Ko̧o̧njeļ ko an Baam̧le
N̄e ro jinen im jemen rej pojak im ajri ro rej ron̄jake im bōk kuņaer ilo ekōnono eo, ko̧o̧njeļ an baam̧ļe eo ej lukkuun in jerbal!
Ro jeiū im jatū, men eo ekōjak in bōtaab em̧ool ej bwe ro jinen im jemen ej bwe jej kajjeon̄ em̧m̧an ilo menin ālkin an ajri ro nejid rūtto ļo̧k. Inaaj kwaļo̧k ippāmi raelepān in juon men in en kar em̧m̧an ļo̧k aō meļeļe ke Barbara im n̄a kar jino karrūto ļo̧k ajri ro nejim̧ro raorōk.
Ilo tōre in jerbal in kwaļo̧k eo aō āinwōt juon rijjilōk, emmakijkij aō āliji kajoor im aorōk eo an ko̧o̧njeļ ko an Kabun̄, ekoba mijen, stake, ward, im ko̧o̧njeļ ko an radik.
Ij tōmak ko̧o̧njeļ ko rej wāween ko rewejepedik tata n̄an bōk tōprak ko rem̧ool. Ilo kakobaba, ijeļā ko̧o̧njeļ ko rej wāween eo an Irooj im bwe Eaar kōm̧anm̧an aolep men ko ilo laļ in kōn juon ko̧o̧njeļ in lan̄, āinwōt kar kwaļo̧k ilo jeje ko rekwojarjar.1
M̧ae kiiō, mekarta, ijjan̄in kar kōnono ilo kweilo̧k eo eļap kōn ko̧o̧njeļ eo ekanooj ļamwaan im ioļapļap tata—im bōlen aorōk tata—iaan aolep ko̧o̧njeļ ko: ko̧o̧njeļ eo an baam̧le.
Ko̧onjeļ ko an baam̧le raar iien otemjej kar aikuji. Rej, ilo m̧ool, indeeo. Jaar uwaan juon ko̧o̧njel in baam̧le ilo mour eo m̧okta, ke jaar mour ippān ro jined im jemed ilan̄ āinwōt ajri in jetōb ro nejier.
Juon ko̧o̧njeļ an baam̧ļe, n̄e kōm̧m̧ane kōn iakwe im m̧wil ko āinwōt an Kraist, naaj kadikļo̧k an kein kapeel ko raan kein jelet me emakijkij aer kōm̧ad kōj jān joļo̧k iien ko raorōk ippān doon im barāinwōt kajieo̧j bōktok nana kajjut n̄an ilowaan im̧ōko im̧ōd.
Jouj im kememej bwe ko̧o̧njeļ ko an baam̧ļe rej oktak jān nokon in jota an baam̧ļe kōm̧m̧m̧ane ilo M̧ande ko. Noko in jota ko rej eļap tata pedped ioon katak kōn gospel eo im m̧akūtkūt ko an baam̧le. Ko̧o̧njeļ ko an baam̧le, ilo jekjek eo juon, maron̄ kōm̧m̧ane ilo jabdewōt raan ilo juon wiik, im rej ilo m̧ool juon kweilo̧k me ro jinen im jemen rej ron̄jake—doon im ajri ro nejier.
Ij tōmak ewōrjilu kain ko̧o̧njeļ ko an baam̧le:
M̧o̧ktata, juon ko̧o̧njeļ an baam̧ļe ej koba in aolepān baam̧le eo.
Ruo, ko̧o̧njeļ an baam̧ļe epād ippāer maron̄ eo ej koba in juon jinen im jemen.
Jilu, ko̧o̧njeļ an baam̧le ewōr wōran koba in ro jinen im jemen im juon ajri.
Emen, ko̧o̧njeļ an baam̧le juon illo̧k juon koba in juon jinen ak jemen im juon ajri.
Jekjek kein aolep an ko̧o̧njeļ an baam̧ļe, electronic device ko rej aikuj kun bwe aolep ren maron̄ lale im ron̄jake doon. Ilo iien ko̧o̧njeļ ko an baam̧ļe im iien ko jet rekkar, kom̧ maron̄ kōņaan bwe en wōr juon iiep n̄an electronic device ko bwe n̄e baam̧le eo aiin doon, aolep—ekoba M̧am̧a im Baba—maron̄ door talboon ko aer, tablet ko, im MP3 player ko ilo iiep eo. Ālkin, remaron̄ ko̧o̧njeļ ippān doon ilo an ejjeļo̧k kapo n̄an uwaaki ennaan ko aer ilo Facebook, text, Instagram, Snapchat, im email ko rej būki.
Ilo tukadu in kwaļo̧k ippāmi ekōjkan an kajjojo jekjek kein an ko̧o̧njeļ ko an baam̧ļe maron̄ jerbal.
M̧oktata, dipio in ko̧o̧njeļ an baam̧ļe ekoba aolep ro uwaan baam̧le eo.
Bok jidikdik eo an Kabun̄ taitōl in Our Family ej kōnono, “Ko̧o̧njeļ in emaron̄ kweilo̧k n̄an ekōnono kōn jorrāān ko an baam̧ļe, jerbali jāān ko, kōm̧m̧ani karōk ko, rie im kōkajoor ļo̧k [doon], im jar kōn doon im doulul eo an baam̧ļe.”2
Ko̧o̧njeļ in aikuj kweilo̧k ilo iien karōke im ej ekkar an ļap ļo̧k jān jabdewōt kain ko̧o̧njeļ an baam̧ļe.
Ej aikuj ijjino kōn jar, ak emaron̄ juon iien dem̧o̧ ļo̧k in ekōnono ko em̧ōj aer kar ijjino ilo bar jekjek ko jet. Jouj im kūle bwe juon ko̧o̧njeļ an baam̧ļe emaron̄ jab aolep iien ewōr juon ijjino ak kōjjem̧ļo̧k emakijkij kōm̧m̧ane.
N̄e ro jinen im jemen rej pojak im ajri ro rej ron̄jake im bōk kuņaer ilo ekōnono eo, ko̧o̧njeļ an baam̧ļe eo ej lukkuun in jerbal!
Jekdo̧o̧n ta lukkuun jekjek eo an baam̧ļe eo ad, eaorōk bwe jān meļeļe jekjek ko rein juon an kajjojo ro uwaan baam̧ļe eo. Men̄e jemaron̄ ilo bōtōktōk nukik doon, emaron̄ wōr jekjej ko im wāween ko ibwilijid me ekōm̧m̧an bwe jān lukkuun okta jān doon im eo emaron̄ aikuji ippān doon an ko̧o̧njeļ an baam̧le n̄an ņa mejļan jorrān ko.
N̄an waanjon̄ak, aolep kōnono ko im kwaļo̧k im iakwe ko ilo laļ in maron̄ jab ņa mejļan juon jorrāān ilo taktō ak juon en̄jake eo epen me juon ak ruo uwaan baam̧le eo remaron̄ jelm̧ae. Ilo tōre kein, ko̧o̧njeļ an baam̧ļe ej erom juon jikin kuk, m̧ool, im rie eo em̧m̧an āinwōt jipan̄ itulikin jipan̄ an baam̧ļe eo ilo pukōt mejļan ko.
Jemjān jemjati ro, eļap tata ro rōrūtto ļo̧k, remaron̄ rijippan̄ ro rekajoor n̄an ajri ro reddik eļan̄n̄e ro jinen im jemen naaj kōjerbal ko̧o̧njeļ an baam̧ļe n̄an kōjerbal jipan̄ eo aer im rie ilo tōre ko reppen im apan̄.
Ilo wāween in, juon baam̧le ej āinwōt juon ward. N̄e bisop eo ej kobaik ro uwaan ward ko̧o̧njeļ eo, emaron̄ ņa mejļan jorrāān ko im kōtōprak elōn̄ men ko rem̧m̧an ilo wāween eo ejjab maron̄ kar kōm̧m̧ane ilo an ejjeļo̧k aer jipan̄. Ilo ejja ļamļam in wōt, ro jinen im jemen rej aikuj kobaik aolep ro uwaan baam̧le eoo ilo ņa mejļan apan̄ ko im kapo. Ilo wāween in, kajoor eo an ko̧o̧njeļ an baam̧ļe ej jerbal. N̄e ro uwaan ko̧o̧njeļ eo rej en̄jake bwe ren m̧ōttan juon jokālet, rej erom ro rej rie im tōprak ko rem̧m̧an maron̄ kōtōprake.
Ejjab aolep ko̧o̧njeļ an baam̧le ewōr ruo jinen im jemen im ajri ro. Ko̧o̧njeļ an baam̧l eo ami emaron̄ lukkuun oktak jān ko̧o̧njeļ an baam̧ļe eo am ke kōm kar karrūto ļo̧k ajri ro nejim jijlimjuon. Rainin ko̧o̧njeļ an baam̧ļe eo am ekoba Barbara im n̄a wōt, ijello̧kin n̄e kōmij kōm̧m̧ane juon ko̧o̧njeļ an baam̧le eo ekoba ajri ro nejim rōrūtto, ro karejarer, im jet iien ajri ro jibūm im ro jibūm̧-jibūmro.
Ro me ejjeļo̧k rejetaer im em̧ool rijikuuļ ro mour etto ļo̧k jān kapijuknen maron̄ ļoor jon̄ak an ko̧o̧njeļ eo ekwojarjar kōn koba ippān ro m̧ōttaer im roommate ro aer n̄an ko̧o̧njeļ ippān doon.
Ļōmņak kōn ekōjkan an peļaak eo ilo juon apartment maron̄ oktak eļan̄n̄e roommate ro rej koba ippān iien otemjej n̄an jar, ron̄jake, im ekōnono, im karōk men ko ippān doon.
Jabdewōt remaron̄ ukukōt juon ko̧o̧njeļ an baam̧ļe n̄an kōjerbale n̄an jeram̧m̧an eo aer an jon̄ak in ekwojarjar kar ejake jān Jemedwōj Ilan̄ eo ej iakwe.
Āinwōt aō kar ba m̧okta, jān iien n̄an iien ko̧o̧njeļ an baam̧le an nukun emaron̄ kanooj jipan̄. Juon ko̧o̧njeļ an baam̧le an nukun emaron̄ in koba in ro jibūn im jim̧m̧an im ajri ro rōrūtto me rejjab jokwe im̧weo. Em̧ool eļan̄n̄e ro jibūn im jim̧m̧an ak ajri ro rōtūtto rej jokwe ettoļo̧k, remaron̄ bōk kuņaer ilo ko̧o̧njeļ ko an baam̧ļe ilo talboon, Skype, ak FaceTime.
Kom̧ maron̄ kōņaan ļōmņak in kōm̧m̧ae ko̧o̧njeļ an baam̧ļe ekkā ilo Jabōt, eo ej raan eo kein kajuon an wiik; baam̧le ko remaron̄ etale wiik eo ļo̧k im karōk n̄an wiik eo ej itok. Remaron̄ lukkuun ta eo baam̧le eo aikuji n̄an jipan̄ kōm̧m̧anbwe Jabōt en juon en̄jake elaudin̄din̄.
Jekjek eo kein karuo an ko̧o̧njeļ an baam̧ļe ej juon ko̧o̧njeļ an baam̧ļe ewōr maron̄ me ekoba wōt jinen im jemen. Ilo iien in ippān doon, ro jinen im jemen remaron̄ etale aikuj ko an kajjojo ajri ilo ānbwiin, en̄jake, im jetōb im eddōk ļo̧k eo aer.
Ko̧o̧njeļ an baam̧ļe ewōr maron̄ ie ej barāinwōt juon iien em̧m̧an n̄an lim̧aro im ļōm̧aro pālele n̄an kōnono kōn jemjerā ko aer make ippān doon. Ke Elder Harold B. Lee kōm̧m̧ane liāp eo am, eaar kataki kōm juon pedped me ij tōmak aolep ripālele ro renaaj lo ejipan̄. Eaar ba, “Jamin n̄an jidik kiki ilo ami jab bukwelōlō ippān doon, jibwe pein doon, im kōm̧m̧ane jar ko ami Kain jar rōt in ej karuwineneik Jemed Ilan̄ n̄an ko̧o̧njeļ ippād kōn kajoor eo an Jetōb.”
Jekjek eo kein kajilu an ko̧o̧njeļ an baamle ej ko̧o̧njeļ an baam̧ļe ej juon eo ewōr jon̄an. Ijin, jim̧o̧r ro jinen im jemen rej joļo̧k iien ippān kajjojo ajri ilo juon mejatoto eo ekkā kōm̧m̧ane ak ilo iien eo jab kōtmene. Iien in ej juon iien em̧m̧an n̄an ekōnono kōn kōm̧m̧ani jokālet ko m̧okta jān iien eo ikkijien kain men kein āinwōt ta eo ļeo ak lieo naaj im naaj jab kōm̧m̧ane ilju im jekļaj. N̄e kain jokālet kein rej kōm̧m̧an, remaron̄ kōņaan ļo̧o̧ki n̄an ilju im jekļaj kein jipan̄ ko eļan̄n̄e aikuji. Eļan̄n̄e ļaddik ak leddik eo nejimi ej lo kom̧ āinwōt juon kein rie epen, kweilo̧k in ko̧o̧njeļ in emaron̄ ejake menin kōttōpar ko im jibadbad ko n̄an ilju im jekļaj. Iien in ej barāinwōt juon iien n̄an kanooj ron̄ajke n̄ūrbōktak ko reļļap im apan̄ ko me juon ajri maron̄ kar jelm̧ae kōn kain men kein āinwōt jab lōke, kakkure, kōmetake, ak mijak.
Jekjek eo kein kemen an ko̧o̧njeļ an baam̧le ej juon-illo̧k-juon ko̧o̧njeļ an baam̧ļe ekoba juon jinen im jemen im juon ajri. Jekjek in an ko̧o̧njeļ an baam̧ļe emakijkij an waļo̧k. N̄an waanjon̄ak, eo jinen ak jemen im ajri eo remaron̄ kōjerbal iien ko rem̧m̧an ilo aer ettōr ilo wa ak jerbal ipeļaak in m̧weo. Juon iien eo me juon ajri rej itok itak ippān jemen ak jinen emaron̄ letok juon iien ilo jetōb im en̄jake ejeno̧lo̧k. Jikejuuļi kain iien rōt in m̧okta ļo̧k bwe ajri ro ren maron̄ karōk im reim̧aan ļo̧k n̄an iien rōt in ejeno̧lo̧k make ippān Jinen ak Jemen
Kiiō, ro jeiū im jatū, eaar wōr juon iien ke m̧weo im̧ōm eaar letok aolep kattōrak ko kōm kar aikuji ņae kapopo ko im kaeel ko jān ilikin. Kōm kar ļaki kōjām ko, dauk wintōk ko, im kiil oror ko, im kōm ka en̄jake ineem̧m̧an, aenōm̧m̧an, im kōjparok ilo likōpejn̄ak eo am edik jān laļ in.
Raan ko kiiō remoot ļo̧k. Dāpdep ko, kōjam ko, ook ko, oror ko an m̧weo im̧ōm jab maron̄ bōbrae luko̧rko̧r ko jab loi jān Internet, Wi-Fi, im network ko an talboon. Remaron̄ deeil im̧ōko im̧ōd kōn kōjerbal mouse an computer eo ak juon keyboard.
Jeram̧m̧an, Irooj eaar letok juon wāween n̄an jum̧ae lukwo̧rko̧r eo an ijo enana an kein kapeel in raan kein me emaron̄ kōm̧ad kōj jān joļo̧k iien eo em̧m̧an ippān doon. Eaar kōm̧m̧ane menin kōn letok jekjek in ko̧o̧njeļ eo n̄an kōkajoor ļo̧k, kōjparok, tōlarōk, im karōk jemjerā ko ad raorōk tata.
Ajir ro relukkuun in aikuji ro ro jinen im jemen kōņaan eo n̄an ron̄jake er, im ko̧o̧njeļ an baam̧ļe emaron̄ letok juon iien me ro uwaan baam̧ļe eo remaron̄ katak n̄an meļeļe im iakwe doon.
Alma eaar katakin, “Pepe ippān Irooj ilo aolep kōm̧m̧an ko am̧, im Enaaj tōl eok n̄an aenōm̧m̧an.”3 Karuwaineneik Irooj n̄an m̧ōttan ko̧o̧njeļ an baam̧ļe eo ad kōn jar naaj kōkōm̧anm̧an jemjerā ko ad ippān doon. Jemaron̄, kōn an Jemed Ilan̄ im jipan̄ an ad Rilo̧mo̧o̧r, erom kijenmej ļo̧k wōt, jouj, jipan̄, jeorļo̧k bōd, im meļeļe ilo ad jar kōn jipan̄. Kōn jipan̄ eo Aer, jemaron̄ kōm̧m̧an bwe m̧weo im̧ōd en āinwōt lan̄ ioon laļ in.
Juon ko̧o̧njeļ an baam̧ļe me ej anōk ko̧o̧njeļ ko ilo lan̄, obrak kōn iakwe āinwōt an Kraist, im tōl jān jetōb eo an Irooj naaj jipan̄ kōj kōjparok baam̧le eo ad jān kapopo ko me remaron̄ ko̧o̧te iien eo ad aorōk ippān doon im kōjparok kōj jān nana ko an laļ in.
Koba ippān jar, ko̧o̧njeļ an baam̧ļe enaaj kūr tok paotok eo an Rilo̧mo̧o̧r, āinwōt An kar kallim̧ur: “Bwe ijo ruo ak jilu rej kweilo̧kļo̧k ilo Eta, Ij pād eoļōpāer.”4 Karuwaineneik Jetōb eo an Irooj n̄an m̧ōttan ko̧o̧njeļ ko an baam̧le eo am ej bōktok kōjeram̧m̧an ko eļap ļo̧k jān kōmeļeļeiki.
Āliktata, jouj im kememej bwe juon ko̧o̧njeļ an baam̧ļe ej kōm̧m̧an iien otemjej enaaj m̧ōkaj an jipan̄ lo jorrāān ko an baam̧ļe im ņa mejļaer; renaaj leļok n̄an kajjojo ro uwaan baam̧ļe eo juon en̄jake wōr tokjān im aorōk eo aer; im eļap tata aolep renaaj jipan̄ kōj n̄an erom wejepedik ļo̧k im m̧ōņōņō ilo jemjera ko ad raorōk, ilowan m̧weo im̧ōd. Kōm̧m̧an bwe Jemād Ilan̄ en kōjeram̧m̧an baam̧le ko ad ilo ad ko̧o̧njeļ ippān doon, ij jar ilo ettā ilo etan Nejin Jitōnbōro, Jisōs Kraist, amen.