Jokālet ko
Jemaron̄ ke kālet kālet eo ejim̧we, ijjelo̧kin kālet eo ebōd.
Ro jeiū im jatū, m̧okta jān aō jino kōnono in aō rainin, ikōņaan kōjjeļļā kōn emān tampeļ ko, ilo allōn̄ kaņe rej itok im iiō kaņe, renaaj ekkal ilo jikin kein rej ellaajrak: Quito, Ecuador; Harare, Zimbabwe; Belém, Brazil; im kein karuo tampeļ ilo Lima, Peru.
Ke ikar erom juon membōr in Doulul eo an Rijilōk ro Jon̄oulruo ilo 1963, ekar wōr 12 tampeļ ko rej jerbal ilo aolepān Kabun̄ in. Jān aje eo an Provo City Center Temple ruo wiik ko rem̧ootļo̧k, ewōr kiiō 150 tampeļ ko rej jerbal ipeļaakin laļ in. Jekanooj m̧ōņōņō kōn kōjeraam̧m̧an kein jej būki ilo em̧ kein rekwojarjar.
Kiiō, ro jeiū im jatū, ikōņaan kwaļo̧k aō kam̧oolol kōn iien in em̧m̧an bwe imaron̄ kwaļo̧k jejjo aō ļōmņak ippām̧i jibbon̄ in.
Ikar ļōmņak kōn kālet ko. Emōj kar ba bwe m̧akūtkūt ko reddik remaron̄ ļap kilaer ilo bwebwenato, im mour ko an armej ro remaron̄ barāinwōt kajoorļo̧k itok wōt jān m̧akūtkūt ko reddik. Kālet ko jej kōm̧m̧ani rej kwaļo̧k tok mejān kajjik eo ad.
Ke jekar likūt mour eo m̧okta im deļo̧n̄etok mour in, jekar bōktok ippād anemkwoj in kālet eo. Kōttōbar eo ad ej n̄an bōk aiboojoj eo eutiejtata, im kālet ko jej kōm̧m̧ani renaaj, eļaptata, kwaļo̧k tok n̄e jekar ak jekar jab tōpar kōttōbar eo ad.
Enan̄in aolepem̧i im jeļā kōn Alice in Lewis Carroll’s classic novel Alice’s Adventures in Wonderland. Kom̧ naaj ememej bwe liin ej itok im ioon ruo iaļ ko im̧aan, kajjojo iaer rej kajjim̧we m̧aanļo̧k bōtaab roktak jān doon. Ke liin ej kōļmenļo̧kjeņ kōn ta eo enej kōm̧m̧ane, liin ekar jelm̧ae kuuj eo Cheshire, eo me Alice ekar kajjitōk ippān, “Ewe iaļ in ij aikuj ļoore?”
Kuuj eo ewaak im ba, “Men ņe ej pedped wōt ioon ia eo kokōņaan etal ie ļo̧k. N̄e kwojjab jeļā ia eo kwoj etal n̄an e, ejjab aorōk iaļ rot eo kwoj bōke.”1
Ejjab āinwōt Alice, jejeļā ia eo jekōņaan etal n̄an e im eaorōk iaļ ta eo jej etal ie ļo̧k, bwe iaļ eo jej ļoor e ilo mour in ej tōl ļo̧k n̄an mejān kajjik eo An ilo mour eo tok juon.
Jemaron̄ ke kālet n̄an kalōk ilo kōj make juon tōmak eļap im kajoor eo enaaj jikin ad koone ņae karōk ko an rikapo eo—juon tōmak em̧ool, ej kain tōmak eo enaaj rejtake kōj im enaaj kōkajoorļo̧k kōņaan eo ad n̄an kālet men eo ejim̧we. Eļan̄n̄e ejjeļo̧k kain tōmak in, ejjeļo̧k jikin jej etal n̄an e. Kōn tōmak, jemaron̄ kōttōbrak kōttōbar ko ad.
Men̄e ej menin ekairir bwe jen kālet ilo jejjet, ewōr iien ko me jenaaj kālet kālet ko rebōd. Menin letok in ukweļo̧k, kar letok jān Rilo̧mo̧o̧r eo ad, ej kōmaron̄ ad kajim̧we kālet ko ad, bwe jen maron̄ ro̧o̧lļo̧k n̄an iaļ eo enaaj tōl ļo̧k n̄an aiboojoj eo eutiejtata jej pukōte.
Jen kōjparok peran eo ejjab ļoor meļeļe ko rebun̄bun̄. Jen kālet kālet eo ejim̧we, ijjelo̧kin kālet eo ebōd.
Ilo ad kōļmenļo̧kjeņ kōn jokālet ko jej kōm̧m̧ani ilo mour ko ad kajjojo raan—men̄e n̄an kālet menin ak kālet ieņ—n̄e jej kālet Kraist, jenaaj kōm̧m̧ane kālet eo ejim̧we.
Bwe menin en āindein ej jar eo aō ilo bōro im ettā ilo etan Jisōs Kraist, ad Irooj im Rilo̧mo̧o̧r, amen.