Tempelo ya Kirtland, na Al Rounds

Sanza ya libwa 1–7: “Mpo na Lobiko ya Siona”

Malongi mpe Mayokani 94–97

Na kala, Nkolo atindaki Mose atonga tabelenakele engebene na ndakisa alakisaki [ye] na ngomba” (Baebele 8:5; tala lisusu Esode 25:8–9). Tabelenakele esengelaki kozala katikati ya kaa ya Yisalaele na esobe (tala Mituya 2:1–2).

Na 1833, Nkolo atindaki Joseph Smith atonga batempelo “nsima na lolenge ya mokili te” kasi nde “nsima na lolenge oyo nakolakisa” (Malongi mpe Mayokani 95:13–14; tala lisusu 97:10). Lokola tabelenakele na esobe, tempelo esengelaki kozala eloko moko ya katikati na Kirtland (tala Malongi mpe Mayokani 94:1).

Lelo, batempelo ezwami na mokili mobimba. Atako soki ezali te na katikati ya bamboka, ezali kolakisa biso Klisto, oyo asengeli kozala katikati ya bomoi na biso. Atako tempelo moko na moko ekeseni na libanda, na kati na yango toyekolaka ndakisa bobele moko wana ya Nzambe—mwango ya lola mpo na kozongisa biso na miso ya Nzambe. Makuli mpe mayokani ya bule ekangisaka biso na Klisto mpe elendisaka mabota na biso “na lolenge ya mokili te” kasi nsima ya ndakisa Nzambe alakisi biso.

Tala Basantu, 1:169–70; “Ndako mpo na Nzambe Na Biso,” kati na Revelations in Context, 165–73.

Makanisi mpo na koteya na Ndako mpe na Eklezia

Malongi mpe Mayokani 94; 97:10–17

Nakoki kozala “komipesa mobimba epai ya Nkolo.”

Na Malongi mpe Mayokani 94, Nkolo apesi mitindo etali botongi bandako ya mosala na Kirtland—bilo mpe ndako ya bobimisi mikanda. Eloko nini ekamwisaka yo na oyo Nkolo alobi na ntina ya bandako oyo na Malongi mpe Mayokani 94:2-12? Lolenge nini ekokani na oyo Ye alobi na ntina ya tempelo na 97:10–17?

Elingi koloba nini mpo na yo kozala “komipesa mobimba epai ya Nkolo”?

Malongi mpe Mayokani 95

Nkolo apesaka etumbu na baye Ye alingaka.

Tango emoniseli na eteni 95 ezwamaki, penepene na sanza mitano elekaki uta Nkolo atindaki Basantu batonga ndako ya Nzambe (tala Malongi mpe Mayokani 88:117–19)—mpe babandaki naino te. Tala ndenge Nkolo asembolaki bango na emoniseli oyo. Okoki kutu kosala liste ya mitindo oyo omoni mpo na kopesa bosembo efulama. Oyekoli nini na ntina ya Nkolo uta na lolenge Ye asembolaki Basantu na Ye?

Tala lisusu Malongi mpe Mayokani 121:43–44; D. Todd Christofferson, “Baye Nalingaka Mingi, Bango nde Napamelaka mpe Napesaka Etumbu,” Liahona, Sanza ya mitano 2011, 97–100.

God Loves His Children

Malongi mpe Mayokani 95:8, 11–17; 97:10–17

Tempelo ezali ndako ya Nkolo.

Nsima ya kopesama etumbu mpo batongaki te ndako ya Nkolo na Kirtland, bakambi ya Eklezia baponaki esika moko na bilanga ya ble epai wapi bakotonga yango. Hyrum Smith, ndeko ya Profeta ya mobali, akimaki mbangu sikasika wana mpo na kozwa mbeli mpe kobanda kokata matiti na bilanga. “Tozali kolengela mpo na kotonga ndako moko ya Nkolo,” elobaki ye, “mpe nazwi mokano mpo na kozala moto ya yambo na mosala” (kati na Teachings of Presidents of the Church: Joseph Smith [2007], 271, 273). Mpo na nini okanisi Hyrum azalaki na mposa makasi ya kotonga tempelo? Manyola yango ntango ozali kotanga Malongi mpe Mayokani 95:8, 11–17; 97:10–17.

Na mikolo na biso, Nkolo “azali kotambuisa na lombango yango tozali kotonga batempelo” (Russell M. Nelson, “Tya Likebi na Tempelo,” Liahona, Sanza ya zomi na moko 2022, 121). Soki moto atuni yo mpo na nini Eklezia ya Yesu Klisto etongaka batempelo ebele, okoloba nini? Luka biyano oyo ekoki kozwama na:

• Nsango ya Mokambi Russell M. Nelson kosakolaka batempelo ya sika (lokola “Sikoyo Nde Tango,” Liahona, Sanza ya mitano 2022, 126).

• “Mpo na nini Basantu ya Mikolo ya Nsuka Batongaka Batempelo” (temples.ChurchofJesusChrist.org).

• Video “Batempelo” (Gospel Library).

What Is a Temple?

Okoki kokokanisa babokasi ya Basantu mpo na kotonga Tempelo ya Kirtland na babokasi na yo mpo na komilengela na makambo ya ntina elongo na Nkolo kati ya tempelo. Ndenge nini okoki kolakisa liyoki ya lombango lokola oyo Hyrum Smith ayokaki mpo na ndako ya bule ya Nkolo? Na ndakisa, nini okoki kosala oyo ekozala lokola kokata elanga, ndenge Hyrum asalaki? Mabonza nini oyoki Nkolo alingi yo osala? (tala Malongi mpe Mayokani 97:12).

Tala lisusu “Batempelo ya Bule na Ngomba ya Siona,” Hymns, no. 289; Topics and Questions, “Batempelo,” Gospel Library.

Hyrum Smith azali kokata matiti mpo na Tempelo ya Kirtland.

Malongi mpe Mayokani 97:8–9

“Bandimami epai na ngai.”

Kanisa ntango moko oyo bandimaki yo—to bandimaki yo te—na etuluku to ekipi. Ndenge nini yango ekokani to ekeseni na oyo Malongi mpe Mayokani 97:8–9 eteyaka na ntina ya nini elimboli kondimama na Nkolo? Okanisi nini Nkolo azali koluka koteya yo na lisese na molongo 9?

Tala lisusu Erich W. Kopischke, “Kondimama na Nkolo,” Liahona, Sanza ya mitano 2013, 104–6.

Sala esika ya molimo mpo na koyekola mpe koteya. “Molimo Mosantu, Yesu alakaki, akoteya bino makambo manso” (Yoane 14:26). Na yango, ozali koyekola yo moko to elongo na basusu, sala ete kobengisa Molimo ezala likambo ya liboso. Miziki ya bule, losambo, mpe boyokani ya bolingo nyonso ekoki kosalisa kokela esika ya kimia, ya molimo epai wapi Molimo Mosantu akoki koteya yo bosolo.

Malongi mpe Mayokani 97:18–28

Siona elingi koloba “bato ya peto na motema.”

Mpo na Basantu na mibu 1830, Siona ezalaki esika. Na emoniseli na eteni 97, Nkolo akolisaki ndimbola mpo na kolimbola bato ya—“peto na motema” (molongo 21). Ntango ozali kotanga milongo 18–28, okoki kozwa ndimbola oyo ntango ozali kotanga liloba Siona. Yango elimboli nini mpo na yo ozala peto na motema?

Tala lisusu Mose 7:18.

Mpo na makanisi mingi, tala nsango ya sanza oyo na Liahona mpe Mpo na Bokasi ya Bilenge bamagazini.

Makanisi mpo na Koteya Bana

Malongi mpe Mayokani 95:–8; 97:10-17

Tempelo ezali ndako ya Nkolo.

• Mpo na koyeba makambo mosusu biteni 95 mpe 97, okoki kokabola na bana na yo “Tempelo ya Kirtland” kati na Masolo ya Malongi mpe Mayokani mpo na Bilenge Batangi (Gospel Library; tala lisusu Basantu, 1:210). Bana na yo bakoki kosepela kosala lokola bazali kosalisa na kotonga Tempelo ya Kirtland (kokata mabaya, kobeta nsete na marto, kopakola langi na bifelo, mpe bongo na bongo). Okoki mpe kolakisa bango elilingi ya Tempelo ya Kirtland, lokola oyo ezali awa, ntango ozali kotanga Malongi mpe Mayokani 95:8 mpo na koteya bana na yo ntina nini Nkolo alingi totonga batempelo.

The Kirtland Temple

• Nsima ya kotanga elongo Malongi mpe Mayokani 97:15-16, yo mpe bana na yo bokoki kokabola moko na mosusu mpo na nini tempelo ezali ntina mingi mpo na bino. Bokoki mpe koyemba elongo loyembo moko mpo na kosalisa bana na yo bayoka limemya mpo na ndako ya Nkolo, lokola “Nalingaka Komona Tempelo” (Children’s Songbook, 95). Mpo na nini tempelo ezali bule?

Malongi mpe Mayokani 97:1–2, 8–9, 21

Siona ezali “bato ya peto na motema.”

• Mpo na kosalisa bana na yo basosola nini liloba peto ekoki kolimbola kati na Malongi mpe Mayokani 97:21, bokoki kotala na kati ya kopo ya mai ya peto elongo mpe bokoki kobakisa eloko moko na kati ya mai oyo ekobebisa yango (na ndakisa bosoto to pilipili). Mpo na nini ezali na ntina ete mai ezala peto? Bongo bana na yo bakoki kotanga molongo 21 mpe batia mosapi na bango na liloba peto. Elimboli nini mitema na biso ezala peto”? Milongo 1–2 mpe 8–9 ekokaki kopesa makanisi songolo. Lolenge nini Mobikisi asalisaka mitema na biso ekoma peto?

Tata na Lola alingi ngai nazala peto na motema.

Malongi mpe Mayokani 97:8–9

Nkolo apambolaka bato oyo babatelaka mayokani elongo na Ye.

• Bana na yo bayebi mayokani nini tosalaka elongo na Nkolo ntango tobatisami na tempelo? Kanisa kozongela mayokani wana na bango na kotangaka Mosiya 18:9–10, 13 to Buku Monene, 27.2. kabola moko na mosusu lolenge nini bozali kosala makasi mpo na “kotosa mayokani [na bino] na mbeka” (Malongi mpe Mayokani 97:8).

• Okoki kobengisa bana na yo bayema bililingi ya oyo Malongi mpe Mayokani 97:9 elimboli. Ntango bazali kokabola bililingi na bango, lobela lolenge nini Nkolo apambolaki yo mpo na kobatela mayokani na yo. Ndenge nini mapamboli wana ezali lokola kozala “nzete ya kobota mbuma oyo elonamaki pembeni ya ebale ya peto”?

Mpo na makanisi mingi, tala nsango ya sanza oyo na Moninga magazini.

Kotonga Tempelo ya Kirtland,, na Walter Rane