Jeptōm̧ba 22–28: “Laajrak an eo Nejin Anij”

Katak im Bujen Ko 106–108

Ilo jinoin kalimjōke, Katak im Bujen Ko 107 āinwōt ke ej kōn wōt ejaake opiij ko an priesthood n̄an juon jekjek in tōl n̄an Kabun̄ eo an Irooj. Jān iien eo eaar jeje revelesōn in, ro uwaan Kabun̄ in raar eddōkļo̧k jān jon̄an eo kar jejjo̧ wōt ritōl ro rekar pād. Kōm̧m̧an elmakot in eddo im jerbal ko an Būreejtōnji eo Kein Kajuon, Doulul eo an Jon̄oulruo ro, Jiljilimjon̄oul eo, bisop ro, im būreejtōnji ro an doulul ko ekar lukkuun mennin aikuj im kar menin jipan̄. Ijoke ewōr eļapļo̧k jān kōmeļeļe in ilo jekjōn 107 jān wāween an ritōl ro an Kabun̄ in kar aikuj in ejaak. Ijin, Irooj ej katakin kōj kōn kajoor im mālim eo An, “Priesthood eo Ekwōjarjar, ilo̧kan Laajrak an eo Nejin Anij” (eoon 3). Un eo an priesthood eo ej n̄an kōpeļļo̧k “aolep kōjeraam̧m̧an ko an jetōb ilo kabun̄ in” bwe ajri ro nejin Anij en maron̄ “kōpeļļo̧k lan̄ ko n̄an er,” im “ioon jemdoon eo im baaktok eo an Anij Jemān, im Jisōs rijojomar eo an bujen eo ekāāl” (eoon 18–19). Ilo an katakin kōj kōn priesthood eo An, Rilo̧mo̧o̧r ej katakin kōj kōn E Make im ekōjkan ad maron̄ itok n̄an Ippān.

Lale “Restoring the Ancient Order,” ilo Revelations in Context, 208–12.

Ļōmnak ko n̄an Ekkatak ilo M̧weeo im ilo Kabun̄ in

Katak im Bujen Ko 106; 108

Irooj ej rie eō n̄e E ej kūr eō n̄an jerbal.

Ilo Katak im Bujen Ko 106 im 108, Irooj ekar letok kapilōk im kallim̧ur ko n̄an ruo membōr ro me rekar kūr er n̄an jerbal ilo Kabun̄ in An. Ilo am̧ ekkatak kapilōklōk eo An, kwoj maron̄ ļōmņake iien em̧m̧an ko am̧ make rem̧m̧an n̄an jerbal n̄an Irooj—bōlen juon jerbal in karejar, juon kūr an Kabun̄, eddo ko ilo baam̧le eo am̧, ak im̧we ko ilo jetōb n̄an kōm̧m̧an em̧m̧an.

Ta eo kwoj en̄jake jen ennaan eo an Irooj n̄an kwe ilo revelesōn kein? Ta eoon ko eļap meļeļeier n̄an kwe? Erkein jet iaer n̄an ļōm̧ņak kaki:

• N̄āāt eo Irooj eaar lewaj n̄an kwe “jouj [ak jipan̄ jān lan̄] im bab-laļ” n̄an maron̄ jerbal n̄an E? (Katak im Bujen Ko 106:8).

• Ta am̧ ļōmņak kōn meļeļein n̄an kōkajoor ro jet “ilo aolep kōm̧m̧an ko am”? (Katak im Bujen Ko 108:7).

Ke Elder Carl B. Cook eaar bōk juon ijjitōn̄ epen an Kabun̄ in, e kar bōk kajoor jān en̄jake eo an juon eo erūtto. Riit menin ilo enaan in an “Serve” (Liahona, Nov. 2016, 110–12). Ļōmņak in je juon leta n̄an kōketak ro bwijjūm̧—ak kwe ilo ilju im jekļaj—n̄an bōk iien em̧m̧an ko n̄an jerbal n̄an Irooj. Ekoba ilo leta eo am̧ m̧ool ko kwoj ekkatak jān enaan eo an Elder Cook, Katak im Bujen Ko 106 im 108, im en̄jake ko am̧ make.

Bar lale Henry B. Eyring “Etetal Ippa,” Liaona, Māe 2017, 82–85; Topics and Questions, “Serving in Church Callings,” Gospel Library; “Warren Cowdery” im “‘Wrought Upon’ to Seek a Revelation,” ilo Revelations in Context, 219–23, 224–28.

Katak im Bujen Ko 107:1–4, 18–20

Priesthood eo ej “iļo̧kan Laajrak an eo Nejin Anij.”

Irooj ej jino An “revelesōn kōn priesthood eo,” (Katak im Bujen Ko 107, jekjōn heading) ilo an katakin kōj lukkuun āt eo etan Melkisedek Priesthood (lale eoon 1–4). Etke kwoj ļōmņak eaorōk n̄an jeļā menin? Ekōjkan an āt in im̧we wāween ad ļōm̧ņak kōn priesthood eo?

Dāpij ļōmņak kein ilo kōļmenļo̧kjen eo am̧ ilo am̧ riit kōn priesthood eo, eļaptata ilo eoon 18–20. Ta meļeļein n̄an “kōpeļļo̧k lan̄ ko”? Ta meļeļein n̄an “ioon jemdoon eo im baaktok eo an Anij Jemān, im Jisōs”? Ekōjkan an kajoor im mālim in priesthood eo an Rilo̧mo̧o̧r kōm̧m̧an bwe aolep men ren pidodo n̄an kwe?

Bar lale Alma 13:2, 16; Katak im Bujen Ko 84:19–27.

Pedped ioon Jisōs Kraist. “Elukkuun lōn̄ men ko n̄an katak kaki kōn jepļaaktok eo an gospel eo an Jisōs Kraist—pedped in katak ko, kien ko, kanaan ko, im bwebwenato ko an jeje ko rekwojarjar. Bōtaab aolep ra kein rej jān ejja wōjke eo wōt, n̄an er aolep ewōr aer jibadbad: n̄an jipan̄ aolep armej itok n̄an Kraist im weppān ilo E (lale Jarom 1:11; Moronai 10:32). Kiiō jekdo̧o̧n ta eo kwoj katakin, keememej bwe kwoj lukkuun kwaļo̧k kōn Jisōs Kraist im elmen n̄an erom āinwōt E” (Katakin ilo Wāween eo an Rilo̧mo̧o̧r, 6). N̄an waanjon̄ak, ilo am̧ katakin—im ekkatak—kōn priesthood eo ilo Katak im Bujen Ko 107, kakutkut am̧ kajjitōk, “Ta ko jej ekkatak kaki kōn Rilo̧mo̧o̧r?”

Katak im Bujen Ko 107:22

Rikarejar ro an Irooj rej “rie er jān lōke, tōmak, im jar an kabun̄ in.”

Ta eo am̧ ļōm̧ņak kōn ta meļeļein rie rijerbal ro an Irooj jān lōke eo am̧? jān tōmak eo am̧? jān am̧ jar?

Bar lale “God Bless Our Prophet Dear,” Hymns, no. 24

Katak im Bujen Ko 107:23–24, 33–35, 38, 91–92

Rikanaan ro im Rijilōk ro rej kam̧ool kōn Jisōs Kraist.

Josep Smith ekar kwaļo̧k jekjōn 107 ilo 1835 n̄an Doulul eo an Jon̄oulruo Rijilōk ro rekāāl kar kūr er (lale jekjōn heading). Ta eo Irooj ekar katakin er kake kōn kūr eo aer ilo eoon 23–24, 33–35, 38? Elmen an kam̧ool eo am̧ kōn Jisōs Kraist kar kajoorļo̧k jān katakin im jerbal in karejar eo an Rijilōk ro An remour?

Ilo eoon 91–92, Irooj ej katakin kōn Rijilōk eo An eutiej, Būreejtōn eo an Kabun̄ in. Elmen an “āinwōt Moses”? (lale Unin Tōl eo an Jeje ko Rekwojarjar, “Moses,” Gospel Library).

Bar lale David A. Bednar, “Kar Kālet n̄an Kwaļo̧k Naan in Kam̧ool kōn Eta,” Liaona, Nov. 2015, 128–31.

Katak im Bujen Ko 107:27–31, 85–89

Irooj ej katōprak jerbal eo An kōn ko̧o̧njeļ ko.

Keememej ta eo Irooj eaar katakin kōn ko̧o̧njeļ ko ilo Katak im Bujen Ko 107:27–31, 85–89. Ta eo ej kōm̧m̧an bwe juon ko̧o̧njeļ en jerbal? Ekōjkan am̧ maron̄ kōjerbal pedped kein ilo kūr eo am̧ ilo Kabun̄, m̧weeo im̧ōm̧, im jerbal ko jet am̧?

Bar lale M. Russell Ballard, “Ko̧o̧njeļ ko an Baam̧le,” Liaona, Māe 2016, 63–65; Bok in Bōk Meļeļe Eļap, 4.3–4.4, Gospel Library.

Irooj ej karuwaineneik baam̧le ko n̄an koonjeļ ippān doon.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Katak im Bujen Ko 107:18–20

Jisōs Kraist ej kōjeraam̧m̧an eō jān kajoor in prieshood eo An.

• Ilo am̧ im ajri ro nejūm̧ riit ippān doon Katak im Bujen Ko 107:18–19, kameej naan eo “aolep kōjeraam̧m̧an ko an jetōb.” Bōlen kwe im ajri ro maron̄ in kalaajrake kōjeraam̧m̧an ko me rej itok jān priesthood eo Kwoj maron̄ kōm̧m̧ane juon ikkure kake menin—lale wōn eo emaron̄ in kōm̧m̧ane juon laajrak eo eaitok tata. Ajri ro nejūm̧ remaron̄ bar jin̄a ak kappukot pija ko rej bōk jikin kōjeraam̧m̧an kein (lale peij in m̧akūtkūt eo an wiik in). Innām kwomaron̄ kōnono wāween an kain̄i ko an priesthood (āinwōt peptaij ak kwojkwoj eo) jipan̄ kōj bōk kōjeraam̧man ko an Anij.

Katak im Bujen Ko 107:21–26, 33–35, 91–92

Irooj eaar kāālet ro rikarejeran n̄an tōl Kabun̄ in An.

• Aolep ennaan in kweilo̧k eo eļap an Liaona ewōr ie juon peij in pja in Ritōl ro Routiej. Ļōmņak in lale pija kein ippān ajri ro ilo am̧ riit kōn eddo ko aer ilo Katak im Bujen Ko 107:21–26, 33–35, 91–92. Kwe im ajri ro nejūm̧ maron̄ kōnono etke kwoj kam̧m̧oolol bwe Irooj ekar lewaj eddo kein n̄an er.

• Ajri ro nejūm̧ remaron̄ ekkatak eļapļo̧k kōn ro rikarejeran Irooj ilo “General Church Leadership” ilo ChurchofJesusChrist.org. Bōlen kajjojo ajri remaron̄ ekkatak kōn juon iaan ritōl rein im katak in doon kōn e. Kwaļo̧k n̄an doon etke kwojeļā ke ritōl rein rej rijerbal ro rem̧ool an Jisōs Kraist.

• Ālkin riiti Katak im Bujen Ko 107:22 ippān doon, kwe im ajri ro maron̄ kajjojo jibwe juon pijaan Būreejtōnji eo Kein Kajuon im kwaļo̧k wāween ko kwomaron̄ rejetak er āinwōt ro rikarejaran Irooj.

Būreejtōnji eo Kein Kajuon

Katak im Bujen Ko 108:3

Imaron̄ tiljek n̄an kōjparok bujen ko aō.

• N̄an jino kōnono eo kōn eoon kein, kwomaron̄ karuwaineneik ajri ro n̄an kōm̧m̧ane juon men me ebōk lukkuun aer n̄an tiljek, āinwōt tein̄i juon kab ak en jab lutōk. Ta eo ej waļo̧k n̄e jejjab tiljek? Innām kwomaron̄ riiti Katak im Bujen Ko 108:3 n̄an kappukot ta eo Irooj ej kōņaan bwe en tiljek ad kōm̧m̧ane. Ta “kallim̧ur ko” (ak bujen ko) jej kōm̧m̧ane ippān Anij? Ewi wāween ad tiljekļo̧k n̄an kōjparoki? Kwomaron̄ jeere jimettan in enaan eo an Sister Becky Craven “Tiljek ņae Jatiljek” (Liaona, Māe 2019, 9–11) me kwomaron̄ in en̄jake n̄an im̧we ajri ro nejūm̧ n̄an kōjparok bujen ko aer. Kom̧ maron̄ bar al juon al kōn kōjparok bujen ko, āinwōt “I Will Be Valiant” (Children’s Songbook, 162).

Tiljek ilo ad lutōke dān eo jemaron̄ keidi n̄an tiljek kōjparok bujen ko ad.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.

Melchizedek Blesses Abram, jān Walter Rane