Ritōl ro Reļļap Rej Rikaļoor ro Reļļap
Enej wōr iien n̄e m̧aan iaļ eo ad enaaj marok, ak wōnm̧aanļo̧k wōt im ļoor Rilo̧mo̧o̧r eo. Ejeļā iaļ eo; ilo m̧ool, E ej iaļ eo.
Ke ekar 12 aō iiō, jema ekar bōk eō bwe kōm̧ro en etal im kakududu ilo toļ ko. Kōm̧ro kar ruj ilo 3:00 awa jibbon̄, likūt kein jijjet ko ilo kidia ko waam̧, im jino etal lōn̄ļo̧k itōrerein toļ ko relukkuun marok. Jon̄an an em̧m̧an ippa kakududu ippān jema, ilo tōre eo ikar en̄jake aō mijak. Ijjan̄in kar pād ilo toļ kein m̧okta, im ikar jab maron̄ lo iaļ eo—ak ikar jab lukkuun loe jabdewōt men. Men eo wōt ikar maron̄ loe ekar juon teen̄ki jidikdik jema ekar etetal kake ilo an kabōļbōļ jidik ioon wōjke pine ko rej pād im̧aam̧. Ta enaaj waļo̧k n̄e kidia ko renej jidilo̧k im wōtlo̧k—emaron̄ ke loe ia eo ekar etal ie ļo̧k? Ak ļōmņak in ekar kaenōm̧m̧an eō: “Baba ejeļā ia eo ej etal ie ļo̧k. Eļan̄n̄e ij ļoor e, men otemjej renaaj EMMAN.”
Im men otemjej rekar EMMAN. Āliktata al ekar tak, im ekar juon raan em̧m̧an n̄an kōm̧ro. Ke kōm̧ij jino jibadekļo̧k kapijuknen, jema ekar jitōn̄ļo̧k lōn̄in juon toļ eaiboojoj emakeļo̧k iaan jān toļ ko jet. “Toļ en ej Windy Ridge,” ekar ba. “Toļ eo en im em̧m̧an kadudu ie.” Ejjab etto, ikar jeļā bwe ikar kōņaan bar ro̧o̧ltok im tallōn̄e Windy Ridge juon raan.
Ilo iiō ko tokālik, ekar emakijkij aō ron̄jake an jema kōnono kōn Windy Ridge, ak kōm̧ro kar jab bar ro̧o̧l n̄an ijo—m̧ae iien juon raan, 20 iiō tokālik, ikar kūrļo̧k jema im ba, “Kōjro etal n̄an Windy.” Bar juon alen kōm̧ro kar likūt kein jijjet ko ilo kidia ko waam̧ im jino etetal itōrerein toļ ko. Ikar kiiō juon eo emminene in kidia 30 jim̧a an iiō, kiiō ikar bwilōn̄ bwe ikar en̄jake ejja mijak eo wōt ikar en̄jake āinwōt juon ļaddik 12 an iiō. Ak jema ekar jeļā iaļ eo, im ikar ļoor e.
Āliktata, kōm̧ro kar tōparļo̧k ilōn̄tata in Windy. Alooje jikin eo ekar lukkuun kabwilōn̄lōn̄, im en̄jake eo ikar en̄jake ekar kōm̧m̧an bwe in kōņaan ro̧o̧l—jab n̄a ilo iien in, ak kōrā eo pāleeō im ajri ro nejim̧ro. Ikar kōņaan bwe ren en̄jake en̄jake eo ikar en̄jake.
Ium̧win elōn̄ iiō ko, ekar wōr aō iien n̄an tōl ļaddik ro nejū im likao ro jet n̄an tulōn̄ in toļ ko, āinwōt jema ekar tōl eō. En̄jake kein rekar im̧we eō bwe in kōļmenļo̧kjeņ kōn ta meļeļein tōl—im ta meļeļein ļoor.
Jisōs Kraist, ej Ritōl eo Eļap ej Rikaļoor eo Eļap
Eļan̄n̄e ikar kajjitōk ippām̧, “Wōn ritōl eo eļaptata ekar mour ioon laļ in?”—ta eo kwonaaj kar ba? Uwaak eo, aaet, ej Jisōs Kraist. Ekar kwaļo̧k waanjon̄ak eo ewāppen an men ko jemaron̄ pijaikļo̧k juon ritōl.
Eļan̄n̄e ikar kajjitōk ippām̧, “Wōn rikaļoor eo eļaptata ekar mour?”—uwaak eo en kar ke Jisōs Kraist? E ej ritōl eo eļaptata kōnke E ej rikaļoor eo eļaptata—Ej ļoor Jemān ilo jejjet, ilo men otemjej.
Laļ in ej katakin bwe ritōl ro rej aikuj in kajoor; Irooj ej katakin bwe er rej aikuj ettā. Ritōl ro an laļ in rej bōk kajoor im im̧we jān tōļan ko aer, kapāāl, im m̧weie. Ritōl ro āinwōt Kraist rej bōk kajoor im im̧we “jān wōt jeļā ņae, jān meanwōd, jān inem̧m̧an im ettā bōro, im jān iakwe jab ankilaan riab.”1
Ilo mejān Anij, ritōl ro reļļap rekar aolep iien rikaļoor ro reļļap.
Kōtļo̧k aō kwaļo̧k ruo aō en̄jake itok jān aō iiaio ippān likao rein an Kabun̄ in ro rekar katakin eō kōn wāween tōl im ļoor.
Kōj Aolep Jej Ritōl
Jet iien rem̧ootļo̧k kōrā eo pāleeō im n̄a kōm̧ro kar pād ilo juon kweilo̧k in kwojkwoj ettoļo̧k jān ward eo am̧ro. Mokta jān an kweilo̧k eo ijjino, juon likao ekar kepaak eō im kajjitōk eļan̄n̄e imaron̄ jipan̄ ajeje kwojkwoj eo. Ikar ba, “Ij m̧ōņōņō in kōm̧m̧ane.”
Ikar jijet ippān tikōn ro jet im kajjitōk ippān juon iaan ro rej jijet iturū, “Ta jerbal eo aō?” Ekar ba n̄an n̄a bwe in jino ajeje kwojkwoj eo itulik in chapel eo ilo jekjen eo ioļap im bwe enaaj pād side eo rājet ilo ejja jekjen eo wōt, im kōm̧ro jim̧or naaj jerbal m̧aanļo̧k n̄an jea ko im̧aan.
Ikar ba, “Ij jan̄in kar kōm̧m̧ane menin ium̧win juon iien eaitok.”
Ekar uwaak, “Em̧m̧an. Enaaj em̧m̧an n̄an kwe. Ikar en̄jake ejja wāween in ke ikar jinoe.”
Tokālik tikōn eo ediktata ilo doulul eo, ekar ekkapit jet wōt wiik m̧oktaļo̧k, ekar kōnono ilo kweilo̧k in kwojkwoj eo. Ālkin kweilo̧k eo, tikōn ro jet rekar kabooļ e im jiron̄ ļo̧k e kōn jon̄an aer em̧ōņōņō kake ke rej ro m̧ōttan ilo doulul eo.
Ke ikar loļo̧k ippān raan eo, ikar jeļā bwe kajjojo wiik membōr in aolep doulul ko an Priesthood eo an Aron ilo ward eo rekar pukōt ļo̧k likao ro jet im karuwaineneik er bwe ren m̧ōttan doulul ko aer.
Likao rein rekar aolep ritōl ro reļļap. Im ekar alikkar bwe rekar bōk jet jipan̄ ko rem̧m̧an jān rikabwijer priesthood ro an Melkisedek, ro jineier im jemāier, im ro jet rej katakin er eddo ko aer. Rūtto ro rekōņaan in loe likao rein jab ilo wāweer wōt ak ilo aer rūttoļo̧k im erom āinwōt. N̄e rej kōnono n̄an ak kōn likao ro, rej jab mijōk wōt likjab ko aer. Ijjelo̧kin, rej kwaļo̧k kadkad in ritōl ro reļļap rej kōmeļeļeik.
Likao ro, en̄in ej wāween an Irooj lale eok. Ij karuwaineneik eok n̄an am̧ lale eok make ilo wāween in. Enaaj wōr iien ko ilo mour eo am̧ n̄e kwoj kūr n̄an tōl. Ilo iien ko jet, kwonaaj aikuj in ļoor. Ak enaan eo aō n̄an kom̧ rainin ej mekarta kūr eo am̧, kwoj juon ritōl aolep iien, im kwoj juon rikaļoor aolep iien. Ritōl ej juon wāween ad ba rikaļoor—ej juon wāween jipan̄ ro jet itok n̄an Kraist, ej ta eo rikaļoor ro rem̧ool rej kōm̧m̧ane. Eļan̄n̄e kwoj kajjieon̄ erom juon rikaļoor an Kraist, innām komaron̄ jipan̄ ro jet ļoor E im komaron̄ erom juon ritōl.
Am maron̄ tōl ejjab itok jān m̧wilim̧, jeļā eo am̧ ak wōr tōļan n̄an kōnono ilobwilej. Ej itok jān kallim̧ur eo am̧ n̄an ļoor Jisōs Kraist. Ej itok jān ikdeleel eo am̧ n̄an erom, ilo naan ko an Ebream̧, “juon riļoore jim̧we.”2 Eļan̄n̄e kwoj kōm̧m̧ane menin—men̄e kwoj jab wāppen, ak kwoj kajjieon̄—innām kwoj juon ritōl.
Jerbal an Priesthood Ej Ritōl
Ilo kar juon iien, ikar pād ilo New Zealand im ikar loļo̧k m̧weo imōn juon kōrā ejjeļo̧k pāleen ippān ajri ro jilu nejin. Ļaddik eo erūtto tata nejin ekar 18 an iiō im emōj an bōk Melkisedek Priesthood eo Jabōt eo ļo̧k. Ikar kajjitōk ippān eļan̄n̄e enan̄in kōjerbal priesthood eo an. Ekar ba, “Ijjab lukkuun jeļā ta meļeļe eo am̧.”
Ikar jiron̄ ļo̧k e kiiō ke ewōr mālim ippān n̄an leļo̧k juon kōjeraam̧m̧an an priesthood n̄an kaenōm̧m̧an ak kōmour. Ikar kalimjōk jinen, eo ejjeļo̧k ippān juon eo ej kabwijer Melkisedek Priesthood eo iturin ium̧win elōn̄ iiō ko. “Ij ļōmņak enaaj juon men em̧m̧an,” Ikar ba, “eļan̄n̄e kwomaron̄ leļo̧k n̄an jinōm̧ juon kōjeraam̧m̧an.”
Ekar uwaak, “Ijjab jeļā elmen aō kōm̧m̧ane.”
Ikar kōmeļeļeiki bwe emaron̄ likūt pein ioon bōran jinen, ba etan, ba bwe ej leļo̧k n̄an e juon kōjeraam̧m̧an kōn mālim eo an Melkisedek Priesthood, innām ba jabdewōt men eo ilo an Jetōb eo kōnono ilo kōļmenļo̧kjeņ eo an im ilo būruwōn, im kili jar eo ilo etan Jisōs Kraist.
Raan eo juon, ikar bōk juon email jān e. Ej kōnono, jimettan in: “Joteen in ikar kōjeraam̧m̧an jinō. … Ikar lukkuun mijak, lukkuun mijak im pere, kōn menin ikar jar im lukkuun lale bwe Jetōb eo en pād ippa, kōnke ijjab maron̄ leļo̧k juon kōjeraam̧m̧an n̄e Jetōb eo ejjab pād ippa. Ke ikar jinoe, ikar lukkuun meļo̧kļo̧k n̄a make im mōjņo̧ ko aō make. … Ikar [jab kōtmāne] jon̄an ļap im kajoor in jetōb eo ikar en̄jake. … Ālkin iien eo, jetōb in iakwe ekar tuwe eō jon̄an ikar jab maron̄ dāpij en̄jake ko aō, kōn menin, ikar bakwijtok jinō im jan̄ āinwōt juon nin̄nin̄. … Aaet m̧ae tōre in ij je leta in, [Ij en̄jake] Jetōb eo [eļap bwe] ijjab kōņaan in kōm̧m̧an aō jerawiwi. … Ij iakwe gospel in.”3
Ej ke juon men eo ekabwilōn̄lōn̄ n̄an lo an juon likao maron̄ kōttōbrak men ko reļļap jān jerbal ko an priesthood, men̄e ej en̄jake an pere? Ij kab jeļā bwe elder in elikao emōj an bōk mission call eo an im enaaj deļo̧n̄e jikin kaminene eo an mijenede ilo allōn̄ in laļ. Ij tōmak enaaj tōl elōn̄ jetōb ko n̄an Kraist kōnke ekar ekkatak wāween ļoor Kraist ilo jerbal in priesthood eo an—jino ilo m̧weo imōn m̧okta, ijo me waanjon̄ak eo an ej im̧we ļaddik eo jatin 14 an iiō.
Ro jeiū im jatū, men̄e jej kile ak jaab, armej rej reitok n̄an kōj—ro uwaan baam̧le ko ad, ro m̧ōttad, aaet ruwam̧ajet ro. Āinwōt rikabwijer ro an priesthood, ejjab bwe n̄an kōj n̄an itok n̄an Kraist; eddo eo ad ej n̄an “karuwainenetok aolep n̄an itok n̄an Kraist.”4 Ejjab maron̄ ju būruwōd ilo bōk kōjeraam̧m̧an ilo jetōb n̄an kōj make; jej aikuj tōl armej ro jej iakwe n̄an ejja kōjeraam̧m̧an kein wōt—im āinwōt rikaļoor ro an Jisōs Kraist, jej aikuj iakwe aolep. Eddo eo an Rilo̧mo̧o̧r eo n̄an Piter ej barāinwōt eddo eo n̄an kōj: “Im n̄e em̧ōj am̧ bar oktak, kwōn kakajoor ro jeim̧ im jatūm̧.”5
Ļoor Em̧m̧aan in Galili
Enej wōr iien n̄e m̧aan iaļ eo ad enaaj marok, ak wōnm̧aanļo̧k wōt im ļoor Rilo̧mo̧o̧r eo. E ejeļā iaļ in; ilo m̧ool, E ej iaļ eo.6 Ilo am̧ lukkuun itok n̄an Kraist, enej m̧wilaļ ļo̧k am̧ kōņaan in jipan̄ ro jet en̄jake ta ko kwaar en̄jaki. Bar juon naan n̄an en̄jaki in ej iakwe em̧ool, “eo [Jemān] Eaar leļo̧k ioon aolep ro rej rikaļoor ro rem̧ool an Nejin, Jisōs Kraist.”7 Innām kwonaaj loe bwe ilo aolep m̧akūtkūt ko n̄an ļoor Kraist, kwoj barāinwōt tōl ro jet n̄an E, bwe ilo naan ko an Būreejtōn Thomas S. Monson, “Ilo ad ļoor Em̧m̧aan in Galili in—aaet Irooj Jisōs Kraist—im̧we eo ad make enaaj erom en̄jake eo em̧m̧an jabdewōt jikin jej pād ie, jekdo̧o̧n kūr rot ko ad.”8
Ij kwaļo̧k aō kam̧ool bwe en̄in ej Kabun̄ eo em̧ool an Kraist. Jej tōl jān juon rikanaan an Anij, Būreejtōn Monson—juon ritōl eļap eo ej barāinwōt juon rikaļoor an Rilo̧mo̧o̧r eo. Ilo etan Jisōs Kraist, amen.