Lōke ilo Jetōb Eo ej Tōl ļo̧k n̄an Kōm̧m̧an Em̧m̧an
Jej epaakeļo̧k Rilo̧mo̧o̧r eo ilo ad, iakwe em̧ool, im jerbal n̄an ro jet kōn E.
Ij kam̧m̧oolol bwe imaron̄ in pād ippāmi joteen in im kabun̄jar, kōļmenļo̧kjeņ kōn, im wujlepļo̧k. Jekar jar ippān doon. Jemedwōj Ilan̄ eo eobrak kōn iakwe ekar ron̄jake kōj. N̄e jej keememej ad Rilo̧mo̧o̧r, Irooj Jisōs Kraist, āinwōt ad kar en̄jake al in nōbar ko n̄an nōbar E. Jekar maron̄ bōk im̧we n̄an kōm̧m̧an eļapļo̧k n̄an jipan̄ Maajta eo ad ilo jerbal in An n̄an kotak im kaenōm̧m̧an ajri ro nejin Jemedwōj Ilan̄.
Kōņaan eo ad n̄an jerbal n̄an ro jet ej ļapļo̧k ilo ad kam̧m̧oolol kōn ta eo Rilo̧mo̧o̧r eo ekar kōm̧m̧ane n̄an kōj. En̄in ej unin an būruwōd jib ke jej ron̄ naan kein “Because I have been given much, I too must give.”1 Kiin̄ Benjamin, ilo kwaļo̧k eo an eļap kar je ilo Bok in Mormon, kar kallim̧ur kake bwe en̄jake eo an kam̧m̧oolol naaj itok (lale Mosaia 2:17–19).
N̄e tōmak eo ad ilo Jisōs Kraist ej tōl ļo̧k kōj im kōkarbab e kōj kōn lan̄lōn̄ in jeorļo̧k bōd eo An, jej en̄jake juon ikdeleel n̄an jerbal n̄an ro jet n̄an E. Kiin̄ Benjamin ekar katakin bwe jeorļo̧k bōd ej jab tōprak ilo juon wōt iien.
Ekar ba wāween eo in: “Im kiiō, kōn kilaan men kein iaar kōnono n̄an kom̧—En̄in, kōn kilaan dāpij jeorļo̧k eo kōn jero̧wiwi ko ami jān raan n̄an raan, bwe kom̧in maron̄ etetal ilo ejjeļo̧k ruōmi im̧aan Anij—ikōņaan bwe kom̧in leļo̧k m̧ōttan m̧weiuk ko ami n̄an ro rijeram̧ōl, kajjojo armej ekkar n̄an men eo ewōr ippān, āinwōt naajdik rikwōle, kanuknuk rikeelwaan, loļo̧k rinan̄inmej im leļo̧k n̄an aer rōļo̧k, jim̧or ilo jetōb im ilo kanniōk, ekkar n̄an kōņaan ko aer” (Mosaia 4:26).
Kōmpānien eo an Alma, Amulek, ekar barāinwōt katakin m̧ool eo bwe jej aikuj wōnm̧aanļo̧k ilo jerbal eo ad n̄an E bwe jen maron̄ bōk jeorļo̧k bōd: “Im kiiō lo, ro jeiū im jatū rejitōnbōro, ij ba n̄an kom̧, kom̧in jab ļōmņak bwe en̄in ej aolep; bwe ālikin ami kar kōm̧m̧ani aolep men kein, eļan̄n̄e kom̧ij oktakļo̧k jān riaikuj, im jān eo ekeelwaan, im jab loļo̧k rinan̄inmej im rien̄taan, jab leļo̧k m̧weiuk ko ami, eļan̄n̄e ewōr ippemi, n̄an ro rej pād ilo aikuj—Ij ba n̄an kom̧, eļan̄n̄e kom̧ ar jab kōm̧m̧an jabdewōt men kein, lo, jar eo ami ewaan, im ejjeļo̧k tokjān n̄an kom̧, im kom̧ij āinwōt rietao ro rej kariab tōmak eo” (Alma 34:28).
Ikar ļōmņak jota kōn kōrā ro ilo mour eo aō. Ewōr 31 kōrā ro im leddik ro ilo baam̧le eo am̧, ej ijjino ippān kōrā eo pāleeō im wōnm̧aanļo̧k wōt im kobaiktok leddik ro jibūm̧ rej kab ļo̧tak. Jet rej pād ijin ippād joteen in. Ļalem rej pād laļ in 12 iiō. Iien in ej kweilo̧k eo aer kein kajuon ilo Conference Center in ippān sister ro aer ilo Kabun̄ in an Rilo̧mo̧o̧r. Kajjojo iaer enaaj bōk jet ememļo̧kjeņ ko roktak jān doon im kōm̧m̧an aer make kallim̧ur jān en̄jake in joteen in.
Elōn̄ jilu ememļo̧kjeņ ko im jilu kallim̧ur ko ij jar kaki bwe ren maron̄ pād wōt ippāer ilo aolepān aer mour im m̧aanļo̧k wōt. Ememļo̧kjeņ ko rej en̄jake ko. Im kallim̧ur ko rej men ko n̄an kōm̧m̧ani.
En̄jake ko reļļap im aorōk ej iakwe. Kom̧ kar en̄jake iakwe eo an ritōl rein rej sister ro ami ro rekar kōnono. Im kom̧ kar en̄jake itok wōt jān Jetōb eo bwe rej iakwe kom̧ men̄e rejjab jeļā kajjeimi kōnke rekar en̄jake iakwe eo an Jemedwōj Ilan̄ im Rilo̧mo̧o̧r eo n̄an kom̧. En̄in ej unin aer lukkuun kōņaan jerbal n̄an kom̧ im bwe kom̧win bōk kōjeraam̧m̧an ko Anij ekōņaan n̄an kom̧.
Kom̧ kar en̄jake iakwe eo n̄an ro jet joteen in—n̄an ro jerami, rijikuuļ ro m̧ōttami, ro riturim̧i, im aaet juon eo kom̧ij kab iioone ilo mour eo ami, juon rūwaimaijet. En̄jake in iakwe in ej juon menin letok jān Anij. Jeje ko rekwojarjar rej ņaetan “iakwe-em̧ool” im “iakwe eo erreo an Kraist” (Moronai 7:47). Kom̧ kar en̄jake iakwe in joteen in, im emaron̄ emakijkij ami bōke n̄e kom̧ naaj pukōte.
En̄jake eo kein karuo kom̧ kar bōke joteen in ekar im̧we eo an Jetōb Kwojarjar. Sister rein rekar kallim̧uri kom̧ joteen in bwe Jetōb Kwojarjar enaaj tōl kom̧ bwe kom̧win loe jipan̄ eo Irooj enaaj lewaj n̄an kom̧ bwe kom̧win leļo̧k n̄an ro jet kōn E. Kom̧ kar en̄jake jān Jetōb eo bwe kallim̧ur eo aer ej jān Irooj im bwe menin em̧ool.
Irooj ekar ba, “Im kiiō, em̧ool, em̧ool, Ij ba n̄an eok, likūt am lōke ilo Jetōb eo ej tōlļo̧k n̄an kōm̧m̧an em̧m̧an—aaet, n̄an kōm̧m̧an jim̧we, n̄an etetal ettā, n̄an ekajet jim̧we; im en̄in ej Aō Jetōb” (K&B 11:12).
Kom̧ kar bōk kōjeraam̧m̧an in joteen in. N̄an waanjon̄ak, juon āt ak turin mejān juon armej eo eaikuj jipan̄ emaron̄ itok ilo kōļmenļo̧kjeņ eo ami ilo kweilo̧k in. Emaron̄ kar juon ļōmņak ekadu, ak kōn wōt ta eo kom̧ kar ron̄jake joteen in, kom̧ naaj jar kake, lōke bwe Anij enaaj tōl kom̧ n̄an kōm̧m̧ane men eo em̧m̧an Ekōņaan n̄an er. Āinwōt kain jar rot kein rej erom juon jon̄ak ilo ami mour, kom̧ im ro jet renaaj oktak im em̧m̧anļo̧k.
En̄jake eo ippām̧i joteen in ej bwe kom̧win aikuj in epaake ļo̧k Rilo̧mo̧o̧r eo. Men̄e leddik ro reddiktata ijin renaaj en̄jake an m̧ool kajjitōk in ilo al in: “‘Itok, ļoor eō,’ Rilo̧mo̧o̧r eo ekar ba. Kōn menin, jen ļoor waanjon̄ak eo An.”2
Kōn menin, kōn en̄jake kein men eo jinoin kwoj aikuj kallim̧ur n̄an kōm̧m̧ane ej etal im jipan̄ ilo am likūt lōmņak in bwe kwoj jab make iaam̧. N̄e kwoj etal im kaenōm̧m̧an im jipan̄ jabdewōt n̄an Rilo̧mo̧o̧r eo, E ej kōpooje iaļ eo n̄an kwe. Kiiō, ilo an mijenede ro rekar mijenede pād ijin joteen in jiron̄ kom̧, bwe ejjab meļeļein bwe aolep armej ilo aolep kōjem̧ repojak in karuwaineneik kom̧ ak aolep armej kwaar kajjieon̄ in jipan̄ er renaaj kam̧m̧oolol kom̧. Ak Irooj enaaj etal im̧aam̧ n̄an kōpooje iaļ eo.
Jān iien n̄an iien, Būreejtōn Thomas S. Monson ekar ba bwe ejeļā m̧ool eo an kallim̧ur in an Irooj: “Im jabdewōt eo ej bōk kom̧, Inaaj pād ijo barāinwōt, bwe Inaaj etal im̧aanļo̧k in mājāmi. Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧” (K&B 84:88).
Juon iaan wāween ko Ej etal im̧aan kōj ej n̄an kōpooj būruwōn juon armej Ekar kajjitōk ippām̧i n̄an jipan̄ e. E enaaj kōpooje būruwōm̧ barāinwōt.
Kom̧ naaj lo bwe Irooj ej likūt rijipan̄ ro iturājetimi—iaanbwijmaron̄imi, iaanmiin̄imi, im ipeļaakimi. Kom̧ij jab etal make iaami n̄an jerbal n̄an er kōn E.
Irooj ekar “kōpooje elōn̄” (Hibru 12:1), jim̧or ilo naan im al, n̄an kobaiki im koorļo̧k kajoor in ta eo E kōņaan bwe in ba. Ikar aikuj in jeļā n̄e imaron̄ kōm̧m̧ane ijo kuņaaō kōn enaan eo Ekar kōņaan bwe in kwaļo̧k. Ij kōjatdikdik im jar bwe kom̧ naaj kam̧m̧oolol im lan̄lōn̄ ilo an Irooj kobaik ippām̧i im ro jet n̄an jerbal n̄an E.
Ilo an emakijkij ami bōk en̄jake in, im kom̧ naaj, kom̧ naaj ettōn̄ dikdik kōn nōbar, āinwōt n̄a, jabdewōt iien jej al “Jerbal in Kamōnōnō.”3
Kom̧ naaj barāinwōt ettōn̄ dikdik n̄e kom̧ij keememej eoon in: “Im Kiin̄ eo enaaj uwaak im ba n̄an er, Em̧ool ij ba n̄an kom̧, ilo ami kōm̧anm̧an jabdewōt n̄an juon iaan rein ro jatū ediktata, kom̧ ar kōm̧anm̧ane n̄an Eō” (Matu 25:40).
Men eo kein karuo kwoj aikuj kōm̧m̧ane ej keememej Irooj ilo am̧ etal im jerbal n̄an E. Irooj ejjab etal wōt im̧aam̧ im jilkinļo̧k enjeļ ro n̄an jerbal ippād, ak Ej barāinwōt en̄jake kaenōm̧m̧an eo jej leļo̧k n̄an ro jet āinwōt n̄e jekar leļo̧k n̄an E.
Aolep leddik ro nejin Anij ro rej ron̄jake im tōmak ennaan ko ilo kweilo̧k in naaj kajjitōk, “Ta eo Irooj enaaj kōņaan bwe in kōm̧m̧ane n̄an jipan̄ E leļo̧k jipan̄ n̄an ro rej aikuj?” Kajjojo jekjek ko an juon sister raorōk. Menin em̧ool n̄an leddik ro nejū, leddik ro ippān ļōm̧aro nejū, leddik ro jibū im jibū-jibū. N̄an er, im n̄an aolep leddik ro nejin Jemedwōj Ilan̄, ij ālij kapilōk in em̧m̧an an Sister Linda K. Burton.
Liin ekar kajjitōk ippām̧i bwe kom̧in jar im tōmak n̄an jeļā ta eo Irooj enaaj kōņaan bwe kwōn kōm̧m̧ane ilo jekjek ko am̧. Innām liin ekar lewaj n̄an kom̧ kallim̧ur eo kōn kaenōm̧m̧an eo em̧m̧an an Irooj Make ekar leļo̧k n̄an kōrā eo me kar kōnono kōn an kar kapit bōran kōn wāeļ eo eļap wōnāān eo en kar aikuj in wiakake n̄an jipan̄ rijeram̧ōļ.
“Im Jisōs ej ba, Kom̧win likūt e; etke kom̧ij an̄ōte? E ar jerbal n̄an Eō jerbal em̧m̧an.
“Bwe ri jeram̧ōļ rej pād ippemi iien otemjej, im iien eo kom̧ kōņaan kom̧ maron̄ jipan̄ er: ak N̄a ijjab pād iien otemjej.
“Lio ear kōm̧m̧an āinwōt an maron̄e; ear kapit ānbwinnū m̧okta n̄an kalbwin Eō.
“E m̧ool Ij ba n̄an kom̧, ijo jabdewōt renaaj kwaļo̧k gospel in i aolepen laļ, men in lio ear kōm̧m̧ane renaaj kōnono kake bwe ren keememej e (Mark 14:6–9).
Eoon in ekadu ej juon kapilōk em̧m̧an n̄an sister ro retiljek ilo aelōn̄ in an Anij ilo juon iien ekawaron̄ron̄. Kom̧ naaj jar bwe kom̧win jeļā wōn ro Anij enaaj kōņaan bwe kom̧win jerbal n̄an er ilo iakwe n̄an E im n̄an Rilo̧mo̧o̧r eo ad. Im kom̧ij jāmin kōtmāne ak kōņaan jeļā ta eo kom̧ kar kōm̧m̧ane, ālkin waanjon̄ak eo ilo eoon in, eo kōm̧m̧an ko an rekwojarjar maron̄ keememeji ak jab etan.
Kōjatdikdik eo aō ej bwe sister ro ilo baam̧le eo aō renaaj kōm̧m̧an em̧m̧an jon̄an wōt aer maron̄ iakwe n̄an Anij n̄an jerbal n̄an ro reaikuj. Im men eo kein kajilu ij kōjatdikdik kake renaaj kōm̧m̧ane bwe ren kōkarbabe er make kōn jerbal ko aer rem̧m̧an. Aaet inaaj jar bwe renaaj bōk kapilōk eo an Irooj, ke Ekar ba—eo Ij lōke jenaaj aikuj in ron̄jake:
“Kōjparok bwe kom̧win jab kōm̧anm̧an ami kwōjarjar im̧aan mejāņ armej bwe ren lo kom̧: eļan̄n̄e jab āinwōt, ejjeļo̧k oņeami ippān Jememwōj i lan̄.
Innam Eaar ba:
“A n̄e kwōj kōm̧m̧an am m̧weien tūriam̧, anmiin̄ōm̧ en jab jeļā men eo an anmooņōm̧ kōm̧m̧an:
“Bwe en ettino am̧ m̧weien tūriam̧o; im Jemam̧ eo Ej lo ilo ettino, E naaj ņa oņeam̧” (Matu 6:1, 3–4).
Aō jar n̄an sister ro ilo aelōn̄ in kiin̄ in, jabdewōt jikin remaron̄ in pād ie ilo jabdewōt jekjek, ej bwe aer tōmak ilo Rilo̧mo̧o̧r eo im Pinmuur eo An enaaj tōl ļo̧k er n̄an kōm̧m̧ane men otemjej remaron̄e n̄an ro Irooj ej kajjitōk ippāer n̄an jerbal n̄an er. Āinwōt aer kōm̧m̧ane, ij kallim̧ur bwe renaaj wōnm̧aanļo̧k im erom̧ kōrā ro rekwojarjar, ro Rilo̧mo̧o̧r eo im Jemedwōj Ilan̄ enaaj karuwaineneik er im nōbar er.
Ij kam̧ool bwe Kabun̄ in ej an Jisōs Kraist eo ekar jerkakpeje. E em̧ōj an Jerkak Ekar kōļļāik wōņāān aolep jerawiwi ko ad. Ijeļā bwe kōn E jenaaj maron̄ jerkakpeje im maron̄ bōk mour indeeo. Būreejtōn Thomas S. Monson ej rikanaan eo An emour. Jemedwōj Ilan̄ ej ron̄jake im uwaake jar ko ad. Ij kam̧ool bwe jen epaakeļo̧k Rilo̧mo̧o̧r eo ilo ad, iakwe eo em̧ool, im jerbal n̄an ro jet kōn E. Āindein ij likūt ippem̧i kamool ilo etan Jisōs Kraist, amen.