C. C. A. Christensen (1831–1912), Kampo ti Zion, c. 1878, tempera iti muslin, 78 × 114 a pulgada. Brigham Young University Museum of Art, sagut dagiti appoko ni C. C. A. Christensen, 1970.

Septiembre 15–21: “Kalpasan ti Adu a Panagtutuok … Umay ti Bendision”

Doktrina ken Katulagan 102–105

Nakaladladingit dagiti Santo iti Kirtland a nakangngeg a dagiti kakabsatda a lallaki ken babbai iti Jackson County, Missouri, ket napapanawda manipud kadagiti pagtaenganda. Nalabit a makaparegta daytoy, ngarud, idi impakdaar ti Apo a “ti pannakasubbot ti Zion” ket “dumteng babaen ti bileg” (Doktrina ken Katulagan 103:15). Iti dayta a kari iti puspusoda, nasurok a 200 a lallaki, ken agarup 25 a babbai ken ubbing ti nakitipon iti naawagan iti Kampo ti Israel, nga iti saan a nabayag naam-ammo a kas Kampo ti Zion. Mision daytoy ti agmartsa a mapan iti Missouri ken mangsubbot iti Zion.

Kadagiti miembro iti kampo, ti panangsubbot iti Zion kaipapananna ti pannakaisubli dagiti Santo iti dagada. Ngem sakbay laeng ti isasangpetda iti Jackson County, imbaga ti Apo ken Joseph Smith a waraenna ti Kampo ti Zion. Natikaw ken naupay dagiti sumagmamano a miembro ti kampo; kasla saan a nagballigi ti ekspedision ket saan a naipatungpal dagiti kari ti Apo. Kadagiti dadduma, nupay kasta, sabali ti panangawatda. Idinto a saan a naipasubli dagiti napapanaw a Santo dagiti daga ken pagtaenganda, nangyeg ti padas iti maysa a tukad ti “panangsubbot” iti Zion, ket daytoy “immay babaen ti bileg.” Dagiti napudno a miembro iti Kampo ti Zion, adu kadakuada iti saan a nabayag ti nagbalin a dadaulo ti Simbaan, a nangpaneknek a dagiti padasda ti nangpapigsa iti pammatida iti bileg ti Dios, iti nadiosan nga awag ni Joseph Smith, ken iti Zion—saan laeng a lugar ti Zion ngem dagiti tao ti Dios ti Zion. Imbes a pagduaduaan ti pateg daytoy maipagarup a di nagballigi nga aramid, nasursuroda a ti pudno nga aramid ket ti panangsurot iti Mangisalakan, uray no saantayo a maawatan ti amin a banag. Kastoy ti pannakasubbotto ti Zion iti udina.

Kitaen iti Saints, 1:194–206; “The Acceptable Offering of Zion’s Camp,” iti Revelations in Context, 213–18.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 102:12–23

Ania ti panggep dagiti konseho ti kinamiembro?

Naglaon tibenneg 102 kadagiti detaliado a linaon iti miting iti Kirtland, Ohio, a nakabuklan ti umuna a nangato a konseho ti Simbaan. Kadagiti bersikulo 12–23, iladawan ti Apo dagiti addang a suroten dagiti nangato a konseho no mangangayda kadagiti konseho iti kinamiembro para kadagiti nakaaramid iti nadadagsen a basbasol.

Insuro ni Presidente M. Russell Ballard: “Saludsoden no dadduma dagiti miembro no apay a maangay dagiti konseho ti [kinamiembro] iti Simbaan. Nagkatlo ti panggepna: maisalakan ti kararua ti makabasol, masaluadan ti inosente, ken masalakniban ti nadalus, integridad, ken nasayaat a nagan ti Simbaan” (“A Chance to Start Over: Church Disciplinary Councils and the Restoration of Blessings,” Ensign, Sept. 1990, 15).

Kitaen met iti Topics and Questions, “Membership Councils,” Gospel Library.

Doktrina ken Katulagan 103:1–12, 36; 105:1–19

Mabalin a maipatakder ti Zion laeng kadagiti pagbatayan ti kinalinteg.

Apay a napukaw dagiti Santo ti naikari a dagada iti Missouri? Mabalin nga adu dagiti rason—di kumurang a maysa, kinuna ti Apo, ket ti “panagsalungasing dagiti taok.” Ngem no saan la a gapu iti dayta, ti Zion “nalabit a nasubbotda koma itan” (Doktrina ken Katulagan 105:2). Bayat ti panangbasayo iti Doktrina ken Katulagan 103:1–12, 36; 105:1–19, mabalin a makitayo ti sumagmamano a banag a nangtubeng iti pannakabangon ti Zion iti Missouri ken ti dadduma pay a mabalin koma a nakatulong. Ania ti masursuroyo a makatulong kadakayo a mangipasdek iti Zion iti pusoyo, iti pagtaenganyo, ken iti komunidadyo?

Doktrina ken Katulagan 103:12–13, 36; 105:1–6, 9–19

Umay dagiti bendision kalpasan ti pannakasubok iti pammati.

Iti adu a wagas, ti pannakiraman iti Kampo ti Zion ti maysa a pannakasuot ti pammati. Naunday ti panagdaliasat, napudot ti tiempo, ken no dadduma ket nakisang ti taraon ken danum. Ket kalpasan iti amin a panagibturda, saan latta a nagballigi ti Kampo ti Zion iti panangpasubli kadagiti Santo iti dagada. Ipapanyo a naaddaankayo iti gundaway a mangsurat iti maysa a miembro ti Kampo ti Zion a ti pammatina iti Apo ket pinakapuy ti padasna. Ania ti mabalinyo nga isao a mangparegta iti daytoy a tao? Ania dagiti kinapudno a masarakanyo iti Doktrina ken Katulagan 103:5–7, 12–13, 36; 105:1–6, 9–19 a makatulong?

Kalpasanna, mabalinyo a panunoten ti namodmoderno a pagarigan ti pannubok a kas iti Kampo ti Zion—kas iti maysa a misionario nga agtartrabaho a sipipinget, ngem awan ti kumappeng iti Simbaan gapu kadagiti panagkagumaanna. Maibatay iti no ania ti inadalyo, kasano a matulonganyo dayta a misionario a makakita a naballigian pay laeng ti misionna?

Kasano a binendisionannakayo ti Apo “kalpasan ti adu a panagtutuok”? (Doktrina ken Katulagan 103:12).

Kitaen met iti 1 Nephi 11:16–17; Alma 7:11–12; Doktrina ken Katulagan 6:33–36; 84:88; 101:35–36; David A. Bednar, “On the Lord’s Side: Lessons from Zion’s Camp,” Ensign, Hulio 2017, 26–35, wenno Liahona, Hulio 2017, 14–23; Topics and Questions, “Endure to the End,” Gospel Library; “How Firm a Foundation,” Hymns, no. 85.

Agsagana babaen ti panagadal iti konteksto ti pakasaritaan dagiti paltiing. Ti pannakaawat iti pannakaisaad dagiti paltiing iti Doktrina ken Katulagan ket mabalin a makatulong kadakayo a makaawat ken mangyaplikar kadagiti pagbatayan nga isuro dagitoy. Ti Umaykayo, Sumurot Kaniak mangipaay kadagiti link iti adu kadagitoy a resources. Para iti Doktrina ken Katulagan 102–5, kitaen iti Saints, 1:194–206; “The Acceptable Offering of Zion’s Camp,” iti Revelations in Context, 213–18; ken “Voices of the Restoration: Zion’s Camp.”

Nagkampo ti Kampo ti Israel kadagiti igid ti Little Fishing River.

Ania ti panggep dagiti pannubok?

Ibilang ti balakad ni Elder Orson F. Whitney maipapan iti panggep dagiti pannubok: “Awan ti saem a sagabaentayo, awan ti pannubok a pagpasarantayo ti masayang. Daytoy ti makatulong iti edukasiontayo, iti pannakapadur-as dagiti kasta a kababalin kas panaganus, pammati, kinatibker ken panagpakumbaba. Amin a sagabaentayo ken amin nga ibturantayo, nangnangruna no ibturantayo daytoy a siaanus, ti mangsukog kadagiti kinataotayo, mangpatarnaw kadagiti pusotayo, mangpadakkel kadagiti kararuatayo, ken mamagbalin kadatayo a nadungdungngo ken ad-adda a managparabur, ad-adda a maikari a maawagan nga annak ti Dios … ken babaen iti panagladingit ken panagsagaba, panagbannog ken panagtutuok, a magun-odtayo ti edukasion nga immayantayo ditoy tapno gun-oden ken mamagbalinto kadatayo nga ad-adda a kas iti Ama ken Inatayo iti langit” (iti Spencer W. Kimball, Faith Precedes the Miracle [1972], 98).

Doktrina ken Katulagan 104:11–18, 78–83

Inaramidnak ti Apo nga “agaywan kadagiti naindagaan a bendision.”

Kas nayon iti pannubok iti Missouri, idi 1834 nakapadas ti Simbaan kadagiti parikut a pakaseknan iti kuarta, agraman dagiti nadagsen nga utang ken paggastuan. Iti benneg 104 nangted ti Apo iti balakad maipanggep iti kasasaad iti pakaseknan iti kuarta ti Simbaan. Kasano a mayaplikaryo dagiti pagbatayan kadagiti bersikulo 11–18 ken 78–83 kadagiti bukodyo a pangngeddeng iti pakaseknan iti kuarta?

Kitaen met iti “Treasure in Heaven: The John Tanner Story” and “The Labor of His Hands” (videos), Gospel Library.

Treasure in Heaven: The John Tanner Story

John Tanner freely gave all he had, giving us an example of generosity and consecration in serving the Lord.

The Labor of His Hands

Church members around the world volunteer both time and money to serve others-- members and nonmembers alike--as Christ would serve.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 103:9

Makapagbalinak “a silaw iti lubong” babaen ti panangsurotko ken ni Jesus.

• Mabalinyo nga awisen dagiti annakyo a mangiggem kadagiti ladawan ti bombilia, kandela, wenno sabali pay a pagtaudan ti lawag bayat ti panagbasayo iti Doktrina ken Katulagan 103:9. Kasano a maipadatayo iti maysa a silaw kadagiti dadduma no surotentayo ni Jesucristo? Kitaen met iti “Jesus Wants Me for a Sunbeam” (Children’s Songbook, 60–61).

Maipadaak iti maysa a silaw kadagiti dadduma no surotek ni Jesucristo.

Doktrina ken Katulagan 104:13–18

Kayat ti Apo nga ibinglayko no ania ti adda kaniak kadagiti tao nga agkasapulan.

• Mabalin a kayatyo nga ikkan dagiti annakyo iti sumagmamano a minuto a mangilista kadagiti bendision nga inted kadakuada ti Dios (kas iti taraon, kawes, talento, pammati, ken pagtaengan). Allukoyen ida a mangilista iti adu agingga a kabaelanda. Kalpasanna, aggigiddan a basaenyo ti Doktrina ken Katulagan 104:13–18, a mangsapsapul kadagiti sungbat dagiti saludsod a kas iti: Asino ti pudno nga akinkukua kadagiti amin a banag? Ania ti kayatna nga aramidentayo kadagitoy a banag? Mabalinyo ken dagiti annakyo ti mangibinglay kadagiti padas a nangtedan kadakayo ti maysa a tao iti maysa a banag a kasapulanyo (kitaen met iti “The Coat” [video], Gospel Library).

  The Coat

  The Coat is a children’s story that depicts a young boy giving selflessly to another child in need.

Doktrina ken Katulagan 104:42

Bendisionannakto ti Apo no tungpalek dagiti bilinna.

• Iti sumagmamano a gundaway iti benneg 104 ikari ti Apo ti “ad-adunto nga amang ti bendision” para kadagiti tao a napudno a mangtungpal kadagiti bilinna. Tapno matulongan dagiti ubbing a makaawat no ania ti kaipapanan ti “ad-adunto nga amang”, mabalinyo ti agdrowing iti sirkulo ket kiddawen kadagiti annakyo a tulongandakayo a mangpaadu iti bilang dagiti sirkulo—agdrowing iti dua, kalpasanna uppat, kalpasanna walo, kalpasanna sangapulo ket innem, ken dadduma pay. Iti tunggal panangnayon iti sirkulo, tulonganyo dagiti annakyo a mangpanunot iti maysa a bendision nga inted ti Nailangitan nga Ama kadakuada.

Doktrina ken Katulagan 105:38–40

Kabaelak ti agbalin a mamagkappia.

• Tapno matulongan dagiti annakyo a makasursuro iti estoria ti Kampo ti Zion, mabalinyo nga ibinglay ti “Kapitulo 36: Kampo ti Zion” (iti Doktrina ken Katulagan, 135–39, wenno ti katupagna a video iti Gospel Library). Agsardengkayo iti kada paset tapno ipakita dagiti leksion a mabalin a masursurotayo manipud iti Kampo ti Zion—kas pagarigan, a ti Apo kayatna nga agbalintayo a natalna ken agtitinnulong imbes nga agsisinnupiat ken agririnnanget (kitaen met iti Russell M. Nelson, “Peacemakers Needed,” Liahona, Mayo 2023, 98–101).

  Chapter 36: Zion’s Camp: February–June 1834

• Mabalinmo pay a basaen ti Doktrina ken Katulagan 105:38–40 ket kiddawem kadagiti ubbing nga agtakder iti tunggal kanito a mangngeganda ti balikas a “kappia.” Ilawlawag a kayat ti Apo a makikappia dagiti Santo kadagiti tao a natangsit. Tulonganyo dagiti annakyo nga agpanunot kadagiti banag a mabalinda nga aramiden tapno agbalinda a mamagkappia, ket awisenyo ida a mangyakem iti sumagmamano a situasion.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Kampo ti Zion (Kampo ti Zion iti Karayan ti Fishing River), ni Judith A. Mehr