Menin Letok n̄an Tōl Juon Ajri
Ewi wāween ad katakin ajri ro nejid n̄an jumae kapo ko an laļin im lōke Jetōb eo?
Juon baba eo e likao eaar maļon̄. E, im ajri ro ruo nejin, im jemānjō raar etetal iturin reba eo. Kar jepooļ er kōn toļ ko reaiboojoj im obrak kōn wōjke pine ko, im lan̄ eaar bōļu, obrak kōn kōdo ko remouj, kwaļo̧k aiboojoj im ineem̧m̧an. Ke ajri ro rej jino aer bwil im mōk, em̧m̧aan ro ruo raar kakukukier im aaō ilo juon kōta ekadu ilo reba eo.
Ilo kalimjōke epidodo kōm̧m̧ane—m̧ae iien ke jemāier eaar jino en̄jake an timlaļļo̧k, aolep men raar jino aer eddo. Dān eo eaar kaņōk e laļļo̧k ilo reba eo, im eaar wiwijet. Ewi wāween an nej kar aaō ļo̧k wōt—im wōnm̧aanļo̧k wōt ilo an leddik eo nejin edik im eaorōk kuku likin?
Ainikien eaar jakoļo̧k ilo an ettoļo̧k ļo̧k wōt; eo jemānjō eaar lukkun ettoļo̧k im eaar jab ron̄ aer kūri im kajjitōk jipan̄. Eaar en̄jake an make iaan im ejjeļo̧k jipan̄.
Kwomaron̄ ke en̄jake am̧ ajimakeke āinwōt an kar ajimakeke, ilo am̧ jab maron̄ tōpar jabdewōt n̄an dāpdep ie im apan̄ ilo juon jekjek eo emenin aikuj ilo mour eo am̧ im an ajri eo nejūm̧? En̄jake ko ad aolep jet iien jej en̄jake menin n̄e jej pād ilo jekjek ko me jelukkun aikuj jipan̄ bwe jān mour wōt im n̄an lo̧mo̧o̧ren ro jet jej iakwe er.
Ke ej jino wiwijet, eaar kile bwe dān eaar kaddoik juuj ko an im eaar timlaļļo̧k. Ke ej kajeon̄ bwe en ebbebe wōt, eaar jino an kajeon̄ wūtikļo̧k juuj ko jān neen. Ak āinwōt n̄e raar jeromi bwe ren pen aer tōm. To in juuj ko raar obrak kōn dān, kar pen im kankanļo̧k wōt loklok eo.
Ilo iien eo emaron̄ āliktata n̄an e ilo an lukkun aikuj, eaar kate n̄an joļo̧k juuj ko jān neen, im āliktata juuj ko raar tim jān neen, im eaar kajju timlaļļo̧k wōt n̄an laļ tata ilo reba eo. Eaar en̄jake mera jān an kar eddo ke rej kanōke laļļo̧k, eaar kajju waļo̧k lōn̄tak, e im leddik eo nejin. Eaar maron̄ aaō kiiō m̧aanļo̧k, aaō n̄an juon jikin em̧m̧an ilo turājet in reba eo.
Jet iien jemaron̄ aolep en̄jake āinwōt n̄e jej timlaļļo̧k. Mour emaron̄ bar eddo. Jej mour ilo “juon laļ eo ekoļap im eļap boub ie. …Eļan̄n̄e jejjab jojo kōjparok ilo laļ in jemaron̄ timlaļļo̧k jān men ko an Jetōb.”1
Ewi wāween ad ļoor waanjon̄ak ko an em̧m̧aan in im kajejtokjen men ko an laļ in me jej ineeki, bwe jen jab edodo kōn men ko an laļ in? Ewi wāween ad maron̄, āinwōt Paul eaar kapilōk kōj, “joļo̧k men otemjej redo”?2 Jemaron̄ kōpooj ajri ro nejid n̄an raan eo me reban bar pedped iood im naan in kam̧ool ko ad—n̄e rerūtto ļo̧k im make iaier.
Ej waļo̧k uwaak n̄e jej kile kajoor in jipan̄ in ekwojarjar. Ej juon kein jipan̄ ekkā ad kajejtokjen, aeet emaron̄ jerbal aolep raan n̄an kōmeraik eddo ko ad im tōl ajri ro nejid rejitōnbōro. Kein jipan̄ in ej menin letok n̄an tōl itok jān Jetob Kwojarjar.
Ilo iiō ņe rualitōk, ajri ro remaron̄ peptaij. Rej ekkatak kōn im kōm̧m̧ane juon bujen ippān Anij. Ro me rej iakwe er rej jepoole er ilo aer tūmlaļļo̧k im waļo̧k tok jān dān kōn en̄jake in lan̄lōn̄ eļap. Innem rej bōk mennin letok eo jab maron̄ kōmmeļeļeiki an Jetōb Kwōjarjar, juon mennin letok eo emaron̄ tōl er n̄e rej mour erreo kōn kōjeram̧m̧an eo.
Jān Elder David A. Bednar: “Naan ko ilo iien [kapen eo] remaron̄ pidodo kōjerbali im jet iien jej kajejtokjen. Naan kein emen—‘Bōk Jetōb Kwojarjar eo’—rejjab naan ko rej waļo̧k ilo an ejjeļo̧k mālim, ijjeļo̧kin rekitbuuj mālim eo an Priesthood, kōn mālim in emōj kakkōl n̄an m̧akūtkūt im jab wōt n̄an m̧akūtkūt ioon.”3
Ajri ro ewōr ikdelel epād ippāier kadede n̄an kōm̧m̧an em̧m̧an im erom juon armej em̧m̧an. Jemaron̄ en̄jake an ejjeļo̧k ruwōer, aer erreo. Ewōr barāinwōt aer en̄jake eļap n̄an ainikien eo edik im e mera.
Ilo 3 Nipai 26, Rilo̧mo̧o̧r eo eaar kwaļo̧k n̄an kōj maron̄ in jetōb ko an ajri ro:
“Eaar kōtļo̧k loer, im raar kōnono n̄an jemāer men ko reļļap im kabwilōn̄lōn̄, em̧ool eļapļo̧k jān men ko Eaar kwaļo̧k n̄an armej ro. …
“… Raar jim̧or lo im ron̄ rein nejier; aaet, em̧ool nin̄nin̄ ro raar kōpeļļo̧k lo̧n̄ier im kōnono men ko rekabwilōn̄lōn̄.”4
Ewi wāween an ro jined im jemed kōļapļo̧k maron̄ in jetōb ko an ajri ro reddik? Ewi wāween ad katakin er n̄an kajejtokjen kareel ko an laļ in im lōke Jetōb n̄e jejjab pād turier im rej make iaier ilo iien ko reppen ilo mour ko aer?
Inaaj kwaļo̧k jet ļōmņak.
M̧oktata, jemaron̄ katakin ajri ro nejid n̄e rej ron̄jake im en̄jake jetōb eo. Jen mōk reilikļo̧k n̄an tōre ko ilo Kallim̧ur Mokta n̄an lale wāween an Ilai kōm̧m̧ane menin n̄an Samuel.
Samuel ke ear juon ajri eaar ron̄ juon ainikien ruo alen im ettōr n̄an ippān Ilai, im ba, “N̄a e.”
“Iar jab kūr,” Ilai eaar uwaak.
Ak “Samuel e jan̄in jeļā Irooj, im e jan̄in waļo̧k n̄an e ilo naan in Irooj.”
Ke ej tōpar kein kajilu, Ilai ej kab jeļā bwe Irooj eaar kūr Samuel im eba n̄an Samuel bwe en ba, “Kwōn kōnono; bwe karijerōm̧ ej ron̄.”5
Samuel eaar jino en̄jake, kile, im ron̄jake ainikien Irooj. Ak ļaddik in edik ejan̄in kar jino jeļā m̧ae iien Ilai eaar jipan̄ e bwe en jeļā. Im kōnke kar katakin e, Samuel eaar jino an kile ainikien in edik im e mera.
Kein karuo, jemaron̄ kōpooj mōko mōd im ajri ro nejid n̄an en̄jake ainikien in edik im e mera. “Elōn̄ rikaki in kajin ko jet rej tōmak bwe ajri epidodo aer ekkatak kajin ilo ‘makūtkūt ko,’ eo me rej jepooļ kōn ro me rej kōnono kajin eo im kūr er n̄an kōnono make iaier. Rej ekkatak ejjab kilen ba wōt naan en, ak n̄an jim̧we aer ba im em̧ool n̄an ļōmņak ilo kajin eo ekāāl. Wāween eo em̧m̧an tata n̄an jeļāļo̧kjeņ ilo jetōb ej ilo m̧ōko imōd, ijo katak ko an jetōb remaron̄ ejaake pedped eo jej mour kake aolep raan.”6
“Kwon kanooj katakin ro nejim̧ kaki, im kwōn kōnono kaki n̄e kwoj jijet ilo m̧weo im̧ōm̧, im n̄e kwōj etetal ilo iaļ, im n̄e kwōj babu, im n̄e kwōj jerkak.”7 Ilo ad ejaake baamle ko ad ilo Jetōb enaaj kōppeļo̧k buruōn ajri ro nejid n̄an im̧we eo An.”
Kein kajilu, jemaron̄ jipan̄ ajri ro meļeļe wāween an Jetōb kōnono n̄an kōj. Josep Smith eaar katakin, “Eļan̄n̄e Ej itok n̄an ajri jiddik, Enaaj kajeon̄ kōnono in ajri im n̄an maron̄ ko an ajri jidik.”8 Juon mama eaar lo bwe kōnke ajri ro roktak kilen aer katak—jet rej ekkatak ilo aer loļo̧kjen, ron̄jake, un̄uri, ak en̄jake—ilo an ļapļo̧k an etale ajri ro, eļapļo̧k an kile bwe Jetōb Kwojarjar ej katakin ajri ro nejin ilo wāween ko kajjojo me em̧m̧an aer ekkatak jāni.9
Bar juon mama eaar kwaļo̧k en̄jake eo an ilo an jipan̄ ajri ro nejin ekkatak n̄an kile Jetōb eo. “Jet iien,” eaar je, “[ajri ro]rejjab jeļā bwe juon ļōmņak eo ekutkut an waļo̧k, juon en̄jake in kaenōm̧m̧an ālkin aer jan̄, ak kemeemej jet men ilo iien eo ejejet rej wāween ko n̄e Jetōb Kwojarjar ej kōnono [n̄an er].” Eaar wōnmaanļo̧k wōt, “N̄a ij katakin ajri ro nejū n̄an mijōk wōt ta eo rej en̄jake [im kōm̧m̧ane].”10
En̄jake im wāween ad kile Jetōb enaaj boktok maron̄ ko an jetōb n̄an mour ko an ro nejid, im ainikien enaaj alikkar ļo̧k aer jeļā kake. Enaaj āinwōt an Elder Richard G. Scott kar ba: “Ilo an ļapļo̧k en̄jake ko im tōprak ilo an jetōb tōl eok, lōke eo kōn en̄jake ko am renaaj erom m̧ool ijjeļo̧kin am pedped ioon ta ko kwoj loi im ron̄.”11
Jej aikuj jab mijak ilo ad lo an ajri ro nejid deļōn̄e dān in mour, bwe emōj jipan̄ kōj kōjejtokjen men ko an laļ in. Emōj ad katakin er n̄an mour kōn menin letok an Jetōb n̄an tōl. Menin letok in ej wōnm̧aanļo̧k wōt im kōmeraik eddo ko rej ineeki im tōl er ļo̧k n̄an mweo imweer ilan̄ eļan̄n̄e remour kake im ļoor im̧we ko an Jetōb Kwojarjar. Ilo etan Jisōs Kraist, amen.