iti maysa a karnero a naisina iti arban ken maipapan iti maysa a sensilio a napukaw. Insaritana maipapan iti nasukir nga anak a lalaki a nagkiddaw iti pammakawan ken maipapan iti inauna a kabsat a lalaki a nagkedked nga umawat kenkuana wenno makipangan kenkuana. Naglaon kadagiti kinapudno ti tunggal maysa kadagitoy a pangngarig nga adda pakainaiganna iti no kasano ti panangkita dagiti Fariseio kadagiti dadduma, a mangisursuro kadakuada a napateg ti tunggal kararua (kitaen iti Lucas 15). Saan nga imbaga ti Mangisalakan kadagiti Fariseo—wenno asino man kadatayo—no asino ti bigbigen kadagiti pangngarigna. No dadduma datayo ti magagaran nga ama. No dadduma datayo ti naapal a kabsat a lalaki. Masansan a datayo dagiti napukaw a karnero wenno ti maag nga anak a lalaki. Ngem ania man dagiti kasasaadtayo, babaen dagiti pangngarig, awisennatayo ti Mangisalakan a mangsapul iti pakainaigan kadagiti pannursurona—tapno takuaten no ania ti tarigagayanna kadatayo a masursuro ken no ania ti mabalin a kasapulantayo a balbaliwan iti bukodtayo a panagpampanunot ken ugali.

Mabalin a madlawmo a saan a makita ti sumagmamano nga agad-adal no apay a napateg kadakuada ti sumagmamano a kinapudno. No ibilangmo dagiti kasapulan dagiti sursuruam, panunotem maipapan no kasano a mabalin a napateg ken maaramat iti kasasaadda dagiti kinapudno iti nasantuan a kasuratan. Maysa a wagas a pakatulongam kadagiti agad-adal a mangkita iti pakainaigan dagiti kinapudno a taktakuatenda ket babaen ti panagdamag kadagiti saludsod kas iti “Kasano a makatulong daytoy kenka iti maysa a banag a pagpaspasaram ita?” “Apay a nasken a maammuam daytoy?” “Ania ti pagdumaan a maaramid daytoy iti biagmo?” Dumngeg kadagiti sursuruam. Palubosam ida nga agsaludsod. Allukoyem ida nga agaramid kadagiti koneksion iti nagbaetan dagiti pannursuro ti mangisalakan ken ti bukodda a biag. Mabalinmo pay nga ibinglay no kasano a natakuatam nga adda pakainaiganna iti bukodmo a biag iti no ania ti isursurom. Ti panangaramidmo iti daytoy ket makaawis iti Espiritu a mangisuro kadagiti agad-adal a saggaysa no kasano a makaaramid iti pakaidumaan iti biagda ti doktrina.

Dagiti Saludsod nga Utoben: Ania ti makaaramid a napnuan kaipapanan dagiti kinapudno iti ebanghelio ken napategda kenka? Ania ti mangtulong kenka a mangsarak iti bukod a pakainaigan banat ti panagadalmo iti ebanghelio? Ania ti ar-aramidem nga agpokus kadagiti kinapudno nga adda pakainaiganna kadagiti sursuruam?

Manipud kadagiti Nasantuan a Kasuratan: 1 Nephi 19:23; 2 Nephi 32:3; Doktrina ken Katulagan 43:7–9

Sumagmamano a Wagas a Pakayaplikaran No Ania ti Masursurom

• Amirisem no ania ti isursurom tapno mapennek a pudno a doktrina ti isursurom? Makatulong dagitoy a saludsod:

  • Nabangon kadi ti plamplanuek nga isuro kadagiti nasantuan a kasuratan ken balikas dagiti propeta?

  • Insuro kadin daytoy dagiti adu a propeta? Ania ti isursuro maipapan daytoy dagiti agdama a lider iti Simbaan?

  • Kasano a mangtulongto daytoy iti dadduma a mangbukel iti pammati ken ni Jesucristo, agbabawi, ken dumur-as iti dana ti katulagan?

  • Maitunos kadi daytoy kadagiti pannignay ti Espiritu Santo, wenno mariknak kadi a diak naespirituan a natibker maipapan iti daytoy?

• Inaldaw nga adalen ti balikas ti Dios tapno masursuruan iti pudno a doktrina para iti bagim.

• Idawat kadagiti agad-adal a mangbasa kadagiti nasantuan a kasuratan ken balikas dagiti agdama a propta bayat ti panangisurom.

• Suruan dagiti agad-adal no kasano nga usaren dagiti footnote, ti Pangiwanwan iti Nasantuan a Kasuratan, ken dagiti dadduma pay a resources bayat ti panagadalda iti nasantuan a kasuratan.

• Awisen dagiti agad-adal a mangsapul kadagiti kinapudno iti binatog iti nasantuan a kasuratan wenno estoria.

• Paneknekan no kasano a naammuam a pudno ti maysa a doktrina.

• Usaren dagiti estoria ken metapora a makatulong kadagiti agad-adal a manggun-od iti naun-uneg a pannakaawat kadagiti kinapudno ti ebanghelio.