Jutak ippān Ritōl ro an Kabun̄ in.
Kom̧ij ke jutak ippān ritōl ro an Kabun̄ in ilo juon laļ eo emarok bwe kom̧ maron̄ kajedeed Meram eo an Kraist?
Kōmij lewaj juon karuwainene eo emeņeņ n̄an Ritōl Routiej ro rekāāl, Eria Jiljilimjuonn̄oul ro, im būreejtōnji eo eutiej an Būraimere em̧m̧an. Im kōn kam̧oolol in em̧wilaļ tata, kōmij kam̧oolol ro kar kōtļo̧k er. Kom̧ij iakwe kom̧, kajjojo iaami.
Ro jeiū im jatū, ej kab m̧ōj ad bōk kuņaad ilo juon en̄jake ejeram̧m̧an tata ilo ad kar kajutak peid n̄an rie rikanaan ro, rilolo ro, im rikwaļo̧k revelesōn ro im ritōl ro jet im opija ro reutiej kar kūr jān Anij ilo lukkuun raan kein. Ijjan̄in kar ididāki aō bōk ak bajjōk bōk iien eo em̧m̧an an rie im kar tōl jān ro rikarejeran an Irooj. Im āinwōt jet wōt allōn̄ ko ilo kūr in aō make āinwōt juon uwaan Doulul eo an Jon̄oulruo Rijilōk ro, ij ettā kōn bout in rie im lōke eo ami. Ij kaorōk kōņaan eo ami n̄an jutak ippa im ippān aolep ritōl rein rem̧m̧an.
Ālkin wōt aō kar rie Oktoba eo ļo̧k, iaar ilo̧k n̄an Pakistan, ilo juon ijjitōn̄ im, ke kar pād ijōņ, kar kweilo̧k ippān Rikwojarjar ro rekabwilōn̄lōn̄ im kijejeto ilo laļ jab eņ. Raar iiet ilo bōnbōn bōtaab ļap ilo jetōb. Ejjab to ālkin ro̧o̧l n̄an kapijuknen, iaar bōk naan kein jān Brother Shakeel Arshad, juon membōr jitōnbōro iaar ioone ilo loļo̧k in aō: “Kom̧m̧ool, Elder Rasband, kōn am itok n̄an Pakistan. Ikōņaan jiron̄ eok bwe kōm … membōr ro an Kabun̄ in … kōmij rie eok im iakwe eok. [Kōmij] lukkuun jide bwe kwar pād ije im kom̧ kar ron̄ jān kwe. Eaar juon raan n̄an kememej ilo mour an baam̧le eo aō bwe kōm kar ioon juon Rijilōk.”1
Ioon Rikwojarjar ro āinwōt Brother Arshad eaar juon en̄jake etōr jān jon̄an im ettā im, kōjerbal naan ko an, “juon raan n̄an kememej” n̄an n̄a barāinwōt.
Ilo Jānode, ritōl ro an Kabun̄ rōkar pād ilo juon jelm̗ae doon kadieojl̗o̗k ippān jo̗dikdik ro im ritōl ro aer im jineer im jemāer jān pel̗aakin lal̗ in. Kadiwōj ļo̧k eo eaar diwōj ļo̧k ilo Internet n̄an elōn̄ jikin ko ilo 146 laļ ko; jet jikin ko eaar wōr jarlepju ko reļļap ilo im̧ōņ jar ko, im ro jet raar ilo juon em̧ ippān juon jidikdik ej koba tok. Ilo aolepān oran, elōn̄ buki taujin raar koba tok.
Ilo ekkeijel ippān jarlepju eo am ekilep, Sister Bonnie Oscarson, būreejtōn eo eutiej an Doulul eo an Jiron̄ Ro; Brother Stephen W. Owen, būreejtōn eo eutiej an Doulul eo an Likao Ro; im n̄a—kar jipan̄ jān jo̗dikdik ro raar bōk eddo, ri al ro, im ro jet —uwaaki kajjitōk ko jān jo̗dikdik ro ad.
Jibadbad eo am eaar n̄an kwaļo̧k kadkad in unin tōl eo an Mutual n̄an 2016, “Bun̄ M̧aanļo̧k kōn Dim ilo Kraist” jān 2 Nipai 31, eoon 20 eo ej kōnono: “Kōn menin, kom̧ aikuj bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k. Kōn menin, n̄e kom̧ naaj bun̄ m̧aanļo̧k, kwōjkwōj ioon naan an Kraist, im niknik n̄an jem̧ļo̧kin, lo, āindein Jemān ej ba: Kom̧ naaj bōk mour indeeo.”2
Jān riiti elōn̄ buki kajjitōk ko an jodidkik ro ad, ta eo kōm kar katak? Kōm kar katak bwe jo̗dikdik ro ad rej iakwe Irooj, rie ritōl ro aer, im ikdeelel n̄an an kajjitōk ko aer uwaak! Kajjitōk ko rej juon kōkaļļe an juon ikdeelel eļap ļo̧k n̄an katak, n̄an kobaik m̧ool ko em̧ōj aer ilo naan in kam̧ool ko ad, im n̄an m̧aanjappopo em̧m̧an ļo̧k n̄an “Bun̄ M̧aanļo̧k kōn Dim ilo Kraist.”
Jepļaaktok eo an gospel eo eaar ijjino ippān juon jo̗dikdik, Josep Smith, kajjitōk juon kajjitōk. Elōn̄ iaan katak ko an Rilo̧mo̧o̧r eo ilo jerbal in kwaļo̧k eo An raar ijjino kōn juon kajjitōk. Keememej kajjitōk eo an n̄an Piter: “Wōn N̄a ilo ami ba? ”3 Im uwaak eo an Piter: “Kwe Ri Kraist, Nejin Anij e mour. ”4 Jej aikuj jipan̄ doon pukōt uwaak ko an Jemād Ilan̄ kōn tōl eo an Jetōb.
Ilo kadiwōjļo̧k eo, iaar ba n̄an jo̗dikdik ro:
“Ritōl ro an Kabun̄ in rejjab ruwaimejet n̄an inepata ko ami, n̄ūrbōkta ko, im apan̄ ko ami.
“Ewōr nejim ajri. Ewōr jibūm̧ ajri. Emakijkij am kweilo̧k ippān jo̗dikdik ro aolepān laļ in. Im kōmij jar kōn kom̧, kōmij kōnono kōn kom̧ ilo jikin ko rekwojarjar tata, im kōmij io̗kwe kom̧.”5
Ikōņaan kwaļo̧k juon iaan uwaak ko rellōn̄, uwaak ko rellōn̄ kōm kar būki jān m̧akūtkūt jab in.
Lisa jān Grand Prairie, Alberta, Canada kar je: “Jeļm̧ae Doon in eaar juon iien em̧m̧an. Juon kajoor n̄an naan in kam̧ool eo aō im m̧ool ko an gospel eo. Kōmij kanooj jeram̧m̧an n̄an an wōr am ritōl ro reim̧we me kar kūr n̄an jerbal ilo elōn̄ kain jon̄ak ko roktak jān doon.”6
Liz, jān Pleasant Grove, Utah, kar jej m̧o̧kta ļo̧k: “Ij kam̧oolol kōn tōmak eo aō make im iien eo em̧m̧an n̄an rejtake juon rikanaan an Anij im em̧m̧aan im kōrā ro me rej jerbal ippān.”7
Jaar rie ritōl ro rainin me raar kōn im̧we kwojarjar, kar kūr n̄an katakin im tōl kōj im ro rej kūr n̄an kōj n̄an iuwōta kōn kauwōtata ko jej iooni kajjojo raan—jān jab ļōmņak in kautiej raan in Jabōt, n̄an kamijak baam̧le eo, n̄an kakkure anemkwōj an kabun̄, im em̧ool n̄an jum̧ae revelesōn in raan-ko āliktata. Ro jeiū im jatū, jej ke ron̄jake kapilōk eo aer?
Elōn̄ alen ilo kweilo̧k ko, kweilo̧k in kwojkwoj ko, im Būraimere, jekōn al naan ko rem̧m̧an, “Tōl iō, lor iō, etetal ippa.”8 Ta meļeļe in naan ko n̄an kom̧? Wōn eo ejiktok ilo ļōmņak n̄e kom̧ij ļōmņak kaki? Em̧ōj ke ami en̄jake im̧we an ritōl ro rejim̧we, rikaļoor ro an Jisōs Kraist ro raar ilo etto im wōnm̧aanļo̧k wōt n̄an rainin un̄ur mour eo ami, ro rej etetal ilo iaļ an Irooj ippāmi? Remaron̄ in epaake kom̧ ilo ijōko jikimi. Remaron̄ in ilo jarlepju eo ijo jokwe ie ak kōnono jān jikin kōnono eo ilo kweilo̧k eo eļap. Rikaļoor rein rej kwaļo̧k ippād kōjeram̧m̧an eo an wōr juon naan in kam̧ool kōn Irooj Jisōs Kraist, ritōl eo an Kabun̄ in, ritōl eo an jetōb ko, eo ekar kallim̧ur, “kom̧in m̧ōņōņō, im jab mijak, bwe N̄a Irooj Ij pād ippemi, im naaj jutak ippemi.”9
Ij keememej Būreejtōn Thomas S. Monson an kwaļo̧k kōn bwebwenato eo ke kar karuwaineneik n̄an m̧ōn stake būreejtōn eo an n̄an kōppopo n̄an wallōn̄ ļo̧k n̄an Melkisedek Priesthood eo. Juon kōjeram̧m̧an āinjuon n̄an stake būreejtōn eo, eo eaar jab jeļā ilo tōre eo bwe eaar katakin juon ļadik in Aaronic Priesthood eo enaaj kar juon raan erom rikanaan an Anij.10
Eaar wōr make aō iien katak ko jān rikanaan eo ad ejitōnbōro, Būreejtōn Monson. Ejjeļo̧k kajjitōk ilo ļōmņak e aō ak ilo būruwō bwe e ej rikanaan eo an Irooj ioon laļ in; em̧ōj aō erom juon ribōk leen eo ettā ke eaar bōk revelesōn im jerbal ekkar n̄an e. Em̧ōj an de katakin kōj n̄an pukōt ļo̧k, n̄an kōjparok doon, n̄an lo̧mo̧o̧ren doon. Kōn menin eaar katakin ilo dān ko an Mormon. “Ikdeelel … ko “n̄an kūr kom̧ armej ro An” kar m̧ōņōņōņ in “ineek eddo ko an ro jet,” “m̧ōņōņō in jan̄ ippān ro rej jan̄,” im “n̄an jutak āinwōt rikam̧ool ro an Anij.”11
Ij jutak rainin āinwōt juon rikam̧ool an Anij Jemen Indeeo im Nejin, Jisōs Kraist. Ijeļā ad Rilo̧mo̧o̧r ej mour im ej iakwe kōj im ej tōl ro Rikarejeran, kwe im n̄a, n̄an kakūrm̧ool jibadbad ko An rekajoor ioon laļ in.12
Ilo ad bun̄ m̧aan ļo̧k, kāļet n̄an ļoor tōl ko im kakkōl ko jān ritōl ro ad, jej kālet n̄an ļoor Irooj ilo an laļ in etal jelmen doon. Jej kālet n̄an jirok likatōttōt n̄an aen in dāpdep eo, n̄an erom Armej ro Rekwojarjar ilo Raan-ko Āliktata, n̄an pād ilo jerbal eo an Irooj, im n̄an kakūrm̧ool “kōn eļap otem ļap lan̄lōn̄.”13
Kajjitōk eo eļap an rainin ej alikkar: ko̧mij ke jutak ippān ritōl ro an Kabun̄ in ilo juon laļ eo emarok bwe jān maron̄ kajedeed Meram eo an Kraist?
Kadkad ko ippān ritōl ro rekanooj in aorōk im ļap. Jekdo̧o̧ņ ewi rūttoier, ewi jon̄an aer epaak ak ettoļo̧k, ak n̄e remaron̄ kar un̄ur mour ko ami, kareel eo aer ekwaļo̧k naan ko an rijeje poem in Amedka eo Edwin Markham, eo ekar ba:
Ewōr juon mejān kajjik me ekōm̧m̧an bwe jān jem̗jān jem̗jati:
[Ejjeļo̧k juon] ej ilo̧k ilo iaļ eo an make:
Aolep men jej r jilkinļo̧k j n̄an mour ko an ro jet.
Rej ro̗o̗ltok n̄an mour kein ad.14
Shakeel Arshad, eo m̧ōtta ilo Pakistan, kar kwaļo̧k rie eo an n̄an n̄a, eo jem̗jān jem̗jatin im m̧ōttan. Barāinwōt elōn̄ iaami. N̄e jej pukōt ļo̧k n̄an kotak doon, jej kam̧ooli naan kein rekajoor: “[Ejjeļo̧k juon] ej ilo̧k ilo iaļ eo an make.”
Eo eļap tata iaan aolep, jej aikuji ad Rilo̧mo̧o̧r, ad Irooj, Jisōs Kraist. Juon iaan bwebwenato ko jān jeje ko rekwojarjar me eaar iien otemjej ļujir eō ilo jetōb ej ke Jisōs Kraist eaar etetal ioon dān n̄an ioon rikaļoor ro An ro raar jerak ilo juon wa ilo Lom̧aļo in Galilee. Rein raar ritōl ro rekar kāāl kar kūr er āinwōt elōn̄ iaam ijin im̧aan rainin. Bwebwenato eo ļo̧o̧ke ilo Matu:
“A kiiō wa eo ej ilukwōn lom̧aļo, im jeplōklōk kōn ņo [eo] ko, bwe kōto ej itok im̧aan.
“Im ilo iien watch kein ka emān ilo bon̄, Jisōs ej ito n̄an ippaer, im etal ioon lo̧jet.
“Im ke rū kaļoran rej lo An etal ioon lo̧jet, rej abwinmake … im rej lam̧ōj bwe rej mijak.
“A em̧ōkaj an Jisōs kōnono n̄an er im ba, Kom̧win peran; N̄a E; kom̧win jab abwinmake.”15
Piter eaar ron̄ kūr eo eaiboojoj an kōketak jān Irooj eo.
“Im Piter e uwaak E im ba, Irooj, eļan̄n̄e Kwe ņe, Kwōn jiron̄ eō bwe in iwōj n̄an Ippam̧ ioon lo̧jet.
“Im [Jisōs] eba, Kwōn itok.”16
Ekanooj in kōperan. Piter eaar juon rieo̗n̄ōd, im eaar jeļā kōn kauwōtata ko an lo̧jet. Mekarta, eaar kallim̧ur n̄an ļoor Jisōs—bon̄ ak raan, ioon juon wa ak ioon āne em̧ōrā.
Imaron̄ pijaik ļo̧k bwe Piter eaar to itōrerein wa eo, jab kōttar n̄an kūr eo kein karuo, im jino etetal ioon dān. Ilo m̧ool, jeje ko rekwojarjar ej ba, “Ej etal ioon lo̧jet, bwe en ilo̧k n̄an Jisōs.”17 AKe kōto eo eaar kajoor ļo̧k an letlet im kajoor im ke ņo ko raar lim̧ajņoņo iturin neen, Piter eaar erom mijak, “im ej jino an tulo̧k im e lam̧ōj [ļo̧k], im ba, Irooj, Kwōn lo̧mo̧o̧ren eō.
“Im e m̧ōkaj an Jisōs erļo̧ke pein, im dāpij e.”18
Juon katak ekanooj in kajoor. Irooj eaar pād ijo n̄an e, ejja āinwōt An pād n̄an kwe im n̄an n̄a. Eaar eļļoke ļo̧k Pein im kanōk ļo̧k Piter n̄an E im n̄an lo̧mo̧o̧r.
Iaar aikuji Rilo̧mo̧o̧r eo im lo̧mo̧o̧r eo An pein ilo elōn̄ kōttan ko. Ij aikuj E kiiō eļap ļo̧k jān m̧okta, āinwōt kom̧ kajjojo. Iaar en̄jake lōke ilo iien ko ij to itōrerein wa eo, ilo kōnono, n̄an jikin ko jab jeļā kake, n̄an wōt kile bwe ijjab maron̄ kōm̧m̧ane make ļo̧k.
Āinwōt am kar kōnono kake ilo iien Jelm̧ae Doon eo, Irooj emakijkij an pukōt tok kōj kōn baam̧le ko ad im ritōl ro, kūr kōj n̄an itok n̄an E—ejja āinwōt Eaar pukōt ļo̧k n̄an lo̧mo̧o̧ren Piter.
Kom̧ barāinwōt naaj wōr iien ko rellōn̄ n̄an uwaake kūr ko remakijkij n̄an “itok n̄an Kraist.”19 Ejjab en̄in ta eo mour in ej jutak kake ke? Kūr eo emaron̄ in itok n̄an lo̧mo̧o̧ren juon uwaan baam̧le eo; itok n̄an jerbale juon mijen; itok n̄an bar ro̧o̧l tok n̄an jar; itok n̄an tampeļ eo ekwojarjar; im, āinwōt ad kar ron̄ ejjab etto jān jodikdik ro ad ilo iien Jelm̧ae Doon eo, itok, jouj jipan̄ eō uwaake kajjitōk eo aō. Ilo iien eo ejejjet, kajjojo iaad naaj ron̄jake kūr eo “Ro̧o̧ļ tok.”
Ij jar bwe jenaaj pukōt ļo̧k—pukōt ļo̧k im jibwe pein Rilo̧mo̧o̧r eo bwe Ej eļļo̧ke tok n̄an kōj, emakijkij kōn ritōl ro An reim̧we im ro uwaan baam̧le eo ad—im ron̄jake kūr eo An n̄an itok.
Ijeļā bwe Jisōs Kraist ej mour; ij iakwe E, im ijeļā kōn aolepān būruwō bwe Ej iakwe kōj kajjojo. E ej Waanjon̄o̗k eo ad eļap im ritōl eo ekwojarjar an aolep ajri ro nejin Jemed. Jān menin ij kwaļo̧k kam̧ool eo aō ekwojarjar ilo etan Jisōs Kraist, amen.