Jetōb Kwojarjar
Ij kwaļo̧k aō iakwe im kam̧m̧oolol Jemedwōj Ilan̄ kōn menin letok eo an Jetōb Kwojarjar, kōn E ej kwaļo̧k Ankilan im jipan̄ kōj ilo mour ko ad.
Ro jeiū im jatū jitenbōro, Ij kōnono rainin āinwōt juon rikarejeraņ Irooj im barāinwōt juon jim̧m̧a. N̄an kom̧ im n̄an ro ineeō, Ij kwaļo̧k im kwaļo̧k naan in kam̧ool eo ekabwilōn̄lōn̄ kōn menin letok eo an Jetōb Kwojarjar.
In ijjino ilo aō kile Meram eo an Kraist, eo ej waļo̧k n̄an “kajjojo m̧aan [im kōrā ] ro rej itok n̄an laļ in.”1 Jej aolep jeram̧m̧an kōn meram in ekwojarjar. Ej “ilo aolep im kōn aolep men ko otemjeļo̧k,”2 im ej jipan̄ kōj kālet em̧m̧an jān nana.3
Bwe Jetōb Kwojarjar eoktak jen Meram eo an Kraist. Ej membōr eo kein kajilu ilo Doulul in Anij, juon armej jetōb kōn eddo ko an rekwojarjar, im juon wōt ilo jibadbad ippān Jemed im Nejin.4
Āinwōt membōr ro an Kabun̄ in, jemaron̄ en̄jake an bōjrak jemjerā eo an Jetōb Kwojarjar. Kōn jepļaaktok in priesthood eo an Anij, jaar peptaij kōn dān n̄an jeorļo̧k jero̧wiwi ko ad innām kar kapen n̄an membōr in Kabun̄ in Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ilo kain̄i in jaar bōk menin letok eo an Jetōb Kwojarjar kōn likūt pā ko ioon bōrad. 5 Kōn menin, jej maron̄ bōk jem̧jerā eo an Jetōb Kwojarjar n̄an keememej Rilo̧mo̧o̧r iien otemjej, kōjparok kien ko An, ukweļo̧k jen jero̧wiwi ko ad, im erreeo n̄an bōk m̧ōttan kwojkwoj eo ilo raan in Jabōt.
Jetōb Kwojarjar ej letok revelesōn an juon make n̄an jipan̄ kōj kōm̧m̧ani kālet ko reļļap an mour kōn men kein āinwōt jeļāļo̧kjeņ, mijen, kōttōbar, m̧are, ajri, ijo jenaaj mour ippān baam̧le ko ad, im ko āierļo̧k wōt. Ilo wāween kein, Jemedwōj Ilan̄ ej kōņaan bwe jen kōjerbal anemkwoj in kālet eo ad, etale jekjek eo ilo kōļmenļo̧kjeņ ko ad ekkar n̄an pedped in katak ko ilo gospel in, im bōk kālet eo ilo jar n̄an E.
Revelesōn an juon make eaorōk, ak ej make wōt m̧ōttan jerbal eo an Jetōb Kwojarjar. Āinwōt an jeje ko rekwojarjar kōmlet, bwe Jetōb Kwojarjar ej barāinwōt kam̧ool kōn Rilo̧mo̧o̧r.6 Ej katakin kōj “men ko reineem̧m̧an an aelōn̄ eo”7 im kōm̧m̧an bwe jen “bōk eļapļo̧k kōjatdikdik.”8 Ej “tōlļo̧k [kōj] n̄an kōm̧m̧an em̧m̧an … [im] kōm̧m̧an jim̧we.”9Ej leļo̧k “n̄an aolep m̧aan [im kōrā] … juon menin leļo̧k jān [jetōb] … bwe ren maron̄ ļapļo̧k kake.”10Ej “letok n̄an [kōj] jeļā”11 im “bōk[tok] kakeememej men otemjej n̄an kōļmenļo̧kjeņ eo [ad]”12 Kōn Jetōb Kwojarjar, kom̧ “maron̄ kokwōjarjar”13 im bōk jeorļo̧k in jero̧wiwi ko [ad].14 Ej juon “Rikaenōm̧m̧an,” eo ejja wōt “kar kallim̧ur [jen Rilo̧mo̧o̧r] n̄an ro rikaloraņ.”15
In kakeememej kōj wōj aolep bwe Jetōb Kwojarjar ejjab itok bwe en kakien kōj. Jet iaad rejakapeel ilo aer pukot tōl an Jetōb Kwojarjar ilo kajjojo kālet ko reddik ilo mour ko aer Menin ekakkure jerbal eo An ekwojarjar. Jetōb Kwojarjar ej kautiej pedped eo an anemkwoj in kālet. Ej kōnono n̄an kōļmenļo̧kjeņ ko ad im ilo būruwōd kōn men ko raorōk.16
Kajjojo iaad remaron̄ en̄jake im̧we eo eoktak an Jetōb Kwojarjar. Im̧we ko An naaj en̄jake ilo jon̄ok ko reoktak ekkar n̄an aikuj im jekjek ko ad make.
Ilo raan kein āliktata, kōmij kapen bwe rikanaan eo wōt emaron̄ bōk revelesōn kōn Jetōb Kwojarjar n̄an aolepān Kabun̄ in. Jet rej meļo̧kļo̧k menin, ke Aaron im Miriam raar kajieon̄ in kapo Moses n̄an errā ippāer. Ak Irooj eaar katakin er im kōj: Ekar ba:
“Eļan̄n̄e ewōr juon rikanaan ippemi, N̄a Irooj Inaaj kwaļo̧k Eō n̄an E. …
“Inaaj kōnono ippān jeļm̧ae doon.”17
Jet iien rikapo eo ej kapo kōj kōn ļōmņak ko rōbōd me remaron̄ pukōj kōj kōn Jetōb Kwojarjar. Ij kam̧ool bwe tiljek n̄an kōjparok kien ko im kōjparok bujen ko ad naaj kōjparok kōj jān etao ko. Kōn Jetōb Kwojarjar, jenaaj maron̄ in kile rikanaan riab ro ro rej kwaļo̧k katak in kien ko an armej.18
Ilo ad bōk Jetōb Kwojarjar kōn kōj make, emenin aikuj n̄an keememej bwe jejjab bōk revelesōn n̄an ro jet. Ijeļā kōn juon ļaddik eo eaar jiron̄ ļo̧k juon leddik, “Eaar wōr juon aō ettōņak bwe kwonaaj kōrā eo pāleeō.” Leddik eo eaar kōļmenļo̧kjeņ kōn ennaan eo innām ba, “N̄e inaaj bōk ejja ettōņak in, Inaaj iwōj im kōnono ippam̧.
Jej maron̄ aolep po n̄an kwaļo̧k ikdelel ko ad make n̄an anjo̧ ioon tōl eo an Jetōb Kwojarjar. Rikanaan Josep Smith eaar akweļap n̄an Jemedwōj Ilan̄ n̄an kōtļo̧k bwe en leļo̧k 116 paij ko jinointata in Bok in Mormon n̄an Martin Harris. Josep eaar ļōmņak eaar juon pepe em̧m̧an. Ak Jetōb Kwojarjar eaar jab leļo̧k juon en̄jake epen n̄an e. Aaet, Irooj eaar kōtļo̧k Josep bwe en leļo̧k peij ko Martin Harris eaar kajakoki. Kōn juon un, Irooj eaar bōk menin letok eo an ukook jen Rikanaan eo, im eaar jeļā jon̄an metak eo ak juon katak eaorōk eaar maron̄ kakeememej e kōn jerbal eo an.
Jetōb Kwojarjar eo ej dilepān Jepļaaktok in. Ke eaar ļaddik eaar riiti Jemes 1:5, Rikanaan eo eaar keememeje, “Ejjan̄in kar wōr jabdewōt eoon jān jeje ko rekwōjarjar enan̄in kar itok kōn eļap kajoor n̄an būruōn armej jān eoon in ilo iien in n̄an buruō.”19 Kajoor eo kar kōmeļeļe jen Josep Smith kar im̧we jān Jetōb Kwojarjar. Āinwōt juon tōprak, Josep eaar jibadekļo̧k bulōn wōjke ko repaake m̧weo im̧ōn im eaar bukwelōlō im kajjitōk ippān Anij.Visōn eo Kein Kajuon eaar lukkuun men eo aorōk im kabwilōn̄lōn̄. Ak bwe iaļ eo kōn loļo̧k eo an Jemed im Nejin raar jino kōn im̧we eo an Jetōb Kwojarjar n̄an jar.
M̧ool ko raar kōjepļaaktok gospel eo kōn jon̄ok eo ilo kappukōt ilo jar innām bōke im ļoor im̧we ko an Jetōb Kwojarjar. Ļōmņak kōn waanjon̄ok kein: ukook eo an Bok in Mormon, jepļaaktok eo an priesthood im kain̄i ko ie, jino ilo peptaij, im ejaak eo an Kabun̄ in—n̄an kōlaajraki jejjo̧. Ij kam̧ool bwe rainin, revelesōn jān Irooj n̄an Būreejtōnji eo im Jon̄oulruo ro rej itok ekkar n̄an ejja jon̄ok eo ekwojarjar. Ejja jon̄ok in ekwojarjar wōt kar kōtļo̧k an juon make revelesōn.
Kōm̧ij leļo̧k kam̧m̧oolol n̄an aolep ro raar ļoor Jetōb Kwojarjar n̄an bōk gospel eo eaar jepļaaktok, jino ippān baam̧le eo make an Josep Smith. Ke ļaddik eo edik Josep eaar jiron̄ ļo̧k jemen kōn loļo̧k eo an Moronai, jemen eaar bōk juon kam̧ool epen kōn e make. Ejjab etto, Josep eaar iļo̧k jen eddo ko an āinwōt rikallib im kar rōjan̄e n̄an ļoor tōl eo an enjeļ eo.
Jen kōm̧m̧ane, āinwōt ro jinen im jemen im ritōl ro, āinwōt aer kōm̧m̧ane. Jen rōjan̄ ajri ro nejid im ro jet n̄an ļoor tōl eo an Jetōb Kwojarjar eo. Ilo kōm̧m̧ane āindein, jen make ļoor waanjon̄ok eo an Jetōb Kwojarjar, tōl kōn jeļā ņae, meanwōr, jouj, ettā bōro, im iakwe.20
Jetōb Kwojarjar ej m̧ōttan jerbal in an Anij, ilo baam̧le ko im ilo aolepen Kabun̄ in. Kōn meļeļe in, in kwaļo̧k jet waanjon̄ok ko aō make kōn Jetōb Kwojarjar ilo mour e aō make im jerbal ilo Kabun̄ in? Ij kwaļo̧ki āinwōt jet kam̧ool ko aō make bwe Jetōb Kwojarjar ej kōjeram̧m̧an kōj aolep.
Elōn̄ iiō ko remootļo̧k, Sister Hales im n̄a kar ļōmņak in kūr tok jet iaan ro m̧ōttam̧ jen jikin jerbal n̄an juon kōjota ilo m̧weo im̧ōm. Ilo iaļ eo aō ļo̧k jen opiij eo, eaar wōr aō juon en̄jake in bōjrak ilo m̧ōn juon eo emej eo pāleen im iaar katakin. Ke ij kōļļaļļaļ ilo kōjem̧ eo an sister eo, eaar uwak, “Iaar jar bwe kwon itok.” Eaar itok jen ia im̧we eo? Jetōb Kwojarjar.
Ālkin, juon nan̄inmej eļap, Iaar tōl ilo juon kweilo̧k eļap an stake. N̄an dāpij ājmour eo aō, Iaar pepe in em̧akūt jen m̧ōn jar eo ālkin wōt m̧wen̄an in kweilo̧k eo an priesthood. Ijoke, ālkin kōjem̧ļo̧k eo, Jetōb Kwojarjar eaar ba n̄an n̄a, ”kwoj etal n̄an ia?” Iaar en̄jake im̧we bwe in iakweik aolep ālkin jar eo. Ke juon elder edik ej wōnm̧aantak, Iaar en̄jake im̧we bwe in leļo̧k n̄an e juon enaan ejeno̧ļo̧k. Eaar kalimjōk laļ, im iaar kōttar an reitok im kalimjōk eō, im iaar maron̄ in ba “Jar n̄an Jemedwōj Ilan̄, ron̄jake Jetōb Kwojarjar, ļoor im̧we eo kwoj būki, im aolep men renaaj em̧m̧an ilo mour eo am̧.” Tok ālik stake būreejtōn eo eaar jiron̄ eō ke ļaddik eo ej kab ro̧o̧l tok jen mijen eo an. Pedped wōt ioon im̧we eo ealikar, stake būreejtōn eo eaar kallim̧uri jemen ļaddik eo bwe eļan̄n̄e enaaj bōktok ļaddik eo nejin n̄an kweilo̧k eo an priesthood, “Elder Hales enaaj kōnono ippān.” Etke iaar tin bōjrak n̄an idik pein kajjojo? Etke iaar tin bōjrak im kōnono n̄an ļaddik in? Ta tōprak in kapilōk eo aō? Jetōb Kwojarjar.
Ilo 2005, iaar tōl n̄an kepooj juon ennaan n̄an kweilo̧k eo eļap kōn ripālele ro rerūtto rej jerbal in mijinede. Ālkin kweilo̧k eo, juon em̧m̧aan eaar ba: “Ke kōm̧ij ron̄jake kweilo̧k eo … Jetōb in Irooj eaar un̄ur eō. … Eaar ejjeļo̧k likjab ilo ennaan eo n̄an n̄a im n̄an kōrā eo ippa. Kōm̧ naaj jerbale juon mijen, im iien eo ej kiiō. Ke iaar … kalimjōk kōrā eo ippa, Iaar kile bwe eaar bōk ejja im̧we eo jān Jetōb.”21Ta eo eaar bōktok juon uwaak ekajoor? Jetōb Kwojarjar.
N̄an ro ineeō im aolep ro kōn ainikieō, Ij lewaj aō naan in kam̧ool kōn revelesōn eo an juon make im jejjet eo ej itok kōn tōl kajjojo raan, kakkōļ, rōjan̄, kajoor, jetōbin karreeo, aenōm̧m̧an, im ineem̧m̧an eo ej itok n̄an baam̧le ko ad kōn Jetōb Kwojarjar. Kōn Jetōb Kwojarjar, jej en̄jake “tūriam̧o eo an” [Kraist]22 im bwilōn̄ ko reban bōjrak.”23
Ij kwaļo̧k kam̧ool eo aō ejeno̧ļo̧k bwe Rilo̧mo̧o̧r emour.” Ij kwaļo̧k aō iakwe im kam̧m̧oolol Jemedwōj Ilan̄ kōn menin letok eo an Jetōb Kwojarjar, kōn E ej kwaļo̧k Ankilan im jipan̄ kōj ilo mour ko ad. Ilo etan Jisōs Kraist, amen.