Kirtland Temple, jān Al Rounds

Jeptōm̧ba 1–7: “Kōn Lo̧mo̧o̧r eo an Zaion”

Katak im Bujen Ko 94–97

Etto, Irooj ekar kakien Moses n̄an kaļōk juon im̧ōn kōppād, “āinwōt jon̄ak eo em̧ōj kwaļo̧k e n̄an [e] ilo toļ eo” (Hibru 8:5; bar lale Exodus 25:8–9). Im̧ōn kōppād eo ekar erom̧ juon jikin kāām eo eļap an riIsrael ilo āne jam̧den (lale Bōnbōn 2:1–2

Ilo 1833, Irooj eaar kakien Josep Smith n̄an kalōk tampeļ ko “jab ilo̧kan jekjek eo an laļ,” ak “en ekkal ilo̧kan jekjek eo me Inaaj kwaļo̧k” (Katak im Bujen Ko 95:13–14; bar lale 97:10). Āinwōt im̧ōn kōppād eo ilo āne jam̧den, tampeļ eo ekar aikuj erom̧ juon jikin ealikkar ilo Kirtland (lale Katak im Bujen Ko 94:1).

Rainin, jej loi tampeļ ko ipeļaakin laļin. Mekarta n̄e rejjab ioļapļap in bukwōn ko ad, rej jitōn̄ļo̧k kōj n̄an Kraist, eo ej aikuj in ioļapļap in mour ko ad. Men̄e kajjojo tampeļ eoktak ilo paaktokin, ilowaan tampeļ kein jej ekkatak ejja jon̄ak wōt eo ekwojarjar—juon karōk jān lan̄ n̄an bar kōjepļaak kōj n̄an im̧aan mejān Anij. Kain̄i ko rekwojarjar im bujen ko n̄an indeeo rej jipan̄ kōj kalōk mour ko ad im kōkajoorļo̧k baam̧le ko ad “jab ilo̧kan jekjek eo an laļ” ak ālkin jon̄ak eo Anij ej kwaļo̧k n̄an kōj.

Lale Armej ro Rekwojarjar, 1:169–70; “A House for Our God,” ilo Revelations in Context, 165–73.

Ļōmņak ko n̄an Ekkatak ilo M̧weeo im ilo Kabun̄ in

Katak im Bujen Ko 94; 97:10–17

Imaron̄ “aolepem ajeļo̧k n̄an Irooj.”

Ilo Katak im Bujen Ko 94, Irooj ej kwaļo̧k kilen kalōk im̧ōn kweilo̧k ko ilo Kirtland—juon opiij im juon im̧ōņ būriin. Ta eo ej kadeel eok n̄an ta ko Irooj ej ba kōn m̧ōkein ilo Katak im Bujen Ko 94:2–12? Elmen an keidi ippān ta eo E ej ba kōn tampeļ ilo 97:10–17?

Ta meļeļein n̄an kwe “aolepem ajeļo̧k n̄an Irooj”?

Katak im Bujen Ko 95

Irooj ej kauweiki ro Ej iakwe.

Ilo an bok in revelesōn in ilo section 95 kar bōke emaron̄ ļalem allon̄ emootļo̧k jān ke Irooj eaar kakien Armej ro Rekwojarjar n̄an kalōk juon im̧ōn Anij (lale Katak im Bujen Ko 88:117–19)—im rejjan̄in kar jinoe. Lale ekōjkan an Irooj kajjim̧we er ilo revelesōn in. Kwomaron̄ bar kōm̧m̧ane juon laajrak in pedped ko kwoj loi n̄an leļo̧k kajjim̧we ko reim̧we. Ta eo kwoj ekkatak ilo wāween an Irooj ilo An kar kajim̧we Armej ro Rekwojarjar?

Bar lale Katak im Bujen Ko 121:43–44; D. Todd Christofferson, “As Many as I Love, I Rebuke and Chasten,” Liahona, May 2011, 97–100

God Loves His Children

Elder Wakolo testifies of God’s love and describes how He shows that love to His children.

Katak im Bujen Ko 95:8, 11–17; 97:10–17

Tampeļ eo ej m̧weo im̧ōn Irooj.

Ālkin kar kauweiki kōn an jab kalōk im̧ōn Irooj ilo Kirtland, ritōl ro an Kabun̄ in rekar kāālet juon jikin ilo juon meļaaj in wiit ijo renaaj kalōke ie. Hyrum Smith, ļeo jein Rikanaan eo, ekar kajju ettōr n̄an bōk juon sickle im jino karreoiki meļaaj eo. “Jej kōppopo n̄an kalōk juon em̧ n̄an Irooj,” ekar ba, “im inaaj kāālet bwe en jinointata ilo jerbal in” (ilo Teachings of Presidents of the Church: Joseph Smith [2007], 271, 273). Etke kwoj ļōmņak Hyrum eaar lukkuun kijōrjōr in kalōk tampeļ eo? Kōļmenļo̧kjen kōn menin ilo am̧ riiti Katak im Bujen Ko 95:8, 11–17; 97:10–17.

Ilo raan kein ad, Irooj eo “e kōm̧ōkajļo̧k bun̄tōn eo me jej kalōk tampeļ ko” (Russell M. Nelson, “Mije Tampeļ eo,” Liaona, Nob. 2022, 121). Eļan̄n̄e jabdewōt ej kajjitōk ippam̧ etke Kabun̄ eo an Jisōs Kraist ej kalōk bwijin tampeļ ko, ta eo kwonaaj ba? Lali uwaak ko ilo:

• Ennaan eo an Būreejtōn Russell M. Nelson kōn tampeļ ko rekāāl (āinwōt “Kiiō Etōreen,” Liaona, Māe 2022, 126).

• “Why Latter-day Saints Build Temples” (temples.ChurchofJesusChrist.org).

• Pijain alooj eo “Temples” (Gospel Library).

What Is a Temple?

The difference between chapels, where Latter-day Saints meet for regular Sunday worship, and temples is also explained.

Kwomaron̄ keidi kijejeto ko an Armej ro Rekwojarjar n̄an kalōk Kirtland Temple n̄an kijejeto ko am̧ kōn keppopo ko ewōr tokjeer ippān Irooj ilo tampeļ eo. Elmen am̧ kwaļo̧k ejja en̄jake in n̄an m̧ōkajin āinwōt kar en̄jake eo an Hyrum Smith kōn m̧weeo im̧ōn Irooj ekwojarjar? N̄an waanjon̄ak, ta eo kwomaron̄ kōm̧m̧ane me ej āinwōt karreoik meļaaj eo, āinwōt an kar Hyrum kōm̧m̧ane? Ta mennin kaarmejet ko kwoj en̄jake Irooj ekōņaan bwe kwon kōm̧m̧ani? (lale Katak im Bujen Ko 97:12).

Bar lale “Holy Temples on Mount Zion,” Hymns, no. 289; Topics and Questions, “Temples,” Gospel Library

Hyrum Smith ej karreoik bwidej eo n̄an Kirtland Tampeļ.

Katak im Bujen Ko 97:8–9

“Rej kam̧ōņōņōik Eō.”

Ļōmņak kōn juon iien ke kwaar kobaļo̧k—ak jab kobaļo̧k—ilo juon tiim. Ekōjkan an menin āinwōt ak oktak jān ta eo Katak im Bujen Ko 97:8–9 ej katak in kōn ta meļeļein kam̧ōņōņōik Irooj? Ta eo kwoj ļōmņak Irooj ej kajjieon̄ katakin eok kōn waanjon̄ak in ilo eoon 9?

Bar lale Erich W. Kopischke, “Kar Bōk jen Irooj,” Liaona, May 2013, 104–6.

Ejake juon jikin n̄an ekkatak im katakin. “Jetōb Kwōjarjar eo,” Jesus eaar kallim̧ur, “enaaj katakin kōj men otemjej” (Jon 14:26). Kiiō mekarta kwoj ekkatak ippam̧ make ak ippān ro jet, kaorōk am̧ karuwaineneik Jetōb. Al ko rekwojarjar, jar, im iiaio̧ ko ilo iakwe remaron̄ aolep ejake juon jikin jetōb eaenōm̧m̧an ijo Jetōb Kwojarjar emaron̄ katakin eok m̧ool eo.

Katak im Bujen Ko 97:18–28

Zaion ej “ro erreo burueer.”

N̄an Armej ro Rekwojarjar ilo 1830 eo, Zaion ekar juon jikin. Ilo revelesōn eo ilo jekjōn 97, Irooj ej kōļapļo̧k meļeļein n̄an kōmeļeļeik juon armej—“ro erreo burueer” (eoon 21). Ilo am̧ riiti eoon 18–28, kwomaron̄ ukot kōmeļeļe in n̄e kwoj riiti naan eo Zaion. Ta meļeļein n̄an eok n̄an erreo ilo bōro?

Bar lale Moses 7:18.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Katak im Bujen Ko 95:8; 97:10–17

Tampeļ eo ej m̧weeo im̧ōn Irooj.

• N̄an jet meļeļe ikijeen jekjōn 95 im 97, kwomaron̄ kwaļo̧k n̄an ajri ro nejūm̧ “The Kirtland Temple” in Doctrine and Covenants Stories for Young Readers (Gospel Library; bar lale Armej ro Rekwojarjar, 1:210). Ajri ro nejūm̧ remaron̄ m̧ōņōņō in arin n̄an jipan̄ kalōk Kirtand Tampeļ (jōkjōk wōjke, am̧a dila, uno kilin em̧, im men ko jet). Kwomaron̄ bar kwaļo̧k n̄an er juon pija in Kirtland Tampeļ, āinwōt ko ilo laajrak in in, ilo am̧ riiti Katak im Bujen Ko 95:8 n̄an katakin ajri ro nejūm̧ etke Irooj ekōņaan bwe jen ekkal tampeļ.

The Kirtland Temple

• Ālkin riit ippān doon Katak im Bujen Ko 97:15–16, kwe im ajri ro nejūm̧ maron̄ kwaļo̧k n̄an doon etke tampeļ eaorōk ippam̧i Kwomaron̄ bar al ippān doon juon al n̄an jipan̄ ajri ro nejūm̧ en̄jake kautiej n̄an m̧weeo im̧ōn Irooj, āinwōt “I Love to See the Temple” (Children’s Songbook, 95). Etke tampeļ eo ekwojarjar?

Katak im Bujen Ko 97:1–2, 8–9, 21

Zaion ej “ro erreo burueer.”

• N̄an jipan̄ ajri ro nejūm̧ meļeļe ta meļeļein naan eo erreo ilo Katak im Bujen Ko 97:21, kwomaron̄ kalimjōk juon kūlaaj in dān erreo im likut juon men ilo dān eo n̄an kōm̧m̧an bwe en ettoon (āinwōt bwidej ak peppa). Etke eaorōk bwe dān ren erreo? Innām ajri ro nejūm̧ remaron̄ riiti eoon 21 im likut addiin peier ioon naan eo erreo. Ta meļeļe erreo ilo būruwōd? Eoon 1–2 im 8–9 remaron̄ letok jet ļōmņak ko. Ekōjkan an Rilo̧mo̧o̧r jipan̄ kōm̧m̧an bwe būruōd en erreo?

Jemedwōj Ilan̄ ekōņaan būruō en erreo.

Katak im Bujen Ko 97:8–9

Irooj ej kōjeraam̧m̧an armej ro rej kōjparok bujen ko Ippān.

• Ajri ro nejūm̧ rejeļā ke ta bujen ko jej kōm̧m̧ani ippān Irooj n̄e jej peptaij ak pād ilo tampeļ? Ļōmņak in etale bujen kein ippāer ilo ami riiti Mosaia 18:9–10, 13 ak Bok in Bōk Meļeļe Eļap, 27.2. Kwaļo̧k n̄an doon wāween ami kajjieon̄ n̄an “kōjparok bujen ko [am̧] jān katok” (Katak im Bujen Ko 97:8).

• Kwomaron̄ karuwaineneik ajri ro nejūm̧ n̄an jin̄aik pija ko me Katak im Bujen Ko 97:9 ej kōmeļeļe kaki. Ilo aer kwaļo̧k pija ko aer, kōnono kake ekōjkan an Irooj kōjeraam̧m̧an eok kōn am̧ kōjparok bujen ko am̧. Ekōjkan an kōjeraam̧m̧an kein āinwōt “wōjke eo ekimuur eo me kar kalbwini … iturin wea erreo”?

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.

Building the Kirtland Temple, jān Walter Rane