Ej kajjitōk n̄an Ad Erom Pā ko Pein
Jerbal in jipan̄ eo em̧ool āinwōt an Kraist ej jab ļōmņak kōn eok make im kalimjōk wōt ro jet.
“Kom̧in yokwe doon; āinwōt Iar yokwe kom̧.”1 Naan kein, kar al jān kumi in al in ejej uwaan, kar kōnono kaki jān Jisōs jet awa m̧okta ļo̧k jān en̄taan in pinmuur eo An eļap—en̄taan eo Elder Jeffrey R. Holland eaar kōmeļeļeik āinwōt “kōkaļļe eo ewōj an iakwe eo erreo kar kwaļo̧ke ilo bwebwenato an laļ in.”2
Jisōs eaar jab wōt katakin kōj wōt n̄an iakwe, ak Eaar mour kōn ta eo Eaar katakin. Ilo aolepān jerbal in kwaļo̧k eo An, Jisōs “eaar etetal im kōm̧anm̧an em̧m̧an”3 im “Ear rōjan̄ kōj otemjej bwe jen ļoor waanjon̄ak ko An.”4 Eaar kwaļo̧k, “Bwe jabdewōt eo ekōņaan dāpij mour, enaaj jako: a jabdewōt eo mour eo an enaaj jako kōn N̄a, e in enaaj lo̧mo̧o̧ren.”5
Būreejtōn Thomas S. Monson, eo eaar meļeļe im mour kōn kean̄ eo n̄an iakwe, eaar ba: “Ij tōmak bwe Rilo̧mo̧o̧r ej jiron̄ kōj bwe eļan̄n̄e jej aje mour ko ad n̄an jerbal n̄an ro jet, ewōr jidik kōttōpar n̄an mour ko ad. Ro me rej mour wōt n̄an er make āliktata jorrāān ilo mour in n̄an … luuji mour ko aer, ilo an ro raar luuji mour ko aer make ilo jerbal n̄an ro jet ej eddōkļo̧k im romakļo̧k—im ilo m̧ool ej lo̧mo̧ren mour eo aer.”6
Jerbal in jipan̄ eo em̧ool āinwōt an Kraist ej jab ļōmņak kōn eok make im kalimjōk wōt ro jet. Juon kōrā eo eaar kauk ļeo ippān eaar ba menin, “Jab ļōmņak kōn jerbal eo am̧ āinwōt juon eddo, ļōmņak kake āinwōt juon iien em̧m̧an n̄an katak ta lukkuun meļeļe in iakwe.”7
Ekōnono ilo juon nokon an BYU, Sister Sondra D. Heaston kar kajjitōk: “Ta eļan̄n̄e jaar maron̄ lukkuun lo būruwōn doon? Enaaj ke kar em̧m̧an ļo̧k ad meļeļe kōn doon? Jān en̄jake ta ro jet rej en̄jake, lo ta eo ro jet rej lo, im ron̄ ta eo ro jet rej ron̄, jenaaj ke kar kōm̧m̧an, im bōk, iien eo n̄an jerbal n̄an ro jet, im naaj ke kar oktak ad kōm̧m̧an n̄an er? Jenaaj ke kar kōm̧m̧an n̄an er kōn elap ļo̧k kijenmej, ļap ļo̧k jouj, im ļap ļo̧k m̧ōņōņō?”
Sister Heaston eaar kwaļo̧k juon en̄jake jān ke eaar jerbal ilo juon kāām an Doulul eo an Jiron̄ ro. Eaar ba:
“Juon iaan … rikōnono ro am ilo nokon eo … kar katakin kōm kōn ‘erom.’ Juon iaan ennaan ko an … kar, ‘Erom juon eo ej ilo̧k n̄an jeļā im jerbal n̄an ro jet—kabōjrak ļōmņak kōn eok make im kalimjōk ro jet.’
.
“N̄an kōm̧m̧ane menin, liin eaar kūr juon jiron̄ im kajjitōk bwe jiron̄ eo en jutak im jelm̧ae e. Innām [liin] eaar kwaļo̧k juon kūlaaj im likūti ikōtaan jiron̄ eo im e bwe liin, [rikōnono eo], en kar kalimjōk ļo̧k kūlaaj eo ilo an liin kajjieon̄ kōnono ippān jiron̄ eo. Ilo an jar kar kōtmāne, eaar jab jino wōr kilaan ak kar jab bwebwenato kake. Menin eaar juon kein katak ekanooj me eaar kwaļo̧k ekōjkan an pen n̄an kōnono kake im jerbal n̄an ro jet eļan̄n̄e eļap ad inepata kōn kōj make im lo wōt kōj make im aikuj ko ad. Innām [liin] eaar door kūlaaj eo, kwaļo̧k tok juon frame in wintō, im likūt ikōtaan mejān im mejān jiron̄ eo. … Kōm kar maron̄ lo bwe jiron̄ eo eaar erom [an] kōttōpar aorōk im bwe m̧ool in jerbal in jipan̄ ej menin aikuj jon̄an kōm kar kalimjōk aikuj ko im en̄jake ko an ro jet. Jet iien ekanooj ļap ad inepata kōn kōj make im mour ko ad repoub—ilo ad kalimjōk kūlaj ko ilo ad kajieon̄ pukōt iien ko rem̧m̧an n̄an jerbal—jon̄an ejjab alikkar ad lo ro jej jerbal n̄an er.”8
Būreejtōn Monson emakijkij an kar kakeememej kōj bwe jej “jepooļ kōn ro rej aikuji jipan̄ ko ad, kōketak ko ad, rejtak ko ad, kaenōm̧m̧an ko ad im jouj ko ad—men̄e ro uwaan baam̧le ko ad, ro m̧ōttad, ro jejeļā kajjier ak ruwamejet ro.” Eaar ba, “Jej pā ko pein Irooj ilo laļin, kōn ijjitōn̄ eo n̄an jerbal im n̄an kotak ajri ro Nejin. Ej kōjatdikdik ioodwōj kajjojo.”9
Iiō eo ļo̧k ilo Jānwōde, Friend im Liahona māākjin ko raar karuwaineneik ajri ro aolepān laļ in n̄an lo̧o̧r kapilōk eo an Būreejtōn Monson—n̄an erom pā ko pein Irooj. Kar karuwaineneik ajri ro n̄an kōm̧m̧an jerbal in jipan̄ ko—ļap im dik. Innām kar kōketak er n̄an jin̄aik peier iion juon peba, m̧wijiti, je jerbal in jipan̄ eo raar kōm̧m̧ane ioon, im jilkin ļo̧k n̄an mākjiin ko. Elōn̄ iaami rej ron̄jake joteen in maron̄ jet iaan taujin ajri ro raar kōm̧m̧ane jerbal in jipan̄ in em̧m̧an im jilkin ļo̧k.10
N̄e ajri ro rej katak ekōjkan iakwe im jerbal n̄an ro jet n̄e rej dik wōt, rej āje juon jon̄ak in jerbal in jipan̄ ilo aolepān mour ko aer. Jet iien ajri ro rej katakin kōjwōj aolep bwe kwaļo̧k iakwe im jerbal in jipan̄ ejjab aikuj in ļap im kabwilōn̄lōn̄ n̄an ļap meļeļe in im kōm̧m̧an oktak.
Juon rūkaki in Būraimere eaar kwaļo̧k waanjon̄ak in: “Rainin,” liin eaar ba, “kūlaaj eo am ļalem-im jiljino-iiō raar kōm̧m̧an m̧arm̧ar iakwe. Kajjojo ajri rekar pijaik pija ko ioon peba eļainin ko: juon kōn er make, juon kōn Jisōs, im uwaan baam̧ļe eo aer im ro jitōn bōro. Kōm kar kōddāpi peba eļainin ko ippān doon kōm̧m̧ane juon chain me kōm kar ukōte n̄an m̧arm̧ar ko. Ke rej jin̄a, ajri ro raar kōnnaan kōn baam̧le ko aer.
“Hailey eaar ba, ‘Ijjab ļōmņak ļeddik eo jeiū ej iakwe eō. Kōmij ire iien otemjej. … Em̧ool ij dike eō make. Ejjab em̧m̧an mour eo aō.’ Im ej likūt bōran ilo pein.
“Iaar ļōmņak kōn jekjek ko an baam̧le eo an im en̄jake bwe bōlen ilo m̧ool epen mour eo an. Bōtaab ālkin an Hailey kar ba menin, Alyssa, ilo jabōn tebōļ eo, kar uwaak, ‘Hailey, ij likūt eok ilo m̧arm̧ar e aō ikōtaō im Jisōs kōnke Ej iakwe eok im ij iakwe eok.’
“Ke Alyssa eaar ba men jab in, Hailey eaar tabōl ļo̧k ium̧win tebōļ eo n̄an tōpar Alyssa im bakwōje.
“Ilo jem̧ļo̧k in kūlaaj eo, ke jibūn eaar itok n̄an ān̄ini, Hailey eaar ba, ‘Kwojeļā ta, Būbū? Jisōs ej iakwe eō.’”
N̄e jej pukōt ļo̧k ilo iakwe im jerbal in jipan̄ em̧ool ilo wāween ko reddik tata, bōro ko rej oktak im mera ļo̧k ilo an ro jet en̄jake iakwe an Irooj.
Jet iien, mekarta, kōnke kōn armej ro rellōn̄ aolepād wōj ro rej aikuj jipan̄ im do̧o̧r jān eddo ko, emaron̄ in pen n̄an tōpar elōn̄ aikuj ko remenin aikuj.
Sister ro, jet iaami rej en̄jake kom̧ij kōm̧m̧ane ijo kom̧ maron̄ kōm̧m̧an kōn aikuj ko an ro uwaan baam̧le eo am̧. Keememej, ilo jerbal ko iien otemjej kōm̧m̧ani im jet iien kōjālimomo, komij “jerbal wōt n̄an ami Anij.”11
Ro jet iaami maron̄ en̄jake ejjeļo̧k jabdewōt me emaron̄ kobrak ilo ami reilo̧k n̄an ro iturum̧ ak jukjuk in pād eo n̄an iien ko rem̧m̧an n̄an jipan̄ kōmeraik ļo̧k eddo ko an ro jet.
Aolepād wōj maron̄ kōm̧m̧ani jerbal in jipan̄ ko ilo mour ko ad aolep raan. Jej mour ilo juon laļ in jab errā. Jej kōm̧m̧an jerbal in jipan̄ n̄e jab kōrrate kōj, n̄e jej kowaan ruruwe, n̄e jejjab ekajet, n̄e jej ettōn̄ dikdik, n̄e jej ba kom̧m̧ool, im n̄e jej kijenmej im jouj.
Kain jerbal in jipan̄ ko rebōk iien, karōk ilo jibadbad, im eļap kajoor. Bōtaab ewōr tokjāer n̄an aolep ad kijejeto. Bōlen jemaron̄ jino kajjitōkin kōj make kajjitōk kein:
-
Wōn eo ijeļā kajien me imaron̄ jipan̄ e rainin?
-
Iien ta im kein jipan̄ ta ko ewōr ippa?
-
Ilo wāween ta ko imaron̄ kōjerbal tōļan im kapeeļ ko aō n̄an jipan̄ ro jet?
-
Ta eo jemaron̄ kōm̧m̧ane āinwōt juon baam̧ļe?
Būreejtōn Dieter F. Uchtdorf ekar katakin:
“Kom̧ij aikuj kōm̧m̧an … ta eo rikaļoor ro an Kraist raar kōm̧m̧ane ilo aolep tōre in bōk eddo: kapilōk ippān doon, kōjerbal aolep kein jipan̄ ko repād, pukōt im̧we an Jetōb Kwojarjar, kajjitōk ippān Irooj kōn kapen eo An, innām lim pein jōōt eo am̧ im ilen jerbal.
“Ij lewaj juon kallim̧ur, ” eaar ba. “Eļan̄n̄e kom̧ naaj ļoor jon̄ak in, kom̧ naaj bōk tōl eo ejeno̧lo̧k āinwōt n̄an wōn, ta, n̄āāt, imia n̄an kakke ilo wāween eo an Irooj.”12
Jabdewōt iien ij ļōmņak ta eo enaaj āinwōt n̄e Rilo̧mo̧o̧r eo ej bar itok, ij ļōmņak kōn loļo̧k eo An n̄an Rinipai ro ke Eaar kajjitōk:
“Ewōr ke ami jabdewōt rinan̄inmej ilubwiljimi? Kom̧in bōktok er ije. Ewōr ke ami jabdewōt riakā, ak ripilo, ak rijipikpik, ak rikinejnej, ak rilōba, ak ro rej mej ānbwinnier, ak ro rejarron̄ron̄, ak ro rej m̧ōjņo̧ ilo jabdewōt wāween otemjeļo̧k? Kom̧in bōktok er ijin im Inaaj kōmour er, bwe ewōr Aō tūriam̧okake kom̧; en̄jake ko Aō robrak kōn tūriam̧o. …
“… [Rilo̧mo̧o̧r eo] eaar kōmour er otemjej.”13
N̄an kiiō, Ej kajjitōk ippād n̄an erom pā ko Pein.
Em̧ōj aō jeļā bwe iakwe Anij im ro jet ej letok aorōk in mour. Kōm̧m̧an bwe jān ļoor waanjon̄ok eo an Rilo̧mo̧o̧r im kean̄ eo An n̄an pukōt ļo̧k ro jet kōn iakwe.
Ij kam̧ool kōn m̧ool eo an kallim̧ur eo an Būreejtōn Henry B. Eyring “bwe eļan̄n̄e [jenaaj] kōjerbal menin letok ko [ad] n̄an jerbal n̄an jabdewōt, [jenaaj] en̄jake iakwe eo an Irooj n̄an armej eo. [Jenaaj] barāinwōt en̄jake iakwe eo an n̄an [kōj].”14 Ilo etan Jisōs Kraist, amen.
Kakeememej: Ilo Eprōļ 2, 2016, Sister Esplin kar kōtļo̧k āinwōt rikakpilōklōk eo kein kajuon ilo būreejtōnji eo eutiej an Būraimere.