C. C. A. Christensen (1831–1912), O le Au Paia ua Tutuliesea mai le Itumalo o Siakisone, Misuri, c. 1878, ata vave mago i luga o le ie musilini, 77 ¼ × 113 inisi. Falemataaga o Faatufugaga a le Iunivesite o Polika Iaga, meaalofa a le fanau a fanau a C.C.A. Christensen, 1970.

Setema 8–14: “Ia Filemu ma Iloa o A’u o le Atua”

Mataupu Faavae ma Feagaiga 98–101

Mo le Au Paia i le vaitaimi o le 1830, o Initipene Misuri, o le nuu moni lea o le folafolaga. O “le nofoaga tutotonu” o Siona (Mataupu Faavae ma Feagaiga 57:3)—o le aai o le Atua i le lalolagi—ma o le faapotopotoina o le Au Paia sa i ai se faatomuaga manaia i le Afio Mai Faalua. Peitai sa ese se auala sa vaai ai tuaoi i le eria ia i latou. Sa latou le fiafia i le faamatalaga e faapea, na tuuina atu e le Atua le laueleele i le Au Paia, ma latou te le’i maua ni lagona lelei i tulaga faaupufai, faaletamaoaiga, ma faaleagafesootai o le anoano o tagata mai se tapuaiga sa le’i masani ai ua vave ona siitia atu i le eria. O le le manuia na vave ona liua i sauaga ma faiga matautia. I le 1833, sa faaleagaina ai le ofisa lomitusi a le Ekalesia, ma sa faamalosia ese le Au Paia mai o latou fale.

O Iosefa Samita sa silia ma le 800 maila na mamao ese ai mai i Katelani, ma na fia vaiaso faatoa oo atu lenei tala ia te ia. Ae sa silafia e le Alii le mea na tupu, ma sa Ia faaali atu i Lana Perofeta ni mataupu faavae o le toafilemu ma faalaeiauga o le a faamafanafanaina ai le Au Paia—o mataupu faavae e mafai foi ona fesoasoani ia i tatou pe a tatou feagai ma ni sauaga, pe a le faataunuuina o tatou manaoga amiotonu, po o le, pe a tatou manaomia se faamanatu o o tatou puapuaga i aso taitasi o le a, i se isi itu, i’u lava ina, “galulue faatasi mo lo [tatou] lelei,” (Mataupu Faavae ma Feagaiga 98:3).

Tagai i le Au Paia, 1:171–93; ‟Faatalitali mo le Afioga a le Alii,” i le Revelations in Context, 196–201.

Manatu mo le Aoaoina i le Aiga ma i le Lotu

Mataupu Faavae ma Feagaiga 98:1–3, 11–14, 22; 101:1–16, 22–31, 36

O o’u tofotofoga e mafai ona galulue faatasi mo lo’u lelei.

O nisi o o tatou lu’itau i le olaga e mafua mai ona o a tatou lava filifiliga. O isi e mafua mai i filifiliga a isi. Ma o nisi taimi e tutupu lava mea o ni vaega o le olaga faaletino. Po o le a lava le mafuaaga, e mafai ona fesoasoani faigata e faataunuu faamoemoega paia a o tatou liliu atu i le Atua.

Sa moni lenei mea mo le Au Paia i Misuri i le 1833, ma e moni mo i tatou i aso nei. A o e faitau i mea na ta’u atu e le Alii i le Au Paia i le Mataupu Faavae ma Feagaiga 98 ma le 101, mafaufau loloto pe faapefea ona faatatau Lana sāvali i tofotofoga po o faigata eseese atonu o loo ia te oe. O nisi nei o fesili ma punaoa e fesoasoani ia te oe.

Afai o se tofotofoga o se taunuuga o le:

• Filifiliga faaletagata lava ia: O a fautuaga—ma folafolaga—e te maua i le Mataupu Faavae ma Feagaiga 98:11–12; 101:1–9? O a ni mea tatou te aoao mai i nei fuaiupu e faatatau i le Tama Faalelagi ma Iesu Keriso? O le a sou manatu o le a le mea atonu e finagalo le Atua e te faia?

• O filifiliga a isi: O le a le faamafanafanaga e te maua i le Mataupu Faavae ma Feagaiga 98:1–3, 22; 101:10–16, 22? O le a le auala o loo finagalo le Alii ina ia tatou taulimaina ai ia sauāga, faasaunoa, po o le faamisa? (Tagai i le Life Help, ‟Abuse,” Gospel Library; Autu ma Fesili, ‟Sauaga Faatautala,” Gospel Library.) O a mea ua aoao mai e nei fuaiupu i le ala tatou te tuu atu ai lo tatou faalagolago i le Alii?

• O faigata o le olaga nei: O le a se vaaiga ua e maua mai le Mataupu Faavae ma Feagaiga 98:1–3; 101:22–31, 36? O a ni mea ua e aoaoina mai i ou puapuaga? O le a sau mea o fai e valaaulia ai le fesoasoani a le Atua? O faapefea ona Ia fesoasoani ia te oe?

Ina ia aoao atili e uiga i le ala e mafai ai e le Atua ona faia “mea uma sa outou puapuagatia ai … galulue faatasi mo lo outou lelei” (Mataupu Faavae ma Feagaiga 98:3), mafaufau e suesue le savali a Elder Anthony D. Perkins “Ia Manatua Lau Au Paia Mafatia, Lo Matou Atua e” (Liahona, Nov. 2021, 103–5). E mafai ona e vaavaai mo se fuaitau i lana sāvali e fesoasoani ia te oe e malamalama ai pe faapefea ona valaaulia oe e le Faaola e vaai i ou luitau. O a ni auala na galulue faatasi ai ou tofotofoga mo lou lelei po o le faataunuuina o faamoemoega o le Atua?

Tagai foi i le Roma 8:28; 2 Nifae 2:2; Mataupu Faavae ma Feagaiga 90:24; D. Todd Christofferson, “O Mai i Siona,” Liahona, Nov. 2008, 37–40; “Trial of Adversity,” “Feeling the Lord’s Love and Goodness in Trials,” “The Refiner’s Fire” (vitio), ChurchofJesusChrist.org.

Trial of Adversity

Katie, who was paralyzed in an auto accident, shares how she exercises her faith to embrace her new life.

Feeling the Lord's Love and Goodness in Trials

When Darlyn learned of her illness, she feared she would not see her children grow up. But through her trial, she felt the Lord’s love and immense goodness. How does He comfort you in times of trial?

The Refiner's Fire

The refiner’s fire is not a comfortable place to be. It involves intense heat and repeated hammering. But it is in the refiner’s fire we are purified and prepared to meet God.

Mataupu Faavae ma Feagaiga 98:23-48

E finagalo le Alii ina ia ou sailia le filemu i Lana ala.

Na aoao mai Peresitene Russell M. Nelson: “O soo o Iesu Keriso e tatau ona faia le faataitaiga mo tagata uma i le lalolagi e mulimuli ai. Ou te aioi atu ia te outou ia faia mea uma tou te mafaia e faamuta ai feteenaiga faaletagata lava ia o loo sasao i o outou loto ma i o outou olaga” (‟O Le Mana o le Malosiaga Faaleagaga,” Liahona, Me 2022, 97).

E ui e le o mea uma i le Mataupu Faavae ma Feagaiga 98:23–48 o le a faatatau i au fegalegaleaiga patino ma isi, o a mataupu faavae e te maua e mafai ona taiala ai oe e faamuta ai feteenaiga faaletagata i lou olaga? E mafai ona maua nisi upumoni faaopoopo i se pese e uiga i le filemu po o le faamagalo atu, e pei o le “Tatou te Iloa Mea Tonu” (Viiga, nu. 172).

Faamatalaga mai le Keriso ma le Taulealea Mauoa, saunia e Heinrich Hofmann

Mataupu Faavae ma Feagaiga 99–100

E tausia e le Alii i latou o e auauna ia te Ia.

O faaaliga i vaega 99 ma le 100 na tuuina mai i tagata o e sa i ai tiutetauave taua o le Ekalesia ae sa popole foi e uiga i o latou aiga. O a ni mea ua e maua i nei faaaliga e mafai ona fesoasoani ia i latou? O le a se sāvali a le Alii mo oe o loo i ai i nei faaaliga?

Tagai foi i le ‟John Murdock’s Missions to Missouri” i le ‟I Quit Other Business’: Early Missionaries” ma le ‟A Mission to Canada,” i le Revelations in Context, 87–89, 202–7.

Mataupu Faavae ma Feagaiga 101:43–65

O le mulimuli i fautuaga a le Atua e fesoasoani ou te saogalemu ai.

O le faataoto i le Mataupu Faavae ma Feagaiga 101:43–62 e faamalamalama mai ai le pogai na faatagaina ai e le Alii le Au Paia ina ia tutuliese i fafo o Siona. A o e faitauina nei fuaiupu, o e vaaia ni mea e tutusa ai oe lava ma auauna o loo i le faataoto? E mafai faapefea ona e faaali atu i le Atua o loo e “loto ia taitaiina i se ala saʼo ma tatau ai mo [lo’u] faaolataga”? (tagai i fuaiupu 63–65).

Faatino tala po o faataoto. O nisi taimi e faigofie atu ona aoao mai ma fesootai i tala ma faataoto i tusitusiga paia pe a tatou tuu i tatou lava i le tulaga o tagata o loo latou faamatalaina. Afai o loo e aoaoina atu le Mataupu Faavae ma Feagaiga 101:43–62, e mafai ona e valaaulia tagata aoao e faatino mai le faataoto a o faitauina leotele e se tasi. O a ni malamalamaga ua e maua mai i le faatinoina o upu?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Ioane Murdock

• Fale o John ma Elsa Johnson

• O Tetee i le Uluai Ekalesia

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 98:1–3

E mafai e Iesu Keriso ona liliu o’u tofotofoga i faamanuiaga.

• E mafai ona e amataina se talanoaga e ala i le fesili atu i lau fanau e uiga i nisi o luitau o loo feagai ma tamaiti o o latou vaitausaga. Ona mafai lea ona outou faitau faatasi le Mataupu Faavae ma Feagaiga 98:1–3 ma talanoa e uiga i le ala e mafai ai e Iesu Keriso ona liliu ia tofotofoga i faamanuiaga. E mafai ona e faasoa atu i lau fanau ni faataitaiga o le ala na Ia liliuina ai ou tofotofoga i faamanuiaga.

Mataupu Faavae ma Feagaiga 98:39–40

E fesoasoani le Faaola ia te a’u e faamagalo atu.

Ia manatua: A’o e aoaoina lau fanau i le taua o le faamagalo atu, ia mautinoa ua latou malamalama foi pe afai e faatiga se tasi ia i latou, e tatau ona latou ta’uina i se tagata matua latou te talitonuina.

• Omataupu 34 ma le 35 i le Tala o le Mataupu Faavae ma Feagaiga (128–34) e mafai ona fesoasoani ia te oe e aoao atu ai e uiga i le ala na taulimaina ai le Au Paia i Misuri i le 1833. E mafai e oe ma lau fanau ona talanoa e uiga i lagona atonu na oo i nei Au Paia. Ona mafai lea ona outou faitauina faatasi le Mataupu Faavae ma Feagaiga 98:23, 39–40 e saili ai po o le a le mea na finagalo le Alii latou te faia. E mafai e oe ma lau fanau ona talanoa e uiga i taimi e manaomia ai ona e faamagalo atu i se tasi ma pe na faapefea ona fesoasoani le Faaola ia te oe.

• E mafai foi ona e faaali atu i lau fanau ni ata o se foliga fiafia ma se foliga faanoanoa. Talanoa e uiga i tulaga e agaleaga ai se tasi, ma fautua atu ni auala e tali atu ai. Fesoasoani i lau fanau e filifili pe o tali taitasi o le a latou maua ai le fiafia po o le faanoanoa e ala i le faasino atu i foliga talafeagai. Aisea e finagalo ai le Alii ia tatou faamagalo i tagata, e oo foi ia i latou e le lelei mai ia i tatou?

Chapter 34: God Warns the People of Zion: July–August 1833

Chapter 35: The Saints Leave Jackson County, Missouri: September–December 1833

Mataupu Faavae ma Feagaiga 101:16, 23–32

E mafai e Iesu Keriso ona aumaia ia te a’u le filemu.

• Pe a uma ona faitauina le Mataupu Faavae ma Feagaiga 101:16, fesoasoani i lau fanau ia iloa lagona o le filemu e oo mai pe a tatou fifilemu ma mafaufau ia Iesu—mo se faataitaiga, pe a tatou tatalo pe fetagofi i le faamanatuga. E mafai ona outou usuina faatasi se pese e faatatau i le migao, e pei o le “Ia Migao, Filemu” po o le “To Think about Jesus” (Tusipese a Tamaiti, 11, 71). E mafai faapefea ona tatou lagonaina Lona filemu i o tatou aiga?

• Atonu e fiafia lau fanau e aoao e uiga i le tulaga o le a i ai le olaga pe a toe afio mai Iesu Keriso. Faitau faatasi le Mataupu Faavae ma Feagaiga 101:23–32 , ma talanoa e uiga i mea latou te maua i nei fuaiupu o le a aumaia ia i tatou le olioli pe a afio mai o Ia. Aisea e taua ai le iloa e uiga i nei mea pe a tatou feagai ai ma se taimi faigata?

O le a aumaia e Iesu Keriso le filemu ma le olioli pe a toe afio mai o Ia.

Mo nisi manatu, tagai i le lomiga o lenei masina o le mekasini o le Uo .

Susunuina o Misuri, saunia e Glen S. Hopkinson